Jibianl cholyaeq Yoshuyal'ae zaqgiqgiq biq
9
Yoqdanl Lolbaeq e neelgae aelheiq boq'ae, geeqzhoq naeq e milcaeq, balziq kaol Eeldeel Deelmae cho'lomyel ae'lye mael Liqba'nenl vae maol keel e milcaeq vae zhol e Hel cholyaeq, Yalmoqlil cholyaeq, Ja'nanq cholyaeq, Biqlilxiq cholyaeq, Xiveil cholyaeq kaol Yebulsi cholyaeq e zongmaehael'ae, silqinq xihael gaeq hhei biq laol, 2 Hhaellaelmyel zhol'eeq deelhhei lael gil, kaol neemae qiq siq laoqmyel Yoshuyal kaol Yiqsellyel cholyaeqhael nyegael daqzhangldiq maoqlye zongl hhae.3 Jibianl vae zhol e cholyaeqhael laoq Yoshuyal Ye'lilge milmae heeqmyel'ae, kaol Ail milmae heeqmyel mael'ae haelzongl biq e silqinq mael gaeq hhei biq laol, 4 Zaqgiqgiq e loqho qiq mal nyuq du hhei, kaol moqheilheil duyil e cholyaeq lil lye zonglgiqgiq kaol duyil vae. Yoqhhaeteel yogeilgeil palbye, kaol gazi e guqtul hoq hhei gol e zilbaeq xyedo e saeqgeel palbye yogeil mael mao'lyu mael'ae toq da hhei, 5 Kaol guqtul hoq gol e paqno yogeil mael aeqkeel mael'ae nuq da hhei, aelhongq yogeil mael aeqhhaol'ae dumda hhei, kaol zaeqzael geiq e aqba mael laoq geesa'lye mqcicia da aeqmyel hhae. 6 Yoqhhaeteel laoq Jiqjaq milcaeq vae haqhhael diqkaeq hhei e milcaeq vae zhol e Yoshuyal tyuqvae keelli, yoqhhaeq'ae kaol Yiqsellyel cholyaeq'ae gee biq: "Ngaeteel gaelmaol maol e milcaeq ae'lye lael aeqlil, yaeqmeel nol ngaeteel nyegael geemeeq deelhhei laeq lye geezaeq lil." 7 Yiqsellyel cholyaeqhael Xiveil cholyaeqhael'ae gee biq: "Nol ngaeq e dongqpyeq vae zhol e cholyaeq vae laoq. Xilnye kaollaoq, ngael haelmillyekaol noq nyegael geemeeq deelhhei laeq?" 8 Yoqhhaeteel Yoshuyal'ae gee biq: "Ngaeteel laoq noq e yaqhacheqzaq e cholyaeq lil." Yoshuyal yoqhhaeteel'ae naelhaeq biq: "Noteel aeqsulsul lilmaeq? Haeqvae lye lael gil lilmaeq?" 9 Yoqhhaeteel yoqhhaeq'ae gee biq: "Noq e yaqhacheqzaq e cholyaeqhael laoq noq e Momil Yeheqhuaq e cholmil gae'lye, gaelmaol guaeq'ei maol e milcaeq ae'lye lael aeqlil. Ngaeteel'ae yoqhhaeq e miqyil kaol yoqhhaeq Aijiq vae haelzongl mael, 10 Kaol yoqhhaeq Yoqdanl Lolbaeq e neeldu aelheiq e Yalmoqlil cholyaeqhael e zongmae niq nulhhaeq'ae hael zongl biq mael gaeq hhei laeq kaol'ae; yoqhhaeteel laoq Xishiqbenq milcaeq e zongmae Xihongq kaol Yalsita'lul milcaeq e Bashan e zongmae El ngeelvae.
11 Ngaeteel e zhangqlaoqhael kaol ngaeteel e milcaeq vae haelzhol cholyaeqhael ngaeteel'ae gee laeq: 'Noteel e aqlaq mael'ae gaelmae vae zaeq e zaeqzael heil hhei, duyil kaol Yiqsellyel cholyaeq'ae mol yil maoqhhae, kaol yoqhhaeteel'ae gee biq: Ngaeteel laoq noteel e yaqhacheqzaq e cholyaeq lil. Yaeqmeel ngaeteel nyegael geemeeq deelhhei laeq lye noteel'ae geezaeq lil.' 12 Ngaeteel duyi kaol noteel saeqvae lael maoqlye tyuqfu qiq nao, ngaeteel e laoqhaol ae'lye heil duyi e aqba xilmael hulm'qye'lye hhae; fu hhei, yaeqmeel aqba mael geesa'lye mqcici da aeqwae. 13 Zilbaeq xyedo e saeqgeel palbye xihael, ngaeteel zilbaeq xyedo fu yosheq wae siq; fu hhei, yaeqmeel laoq gazi aeqmyel wae. Ngaeteel e aelhongq kaol paqno xihael, gaelmae guaeq'ei maol gae'lye yogeil eiq dum geil aeqwae." 14 Yiqsellyel cholyaeqhael laoq yoqhhaeteel e zaeqzael mael aelheel heilzaeq vae, ngeelfeiq, Yeheqhuaq'ae tyuqmyeq laeq lye maeq naelhaeq biq'ae. 15 Tyulkaol, Yoshuyal yoqhhaeteel nyegael hoqpinq guanxil gee deelhhei, kaol yoqhhaeteel nyegael geemeeq deelhhei vae, kaol yoqhhaeteel'ae bi dyeqdeel; kaol huilzhongl e yoheeqhael eiq yoqhhaeteel'ae faqsilkei biq.
16 Yiqsellyel cholyaeqhael yoqhhaeteel nyegael geemeeq deelhhei aeqnaol, suq nao gol hhei'laol, yoqhhaeteel laoq dongqpyeq e cholyaeq'ae, kaol gaelniq vae zhol hhae lye caiq gaeq hhei biq. 17 Yiqsellyel cholyaeqhael deelsae hheikaol deel vae, dilsan tian yoqhhaeteel e milmae heeqmyel vae keellael vae; Yoqhhaeteel e milmae heeqmyel mael laoq Jibianl, Jifei'la, Biqlul kaol Ji'lyel Ye'linq'ae. 18 Huilzhongl e yoheeqhael laoq, Yiqsellyel e Momil Yeheqhuaq'ae tyuq deelhhei kaol yoqhhaeteel'ae faqsilkei gol biq, tyulkaol, Yiqsellyel cholyaeqhael yoqhhaeteel'ae maq hha xyeq biq'ae. Huilzhongl cholyaeqhael laoq yoheeqhael'ae buqzaq gil biq. 19 Yoheeqhael huilzhongl cholyaeqhael'ae gee biq: "Aedeeteel Yiqsellyel e Momil Yeheqhuaq'ae tyuq deelhhei kaol yoqhhaeteel'ae faqsilkei gol biq wae, kaol yaeqmeel aedeeteel yoqhhaeteel'ae maeq hhae diq biq'ae. 20 Aedeeteel yoqhhaeteel'ae xilnye zongl biq maoqhhae, yoqhhaeteel yaol bi dyeqdeel maoqhhae, aeqgael aedeeteel yoqhhaeteel'ae faqsilkei gol biq gae'lye, faqhoqkei mael aedeeteel'ae yo'lael maeqhe." 21 Yoheeqhael huilzhongl'ae gee biq: "Yoqhhaeteel yaol bi dyeqdeel aeqmeel." Tyulkaol, cholyaeq tyuhael laoq yoheeqhael gee laoqmyel, huilzhongl cholyaeqhael e aeqzaeq cheq, eelcuq baq e cholyaeq geiq hhae.
22 Yoshuyal yoqhhaeteel yaol gul laeq, kaol yoqhhaeteel'ae gee biq: "Noteel aeqcheekaol ngaeteel'ae zaqgiqgiq laq, gee: 'Ngaeteel kaol noteel zhol mael laoq gaelmaol guaeq'ei maol hhae.' Qiqshiq laoq, noteel ngaeteel e dongqpyeq vae zhol hhae. 23 Yaeqmeel noteel doqchiq hhae pi ngeelvae! Noteel onglci e cholyaeq laoq aeqdilmyel maqqyemyel hhaeq'ongq ongqzaeq e cholyaeq hha geiq hhae, kaol ngaeq e Momil e heelhaol vae aeqzaeq cheq, eelcuq baq e cholyaeq hha geiq hhae." 24 Yoqhhaeteel Yoshuyal'ae geehoq biq, gee: "Aeqdilmyel cholyaeq lye noq e yaqhacheqzaq e cholyaeqhael'ae geegaeq hhei laeq, noq e Momil Yeheqhuaq yoqhhaeq e yaqhacheqzaq e cholyaeq Moxi'ae moqheilheil gol biq, saeqvae halza milcaeq mael noteel'ae biq biq, kaol noteel e yiqsi ae'lye saeqvae milcaeq vae zhol e gilzuqmyel cholyaeqhael yaol zonglmye maoqlye gee kaol'ae, ngaeteel noteel gae'lye aeqyil maq hha dyeq wae lye guaeq'ei gu laq hhae, kaol xilmael zongl aeqlil. 25 Yaeqmeel, fu hhei, ngaeteel noq e aqlaq holhhaq vae zhol lil, nol ngaeteel'ae haelmillye zongl mael meeq kaol hoq'ae lye nyuq laol, xilnye zongl laeq aeqmeel." 26 Tyulkaol, Yoshuyal yoqhhaeteel'ae xilnye zongl biq hhae, kaol yoqhhaeq lye yoqhhaeteel yaol Yiqsellyel cholyaeq e aqlaq ae'lye jiul du biq, kaol Yiqsellyel cholyaeqhael yoqhhaeteel'ae maq xyeq biq'ae. 27 Tyuqfu qiq nao, Yoshuyal lye yoqhhaeteel yaol Yeheqhuaq lye saelpodu hhei e milcaeq vae bi yil, kaol yaeqnao keellye huilzhongl'ae kaol Yeheqhuaq e jiltanq gae'lye, aeqzaeq cheq kaol eelcuq bi baq hhae.