5
Yoqdanl Lolbaeq e neelgae aelheiq e Yalmoqlil cholyaeq e zongmaehael'ae, kaol eeldeel deelmae'ae niqli e Ja'nanq cholyaeq e zongmaehael'ae, Yiqsellyel cholyaeqhael guq byel yil fu keellye, Yeheqhuaq lye Yiqsellyel cholyaeq e yiqsi'ae, Yoqdanl Lolbaeq e eelcuq mael bi gee yil vae lye gaeq hhei biq, kaol zongmaehael Yiqsellyel cholyaeq gae'lye saeqzuq gu zuq gil biq, kaol neemae bozaeq mael buyil biq vae.Yoshuyal cholyaeqhael'ae yeqgae gui'liq zongl gil biq
2 Tyuqfu, Yeheqhuaq Yoshuyal'ae gee biq: "Nol miqdiqdiq e haqlo maejyel zongldu hhei maoqhhae, kaol Yiqsellyel cholyaeqhael'ae yeqgae gui'liq dil'el cil zongl biq." 3 Kaol Yoshuyal miqdiqdiq e haqlo maejyel zongldu hhei vae, kaol Yeqgae Gui'liq Geeqzhoq vae lye Yiqsellyel cholyaeqhael'ae yeqgae gui'liq zongl biq vae. 4 Yoshuyal yeqgae gui'liq zongl gil biq mael laoq xilnye kaol'ae: Aijiq ae'lye duyi e cholyaeqhael, haelzhol e daqzhangldiq ongl e haqyoyaeqhael, Aijiq ae'lye duyi aeqnaol, gilzuqmyel Ja'nanq'ae yil e diqsheelleeldye e gaelmae vae lye sil vae. 5 Aijiq ae'lye duyi e cholyaeq xihael gilzuqmyel yeqgae gui'liq zongl gol vae; ngeelfeiq, Aijiq ae'lye duyi aeqnaol, Ja'nanq'ae yil e diqsheelleeldye e gaelmae vae lye dyeqlal e cholyaeq tyuhael, yeqgae gui'liq maeq zongl yo'ae. 6 Yiqsellyel cholyaeq Aijiq ae'lye duyi, goqja e daqzhangldiq ongl e cholyaeqhael gilzuqmyel myeyil fu keellye, yoqhhaeteel diqsheelleeldye vae yuqqyel hoq deel aeqwae, yoqhhaeteel Yeheqhuaq e saeziq mael maeq naelhaeq kaol'ae. Yeheqhuaq yoqhhaeteel'ae faqsilkei gol biq, aeqdilmyel yoqhhaeteel'ae Yeheqhuaq yoqhhaeteel e aeqpyuq aeqdae'ae ngaeteel'ae biq laqngeel lye faqsilkei gol biq e aeqchil kaol baq'eel du e milcaeq mael maeq bi mol'ae. 7 Yoqhhaeteel onglci'ae Yeheqhuaq lye cu heeq hhei e yoqhhaeteel e vuqtu bi geiq e yuqpaeq yuqnyulhael laoq, yeqgae gui'liq qiq hhaeq eiq maeq zongl gol'ae; yoqhhaeteel yi e gaelmae vae yeqgae gui'liq maeq zongl gol'ae, tyulkaol, Yoshuyal lye yoqhhaeteel'ae yeqgae gui'liq zongl biq vae.
8 Goqja e gilzuqmyel cholyaeqhael yeqgae gui'liq zongl vae, kaol meeqsholyil fu keellye, cholyaeqhael haqhhael diqkaeq hhei e aeqyoyoq e milcaeq'ae zhol hhae. 9 Yeheqhuaq Yoshuyal'ae gee biq: "Ngaeq lye yaeqnao Aijiq cholyaeq lye noteel'ae maduq maqza myel zonglpeq biq mael noteel e aeqhhaol taq ae'lye heilgae aeqwae." Tyulkaol, yaeqnao keellye tyuqvae milcaeq laoq Jiqjaqa lye gul hhae.
Jiqjaq vae Yuq'yeqjyeq gol
10 Yiqsellyel cholyaeqhael Jiqjaq vae haqhhael diqkaeq hhei gil'ae; zen'yu qyel'yuq nao fu e mqkiq, yoqhhaeteel Ye'lilge e dyeongl longlmae vae Yuq'yeqjyeq gol gil hhae. 11 Yuq'yeqjyeq e dil'el tian, yoqhhaeteel tyuqvae milcaeq ae'lye du'lal e zaeqzael mael zaeq vae; tyuqfu qiq nao, paofenq maqzoq e aqba kaol ol mao hhei e zaelsiq zaeq vae. 12 Yoqhhaeteel tyuqvae milcaeq'ae du'lal e zaeqzael mael zaeq e aeqnaol qiq nao, maqnaq maeq leeqgae vae, kaol Yiqsellyel cholyaeqhael'ae maqnaq maqza biq vae; tyuqfu qiq hoq, yoqhhaeteel Ja'nanq milcaeq ae'lye du'lal e zaeqzael mael zaeq vae.
Yeheqhuaq e junduil'ae sheeqmyeqzaeq e yoheeq
13 Yoshuyal Ye'lilge vae niqli fu, vuqduq baqtul hheikaol chifu, fu hhei, cholyaeq qiq hhaeq yoqhhaeq e yiqsi yulboq'ae haoqtul deelhhei, aqlaq mael'ae eedu hhei e maejyel baq hhei hhae. Yoshuyal yoqhhaeq tyuqvae keelli, kaol yoqhhaeq'ae gee biq: "Nol ngaeteel boq e lilmaeq, paelsilmyel ngaeteel e diqrenq boq e lilmaeq?" 14 Yoqhhaeq gee: "Maeqngeel yil, yaeqmeel ngael yi mael laoq Yeheqhuaq e junduil'ae sheeqmyeqzaeq e yoheeq geiq yi aeqlil." Kaol Yoshuyal maduq mael milcaeq vae tongqmaoq yil aeqmyel vuqduqtongq gae hhei, gee: "Ngaeq e hhaoqsongl, aeqchee saeziq gee maoqlye laol, yaqhacheqzaq e cholyaeq'ae moqheilheil laeq aeqmeel!" 15 Yeheqhuaq e junduil'ae sheeqmyeqzaeq e yoheeq Yoshuyal'ae gee biq: "Noq e aeqkeel e paqno mael heiga hhei, nol haoqtul deelhhei e milcaeq laoq senljyeq kaol'ae." Kaol Yoshuyal tyulnye zongl vae.