Ye'lilge e congqciq mael leeqba byel vae
6
Ye'lilge milmae heeqmyel e oheiq mael Yiqsellyel cholyaeq gae'lye nyeqlye piqtyeq hhae, kaol duyil do'lal e cholyaeq maeq zhol'ae. 2 Yeheqhuaq Yoshuyal'ae gee biq: "Fu hhei, ngaeq lye Ye'lilge milmae heeqmyel mael, Ye'lilge e zongmae, kaol zhee onglzaeq e aqha yobohael, gilzuqmyel noq e aqlaq'ae heilmoq aeqwae. 3 Noteel milmae heeqmyel xilmael'ae deel ongq maoqhhae, haelzhol e dangbinkei e cholyaeq milmae heeqmyel mael'ae qiq pu deel ongq, nol koq nao myel xilnye zongl maoqhhae; 4 Kaol jilsi siq hhaeq'ae aeqyol vuqkyul siq mal heil hhei aeqmyel, yoqguil e laefuqboq'ae bi deel; dilqiq tian'ae noteel milmae heeqmyel xilmael'ae siq pu deel ongq maoqhhae, kaol jilsihael eiq vuqkyul bo maoqhhae. 5 Aeqyol vuqkyul e botyel maol fu, noteel vuqkyul yotyel mael zhoq gaeq hhei'laol, cholyaeqhael gilzuqmyel yotyel haeqheemyel gul maoqhhae, tyulnye laol, milmae heeqmyel e congqciq mael leeqba gayi maoqlye hhae; kaol noteel haetaeq eiq aqtaq boq'ae byuq da'li maoqhhae." 6 Nenl e yaqyo Yoshuyal laoq jilsihael yaol gul'eeq laeq, kaol yoqhhaeteel'ae gee biq: "Noteel yoqguil mael baqqei hhei maoqhhae; kaol jilsi siq hhaeq'ae aeqyol vuqkyul siq mal heil hhei aeqmyel, Yeheqhuaq e yoqguil laefuqboq'ae bi deel." 7 Yoqhhaeq cholyaeqhael'ae yol gee biq: "Noteel da'li kaol milmae heeqmyel tyulmael'ae ongtyeq li gil, daqzhangldiq moqgoq baq hhei hael laoq Yeheqhuaq e yoqguil e laefuqboq'ae deel duyil." 8 Yoshuyal cholyaeqhael'ae haelgee biq laoqmyel, jilsi siq hhaeq aeqyol vuqkyul siq mal heil hhei aeqmyel Yeheqhuaq e yiqsi ae'lye deel duyil, kaol yoqhhaeteel vuqkyul bo, Yeheqhuaq e yoqguil mael yoqhhaeteel e aeqnaolboq'ae cho'lyeq hhae. 9 Daqzhangldiq moqgoq baq hhei e cholyaeqhael, vuqkyul bo e jilsihael e laefuqboq'ae deel, aeqnaolboq e cholyaeq qiq miq laoq yoqguil mael'ae cho'lyeq deelhhei myel deel, vuqkyul maqqyemyel bo. 10 Yoshuyal cholyaeqhael'ae moqheilheil biq, gee: "Noteel maeq gul hhaeq'ae, noteel e yotyel mael ochoq'ae maeq bi gaeq hhei hhaeq'ae, saeziq qiq doq dyel'eiq noteel e myeqbongq ae'lye maq hha duyi'ae, ngael noteel'ae 'gul gil' lye gee biq e tyuq qiq nao maoqlaol, noteel maeq hhae gul'ae." 11 Xilnye laol, Yoshuyal laoq Yeheqhuaq e yoqguil mael milmae heeqmyel tyulmael'ae bi deel ongq, kaol milmae heeqmyel mael'ae qiq pu deel ongq hhei. Aeqnaol, cholyaeqhael haqhhael diqkaeq hhei myel vae hoq keelli, kaol haqhhael diqkaeq hhei myel vae haq hhae.12 Yoshuyal naqlye tullael, jilsihael Yeheqhuaq e yoqguil mael yol baqqei hhei. 13 Kaol aeqyol vuqkyul siq mal heil hhei e jilsi siq hhaeq Yeheqhuaq e yoqguil laefuqboq'ae deel; yoqhhaeteel vuqkyul bo; daqzhangldiq moqgoq baq hhei hael laoq yoqhhaeteel e laefuqboq'ae deel, aeqnaolboq e cholyaeq qiq miq laoq Yeheqhuaq e yoqguil aeqnaolboq'ae cho'lyeq deelhhei aeqmyel deel; vuqkyul maqqyemyel bo hhae. 14 Aeqnaol qiq nao, yoqhhaeteel milmae heeqmyel mael'ae yol qiq pu deel ongq laol, yoqhhaeteel haqhhael diqkaeq hhei myel vae hoqli vae. Koq nao myel xilnye zongl hhae.
15 Dilqiq tian'ae naqlye baezulbaegeq fu, yoqhhaeteel tullael, kaol qiqsheel loqho laoqmyel milmae heeqmyel mael'ae siq pu deel ongq hhei; yoqhhaeteel milmae heeqmyel mael'ae siq pu deel ongq mael laoq xi qiq nao wae. 16 Siq pu e tyu qiq pu keellael laol, jilsi vuqkyul bo fu, Yoshuyal cholyaeqhael'ae gee biq: "Gul gil o, Yeheqhuaq lye milmae heeqmyel xilmael noteel'ae heilmoq biq vae kaol'ae! 17 Milmae heeqmyel xilmael, milmae heeqmyel onglci'ae halza haelzholhael haeqfu keellye Yeheqhuaq'ae heelda hhei biq, kaol zonglmye maoq e moqgoq geiq maoqhhae, jilnyuq Laheq kaol yoqhhaetoq'ae halza haelzholhael maoqlaol maeq hhae dyeqdeel'ae, yoqhhaeq lye aedeeteel lye moqheilheil duyil e fu'loq yil e cholyaeqhael yaol sheeqhhaq biq kaol'ae. 18 Ngeelfeiq, noteel aeqdilmyel aeqyae'lye kei maoqhhae, zonglmye maoq e moqgoq tyuhael maeq hhae heilmul'ae, aeqgael noteel zonglmye maoq e moqgoq tyulmael heilmul laol, haqhhael diqkaeq hhei e milcaeq vae haelzhol e Yiqsellyel cholyaeqhael'ae doqchiq kaol zai'nanl bi yo'li maeqhe. 19 Ngeelfeiq, pulsheel, pulziq kaol geeqsheel, sulm e moqgoqhael gilzuqmyel senljyeq wae lye Yeheqhuaq'ae biq biq maoqhhae, kaol Yeheqhuaq e moqgoq baqdeelzaeq e laoqhaol vae baq do deelli." 20 Tyulkaol, cholyaeqhael gul gil, jilsihael vuqkyul bo. Cholyaeqhael vuqkyul yotyel zhoq gaeq hhei biq, kaol yotyel haeqheemyel gul gil laol milmae heeqmyel e congqciq mael leeqba hhei vae; kaol cholyaeqhael da'li kaol milmae heeqmyel vae do'li, haetaeq eiq laefuqboq'ae da'li, kaol milmae heeqmyel mael diq yinqzaeq biq vae. 21 Yoqhhaeteel lye milmae heeqmyel vae haelzholhael, haqyoyaeq haeqmiyaeq haoq, yaeqmoq yaeqguq haoq, aeqnuq aeqyol kaol mao'lyu haoq, gilzuqmyel maejyel maellye xyeq biq vae.
22 Yoshuyal milcaeq xilmael'ae haoqchifu yil e cholyaeq niq nulhhaeq'ae gee biq: "Noteel jilnyuq tyutoq'ae do'li, kaol noteel yoqhhaeq'ae faqsilkei gol biq laoqmyel, haeqmiyaeq tyutaeq yaol kaol yoqhhaeq'ae halza haelzholhael gilzuqmyel tyuqvae lye sheeq duyi." 23 Kaol fu'loq yil gol e yaqyoyaeq tyu niq nulhhaeq do'li vae, kaol Laheq, yoqhhaeq e aeqdae aeqmae, algo aeqnilhael, yoqhhaeq e halza haelzholhael, kaol yoqhhaeq e haelzhol e paeqyaeqhael, gilzuqmyel sheeq duyi, kaol Yiqsellyel cholyaeqhael haqhhael diqkaeq hhei e milcaeq nildu vae bi zhol hhae. 24 Yoqhhaeteel lye aeqzaeq maellye milmae heeqmyel tyulmael kaol milmae heeqmyel e halza haelzholhael gilzuqmyel pe byel vae; pulsheel, pulziq, geeqsheel kaol sulm e moqgoq mael maoq Yeheqhuaq e heelhaol e moqgoq baqdeelzaeq e laoqhaol vae maeq heil do'li'ae. 25 Jilnyuq Laheq, yoqhhaeq e aeqdae toq kaol yoqhhaeq'ae halza haelzholhael, Yoshuyal laoq yoqhhaeteel e aeqyil mael bi dyeqdeel'ae. Yoqhhaeq yaeqnao keellye Yiqsellyel onglci vae zhol hhae, yoqhhaeq lye Yoshuyal lye Ye'lilge vae bi haoqchifu yil e moqheilheil duyil e cholyaeqhael yaol sheeqhhaq biq kaol'ae.
26 Tyuqfu, Yoshuyal cholyaeqhael'ae faqsil bi kei: "Tullael kaol Ye'lilge milmae heeqmyel xilmael cutulhoq e cholyaeq laoq, Yeheqhuaq e yiqsi'ae doqchiq hhae pi ngeelvae.
Yoqhhaeq congqciq paeqhhael zongltul fu,
fuqbo yaqyo aeqdilmyel sil biq maoqlye hhae;
yoqhhaeq milmae heeqmyel e oheiq zongl fu,
hhaelnil nilli e qiq hhaeq aeqdilmyel sil biq maoqlye hhae."
27 Yeheqhuaq Yoshuyal nyegael qiqgael baelzhol; Yoshuyal e miqyil mael haeqvae milcaeq vae eiq geegaeq duyil vae.