Fu'loq yil e cholyaeq yaol Ye'lilge vae moqheilheil du hhei
2
Nenl e yaqyo Yoshuyal lye Shiqtinq vae lye ochoq'ae maeq biq loq myel fu'loq yil e cholyaeq niq nulhhaeq yaol moqheilheil du hhei, kaol yoqhhaeteel'ae gee biq: "Noteel tyuqvae milcaeq'ae kaol Ye'lilge vae haoqchifu yil gil." Tyulkaol, tyu niq nulhhaeq yil vae, kaol Laheq lye gul biq e jilnyuq qiq hhaeq toq'ae keellael, kaol tyuqvae haq hhae. 2 Cholyaeq lye Ye'lilge e zongmae'ae geegaeq hhei biq: "Aeqyae'lye kei maoqhhae, yaeqmil Yiqsellyel cholyaeq saeqvae lael, kaol milcaeq xilmael'ae haoqchifu lael hhae." 3 Ye'lilge e zongmae lye cholyaeq yaol Laheq e tyuqvae moqheilheil du hhei, gee: "Nol noq e saeqvae lael, kaol notoq'ae do'lal e cholyaeq yaol sheeq duyi, yoqhhaeteel lael mael laoq aedeeteel e halza milcaeq mael'ae haoqchifu maoqlye kaol'ae." 4 Ngeelfeiq, haeqmiyaeq tyutaeq lye tyu niq nulhhaeq yaol sheeqhhaq vae, gee: "Cholyaeq tyu niq nulhhaeq aeqdilmyel ngaeq e saeqvae keellael gol'ae, ngeelfeiq, yoqhhaeteel haeqvae lye lael hhae lye ngael maeq loq yae. 5 Mqkiqkiq gayi, kaol milmae heeqmyel e oheiq mael piqtyeq maoqlye fu, yoqhhaeteel duyil vae. Yoqhhaeteel haeqvae yil hhae lye ngael maeq loq yae. Noteel nae'nae lyeq yil laol yoqhhaeteel yaol lyeqmil hhei ongl'ae." 6 Qiqshiq laoq, haeqmiyaeq xitaeq lye yoqhhae niq nulhhaeq yaol laoqhaol ziltaq'ae sheeq da'li biq hhae, kaol yoqhhaeteel yaol yoqhhaeq lye ziltaq vae dolza'lye baq deelhhei e ziq e aelkongq onglci vae sheeqhhaq biq hhae. 7 Cholyaeq tyuhael laoq yoqhhaeteel'ae Yoqdanl Lolbaeq'ae yil e gaelmae ae'lye lyeq mael guqheiq'ae keellye lyeq keelyil vae. Yoqhhaeteel'ae lyeq e cholyaeqhael zhoq duyil laol, milmae heeqmyel e oheiq mael piqtyeq vae.8 Tyu niq nulhhaeq maq ssuqza ga hhei siq laefuq'ae, haeqmiyaeq ziltaq vae da'li, kaol yoqhhaeteel e tyuqvae keelli, 9 Kaol yoqhhaeteel'ae gee biq: "Ngael laoq Yeheqhuaq lye saeqvae e milcaeq mael noteel'ae biq hhei biq wae lye loq lil, kaol ngaeteel noteel'ae gu laq hhae. Saeqvae milcaeq vae zhol e gilzuqmyel cholyaeqhael noteel e yiqsi'ae saeqzuq gu zuq aeqmyel gu biq hhae. 10 Ngaeteel laoq noteel Aijiq ae'lye duyi fu, Yeheqhuaq haelmillye noteel e yiqsi ae'lye Hongqhaiq e eelcuq mael bi gee yil, kaol noteel lye Yoqdanl Lolbaeq neeldu aelheiq e Yalmoqlil e zongmae niq nulhhaeq, Xihongq kaol El'ae haelmillye zongl biq, kaol yoqhhaeteel yaol gilzuqmyel zonglmye biq vae lye gaeq hhei gil laeq kaol'ae. 11 Ngaeteel'ae zhoq gaeq hhei gil laeq laol, neemae onglci'ae zhee gu gil laq hhae, kaol haetaeq eiq noteel gae'lye neemae bozaeq mael buyil biq vae. Noteel e Momil Yeheqhuaq laoq holtaq e mqmae kaol holhhaq e milcaeq mael guanq e Momil'ae. 12 Yaeqmeel ngael noteel'ae meeq biq vae laol, Yeheqhuaq'ae tyuq deelhhei kaol ngaeq'ae faqsilkei laeq, noteel eiq ngaedae toq'ae meeq biq maoqhhae lye geezaeq lil. Noteel ngaeq'ae xiangxinl hhaeq kael e zenljul qiq mal heil hhei laeq, 13 Kaol ngaeq e aeqdae aeqmae, algo aeqnil, aelbae aeqnilhael'ae, kaol yoqhhaeteel hhae lye hael laoq bi dyeqdeel laeq maoqhhae, kaol ngaeteel e aeqyil mael sil myel vae lye jiul duyi laq." 14 Tyu niq nulhhaeq yoqhhaeq'ae gee biq: "Ngaeteel laoq ngaeteel e aeqyil maellye noteel e vuqtu mael sil kaol'eiq hhaeq lil. Noteel ngaeteel e silqinq xilmael maeq geedu yil kaollaoq, Yeheqhuaq lye milcaeq xilmael ngaeteel'ae biq hhei laq fu, ngaeteel neemae maeqpaelmyel gaeq kaol zaqgiq maqgiq maellye noteel'ae za laeqngeel."
15 Tyulkaol, haeqmiyaeq tyutaeq alca maellye cholyaeq tyu niq nulhhaeq yaol maekael gonglbyu ae'lye pyeqgae hhei biq, yoqhhaeq e laoqhaol mael milmae heeqmyel e congqciq myeqzaeq taq vae za hhae, yoqhhaeq eiq milmae heeqmyel e congqciq taq'ae zhol kaol'ae. 16 Yoqhhaeq yoqhhaeteel'ae gee biq: "Noteel geeqzhoq vae laefuq qiqlaq yil, aeqgael lyeq e cholyaeqhael noteel'ae deelpuqlael maeqhe, kaol tyuqvae suq nao hoqhhaq maoqhhae, kaol noteel'ae lyeq e cholyaeqhael hoqlal fu'ae doqkeel, kaol noteel aeqyoyoq e gaelmae vae caiq hhae deel hhae." 17-18 Cholyaeq tyu niq nulhhaeq yoqhhaeq'ae gee biq: "Naelhaeq, ngaeteel saeqvae milcaeq vae keellael fu, nol nyelna'na alca xilmael, ngaeteel yaol pyeqgae hhei laeq e maekael gonglbyu vae kaltoq deelhhei; noq e aeqdae aeqmae, algo aeqnilhael kaol nodae toq e qiqhaoq qiqjyel myel notoq vae gul'eeq deelhhei maoqhhae. Xilnye maeq zongl kaollaoq, nol ngaeteel'ae faqsil bi kei laeq mael, ngaeteel vae maeq guanqyo wae. 19 Notoq oheiq ae'lye deelsae hheikaol gaiziq vae yil laol, yoqhhaeq e siq mael aeqyoyoq e vuqduq taq'ae suanl da hhei biq, ngaeteel'ae maeq guanqyo wae; notoq vae haelzholhael, cholyaeq aqlaq maellye yoqhhaeq'ae hail biq kaollaoq, yoqhhaeq e siq mael ngaeteel e vuqduq taq'ae suanl da hhei aeqmeel. 20 Nol ngaeteel zongl e silqinq xilmael geedu yil kaollaoq, nol ngaeteel'ae faqsil bi kei laeq mael, ngaeteel'ae maeq guanqyo wae." 21 Haeqmiyaeq tyutaeq gee: "Noteel gee e saeziq laoqmyel zongl aeqmeel!" Tyulkaol, yoqhhaeq lye yoqhhaeteel yaol sheeqsaehoq biq vae, kaol nyelna'na alca mael maekael gonglbyu vae kaltoq da hhei vae. 22 Tyu niq nulhhaeq deelsae vae, kaol geeqzhoq vae da'li, kaol tyuqvae suq nao songl vae, kaol lyeq e cholyaeqhael hoqyil fu keellye doqkeel vae. Lyeq e cholyaeqhael gaelmae qiq keel qiq lo myel saelpo feiq, maeq saelpopuq hhei ongl biq'ae. 23 Tyu niq nulhhaeq hoqlal vae, kaol geeqzhoq ae'lye gaeyi, kaol lolbaeq vae guq yil, kaol Nenl e yaqyo Yoshuyal e tyuqvae keellael vae, kaol yoqhhaeteel'ae hael puqli biq e silqinqhael gilzuqmyel yoqhhaeq'ae geedu hhei biq. 24 Yoqhhaeteel Yoshuyal'ae gee biq: "Yeheqhuaq aeqdilmyel tyuqvae halza milcaeq mael, aedeeteel e aqlaq'ae heilmoq hhei laeq wae, kaol tyuqvae milcaeq vae zhol e gilzuqmyel cholyaeqhael aedeeteel e yiqsiboq'ae saeqzuq gu zuq biq aeqwae."