Ail milmae heeqmyel mael diq yinqzaeq laeq biq
8
Yeheqhuaq Yoshuyal'ae gee biq: "Maq gu kael, maeq zongl gaeyil ongl yaevae lye haeq kei. Nol tullael, haelzhol e daqzhangldiq e cholyaeqhael yaol sheeq hheikaol Ail milmae heeqmyel'ae da'li; fu hhei, ngaeq lye Ail milmae heeqmyel e zongmae kaol yoqhhaeq e cholyaeqhael noq'ae eemoq biq aeqwae, yoqhhaeq e milmae heeqmyel mael kaol yoqhhaeq e milcaeq mael, gilzuqmyel noq e aqlaq'ae heilmoq aeqwae. 2 Nol Ye'lilge kaol Ye'lilge e zongmae'ae haelmillye zongl biq laol, Ail milmae heeqmyel mael'ae kaol Ail milmae heeqmyel e zongmae'ae haelmillye zongl biq. Milmae heeqmyel onglci'ae lye diqkoqzaeq laeq e jadanglhael, kaol jyeqyaeqhael laoq, noteel aeqyoyoq lye diqkoqzaeq laeq e moqgoq geiqzaq. Nol dangbinkei e cholyaeqhael yaol milmae heeqmyel e aeqnaolboq'ae bi hoqhhaq deelhhei maoqhhae."3 Tyulkaol, Yoshuyal kaol haelzhol e daqzhangldiq e cholyaeqhael tullael, kaol Ail milmae heeqmyel vae da'li. Yoshuyal lye zhee onglzaeq e aqha yobo suqtongl (30000) hhaeq saelpodu hhei, kaol mqkiq'ae yoqhhaeteel yaol moqheilheil du hhei, 4 Kaol yoqhhaeteel'ae moqheilheil biq, gee: "Naelhaeq, noteel milmae heeqmyel aeqnaol'ae hoqhhaq deelhhei, milmae heeqmyel'ae haeldyulmyel maeq hhae maol yil'ae, haetaeq eiq paeqgaelsael meeq deelhhei maoqhhae. 5 Ngael kaol ngael sheeq hhei e dangbinkei e cholyaeqhael milmae heeqmyel boq'ae da'li maoq. Milmae heeqmyel e cholyaeqhael laefuq qiq pu laoqmyel duyi kaol ngaeteel nyegael diqgae yi fu, ngaeteel yoqhhaeteel yiqsi ae'lye kisae maoq. 6 Ngaeteel lye yoqhhaeteel'ae cheeqmu biq kaol milmae heeqmyel tyulmael'ae gaelmaolsae'lye bi maol yil fu keellye, yoqhhaeteel duyi kaol ngaeteel'ae lyeq yi kiq'ae. Yoqhhaeteel xilnye gee kaol'ae: 'Cholyaeq xihael laefuq qiq pu laoqmyel aedeeteel yiqsi ae'lye kisae hhei'ae.' Tyulkaol, ngaeteel yoqhhaeteel yiqsi ae'lye kisae maoqlye lil. 7 Tyuqfu, noteel hoqhhaq deelhhei e milcaeq vae lye tullael, kaol milmae heeqmyel tyulmael diq yinqzaeq biq, noteel e Momil Yeheqhuaq milmae heeqmyel mael noteel e aqlaq'ae heilmoq biq vae kaol'ae. 8 Noteel milmae heeqmyel mael zholchiqzaeq hhei aeqnaol, milmae heeqmyel mael aeqzaeq maellye pe maoqhhae, Yeheqhuaq e saeziq laoqmyel zongl yil maoqhhae. Naelhaeq, xilmael laoq, ngael noteel'ae moqheilheil biq mael'ae." 9 Tyulkaol, Yoshuyal yoqhhaeteel yaol moqheilheil duyil. Yoqhhaeteel laoq Ail milmae heeqmyel e neelgae aelheiq boq'ae, Boqtellil kaol Ail milmae heeqmyel e kaeqlaeq vae hoqhhaq maoqlye e milcaeq vae keelli vae. Xi qiq mil, Yoshuyal dangbinkei e cholyaeqhael onglci'ae bal haq hhae.
10 Yoshuyal naqlye tullael, kaol dangbinkei e cholyaeqhael lo vae maeqlye suqda hhei. Yoqhhaeq kaol Yiqsellyel e zhangqlaoqhael laoq cholyaeqhael e laefuqboq'ae Ail milmae heeqmyel'ae da'li. 11 Yoqhhaeq nyegael daqzhangl bael diq e haelzhol e dangbinkei e cholyaeqhael gilzuqmyel da'li, kaol laefuqboq'ae ki niqli, kaol milmae heeqmyel laefuq'ae keellael, kaol milmae heeqmyel e beqbian boq'ae haqhhael diqkaeq hhei gil'ae. Yoshuyal kaol Ail milmae heeqmyel kaeqlaeq vae longlkaeq qiq mal kaeq hhae. 12 Yoqhhaeq lye cholyaeq ngaeqca (5000) hhaeq laellye saelpodu hhei, kaol yoqhhaeteel yaol Ail milmae heeqmyel e neelgae aelheiq boq'ae, Boqtellil kaol Ail milmae heeqmyel e kaeqlaeq vae bi hoqhhaq deelhhei. 13 Tyulkaol, yoqhhaeteel lye milmae heeqmyel e beqbian boq e junduil e cholyaeqhael, kaol milmae heeqmyel e neelgae aelheiq boq'ae hoqhhaq deelhhei e dangbinkei e cholyaeqhael yaol qiqgael'ae qiq miq qiq miq lye bi zhol deelhhei, yoqhhaeteel lye gilzuqmyel paeqgaelsael meeq deelhhei vae. Xi qiq mil, Yoshuyal longlkaeq vae do'li. 14 Ail milmae heeqmyel e zongmae mol hhei biq laol, milmae heeqmyel e cholyaeqhael nyegael naqlye tullael, kaol nae'naemyel duyil, yoqhhaeq kaol haelzhol e dangbinkei e cholyaeqhael yil maoqlye gee deelhhei e milcaeq vae keellael vae, Yallaba laefuq'ae Yiqsellyel cholyaeqhael nyegael diqgae maoqlye duyi, kaol daqzhangldiq gil; ngeelfeiq, zongmae laoq milmae heeqmyel e aeqnaol'ae hoqhhaq deelhhei e dangbinkei e cholyaeq zhol'ae lye maeq loq biq'ae. 15 Yoshuyal kaol Yiqsellyel cholyaeqhael yoqhhaeteel yiqsi'ae diqsu yaevae lye zonglgiqgiq, kaol diqsheelleeldye'ae yil e gaelmae boq'ae kisae yil. 16 Milmae heeqmyel e cholyaeqhael yaol gilzuqmyel gul laeq kaol yoqhhaeteel'ae bi lyeq yil. Ail milmae heeqmyel e cholyaeqhael Yoshuyal'ae lyeq yil fu, yoqhhaeteel yaol milmae heeqmyel tyuqvae lye gaelmaolsae'lye cheeqmu yil biq vae. 17 Ail milmae heeqmyel cholyaeqhael kaol Boqtellil e cholyaeqhael, gilzuqmyel duyi kaol Yiqsellyel cholyaeqhael'ae lyeq yil, kaol qiq hhaeq eiq maeq zholdeelsaeq'ae. Yoqhhaeteel diqpong deelhhei e milmae heeqmyel e oheiq mael beiqdeelsaeq, kaol Yiqsellyel cholyaeqhael'ae lyeq yil.
18 Yeheqhuaq Yoshuyal'ae gee biq: "Nol Ail milmae heeqmyel boq'ae aqlaq'ae baq hhei e gongq mael tyuqdu hhei, ngael milmae heeqmyel tyulmael noq e aqlaq'ae heilmoq hhei maoqlye kaollil." Yoshuyal milmae heeqmyel tyuboq'ae aqlaq e gongq mael tyuqdu hhei. 19 Yoqhhaeq aqlaq mael zhoq tyuqdu hhei'laol, hoqhhaq deelhhei e dangbinkei e cholyaeqhael hoqhhaq deelhhei myel vae lye nae'naemyel ki duyi, kaol milmae heeqmyel vae ki do beq li, kaol milmae heeqmyel mael diqkoqzaeq biq, kaol nae'naemyel milmae heeqmyel mael aeqzaeq maellye loqpyeq biq. 20 Ail milmae heeqmyel e cholyaeqhael zipol hoqlael, kaol aeqnaolboq'ae chifu pol hoq hhei'laol, fu hhei, milmae heeqmyel onglci'ae aeqhaoq mael mqmae'ae byuq da hhae, yoqhhaeteel xiboq'ae, paelsilmyel yulboq'ae kisae hhael qiqgael eiq maqza biq'ae. Diqsheelleeldye boq'ae kisae e cholyaeqhael ki polhoqlael kaol yoqhhaeteel vae lyeq e cholyaeqhael'ae diq biq. 21 Yoshuyal kaol Yiqsellyel cholyaeqhael laoq hoqhhaq deelhhei e dangbinkei e cholyaeqhael lye milmae heeqmyel mael diqkoqzaeq hhei, kaol milmae heeqmyel vae aeqhaoq byuq da mol hhei biq laol, ki polhoqlael kaol Ail milmae heeqmyel e cholyaeqhael yaol xyeq biq. 22 Hoqhhaq deelhhei e dangbinkei e cholyaeqhael eiq milmae heeqmyel ae'lye duyi kaol yoqhhaeteel'ae lyeq yil, kaol Yiqsellyel cholyaeqhael lye yoqhhaeteel yaol loongq biq, xiboq eiq zhol, yulboq eiq zhol. Tyulkaol, Yiqsellyel cholyaeqhael lye yoqhhaeteel yaol xyeq biq, dyeqdeel siq e cholyaeq qiq hhaeq eiq maeq bi zholdeelsaeq'ae, qiq hhaeq eiq maeq bi kibeiqzaeq'ae. 23 Yiqsellyel cholyaeq lye Ail milmae heeqmyel e zongmae yaol yodyeq myel deiqtyeq biq, kaol yoqhhaeq yaol Yoshuyal tyuqvae ee'li biq vae.
24 Yiqsellyel cholyaeqhael lye haeldye kaol diqsheelleeldye vae lye, yoqhhaeteel'ae lyeq biq e Ail milmae heeqmyel vae zhol e haelzhol cholyaeqhael yaol xyeq byel biq vae. Yoqhhaeteel gilzuqmyel maejyel holhhaq'ae leeqgul vae, kaol mye byel yil vae. Yiqsellyel cholyaeqhael Ail milmae heeqmyel'ae hoq keelli, kaol maejyel maellye milmae heeqmyel onglci e cholyaeqhael xyeq biq vae. 25 Tyuqfu qiq nao xyeq biq e cholyaeqhael, haeqmiyaeq haqyoyaeq laoqlye gilzuqmyel qiqtongl niqca (12000) hhaeq zoq wae, xihael laoq Ail milmae heeqmyel e haelzhol cholyaeq'ae. 26 Yoshuyal laoq Ail milmae heeqmyel vae zhol e haelzhol cholyaeqhael yaol gilzuqmyel zonglmye byel fu maoqlaol, aqlaq'ae baq hhei e gongq mael maq baq loq ga hhei'ae. 27 Ngeelfeiq, jyeqyaeq kaol milmae heeqmyel onglci'ae lye diqkoqzaeq laeq e jadanglhael, Yiqsellyel cholyaeqhael Yeheqhuaq Yoshuyal'ae moqheilheil biq e saeziq laoqmyel, aeqyoyoq lye diqkoqzaeq laeq e moqgoq geiq zaq hhae. 28 Yoshuyal lye Ail milmae heeqmyel mael loqpyeq biq vae, kaol milmae heeqmyel mael haeqfu keellye laoqhaol nulba bi peqyil vae, kaol yaeqnao keellye cholgulcillye wae siq. 29 Yoqhhaeq lye Ail milmae heeqmyel e zongmae yaol aelbol taq'ae pyeqcheeq da biq, kaol kiqsulkiqxeiq fu'ae bi za keel hhae. Neelmae leeq do ga fu, Yoshuyal laoq cholyaeq'ae sil e aeqhhaol mael aelbol taq ae'lye pyeqgae hhei, kaol milmae heeqmyel e oheiq vae beiq deelhhei, kaol sil e aeqhhaol taq'ae haqlo qiq gongq gongqmae gongq da hhei lye moqheilheil biq, haqlo xihael yaeqnao keellye za wae siq.
Yoshuyal Yiqba'lul Geeqzhoq vae cholyaeqhael'ae lilfaq duq gaeq gilbiq
30 Tyuqfu, Yoshuyal Yiqba'lul Geeqzhoq vae, Yiqsellyel e Momil Yeheqhuaq'ae jiltanq qiq mal zongl hhei biq. 31 Jiltanq xilmael laoq, Yeheqhuaq e yaqhacheqzaq e cholyaeq Moxi lye, Yiqsellyel cholyaeq'ae moqheilheil biq laoqmyel hhae, sulm e moqgoq maellye maq taq gol e haqlo qiq siq lye zongl hhei hhae, xilmael laoq, Moxi e lilfaq e suqhhaq taq'ae cu deelhhei laoqmyel hhae. Yoqhhaeteel jiltanq xilmael taq'ae Yeheqhuaq'ae Pebyel Zaelheel heel biq, kaol jyeqyaeq xyeq hheikaol Neesaelhhae Zaelheel geiq. 32 Yoshuyal tyuqvae lye, Yiqsellyel cholyaeqhael e yiqsi'ae lye Moxi lye hal cu hhei e lilfaq mael haqlo taq'ae cao da hhei. 33 Yoqmilyoq e cholyaeqhael haoq, paelsilmyel baelzhol lael e cholyaeqhael haoq, Yiqsellyel e gilzuqmyel cholyaeqhael aeqyoteel e zhangqlaoqhael, zhiqmoq yoheeqhael kaol shenqpanl e zhiqmoqhael nyegael, qiq pa laoq Ji'lilxin Geeqzhoq boq'ae polyil aeqmyel, qiq pa laoq Yiqba'lul Geeqzhoq boq'ae polyil aeqmyel Yeheqhuaq e yoqguil mael baq e Lilveil toq e jilsihael e yiqsi vae yoqguil niqboq'ae haoqtul deelhhei hhae; yoqhhaeteel Yeheqhuaq e yaqhacheqzaq e cholyaeq Moxi laefuq moqheilheil deelsaeq laoqmyel, Yiqsellyel cholyaeqhael'ae geeqlongq biq biq. 34 Aeqnaol, Yoshuyal laoq lilfaq taq e geeqlongq kaol doqchiq e saeziq mael, lilfaq suqhhaq taq'ae hal cu deelhhei laoqmyel, yotyel ha'lye qiq pu duq hhae. 35 Moxi moqheilheil e gilzuqmyel saeziqhael, Yoshuyal laoq Yiqsellyel huilzhongl cholyaeqhael, cholhae aeqmae, yaeqguq kaol yoqhhaeteel onglci'ae baelzhol lael e cholyaeq yiqsi'ae, yotyel ha'lye maeq duq du hhei myel qiq doq eiq maqza'ae.