Shuil shezaeqhael e yoheeq Saqgai
19
Yesu Ye'lilge vae do'li, milmae heeqmyel ae'lye deelpol duyil. 2 Tyuqfu, tyuqvae Saqgai lye gul biq e yoha qiq hhaeq zhol'ae. Yoqhhaeq laoq shuil shezaeqhael e yoheeq'ae. 3 Yoqhhaeq Yesu laoq haelmillye qiq hhaeq'ae maeq lye mol goq biq hhae, ngeelfeiq, yoqhhaeq cholsiq nil, kaol cholyaeqhael onglci'ae lye Yesu yaol maeq hhae mol congl biq'ae. 4 Tyulkaol, yoqhhaeq cholyaeqhael e laefuqboq'ae ki du'li, Yesu yaol mol maoqlyekaol siqpyu'laq'oq e aelbol mael'ae pa da'li, Yesu tyuqvae deelpol duyi maoqlye kaol'ae. 5 Yesu tyuqvae keellael, aqtaqboq'ae fu da hhei, kaol yoqhhaeq'ae gee biq: "Saqgai, wae gaeyi! Yaeqnao ngael aeqdilmyel notoq'ae haq maoqlye lil." 6 Kaol yoqhhaeq nae'naemyel gaeyi vae, zhee hhaol gae'lael aeqmyel Yesu'ae sheeqcaq biq'ae. 7 Cholyaeqhael mol hhei biq laol hhaellaelmyel geezil geezae gil'ae, gee: "Yoqhhaeq golsiq za e cholyaeq toq'ae haq li'ae." 8 Saqgai haoqtul lael kaol Hhaoqsongl'ae gee biq: "Hhaoqsongl o! Naelhaeq, ngael laoqhaol'ae halzahael qiq pa laoq saeqyaeqhael'ae heil biq maoqlye lil, ngael aeqsul'ae zaqgiqgiqzaq gol biq kaollaoq, tyutaeq'ae yuq pa peiqhoq biq maoq." 9 Yesu yoqhhaeq'ae gee biq: "Yaeqnao jiul'en mael xitoq'ae yo'lael vae, yoqhhaeq eiq Yalboqlahanl e houldail kaol'ae. 10 Cholyaeq Yaqyo yi mael laoq, Momil e gaelmae ae'lye deelbael e cholyaeqhael'ae saelpo yi kaol jiul yi hhae."Yaqhacheqzaq e cholyaeq qyel hhaeq e dullaelmyel guqjin
11 Yesu Ye'lulsa'lenq'ae keelli maoq fu, cholyaeqhael laoq Momil e Goqja mael mol du'lal goqbiq vae lye kei gil biq hhae. Tyulkaol, yoqhhaeteel saeziq xihael naelhaeq gil siq fu, Yesu dullaelmyel guqjin yol qiq mal gee gil biq: 12 "Maduq zhee za e yoha toq ae'lye dyeqlal e cholyaeq qiq hhaeq, gaelmaolsae'lye vae yil kaol zongmae geiq e laqtaq heil hheikaol hoqlal maoqlye hhae. 13 Yoqhhaeq lye aeqyoq e yaqhacheqzaq e cholyaeq qyel hhaeq yaol gul laeq, yoqhhaeteel'ae dyuqbaq qiq hhaeq'ae qiqca (1000) heilmoq hhei biq, gee: 'Noteel ngael hoq keellael fu keellye senyil mulzaeq yil gil.' 14 Ngeelfeiq, aeqyoq e goqja e cholyaeqhael laoq yoqhhaeq'ae neemasu zaq biq, kaol cholyaeq yaol cho'lyeq yil lye moqheilheil du hhei, gee: 'Ngaeteel cholyaeq xitaeq yaol zongmae maeq bi geiq kaol ngaeteel'ae maeq bi guanqliq goq yae.' 15 Yoqhhaeq zongmae geiq e laqtaq heil hheikaol hoqlal vae, kaol dyuqbaq heil yo e yaqhacheqzaq e cholyaeqhael yaol gul laeq, yoqhhaeteel dyuqbaq haeldyul zonglzaeq laeq maeq lye loq maoqlye hhae. 16 Laefuq fuqli qiq hhaeq lael kaol gee: "Hhaoqsongl o! Noq e qiqca (1000) dyuqbaq maellye qiqtongl (10000) zonglzaeq laeq aeqwae. 17 Hhaoqsongl yoqhhaeq'ae gee biq: 'Zongl mael meeq she! Meeq e yaqhacheqzaq e cholyaeq o, nol aeqdilmyel mildi'lye e silqinq mael'ae neemae xyelpu maqpu, kaol nol laoq milmae heeqmyel qyel gael guanqliq e laqtaq za'ae!' 18 Aeqnaol e qiq hhaeq keellael, gee: 'Hhaoqsongl o! Noq e qiqca (1000) dyuqbaq maellye ngaeqca (5000) zonglzaeq laeq aeqwae.' 19 Tyulkaol, hhaoqsongl xitaeq'ae gee biq: 'Nol milmae heeqmyel ngaeq gael guanqliq o!' 20 Baeqjyelboq e qiq hhaeq keellael, gee: 'Hhaoqsongl o! Noq e dyuqbaq qiqca (1000) mael, ngaeq lye haeqfu eiq haeqpael onglci'ae heilhhaq deelhhei lil. 21 Nol laoq aeqlyeq maeq lyeq lael e cholyaeq'ae, noq lye heildeel hhei maeqngeel feiq heilzaeq yil maoqlye hhae, noq lye kae hhei maeqngeel feiq heillezaq yil maoqlye hhae.' Tyulkaol, ngael haeqfu eiq noq'ae gu laq hhae. 22 Hhaoqsongl tyutaeq yoqhhaeq'ae gee biq: 'Duqlaq e yaqhacheqzaq e cholyaeq! Ngael nol gee e saeziq maellye noq'ae golsiq za'ae lye gee maoq. Nol laoq ngael aeqlyeq maeq lyeq lael, ngaeq lye heildeel hhei maeqngeel feiq heilzaeq, ngaeq lye kae hhei maeqngeel feiq heillezaq hhae lye loq'ae. 23 Nol aeqcheekaol ngaeq e dyuqbaq mael yinqhangq vae maeq heildeel yil lilmaeq? Tyulnye laol, ngael hoqlal fu, aelyaeq aeqmae myel qiqgael hhae heilzaqhoq laeq wae.'
24 Kaol yoqhhaeq dongqpyeq'ae haoqtul deelhhei e cholyaeqhael'ae gee biq: 'Yoqhhaeq e dyuqbaq qiqca (1000) mael diqkoq laeq, kaol qiqtongl (10000) za qiq hhaeq'ae heil hhei biq.' 25 Ngeelfeiq, yoqhhaeteel yoqhhaeq'ae gee biq: 'Hhaoqsongl o! Yoqhhaeq'ae dyuqbaq qiqtongl (10000) za vae!' 26 Hhaoqsongl geehoq biq: 'Ngael noteel'ae geegaeq laeqngeel, za hael'ae laoq, heil biq maoq siq; maqza hael'ae laoq, yoqhhaeq'ae halzahael dyel'eiq diqkoqzaeq biq maoq. 27 Ngaeq yaol yoqhhaeteel e zongmae maeq bi geiq laq e diqrenq tyuhael yaol saeqvae ee'laeq, kaol ngaeq e yiqsiboq ae'lye xyeq biq!'"
Yesu maduq zhee za aeqmyel Ye'lulsa'lenq vae do'li
28 Yesu saeziq xihael gee byel hhei'laol, cholyaeqhael e laefuqboq'ae Ye'lulsa'lenq'ae da'li maoqlye deel'ae. 29 Yesu Boqfaqqiq pusiq kaol Boqdalniq pusiq vae deel niqli maoq fu, Zhoqcae Geeqzhoq lye gul e milcaeq vae keellael, kaol laqcaq niq nulhhaeq yaol moqheilheil du hhei. 30 Gee: "Noteel laefuqboq e pusiq'ae yil gil, do'li laol, tyuqvae mao'lyu lyuyaeq qiq keel kaltoq deelhhei e mol lael'ae, cholyaeq qiq hhaeq eiq maeq ziq yo wae siq, keelpyel hheikaol cheellaeq. 31 'Aeqchekaol xilnye zongl gil lilmaeq lye ochoq naelhaeq lael kaollaoq, noteel xilnye geehoq biq: 'Hhaoqsongl mao'lyu lyuyaeq mulyo biq hhae.'" 32 Moqheilheil duyil e niq nulhhaeq yil vae, yoqhhaeteel mol hhei biq mael Yesu gee gol laoqmyel hhae. 33 Yoqhhaeteel mao'lyu lyuyaeq mael keelpyel hhei fu, mao'lyu e hhaoqsongl yoqhhaeteel'ae naelhaeq biq: "Noteel aeqcheekaol mao'lyu lyuyaeq mael keelpyel lilmaeq?" 34 Yoqhhaeteel gee: "Hhaoqsongl mao'lyu lyuyaeq mulyo biq hhae."
35 Yoqhhaeteel lye mao'lyu lyuyaeq mael Yesu zael'ae cheellaeq biq laol, aeqyoyoq e aelhongq mael mao'lyu lyuyaeq e dolcheq mael'ae heil da hhei biq, kaol Yesu yaol bi ziq da'li vae. 36 Yesu mao'lyu lyuyaeq ziq hheikaol deel fu, cholyaeqhael lye aeqyoteel e nildu'ae dum hhei e aelhongq mael gaelmae'ae beiqhoq deelhhei biq.
37 Yoqhhaeq Zhoqcae Geeqzhoq e tongqtyuq vae deel niqli fu, haelnaeq naeqmaemyel laqcaqhael yoqhhaeteel bael mol e shenqjiqhael gae'lye, Momil laoq henq'ae lye hhaol gae'lael aeqmyel gul bonggaebyel'ae, 38 Gee:
"Hhaoqsongl e cholmil maellye lael e qiq hhaeq laoq
maeqdaeqhhaeq'ae!
Mqmae taq'ae laoq hoqpinq mael za'ae,
mqmae taq'ae hhaelgao gao'li vae laoq rongqyaol za'ae!"
39 Cholyaeqhael onglci'ae Faqlilsail cholyaeq mee'nee hhaeq yoqhhaeq'ae gee biq: "Laoqsi, noq e laqcaqhael'ae gaezaeq biq! 40 Yesu geehoq biq: "Ngael noteel'ae geegaeq laeqngeel, cholyaeq xihael yotyel maq du kaol feiq, haqlo mael eiq gul tullaeq'ae!"
Yesu Ye'lulsa'lenq gae'lye nyuqsaeq biq kaol nyul'ae
41 Yesu Ye'lulsa'lenq vae keelli maoq fu, milmae heeqmyel tyulmael mol hhei biq, Ye'lulsa'lenq'ae peqlal maoqlye mael gae'lye nyuqsaeq biq kaol nyul'ae. 42 Gee: "Ye'lulsa'lenq e cholyaeqhael o, ngael noteel'ae yo'lael maoqlye e neesaelhhae e silqinq mael, aeqdilmyel noteel'ae zhee bi loq goq yae lye nyuqlil. Ngeelfeiq, silqinq xihael yaeqmeel noteel'ae bi zonglhhaq hhae, kaol noteel e ma'ne mael maeq bi fudu ongl'ae. 43 Naohaeq keellael goqbiq vae, noteel e diqrenq congqciq ciqlongl hheikaol noteel'ae diq lael maoqlye hhae, noteel yaol ongtyeq hhei, dongqpyeq dongqjyel myel noteel yaol baqlongl laeq. 44 Noteel laoq Momil noteel'ae fupol gol biq e naohaeq mael teel eiq maeq loq gil biq. Tyulkaol, noteel e chouqrenqhael lye noteel e milmae heeqmyel mael, haqlo qiq siq holtaq'ae qiq siq maeq bi zadeel myel zonglmye hhei, noteel kaol noteel onglci'ae zhol e noteel e yaeqguqhael eiq zonglmye maoqlye hhae."
Yesu lye sholhaol vae moqgoq ongqzaeq hael yaol lyeqdu biq
45 Yesu sholhaol vae do'li, kaol zhoqmyel tyuqvae moqgoq ongqzaeq vulzaeq e cholyaeqhael yaol lyeqdu byel biq. 46 Yoqhhaeteel'ae gee biq: "Momil e Suqhhaq taq'ae xilnye cu deelhhei:
'Ngaeq e heelhaol mael laoq heeldoq gee e heelhaol'ae,
ngeelfeiq, noteel lye lolbiq diqkoqzaeq e cholyaeq e laoqhaol zonglpeq vae!'"
47 Yesu naochomyel sholhaol vae cholyaeqhael'ae geemyeq gil biq, jilsizhangqhael kaol Momil e saeziq mael loq e laqkiqhael kaol cholyaeqhael e yoheeqhael yoqhhaeq yaol xyeq goq biq hhae. 48 Ngeelfeiq, loqho maeq saelpodu hhei ongl biq'ae, cholyaeqhael gilzuqmyel naeqbol haellye yoqhhaeq geemyeq e saeziq mael naelhaeq gil kaol'ae.