Haqlo baqtul hheikaol jilhaol geiqzaq
4
Goqja e cholyaeqhael gilzuqmyel Yoqdanl Lolbaeq vae guq yil vae, Yeheqhuaq Yoshuyal'ae gee biq: 2 "Nol cholyaeqhael onglci ae'lye cholyaeq qyelniq hhaeq saelpodu hhei, hae yiq gol zhipail ae'lye eiq qiq hhaeq saelpodu hhei maoqhhae, 3 Kaol yoqhhaeteel'ae moqheilheil biq, gee: 'Noteel saeqvae lye, jilsi e aeqkeel sseetae'lye haoqtul deelhhei e Yoqdanl Lolbaeq onglci ae'lye, haqlo qyelniq siq baq hhei, kaol qiqgael heil guq yil, kaol noteel yaeqmil haq maoqlye e milcaeq vae baqdeel hhei.'" 4 Tyulkaol, Yoshuyal laoq yoqhhaeq lye Yiqsellyel cholyaeqhael onglci ae'lye saelpodu hhei e cholyaeq qyelniq hhaeq yaol gul'eeq laeq, hae yiq gol zhipail vae lye eiq qiq hhaeq'ae. 5 Yoshuyal yoqhhaeteel'ae gee biq: "Noteel guq yil, kaol Yoqdanl Lolbaeq onglci'ae keellael, kaol noteel e Momil Yeheqhuaq e yoqguil laefuq'ae, Yiqsellyel zhipail e sulmuq laoqmyel, hae yiq gol zhipail eiq haqlo qiq siq baq hheikaol baqtaq'ae baqda hhei maoqhhae. 6 Xilnye laol, haqlo xihael noteel onglci'ae jilhaol peqlal maoqlye hhae. Naeshoq aeqnao'ae, noteel e yuqpaeq yuqnyul noteel'ae 'haqlo xihael noteel'ae aeqchee yilsi za laq hhaemaeq' lye naelhaeq laol, 7 Noteel yoqhhaeteel'ae xilnye gee biq: 'Xilmael laoq, Yoqdanl Lolbaeq e eelcuq mael Yeheqhuaq e yoqguil yiqsi'ae ga'qye hhei kaol'ae; yoqguil mael Yoqdanl Lolbaeq vae guq yil fu, Yoqdanl Lolbaeq e eelcuq mael ga'qye vae. Haqlo xihael haeqfu keellye Yiqsellyel cholyaeqhael yaol silqinq xilmael bi nyuq tullaeq e jilhaol geiq maoqlye hhae.'"8 Yiqsellyel cholyaeqhael Yoshuyal moqheilheil laoqmyel zongl vae. Yoqhhaeteel laoq Yiqsellyel zhipail e sulmuq laoqmyel, Yoqdanl Lolbaeq onglci ae'lye haqlo qyelniq siq baq hhei vae, xilmael laoq, Yeheqhuaq Yoshuyal'ae moqheilheil biq laoqmyel hhae. Yoqhhaeteel haqlo mael heil guq yil, kaol yoqhhaeteel haq e milcaeq vae keellael laol tyuqvae baqdeel hhei. 9 Yoshuyal lye baeqjyelboq e haqlo qyelniq siq mael, Yoqdanl Lolbaeq e onglci'ae, yoqguil baq e jilsihael e aeqkeel haoqtul deelhhei myel vae baqtul deelhhei; yaeqnao keellye, haqlo mael tyuqvae za wae siq. 10 Yeheqhuaq Yoshuyal'ae cholyaeqhael vae geegaeq hhei biq lye e minllinl biq mael, gilzuqmyel zonglbyel fu keellye, yoqguil mael baq e jilsihael Yoqdanl Lolbaeq onglci'ae haoqtul deelhhei, xilmael laoq, Moxi Yoshuyal'ae moqheilheil biq saeziqhael laoqmyel hhae.
Tyulkaol, cholyaeqhael nae'naemyel lolbaeq guq yil gil vae. 11 Haelzhol cholyaeqhael lolbaeq guq yil hhei aeqnaol, Yeheqhuaq e yoqguil kaol jilsihael caiq guq yil hhae, kaol cholyaeqhael e laefuqboq'ae keellael. 12 Liuqbenq cholyaeq, Jadeq cholyaeq kaol Maqnaqxi zhipail e qiq pa cholyaeq, gilzuqmyel Moxi yoqhhaeteel'ae moqheilheil biq laoqmyel, daqzhangldiq moqgoq baq hheikaol Yiqsellyel cholyaeq e laefuq'ae guq yil vae. 13 Yuq tongl (40000) hhaeq laellye daqzhangldiq moqgoq baq hhei e junduil laoq, Yeheqhuaq e yiqsi ae'lye guq yil, kaol Ye'lilge e dyeongl longlmae vae keellael, kaol daqzhangldiq maoqlye paeqgaelsael meeq deelhhei. 14 Tyuqfu qiq nao, Yeheqhuaq lye Yoshuyal yaol Yiqsellyel cholyaeqhael ma'ne e yiqsi'ae yoheeq heeqmae bi peqlal vae. Yoqhhaeq e qiqyil e naohaeq'ae, cholyaeqhael yoqhhaeq'ae zun eiq zunjinl gu eiq gu biq mael, laefuq Moxi'ae zun eiq zunjinl gu eiq gu biq laoqmyel hhae.
15 Yeheqhuaq Yoshuyal'ae gee biq: 16 "Nol gailminl bongqke baq e jilsihael'ae Yoqdanl Lolbaeq ae'lye da'lal lye moqheilheil biq." 17 Kaol Yoshuyal jilsihael'ae moqheilheil biq, gee: "Noteel Yoqdanl Lolbaeq ae'lye da'lal gil." 18 Yeheqhuaq e yoqguil mael baq e jilsihael Yoqdanl Lolbaeq onglci ae'lye da'lal, jilsi e aeqkeel paeqhhael mael loljyel e milgee vae zhoq nuq da hhei'laol, Yoqdanl Lolbaeq e eelcuq mael laefuq yul myel vae yul hoqyil vae, kaol laefuq laoqmyel loljyel niqboq'ae naq da keel aeqmyel hhae. 19 Zen'yu cushiq'ae, cholyaeqhael Yoqdanl Lolbaeq ae'lye da'lal vae, kaol Ye'lilge e neeldu aelheiq boq e Jiqjaq vae haqhhael diqkaeq hhei gil'ae. 20 Yoshuyal laoq yoqhhaeteel lye Yoqdanl Lolbaeq ae'lye baq laq e haqlo tyu qyelniq siq mael, Jiqjaq vae baqtul deelhhei, 21 Kaol Yiqsellyel cholyaeqhael'ae gee biq: "Naeshoq aeqnao'ae, noteel e yuqpaeq yuqnyulhael yoqhhaeteel e aeqdae'ae 'haqlo xihael aeqchee yilsi aeqmaeq' lye naelhaeq laol, 22 Noteel noteel e yuqpaeq yuqnyulhael'ae bi loq maoqhhae, gee: "Yiqsellyel cholyaeqhael yilkaefu Yoqdanl Lolbaeq xilmael e milgee ae'lye deel gol duyil hhae.' 23 Noteel guq lael fu keellye, noteel e Momil Yeheqhuaq noteel e yiqsi vae Yoqdanl Lolbaeq e eelcuq mael bi gee yil hhei, xilmael laoq, ngaeteel guq lael fu keellye, noteel e Momil Yeheqhuaq laefuq ngaeteel e yiqsi ae'lye Hongqhaiq mael bi gee yil hhei laoqmyel hhae, 24 Kaol milcaeq taq e cholyaeqhael'ae, Yeheqhuaq e aqlaq laoq zhee onglzaeq hhae lye bi loq, kaol noteel'ae naochomyel noteel e Momil Yeheqhuaq'ae zun eiq zunjinl gu eiq gu myel biq ngeel maoqlye hhae."