Naq'oqmiq Luldeq'ae Boasi vae mulzaeq biq lye gee biq
3
Luldeq e ssuqmae, Naq'oqmiq Luldeq'ae gee biq: "Yaeqmiq o, ngael haelmillyekaol eiq noq'ae ssuqhaoq haelmeeqlye qiq haoq bael saelpopuq hhei laeqngeel, noq'ae ssuqhaoq haelmeeqlye bi caqzaq maoq maeqngeel maeq? 2 Nol duqlye yoqhhaeq e yaqhacheqzaq e haeqmiyaeqhael nyegael qiqgael baelzhol e Boasi tyutaeq, aedeeteel e paeqyaeq maeqngeel maeq? Yoqhhaeq yaeqmil diq'onglluldye vae dalmeq bo'qyel maoqlye hhae. 3 Nol aeqhhaol ciq hhei, kaol aelhongq dumpael hhei, nulsael lael aeqmyel mael soda hhei, kaol diq'onglluldye vae gaeyil. Ngeelfeiq, yultaeq maeq zaeq byel maeq dol byel fu, noq yaol yoqhhaeq lye haeq bi fuduzaq hhei. 4 Yoqhhaeq ssuqza ga hhei fu doqkeel, nol yoqhhaeq haeqvaehael'ae ssuqza hhae lye loq maoqhhae, do'li kaol yoqhhaeq e aeqkeel mael'ae cheelkaeq deelhhei mael cheelpong hhei, kaol tyuqvae ssuqza ga hhei. Tyutaeq noq'ae haelmillye zongl lye gee laeq'ae." 5 Luldeq yoqhhaeq'ae gee biq: "Nol haelmillye gee laol, ngael haelmillye zongl hhaeq."Mqkiq Luldeq qiq hhaeq myel diq'onglluldye vae Boasi'ae saelpo yil
6 Tyulkaol, yoqhhaeq diq'onglluldye vae gaeyil vae, ssuqmae haelmillye gee biq laol yoqhhaeq haelmillye zongl hhae. 7 Boasi zaeq byel dol byel laol, neemae zhee zholsael biq, yil kaol meqziq gongq deelhhei myel e dongqpyeq'ae ssuqza ga hhei. Luldeq hoqhhaq hoqhhaq myel lael'ae, kaol Boasi aeqkeel mael'ae cheelkaeq deelhhei mael, cheelpong hheikaol aeqkeel mael bi mol du'lal, kaol dongqpyeq'ae ssuqza ga hhei. 8 Sul'ongl keellael laol, Boasi dilnyuq lael, zipu lal laol haeqmiyaeq qiq hhaeq yoqhhaeq e aeqkeel dongqpyeq'ae ssuqza deelhhei mol hhei biq. 9 Kaol gee: "Nol aeqsul lilmaeq?" Yoqhhaeq geehoq biq: "Ngael noq e yaqhacheqzaq e haeqmiyaeq Luldeq lil. Nol laoq ngaeq e zaeqdye halngeiq suq duhoq e laqtaq za e paeqyaeq qiq hhaeq'ae, kaol noq e yaqhacheqzaq e haeqmiyaeq vae noq e aelhongq hongqdongq maellye cheelkaeq hhei laeq." 10 Boasi gee: "Ngaeq e yaeqmiq o, Yeheqhuaq noq'ae geeqlongq biq biq lye nyuqlil. Dyuqbaq zacongl maq zacongl e aqha yobohael'ae, nol qiq hhaeq vae eiq maeq cho'lyeqzaeq'ae, kaol noq e yaeqmeel e neemae mael laefuq taq'ae hhael meeq'ae. 11 Ngaeq e yaeqmiq o, yaeqmeel nol maq gu kael, nol haelgee hael ngael haelmillyekaol eiq zongl yil hhaeq. Saeqvae milcaeq cholyaeqhael nol laoq cholyaeq zhee mul kiq e haeqmiyaeq'ae lye loq'ae. 12 Maq ba, ngael laoq noq e zaeqdye halngeiq suq duhoq e laqtaq za e paeqyaeq lil, alngeiqmyel wae, suq duhoq e laqtaq za e paeqyaeq qiq hhaeq zhol wae siq, xitaeq ngaeq taq'ae hhael niq'ae. 13 Nol yaeqmil saeqvae haq aeqmeel, naeshoq mqshoq yoqhhaeq noq yaol suq duhoq hhaeq lye kaollaoq, yoqhhaeq suq duhoq biq oq; yoqhhaeq noq yaol maeq suq duhoq kaollaoq, ngael haeqfu eiq dyeqdeel e Yeheqhuaq'ae tyuq deelhhei kaol faqsilkei peq lil, ngael haelmillyekaol eiq noq yaol suq duhoq laqngeel. Nol mqbaebae lael fu'ae ssuqza keel aeqmeel."
14 Luldeq mqshoq keellye Boasi aeqkeel dongqpyeq'ae ssuqza hhae. Luldeq baezulbaegeq fu, cholyaeqhael qiqhhaeq qiqhhaeq'ae maeq fu'loq ongl fu ae'lye tullael. Boasi gee gol: "Cholyaeqhael'ae diq'onglluldye vae haeqmiyaeq lael gol'ae lye maeq bi loq hhaeq'ae." 15 Boasi gee: "Noq e aelhongq poljye mael heil laeq kaol beiqhoq hhei." Kaol yoqhhaeq beiqhoq hhei vae, Boasi lye dalmeq koq pu kuq hhei biq, kaol yoqhhaeq e baqtaq mael'ae baqda hhei biq. Luldeq milmae heeqmyel vae hoqli vae.
Luldeq silqinqhael Naq'oqmiq'ae geedu biq
16 Luldeq yoqhhaeq e ssuqmae zael'ae keelli, ssuqmae naelhaeq biq: "Ngaeq e yaeqmiq o, haelmillye maeq?" Luldeq yultaeq haelmillye zongl laeq hhae lye mael, gilzuqmyel yoqhhaeq e ssuqmae vae geedu biq. 17 Luldeq gee: "Dalmeq xihael yoqhhaeq lye ngaeq'ae koq pu kuq hhei laeq mael, ngaeq'ae gee laeq: 'Aqlaq alngeiqmyel noq e ssuqmae'ae haeq mol hoqli.'" 18 Naq'oqmiq gee: "Ngaeq e yaeqmiq o, nol neemaegil lye doq deelhhei, nol silqinq xilmael haelmillye peqyil hhei maeq lye chifu. Tyutaeq yaeqnao haelzongl maoqlye silqinq mael maeq zonglmeeq kaollaoq, hhaeqnaeq maeq naeq wae."