Yalmoqlil cholyaeq yaol diq yinqzaeq biq vae
10
Ye'lulsa'lenq e zongmae Yaldo'niq Xiqdeq laoq Yoshuyal lye Ail milmae heeqmyel mael diqkoqzaeq biq, kaol mye lye zonglmye biq, Ail milmae heeqmyel mael'ae kaol Ail milmae heeqmyel e zongmae'ae zongl biq mael, Ye'lilge kaol Ye'lilge e zongmae'ae zongl biq laoqmyel hhae lye gaeq hhei biq, kaol Jibianl vae zhol e cholyaeqhael laoq Yiqsellyel cholyaeq nyegael hoqpinq tiaoqyoq cu deelhhei vae, kaol yoqhhaeteel onglci'ae baelzhol hhae lye yol gaeq hhei biq, 2 Jibianl laoq haeqheemyel milmae heeqmyel hhae, kaol zongmae e milmae heeqmyel laoqmyel hhae, Ail milmae heeqmyel mael taq'ae hhael heeq, kaol milmae heeqmyel cholyaeqhael gilzuqmyel aqha yobo'ae, tyulkaol, Ye'lulsa'lenq cholyaeqhael zhee gu gil biq hhae. 3 Ye'lulsa'lenq e zongmae Yaldo'niq Xiqdeq lye cholyaeq yaol moqheilheil du hhei, kaol Xiboqlunq e zongmae Hoqhanq, Yemol e zongmae Pi'lanq, Lajiq e zongmae Yaqfeiyal kaol Yiji'lunq e zongmae Diqbil'ae bi mol yil, gee: 4 "Noteel da'lal kaol ngaeq'ae baelzongl lael laeq lye geezaeq lil, kaol aedeeteel Jibianl milmae heeqmyel mael'ae diq li, Jibianl laoq Yoshuyal kaol Yiqsellyel cholyaeq nyegael hoqpinq tiaoqyoq cu deelhhei vae kaol'ae." 5 Tyulkaol, Yalmoqlil cholyaeq e zongmaehael onglci'ae, Ye'lulsa'lenq e zongmae, Xiboqlunq e zongmae, Yemol e zongmae, Lajiq e zongmae kaol Yiji'lunq e zongmae, xi ngaeq hhaeq laoq yoqhhaeteel e gilzuqmyel junduilhael gul'eeq hheikaol da'li, kaol Jibianl yiqsi yulboq'ae haqhhael diqkaeq hhei, kaol Jibianl vae diq maoqlye zongl hhae.6 Jibianl cholyaeq lye cholyaeq yaol Jiqjaq e haqhhael diqkaeq hhei myel vae zhol e Yoshuyal tyuqvae yil lye moqheilheil du hhei, kaol yoqhhaeq'ae geegaeq biq: "Aqlaq baqcuq aeqmyel noq e yaqhacheqzaq e cholyaeq'ae maeq guanq myel haeq zongl laeq; nol nae'naemyel da'lal kaol ngaeteel'ae jiul lael laeq, baelzongl lael laeq lye geezaeq lil; geeqzhoq naeq e milcaeq vae zhol e Yalmoqlil cholyaeqhael e zongmaehael hhaellaelmyel, ngaeteel'ae diq lael laeq kaol'ae." 7 Tyulkaol, Yoshuyal kaol haelzhol e yoqhhaeq nyegael daqzhangl qiqgael diq e dangbinkei e cholyaeqhael kaol zhee onglzaeq e aqha yobohael, Jiqjaq vae lye da'li gil. 8 Yeheqhuaq Yoshuyal'ae gee biq: "Yoqhhaeteel'ae maq gu kael, ngaeq lye yoqhhaeteel yaol noq e aqlaq'ae eemoq wae, kaol yoqhhaeteel noq e yiqsi'ae qiq hhaeq eiq maeq haoqtul deel ongl'ae." 9 Yoshuyal mqkiq mqqyemyel Jiqjaq ae'lye da'li, kaol qiqlaqmyel yoqhhaeteel'ae diq li biq. 10 Yeheqhuaq lye yoqhhaeteel yaol Yiqsellyel cholyaeq yiqsi'ae aeqbeeqlaeqleel myel bi peqyil hhei. Yoshuyal lye yoqhhaeteel yaol Jibianl vae guaeq'ei xyeq biq, kaol Boqheqlunq e tongqda gaelmae vae lye mael Yalxija kaol Maqjidal vae keellye, yoqhhaeteel'ae lyeq biq kaol xyeq biq hhae. 11 Yoqhhaeteel Yiqsellyel cholyaeq yiqsi ae'lye kisae hhei. Boqheqlunq milcaeq e tongqtyuq'ae gaeyil fu, Yeheqhuaq lye mqmae ae'lye heelsiq siqmae mael yoqhhaeteel e aeqhhaol taq'ae bi diq dayi, heelsiq mael Yalxija vae keellye diq gaeyi, kaol yoqhhaeteel yaol diq sil biq; heelsiq maellye diq sil mael laoq, Yiqsellyel cholyaeq lye maejyel maellye xyeqsil biq taq'ae hhael naeq wae siq.
12 Yeheqhuaq lye Yalmoqlil cholyaeq yaol Yiqsellyel cholyaeq'ae eemoq biq e tyuqfu qiq nao, Yoshuyal Yeheqhuaq'ae saeziq gee biq, Yiqsellyel cholyaeq e ma'ne yiqsi ae'lye gee:
"Neelmae o, Jibianl holtaq'ae songl deelhhei;
baehae o, Yalyaqlunq Longlkaeq holtaq'ae za deelhhei."
13 Goqja e cholyaeqhael diqrenq'ae zonglhoq biq fu keellye,
neelmae mael songl deelhhei vae,
baehae mael za deelhhei vae.
Silqinq xilmael Yasha'eq e Suqhhaq taq'ae cu deelhhei maeqngeel maeq? Neelmae mael mqmae onglci'ae songl deelhhei, nae'naemyel maq loq gayil mael qiqnao naomq zoq wae. 14 Xi qiq nao laefuq'ae paelsilmyel xi qiq nao aeqnaol'ae, Yeheqhuaq cholyaeq e yotyel mael'ae naelhaeq mael xi qiq nao laoqmyel qiqzael eiq maqza gol'ae, xilmael laoq Yeheqhuaq Yiqsellyel'ae daqzhangl bael diq biq kaol'ae. 15 Yoshuyal kaol yoqhhaeq nyegael qiqgael baelzhol e Yiqsellyel cholyaeqhael, Jiqjaq e haqhhael diqkaeq hhei myel vae hoq keelli vae.
Yalmoqlil e zongmae ngaeq hhaeq yaol deiqtyeq biq
16 Zongmae tyu ngaeq hhaeq kisae vae, kaol Maqjidal gonglbyu vae hoqhhaq deelhhei hhae. 17 Kaol cholyaeq Yoshuyal'ae geegaeq biq, gee: "Zongmae tyu ngaeq hhaeq yaol saelpopuq hhei aeqwae, gilzuqmyel Maqjidal gonglbyu vae hoqhhaq deelhhei hhae." 18 Yoshuyal gee: "Noteel haqlo lomae mee'nae siq mael gonglbyu byuheiq vae moqchiq deelhhei, kaol cholyaeq yaol tyuqvae moqheilheil du hhei, kaol yoqhhaeteel yaol bi fu'qye deelhhei. 19 Ngeelfeiq, noteel haeq dan'goq gil, kaol noteel e diqrenq'ae lyeq yil maoqhhae, kaol aeqnaolboq'ae lye yoqhhaeteel'ae diq biq, yoqhhaeteel yaol aeqyoyoq e milmae heeqmyel vae haeq bi ki do hhei, noteel e Momil Yeheqhuaq lye yoqhhaeteel yaol noteel e aqlaq'ae eemoq vae kaol'ae." 20 Yoshuyal kaol Yiqsellyel cholyaeqhael lye yoqhhaeteel yaol diq yinqzaeq byel biq, kaol yoqhhaeteel yaol xyeqmye biq fu keellye hhae, kaol yoqhhaeteel onglci'ae dyeqdeel siq e zholdeelsaeq hael laoq maeq diq do'li sael e milmae heeqmyel vae kisae do'li vae. 21 Haelzhol cholyaeqhael neesaelhhae'lye Maqjidal milcaeq'ae haqhhael diqkaeq hhei myel vae zhol e Yoshuyal e tyuqvae hoq keelli. Cholyaeq qiq hhaeq eiq Yiqsellyel cholyaeqhael'ae yulnye xilnye lye maeq gee peq biq'ae.
22 Yoshuyal gee: "Gonglbyu byuheiq mael moqpong hhei, kaol zongmae tyu ngaeq hhaeq yaol gonglbyu ae'lye sheeq duyi, kaol ngaeq e saeqvae sheeqlaeq." 23 Kaol cholyaeqhael tyulnye zongl vae, yoqhhaeteel lye Ye'lulsa'lenq e zongmae, Xiboqlunq e zongmae, Yemol e zongmae, Lajiq e zongmae kaol Yiji'lunq e zongmae, xi ngaeq hhaeq yaol gonglbyu ae'lye sheeq duyi vae, kaol Yoshuyal e tyuqvae sheeq keelli. 24 Yoqhhaeteel lye zongmae tyu ngaeq hhaeq yaol Yoshuyal e tyuqvae sheeq keelli fu, Yoshuyal lye haelzhol e Yiqsellyel cholyaeq yaol gul laeq, kaol yoqhhaeq nyegael bal yil e daqzhangldiq e yoheeqhael'ae gee biq: "Noteel laefuqboq'ae niq lael, kaol aeqkeel mael zongmae xihael e kongqlongl mael'ae nuq da hhei." Kaol yoqhhaeteel laefuqboq'ae niqli, kaol aeqkeel mael zongmae tyuhael e kongqlongl mael'ae nuq da hhei biq'ae. 25 Yoshuyal yoqhhaeteel'ae gee biq: "Noteel maq gu kael, maeq zongl gaeyil ongl yaevae lye haeq kei; neemaeha'lye qiqgiq maqguzaq myel ngeel maoqhhae, Yeheqhuaq laoq noteel diq maoqlye haelzhol e diqrenqhael'ae xilnye zongl biq maoqlye kaol'ae." 26 Aeqnaol, Yoshuyal lye zongmae tyu ngaeq hhaeq yaol xyeqsil biq, kaol aelbol ngaeq bol taq'ae pyeqcheeq da biq. Yoqhhaeteel yaol aelbol taq'ae pyeqcheeq da biq mael mqkiq'ae keellye hhae. 27 Neelmae leeqdo fu, Yoshuyal cholyaeq'ae sil e aeqhhaol mael aelbol taq ae'lye pyeqgae hhei, kaol yoqhhaeteel hoqhhaq gol e gonglbyu vae beiqdo hhei, kaol haqlo lomae mee'nae siq mael gonglbyu byuheiq vae baq deelhhei lye moqheilheil biq; haqlo xihael laoq yaeqnao keellye zadeel wae siq.
Haelnaeqmyel milmae heeqmyel mael diq yinqzaeq biq
28 Tyuqfu qiq nao, Yoshuyal lye Maqjidal milcaeq mael diqkoqzaeq biq, kaol maejyel maellye milmae heeqmyel e cholyaeqhael kaol zongmae yaol xyeq biq, kaol milmae heeqmyel onglci vae haelzhol cholyaeq yaol gilzuqmyel zonglmye biq, dyeqdeel siq e cholyaeq qiq hhaeq eiq maeq bi zholdeelsaeq'ae; yoqhhaeq Maqjidal zongmae'ae zongl biq mael, yilkaefu Ye'lilge zongmae'ae zongl biq laoqmyel hhae. 29 Yoshuyal kaol yoqhhaeq nyegael qiqgael baelzhol e Yiqsellyel cholyaeqhael, Maqjidal ae'lye Lilnaq vae yil, kaol Lilnaq vae diq li biq. 30 Yeheqhuaq lye Lilnaq kaol Lilnaq e zongmae yaol eiq Yiqsellyel cholyaeq e aqlaq'ae eemoq biq wae. Yoshuyal milmae heeqmyel xilmael'ae diq biq, kaol maejyel maellye milmae heeqmyel onglci vae haelzhol cholyaeq yaol xyeq biq vae, dyeqdeel siq e cholyaeq qiq hhaeq eiq maeq bi zholdeelsaeq'ae. Yoqhhaeq Lilnaq zongmae'ae zongl biq mael, yilkaefu Ye'lilge zongmae'ae zongl biq laoqmyel hhae.
31 Yoshuyal kaol yoqhhaeq nyegael qiqgael baelzhol e haelzhol e Yiqsellyel cholyaeqhael Lilnaq ae'lye Lajiq vae yil, kaol Lajiq'ae polyil boq'ae haqhhael diqkaeq hhei, kaol milmae heeqmyel xilmael'ae diq biq. 32 Yeheqhuaq lye Lajiq milcaeq mael Yiqsellyel cholyaeq e aqlaq'ae heilmoq biq aeqwae. Aeqnaol qiq nao, Yoshuyal lye Lajiq milcaeq mael diqkoqzaeq biq vae, maejyel maellye milmae heeqmyel onglci vae haelzhol cholyaeqhael yaol xyeq biq vae, xilmael laoq, yoqhhaeq Lilnaq vae haelzongl biq laoqmyel hhae. 33 Tyuqfu, Jisel e zongmae Heqlanq da'lal kaol Lajiq cholyaeqhael'ae baelzongl lael biq, kaol Yoshuyal lye yoqhhaeq kaol yoqhhaeq e cholyaeqhael yaol gilzuqmyel xyeq biq vae, dyeqdeel siq e cholyaeq qiq hhaeq eiq maeq bi zholdeelsaeq'ae.
34 Yoshuyal kaol yoqhhaeq nyegael qiqgael baelzhol e haelzhol Yiqsellyel cholyaeqhael Lajiq ae'lye Yiji'lunq vae yil, kaol Yiji'lunq'ae polyil boq'ae haqhhael diqkaeq hhei, kaol milmae heeqmyel xilmael'ae diq biq. 35 Tyuqfu qiq nao, Yoshuyal lye milmae heeqmyel mael diqkoqzaeq biq vae, kaol maejyel maellye milmae heeqmyel onglci e cholyaeqhael yaol xyeq biq vae. Tyuqfu qiq nao, Yoshuyal lye milmae heeqmyel onglci vae haelzhol cholyaeq yaol gilzuqmyel zonglmye biq vae; xilmael laoq, yoqhhaeq Lajiq milcaeq mael'ae haelzongl biq laoqmyel hhae.
36 Yoshuyal kaol yoqhhaeq nyegael baelzhol e haelzhol e Yiqsellyel cholyaeqhael Yiji'lunq ae'lye Xiboqlunq vae da'li, kaol milmae heeqmyel xilmael'ae diq biq, 37 Kaol Xiboqlunq mael diqkoqzaeq biq vae, maejyel maellye Xiboqlunq, Xiboqlunq e zongmae, Xiboqlunq hhae lye halza e milmae heeqmyel mael, kaol milmae heeqmyel onglci vae haelzhol cholyaeqhael yaol zonglmye biq vae, yoqhhaeq laoq dyeqdeel siq e cholyaeq qiq hhaeq eiq maeq bi zholdeelsaeq'ae, xilmael laoq, yoqhhaeq Yiji'lunq vae haelzongl biq laoqmyel hhae, kaol milmae heeqmyel onglci vae haelzhol cholyaeq yaol gilzuqmyel zonglmye biq vae.
38 Yoshuyal kaol yoqhhaeq nyegael qiqgael baelzhol e Yiqsellyel cholyaeqhael Diqbil vae hoq keelli, kaol milmae heeqmyel xilmael'ae diq biq hhae, 39 Diqbil kaol Diqbil hhae lye halza e milmae heeqmyel mael diqkoqzaeq biq, kaol Diqbil e zongmae yaol deiqtyeq biq, kaol maejyel maellye milmae heeqmyel onglci e cholyaeqhael yaol gilzuqmyel zonglmye biq vae, dyeqdeel siq e cholyaeq qiq hhaeq eiq maeq bi zholdeelsaeq'ae. Yoqhhaeq Diqbil kaol Diqbil e zongmae'ae zongl biq mael, yilkaefu Xiboqlunq, Lilnaq kaol Lilnaq e zongmae'ae zongl biq laoqmyel hhae.
40 Xilnye laol, Yoshuyal lye halza milcaeq e cholyaeqhael yaol diq yinqzaeq biq vae, tyuhael laoq, geeqzhoq naeq e milcaeq, Neilgaelvuq, balziq, tongqda vae zhol e cholyaeq kaol tyuqvae e zongmaehael ngeelvae, dyeqdeel siq e cholyaeq qiq hhaeq eiq maeq bi zholdeelsaeq'ae. Yoqhhaeq lye saeq hael ol hael gilzuqmyel zonglmye vae, xilmael laoq, Yiqsellyel e Momil Yeheqhuaq moqheilheil laoqmyel hhae. 41 Yoshuyal Jadiqsi Ba'niqyal ae'lye mael Jasal keellye diq keelyil, kaol Geshan halza milcaeq ae'lye mael Jibianl vae keellye diq keel. 42 Yoshuyal qiq pu ae'lye zongmae xihael yaol diq yinqzaeq biq, kaol yoqhhaeteel e milcaeq mael diqkoqzaeq biq, Yiqsellyel e Momil Yeheqhuaq Yiqsellyel gae'lye daqzhangldiq kaol'ae. 43 Tyulkaol, Yoshuyal kaol yoqhhaeq nyegael baelzhol e Yiqsellyel cholyaeqhael Jiqjaq e haqhhael diqkaeq hhei myel vae hoq keelli vae.