Yonaq teel eiq maeq hhaol biq'ae
4
Yonaq teel eiq maeq hhaol biq kaol faqhoqkei tullaeq. 2 Yoqhhaeq Yeheqhuaq'ae heeldoq gee biq: "Yeheqhuaq o! Ngael ngaeq e milcaeq vae zhol fu, xilnye gee gol maeqngeel maeq? Ngael loq lil, nol laoq enhuil kaol hhaoqsaeqsaeq kiq mael za e Momil'ae, nol laoq hhaoqli hhaoqzaeqlye laoq faqhoq maeq kei'ae, duqgongqgongqlye neemae maeqpaelmyel gaeq mael za, nol nyuqpael hhei'laol, zai'nanl tyulmael maeq bi yo'lael vae. Ngael xilmael gae'lye, nae'naemyel Tashi vae kihhaq zaq yil'ae lil. 3 Yeheqhuaq o! Yaeqmeel ae'lye ngaeq e aeqyil mael heil hoqli aeqkaovae, ngael sil hhei mael dyeqdeel taq'ae dyel'eiq hhael hhaeq yae."Momil lye haexyel aelbol qiq bol saelpodu hhei
4 Yeheqhuaq geehoq biq: "Nol xilnye faqhoqkei maeqhael hoq?"
5 Yonaq milmae heeqmyel ae'lye duyi, milmae heeqmyel e neeldu aelheiq boq'ae zholgae hhei. Yoqhhaeq tyuqvae haelcul qiq ssul diqkaeq hhei, caelsiq holhhaqboq'ae zholgae hhei, kaol milmae heeqmyel xi qiqgael haelmillye peqyil hhei maeq lye fu. 6 Momil Yeheqhuaq lye haexyel aelbol qiq bol saelpodu hhei, bi heeqda lal kaol Yonaq taq'ae hhael gao da'lal, aelbol caelsiq maellye yoqhhaeq e vuqduq mael baqkaeq hhei biq, yoqhhaeq'ae maeq bi zholsaeq lye kaol'ae. Yonaq aelbol xi qiq bol gae'lye zhee hhaol biq'ae. 7 Aeqnaol qiq nao mqbaebae lael fu, Momil lye aeqzuq qiq yaeq saelpodu hhei, kaol haexyel aelbol mael zaeq nu biq, tyulnye laol, haexyel aelbol mael kuga vae. 8 Neelmae du'lal fu, Momil lye neeldu aelheiq boq ae'lye zaeqxil honglqye'lye saelpodu hhei. Aeqcael caelmae mael Yonaq e vuqduq mael'ae pe biq, kaol yoqhhaeq yaol pe mee biq, kaol yoqhhaeq sil maoqlye geezaeq biq, gee: "Ngael sil hhei mael dyeqdeel taq'ae hhael hhaeq yae."
9 Momil Yonaq'ae gee biq: "Nol haexyel aelbol xi qiq bol gae'lye ngaeq'ae faqhoqkei laeq maeqhael hoq? Yonaq gee: "Ngael faqhoqkei sil hhei kaol'eiq hoq'ae."
10 Yeheqhuaq gee: "Haexyel aelbol xi qiq bol noq lye kae hhei maeqngeel, noq lye til heeqda hhei maeqngeel, qiq mil'ae lye heeqda lal laol, qiq mil'ae lye sil hhei, nol laoq xuldyulmyel fuyo biq. 11 Niqniqvei saeqvae haeqheemyel milmae heeqmyel vae laoq, laqsseq laeqbael maeq loq myel cholyaeq laoq qyelniq tongl (120000) zhol wae siq, laoqhaol jyeqyaeq eiq zhee zhol. Ngael aeqcheekaol maeq fuyo laeq?"