Yiqsellyel cholyaeqhael Yoqdanl Lolbaeq'ae guq yil
3
Yoshuyal naqlye tullael, kaol Yiqsellyel cholyaeqhael nyegael qiqgael deelsae hheikaol deel vae, kaol Shiqtinq ae'lye deelsae hhei, kaol Yoqdanl Lolbaeq vae keellael, lolbaeq maeq guq yil laefuq'ae tyuqvae haq hhae. 2 Suq nao gol hhei'laol, zhiqmoq yoheeqhael haqhhael diqkaeq hhei e milcaeq vae deeldyu byel hhei, 3 Kaol cholyaeqhael'ae moqheilheil biq, gee: "Noteel Lilveil toq e jilsihael noteel e Momil Yeheqhuaq e yoqguil mael baq e mol hhei fu, noteel laoq tullael kaol zhol e milcaeq ae'lye deelsae hheikaol deel, kaol yoqguil mael'ae cho'lyeq deelhhei aeqmyel deel maoqhhae, 4 Xilnye laol, noteel deel maoq e gaelmae hhae loq wae, gaelmae xi qiq keel laoq noteel qiqzael eiq maeq deel gol kaol'ae. Noteel laoq yoqguil mael'ae yil gong'liq kaeq maoqhhae, yoqguil mael'ae maeq hhae deel niqli'ae." 5 Yoshuyal cholyaeqhael'ae moqheilheil biq, gee: "Noteel aeqyoyoq yaol zonglqyel du hheikaol senljyeq wae lye geiq maoqhhae, naeshoq Yeheqhuaq noteel onglci vae shenqjiq zongldu hhei maoqlye kaol'ae." 6 Yoshuyal jilsihael'ae gee biq: "Noteel yoqguil mael baqqei hhei, kaol cholyaeqhael e laefuq ae'lye deelpol duyil maoqhhae." Tyulkaol, yoqhhaeteel yoqguil mael baqqei hhei, kaol cholyaeqhael e laefuq'ae deel hhae.7 Yeheqhuaq Yoshuyal'ae gee biq: "Yaeqnao ae'lye laol, ngael noq yaol Yiqsellyel cholyaeqhael e ma'ne onglci'ae yoheeq heeqmae bi peqlal maoq, kaol yoqhhaeteel'ae ngael Moxi nyegael haelmillye qiqgael baelzhol laol, noq nyegael eiq haelmillye baelzhol'ae lye bi loq maoq. 8 Nol yoqguil baq e jilsihael'ae moqheilheil biq, gee: 'Noteel Yoqdanl Lolbaeq e loljyel vae keelli fu, Yoqdanl Lolbaeq onglci vae haoqtul deelhhei maoqhhae.'" 9 Yoshuyal Yiqsellyel cholyaeqhael'ae gee biq: "Noteel deelniq laeq, kaol saeqvae lael gil, kaol noteel e Momil Yeheqhuaq e saeziq mael naelhaeq gil." 10 Yoshuyal gee: "Noteel xilmael gae'lye haeqfu eiq dyeqdeel e Momil noteel onglci vae zhol'ae lye hhae loq wae, kaol yoqhhaeq noteel e yiqsi ae'lye Ja'nanq cholyaeq, Hel cholyaeq, Xiveil cholyaeq, Biqlilxiq cholyaeq, Geqjasa cholyaeq, Yalmoqlil cholyaeq kaol Yebulsi cholyaeq yaol lyeqdu maoqlye hhae. 11 Fu hhei! Halza milcaeq e Hhaoqsongl e yoqguil mael noteel laefuq'ae gol yil maoqlye hhae, kaol Yoqdanl Lolbaeq onglci vae keellael. 12 Yaeqmeel, noteel Yiqsellyel zhipail onglci ae'lye cholyaeq qyelniq hhaeq saelpodu hhei, hae yiq gol zhipail ae'lye eiq qiq hhaeq saelpodu hhei maoqhhae. 13 Halza milcaeq e Hhaoqsongl Yeheqhuaq e yoqguil mael baq e jilsihael e aeqkeel paeqhhael mael, Yoqdanl Lolbaeq e eelcuq onglci vae zhoq nuq do hhei fu, Yoqdanl Lolbaeq vae aqtaq ae'lye mael aq'oq'ae yul gaeyi e eelcuq mael aeqdilmyel ga'qye hhei, kaol yul'eeq da hheikaol congqciq laoqmyel peqlal maoqlye hhae."
14 Cholyaeqhael tullael kaol haeqpael haelcul ae'lye deelsae hheikaol deel, kaol Yoqdanl Lolbaeq vae guq yil fu, yoqguil baq e jilsihael cholyaeqhael e laefuq'ae deel hhae. 15 Tyuqfu laoq zaelsiq heillezaq e naohaeq'ae, Yoqdanl Lolbaeq e eelcuq mael loljyel niqboq'ae naq da keellaeq wae. Yoqguil baq e cholyaeqhael Yoqdanl Lolbaeq vae keellael, yoqguil baq e jilsihael e aeqkeel mael loljyel eelcuq vae zhoq nuq do hhei'laol, 16 Aqtaq ae'lye mael aq'oq vae yul gaeyi e eelcuq tyulmael, gaelmaolsae'lye e Saqladanl dongqpyeq e Yaldang milmae heeqmyel vae zadeel vae, kaol eelcuq mael tullael kaol congqciq laoqmyel peqlal vae; Caqdeq Eeldeel lye gul e Yallaba Eeldeel Deelmae vae yul gaeyil e eelcuq mael ga'qye vae. Tyulkaol, cholyaeqhael Ye'lilge yulboq ae'lye lolbaeq guq yil vae. 17 Yiqsellyel cholyaeqhael gilzuqmyel milgee vae lye deel gol duyil fu, Yeheqhuaq e yoqguil mael baq e jilsihael Yoqdanl Lolbaeq onglci e milgee vae sseetae'lye haoqtul deelhhei hhae, goqja e cholyaeqhael gilzuqmyel Yoqdanl Lolbaeq vae deel gol du byel yil fu keellye haoqtul deelhhei hhae.