Ja'naq milcaeq e yulyaeq mulzaeq mael
2
Dilsan tian, Ja'lillil milcaeq e Ja'naq vae yulyaeq mulzaeq hhae, Yesu e aeqmae tyuqvae zhol hhae; 2 Yesu kaol laqcaqhael vae eiq yulyaeq bael mulzaeq yi lye gul biq hhae. 3 Zilbaeq dol byel vae, kaol Yesu e aeqmae yoqhhaeq'ae gee biq: "Yoqhhaeteel'ae zilbaeq maqza biq vae." 4 Yesu gee: "Aeqmaea nol aeqcheekaol ngaeq'ae xilmael bi guanq laeq lilmaeq? Ngaeq e naohaeq maeq keel'ae siq." 5 Yoqhhaeq e aeqmae yaqhacheqzaq e cholyaeqhael'ae gee biq: "Yoqhhaeq noteel'ae aeqchee zongl yil lye moqheilheil laeq laol aeqchee zongl yil gil." 6 Tyuqvae haqlo eelzhol koq mael za'ae, eelzhol hae qiq mal vae eiq eelcuq niq sul bongq xyedo dyel'ae, xilmael laoq Yoqtail cholyaeqhael zonglshol e gui'liq zongl gil fu mul hhae. 7 Yesu yaqhacheqzaq e cholyaeqhael'ae moqheilheil biq gee: "Eelzholhael'ae eelcuq xye bong do hhei!" Kaol yoqhhaeteel lye eelzhol myeqheiq'ae keellye xye bong do hhei vae. 8 Yesu yoqhhaeteel'ae moqheil yol heil biq gee: "Yaeqmeel kuq du hhei, kaol yulyaeq mulzaeq mael'ae guanq e qiq hhaeq'ae baq yil biq!" Kaol yoqhhaeteel baq yil vae. 9 Guanq e qiq hhaeq eelcuq maellye peqlal e zilbaeq mael dol fufu hhei vae, ngeelfeiq, haeqvae lye lael hhae lye maeq loq'ae, eelcuq kuq e yaqhacheqzaq e cholyaeqhael loq dyul wae. Tyulkaol, guanq e qiq hhaeq lye yaqyo alsheq yaol gul laeq, 10 Kaol yoqhhaeq'ae gee biq: "Aeqsul eiq hhael meeq e zilbaeq mael laefuq baqda hhei'ae, daeqxihael doldye hhei'laol, maeqmeeq mael caiq baqda hhei hhae, ngeelfeiq, nol laoq meeq e zilbaeq mael yaeqmeel'ae taeq keel'ae she." 11 Xilmael laoq Yesu Ja'lillil milcaeq e Ja'naq vae, laefuq fuqli zongl e shenqjiq qiq mal'ae. Yoqhhaeq aeqyoq e rongqyaol mael bi mol du'lal vae, kaol yoqhhaeq e laqcaqhael yoqhhaeq'ae xiangxinl vae. 12 Silqinq xilmael aeqnaol, Yesu, yoqhhaeq e aeqmae, aeqnilhael kaol laqcaqhael Jabaiqnongq vae gaeyil vae, tyuqvae hae'nae nao myel maeq zhol yo'ae.Yesu lye sholhaol mael zonglshol hhei vae
13 Yoqtail cholyaeq e Yuq'yeqjyeq keellael goqbiq vae, kaol Yesu Ye'lulsa'lenq'ae da'li vae. 14 Yoqhhaeq sholhaol e dyekaeq vae aeqnuq, aqciq kaol haoqhaoq ongqzaeq gil e cholyaeqhael, kaol tyuqvae zhol deelhhei e pulziq heilpael e cholyaeqhael yaol mol hhei biq, 15 Kaol alca maellye caxu qiq ca zongldu hhei, kaol sholhaol ae'lye cholyaeqhael yaol, kaol aeqnuq aqciqhael lyeqdu biq, kaol pulziq heilpael e cholyaeqhael e pulziq mael xyehael biq, kaol zaelzhee mael eiq deiqlol biq; 16 Kaol haoqhaoq ongqzaeq e cholyaeqhael'ae gee biq: "Moqgoq xihael baq duyil, ngaedae e heelhaol mael gaiziq haq geiqzaq gil." 17 Kaol Yesu e laqcaqhael Momil e Suqhhaq taq'ae cu deelhhei mael nyuq tullaeq biq: "Ngael noq e heelhaol gae'lye zoqgiq kaol neemae mael aeqzaeq doq laoqmyel zongl yae." 18 Tyulkaol, Yoqtail cholyaeq yoqhhaeq'ae naelhaeq biq: "Nol silqinq xihael zongl e laqtaq za lil lye ngaeteel'ae shenqjiq zonglfu hhei laeq." 19 Kaol Yesu yoqhhaeteel'ae geehoq biq: "Noteel heelhaol mael cheqba hhei, ngael suq nao maeq jyeqli myel heelhaol mael cutulhoq hhei maoq." 20 Yoqtail cholyaeq gee: "Heelhaol xilmael yuqqyel koq hoq cu do wae, nol suq nao maeq jyeqli myel cutulhoq hhei ongl lilmaeq?" 21 Qiqshiq laoq, Yesu gee e heelhaol xilmael laoq yoqhhaeq e aeqhhaol mael'ae gee hhae. 22 Kaol Yesu cholsil onglci ae'lye dyeqhoqlal aeqnaol, laqcaqhael yoqhhaeq gee gol e saeziq xihael nyuq tul hoqlaeq biq, kaol Momil e Suqhhaq taq'ae cu deelhhei mael kaol Yesu haelgee e saeziq mael xiangxinl vae.
Yesu cholyaeq e neemae onglci'ae nyuq mael loq'ae
23 Yesu Ye'lulsa'lenq vae Yuq'yeqjyeq gol fu, haeldyul dyulmae cholyaeqhael yoqhhaeq zongl e shenqjiq mael mol vae, kaol cholyaeqhael yoqhhaeq'ae xiangxinl vae. 24 Ngeelfeiq, Yesu laoq yoqhhaeteel'ae maeq xinlrenl'ae, Yesu laoq haelzhol cholyaeq yaol loq kaol'ae, 25 Kaol cholyaeq qiq hhaeq eiq yoqhhaeq'ae cholyaeq haelmillye hhae lye maeq geedu biq kael'ae, Yesu laoq cholyaeqhael e neemae onglci'ae aeqchee nyuq hhae lye mael loq kaol'ae.