Yalgan golsiq zonglpizaeq
7
Yiqsellyel cholyaeqhael zonglmye maoq e moqgoq taq'ae golsiq zonglpizaeq vae. Yoqdal zhipail onglci'ae Xyella e yuqheiq, Saqdiq e yuqpaeq, Jamiq e yaqyo Yalgan zonglmye biq maoq e moqgoq mael heilmul vae, kaol Yeheqhuaq Yiqsellyel cholyaeqhael'ae faqhoqkei biq.2 Yoshuyal laoq Ye'lilge ae'lye cholyaeq yaol Boqtellil e neeldu aelheiq boq'ae, Boq Yalwenq'ae niqli e Ail milmae heeqmyel vae yil lye moqheilheil du hhei, kaol yoqhhaeteel'ae gee biq: "Noteel da'li kaol tyuqvae milcaeq'ae haoqchifu li." Cholyaeq tyuhael da'li kaol Ail milmae heeqmyel'ae haoqchifu li vae. 3 Yoqhhaeteel Yoshuyal e tyuqvae hoq keellael, kaol yoqhhaeq'ae gee biq: "Cholyaeqhael gilzuqmyel maq da'li kael'ae, niq suq ca hhaeq laellye da'li laol, Ail milmae heeqmyel mael diq yinqzaeq laeq ongl'ae; haelzhol cholyaeq myel duqhee'lye tyuqvae maeq bi da'li kael'ae, yoqhhaeteel laoq cholyaeq maeq naeq kaol'ae. 4 Tyulkaol, cholyaeqhael onglci e suqca (3000) hhaeq laellye tyuqvae da'li, ngeelfeiq, yoqhhaeteel Ail milmae heeqmyel e cholyaeq yiqsi ae'lye kisae vae. 5 Ail milmae heeqmyel e cholyaeq lye yoqhhaeteel yaol suqqyel koq hhaeq laellye xyeq biq vae, yoqhhaeteel yaol milmae heeqmyel e oheiq ae'lye mael Shilba'linq vae lyeqkeel biq, kaol tongqtyuq vae lye yoqhhaeteel yaol diq yinqzaeq biq. Yoqhhaeteel saeqzuq gu zuq biq, kaol neemae mael hual ga biq kaol eelcuq peqyil biq vae.
6 Yoshuyal kaol Yiqsellyel e zhangqlaoqhael nyuqsaeq biq kaol aelhongq mael eezi hhei; mqkiq'ae keellye Yeheqhuaq e yoqguil yiqsi'ae maduq mael milcaeq vae tongqmaoq yil aeqmyel zongl gil hhae. Yoqhhaeteel haeqlyel mael vuqduq taq'ae beiqxeiq da hhei. 7 Yoshuyal gee: "El'aeq! Hhaoqsongl Yeheqhuaq o, nol aeqcheekaol cholyaeq xihael yaol Yoqdanl Lolbaeq vae sheeq guq laeq biq, kaol ngaeteel yaol Yalmoqlil cholyaeq aqlaq'ae eemoq laeq, kaol ngaeteel yaol bi myeyil laq lilmaeq? Ngaeteel Yoqdanl Lolbaeq yulboq'ae zhol mael hhael shoq oqyaevae! 8 Hhaoqsongl o! Yiqsellyel cholyaeqhael diqrenq e yiqsi ae'lye zipol yil kaol kisae vae, kaol ngael aeqchee lye gee siq laeq? 9 Ja'nanq cholyaeq kaol saeqvae milcaeq vae hael zhol e cholyaeqhael gaeq hhei'laol, ngaeteel'ae ongtyeq lael wae, kaol ngaeteel e cholmil mael milcaeq taq ae'lye jyeqdael maellye noga hhei laoqmyel noga hhei wae. Tyuqfu, nol noq e maeqdaeqhhaeq e cholmil mael'ae haelmillye zongl maoq maeq?" 10 Yeheqhuaq Yoshuyal'ae gee biq: "Tullael! Noq e maduq mael aeqcheekaol milcaeq vae tongqmaoq yil aeqmyel zongl lilmaeq? 11 Yiqsellyel laoq golsiq zonglpizaeq vae, ngael yoqhhaeteel'ae moqheilheil biq e geemeeq deelhhei e saeziq mael laoqmyel maeq zongl, yoqhhaeteel zonglmye maoq e moqgoq mael heilmul. Yoqhhaeteel lolbiq haoqzaeq, zaqgiqgiq, kaol zonglmye maoq e moqgoq mael aeqyoyoq e moqgoq mael nyegael qiqgael heil deelzaeq hhei. 12 Tyulkaol, Yiqsellyel cholyaeqhael diqrenq yiqsi'ae maeq haoqtul deel ongl. Yoqhhaeteel diqrenq e yiqsi ae'lye zipol yil kaol kisae vae, yoqhhaeteel laoq zonglmye maoq e moqgoq peqyil vae kaol'ae. Noteel zonglmye maoq e moqgoq mael noteel onglci ae'lye maeq zonglmye hhei kaollaoq, ngael noteel nyegael zail eiq maeq baelzhol vae. 13 Nol tullael, kaol cholyaeqhael'ae aeqyoyoq yaol zonglqyel du hheikaol senljyeq wae lye geiq lye gee biq: 'Noteel naeshoq gae'lye aeqyoyoq yaol zonglqyel du hheikaol senljyeq wae lye geiq maoqhhae, Yiqsellyel e Momil Yeheqhuaq xilnye gee kaol'ae: Yiqsellyel o, noq e onglci'ae zonglmye maoq e moqgoq za hhae; noteel laoq noteel onglci e zonglmye maoq e moqgoq mael maeq zonglmye hhei kaollaoq, nol diqrenq e yiqsi'ae aeqdilmyel maeq haoqtul deel ongl'ae!' 14 Mqshoq keellael laol, noteel yiq gol zhipail yiq gol zhipail lye laefuqboq'ae niq lael gil. Yeheqhuaq lye saelpodu hhei e zhipail, qiq zonglyaeq qiq zonglyaeq lye laefuqboq'ae niq lael gil; Yeheqhuaq lye saelpodu hhei e zonglyaeq, yiq gol jacuq yiq gol jacuq lye laefuqboq'ae niq lael gil, Yeheqhuaq lye saelpodu hhei e jacuq laoq, haqyoyaeqhael qiqhhaeq qiqhhaeq lye laefuqboq'ae niq lael gil. 15 Saelpodu hhei e cholyaeqhael onglci'ae zonglmye maoq e moqgoq mael yoqhhaeq e tyuqvae za laol, yoqhhaeq kaol yoqhhaeq e halza haelzholhael gilzuqmyel aeqzaeq maellye pe biq maoqhhae, yoqhhaeq Yeheqhuaq e geemeeq deelhhei mael maeq zongl kaol'ae, yoqhhaeq Yiqsellyel onglci'ae miqyil daoqcheeq e silqinq zongl kaol'ae.'"
16 Tyulkaol, Yoshuyal naqlye tullael, kaol Yiqsellyel cholyaeqhael yaol yiq gol zhipail yiq gol zhipail lye laefuqboq'ae niq lael gil lye gul laeq vae. Saelpodu hhei mael laoq Yoqdal zhipail'ae. 17 Yoqhhaeq Yoqdal e zonglyaeq yaol laefuqboq'ae niq lael lye gul laeq vae, saelpodu hhei mael laoq Xyella zonglyaeq'ae. Yoqhhaeq Xyella zonglyaeq e haqyoyaeqhael qiqhhaeq qiqhhaeq lye lael lye gul laeq vae, kaol saelpodu hhei mael laoq Saqdiq'ae. 18 Yoqhhaeq Saqdiq e jacuq yaol gul laeq vae, kaol haqyoyaeqhael qiqhhaeq qiqhhaeq lye laefuqboq'ae niq lael gil vae, kaol Yoqdal zhipail e Xyella e yuqheiq, Saqdiq e yuqpaeq, Jamiq e yaqyo Yalgan yaol saelpodu hhei. 19 Yoshuyal Yalgan'ae gee biq: "Ngaeq e yaqyo o, ngael noq'ae rongqyaol mael Yiqsellyel e Momil Yeheqhuaq'ae heil biq lye haelmeeqlye gee laeqngeel, yoqhhaeq e yiqsi'ae golsiq za yaevae lye gee biq, nol haelzongl mael ngaeq'ae geegaeq laeq, ngaeq'ae maeq hhae geehhaq laq'ae." 20 Yalgan Yoshuyal'ae geehoq biq, gee: "Ngael aeqdilmyel Yiqsellyel e Momil Yeheqhuaq'ae zonglzhil biq yaevae. Ngael haelzongl mael laoq xilnye hhae: 21 Ngaeq lye diq yinqzaeq laeq e jadanglhael onglci'ae, zhee meeq e Shilnaq milcaeq e nildu'ae dum e poljye qiq ko, pulziq niqhael (200) shelkellel kaol pulsheel ngaeqqyel shelkellel cheng e qiq mal mol hhei laeq hhae. Ngael moqgoq xihael zhee mulgoq laq, kaol heilmul yil aeqwae. Naelhaeq, moqgoq xihael ngaeq e haeqpael haelcul onglci e milcaeq holhhaq'ae zongl vuq deelhhei lil, pulziq mael laoq nildu'ae dum e poljye holhhaq vae za hhae."
22 Yoshuyal lye moqheilheil duyil e cholyaeq yaol Yalgan e haeqpael haelcul'ae ki yil lye moqheilheil du hhei. Nildu'ae dum e poljye tyu qiq ko yoqhhaeq e haeqpael haelcul onglci vae aeqdilmyel heilhhaq deelhhei hhae, pulziq mael nildu'ae dum e poljye holhhaq vae za hhae. 23 Yoqhhaeteel lye moqgoq xihael haeqpael haelcul ae'lye heil duyi laol, Yoshuyal kaol Yiqsellyel cholyaeqhael e tyuqvae heil keellaeq, kaol Yeheqhuaq e yiqsi'ae xyehael du hhei. 24 Yoshuyal kaol Yiqsellyel cholyaeqhael lye Xyella e yuqheiq Yalgan, kaol Yalgan e yaeqmiq yaqyo yaol sheeq hhei, pulziq tyulmael, nildu'ae dum e poljye tyu qiq ko, pulsheel tyu qiq mal, haeqpael haelcul kaol yoqhhaeq e halzahael heil hhei, kaol aeqnuqhael, mao'lyuhael, aqciqhael lyeq hheikaol Yalge Longlkaeqa vae da'li. 25 Yoshuyal gee: "Nol aeqcheekaol ngaeteel'ae zai'nanl mael pi laeq laeq lilmaeq? Yaeqnao, Yeheqhuaq noq'ae zai'nanl bi yo'lael maoqlye hhae." Tyulkaol, Yiqsellyel cholyaeqhael lye yoqhhaeq yaol haqlo maellye beiqsil biq, aeqzaeq maellye yoqhhaeteel yaol pe biq, kaol haqlo mael holtaq vae beiq da deelhhei. 26 Cholyaeqhael Yalgan e aeqhhaol taq'ae haqlo qiq gongq gongqmae gongq da hhei, xilmael yaeqnao keellye za siq. Tyulkaol, Yeheqhuaq neemae nyuqpael hhei'laol, yoqhhaeq e faqhoq guaeq'ei kei mael maeq kei vae. Tyulkaol, yaeqnao keellye, tyuqvae milcaeq'ae Yalge Longlkaeq lye gul hhae.