Yonaq Yeheqhuaq vae heeldoq gee biq
"Ngaeq'ae saeqlael yo'lael laeq fu,
Yeheqhuaq'ae geezaeq biq,
yoqhhaeq ngaeq'ae toq laeq vae;
ngael mil'oq vae lye gul gae'lael aeqmyel geezaeq biq,
nol ngaeq e yotyel mael gaeq vae.
3 Noq lye ngaeq yaol hhalnaqmyel vae beiqpuq do'laq,
eelcuq yul mael ngaeq'ae baqlongl byel laeq;
noq e eeldiqdiq, noq e eeldiq diqmae mael,
gilzuqmyel ngaeq'ae naqvuq laq.
4 Ngael gee: 'Ngaeq yaol noq e yiqsi ae'lye lyeqsae laeq,
ngael haelmillyekaol eiq vuqduq baqtul hheikaol,
noq e sholhaol mael'ae chifu maoq.'
5 Eelcuq lye ngaeq e aeqyil mael eetyeq laeq;
hhalnaqmyel e eelcuq lye ngaeq'ae baqlongl laeq;
eelcuq e haelsaeq lye ngaeq e vuqduq mael'ae leeltyeq byel laeq.
6 Ngael geeqzhoqhael e aeqkeel'ae leeqneq do keel laq,
milcaeq holhhaq e oheiq mael ngaeq'ae haeqfu eiq piqtyeq laeq.
Ngeelfeiq, Yeheqhuaq ngaeq e Momil o!
Nol ngaeq e aeqyil mael duqhongq hongqmae ae'lye ee da hoqlaq.
7 Ngaeq e aeqyil mael nyeq'ei ta nyeq'ei maeq hhaeq fu,
Yeheqhuaq vae nyuqdu yae;
ngaeq e heeldoq mael noq e sholhaol vae do'li,
kaol noq e yiqsiboq'ae keellael.
8 Qiqgiq yilsi maqza myel e
moqgoq mael'ae heelzaeq e cholyaeqhael,
aeqdilmyel yoqhhaeteel'ae neemae maeqpaelmyel gaeq biq e Momil'ae deelsae hhei vae.
9 Ngeelfeiq, ngael laoq,
meeqyaevae lye e saeziq maellye noq'ae baqheel maoq.
Ngael xuqyuanlkei gol mael, ngael aeqdilmyel zongl hhaeq.
Jiul'en mael laoq Yeheqhuaq ae'lye lael hhae."
10 Yeheqhuaq ngaeqdyel mael'ae moqheilheil biq laol, ngaeqdyel lye Yonaq yaol milgee vae myedu hoq hhei biq vae.