Yonaq Yeheqhuaq e saeziq mael naelhaeq vae
3
Yeheqhuaq e saeziq mael Yonaq vae yol yo'li biq, gee: 2 "Waekei, Niqniqvei haeqheemyel e milmae heeqmyel vae yil. Ngael noq'ae moqheilheil biq maoqlye saeziq mael, tyuqvae milmae heeqmyel e cholyaeqhael'ae yotyel ha'lye geedu hhei biq." 3 Yonaq Yeheqhuaq e saeziq mael naelhaeq kaol deelsae vae, Niqniqvei'ae yil vae. Niqniqvei laoq Momil'ae lye fu'li'laol, haeqheemyel e milmae heeqmyel hhae, suq nao kaolmaoqlaol maeq deeldyu ongl'ae.Niqniqvei cholyaeqhael neemae paellael
4 Yonaq milmae heeqmyel vae do'li kaol qiq nao deel vae, yotyel ha'lye geedu hhei, gee: "Yuqqyel nao aeqnaol laoq, Niqniqvei laoq zonglmye maoqlye wae."
5 Niqniqvei cholyaeqhael Momil'ae xiangxinl vae. Cholhae ae'lye mael yaeqguq'ae keellye ziq e haeqpael pyeqcheeq da hhei, kaol maeq zaeq myel zhol gil. Xilnye zongl mael laoq, neemae paellael wae lye hhae. 6 Xilnye zongl gil mael Niqniqvei e zongmae'ae gaeq hhei biq. Tyulkaol, yoqhhaeq tullael kaol zongmae duqtyel ae'lye gaeyi, zongmae e poljye mael heiga hheikaol ziq e haeqpael pyeqcheeq da hhei, kaol haeqlyel mael vae zholgae hhei. Xilnye zongl mael laoq, neemae paellael wae lye hhae. 7 Zongmae e saeziq mael Niqniqvei milcaeq e cholyaeqhael'ae gee keelyil biq, gee: "Xilmael laoq zongmae kaol yoqhhaeq e zhiqmoqhael e minllinl mael, gee: 'Cholyaeq haoq, laoqhaol jyeqyaeq haoq, aeqnuq haoq, aqciq eiq, gilzuqmyel qiqgiq maeq hhae zaeq fufu'ae, kaol maeq hhae zaeq maeq hhae dol'ae. 8 Cholyaeq haoq, laoqhaol jyeqyaeq haoq, gilzuqmyel ziq e haeqpael pyeqcheeq maoqhhae. Aeqsul eiq aqha halzoqmyel Momil'ae geezaeq biq maoqhhae. Aeqsul eiq xinqlalmyel gaelmae ae'lye deelpuhoq laeq maoqhhae, ochoq eiq maeq tyel hhaeq vae. 9 Aeqsul loq maeq, aeqgael Momil nyuqpael hhei'laol, aedeeteel'ae faqhoq guaeq'ei maeq kei laeq laol maeq sil kael maeqhe.'"
10 Cholyaeqhael xinqlalmyel gaelmaehael ae'lye deelpuhoq laeq maoqhhae. Momil yoqhhaeteel haelzonglhael mol hhei biq. Momil nyuqpael hhei'laol, gee gol e zai'nanl mael yoqhhaeteel'ae maeq bi yo'li vae.