Cholyaeqhael yaol zail qiq pu bi bo duhoq hhei maoqhhae
3
Niqgediqmuq lye gul biq e Faqlilsail cholyaeq qiq hhaeq zhol'ae. Yoqhhaeq laoq Yoqtail cholyaeq e zhiqmoq'ae. 2 Mqkiq'ae yoqhhaeq Yesu tyuqvae lael, kaol yoqhhaeq'ae gee biq: "Labiq, nol haelzongl e shenqjiq xihael Momil maeq baelzhol kaollaoq, cholyaeq qiq hhaeq eiq maeq zonglkeel ongl'ae, tyulkaol, ngaeteel nol laoq Momil zaellye lael e laoqsi'ae lye loq lil." 3 Yesu geehoq biq: "Ngael aeqdilmyel noq'ae geegaeq laeqngeel, cholyaeq yaol zail qiq pu maeq bi bo duhoq hhei kaollaoq, Momil e Goqja mael maeq hhae mol'ae." 4 Niqgediqmuq gee: "Cholyaeq yaeqmoq wae, haelmillye zail qiq pu bi bo duhoq hhei laeq? Aeqmae e oqma vae byuq do hoqli kaol zail qiq pu bi bo du hhei ongl maeq?" 5 Yesu geehoq biq: "Ngael aeqdilmyel noq'ae geegaeq laeqngeel, cholyaeq yaol eelcuq kaol senllinq lye bo du hhei maeqngeel kaollaoq, Momil e Goqja'ae maq hha do'li'ae. 6 Cholyaeq e aeqhhaol lye bo du hhei hael laoq aeqhhaol ngeelvae, yohael lye bo du hhei hael laoq yohael hhae lye ngeelvae. 7 Kaol ngael noq'ae 'noteel aeqdilmyel zail qiq pu bi bo duhoq hhei maoqhhae' lye gee gae'lye gaqmaq haq zuq. 8 Zaeqxila mael haeqvae bo yil goq laol haeqvae bo yil, nol zaeqxil e yotyel mael gaeq vae, ngeelfeiq, haeqvae lye bo laeq kaol haeqvae bo yil lye maeq loq'ae; kaol senllinq lye bo du hhei e haetaeq eiq xilnye ngeelvae." 9 Niqgediqmuq gee: "Haelmillyekaol xilnye ngeel kiq laeq?" 10 Yesu geehoq biq: "Nol laoq Yiqsellyel cholyaeq e laoqsi'ae, silqinq xihael maeq loq laeq wae siq maeq? 11 Ngael aeqdilmyel noq'ae geegaeq laeqngeel, ngaeteel loq mael maoqlaol maeq gee yil; mol gol mael maoqlaol maq zoqzenl yil, ngeelfeiq, noteel laoq ngaeteel zoqzenl mael maq mul nae. 12 Ngael noteel'ae milcaeq taq e silqinq mael geegaeq biq, noteel laoq maeq xiangxinl, mqmae taq e silqinq mael noteel'ae geegaeq biq kaollaoq, haelmillyekaol xiangxinl laeq? 13 Mqmae ae'lye gaeyi e Cholyaeq Yaqyo maoqlaol cholyaeq qiq hhaeq eiq mqmae vae maq da'li gol'ae. 14 Moxi diqsheelleeldye vae geeqsheel maellye zongldu hhei e oqhol mael haelmillye baqqei hhei'laol, Cholyaeq Yaqyo yaol eiq aeqdilmyel tyulnye bi baqqei hhei ngeelvae, 15 Xilnye laol, yoqhhaeq'ae xiangxinl e cholyaeq laoq haeqfu eiq zadeel e aeqyil mael hhamul wae.16 Momil milcaeq taq e cholyaeqhael'ae gaeq biq, kaol aeqyoq e Yaqyo qiqhhaeq hhaeqli mael eiq yoqhhaeteel'ae biq hhei biq, yoqhhaeq'ae xiangxinl e cholyaeqhael maeq bi myeyil dyul maeqcilmyel, haeqfu eiq zadeel e aeqyil mael bi mul'ae. 17 Momil yoqhhaeq e Yaqyo yaol milcaeq taq'ae moqheilheil du hhei mael laoq, cholyaeqhael'ae golsiq za'ae lye bi gee yi maeqngeel'ae, cholyaeqhael yaol yoqhhaeq gae'lye bi deqjiul maoqlye hhae. 18 Yoqhhaeq'ae xiangxinl e cholyaeq laoq, golsiq za'ae lye maeq gee biq wae; maeq xiangxinl e cholyaeq'ae laoq, golsiq za'ae lye gee biq vae, yoqhhaeq Momil e Yaqyo qiqhhaeq hhaeqli'ae maeq xiangxinl kaol'ae. 19 Aeqcael mael milcaeq taq'ae yi vae, milcaeq taq e cholyaeqhael laoq aeqyoyoq e xinqweiq mael duqlaq gae'lye, aeqcael mael'ae maeq hhaol myel nahongq mael'ae hhaol biq hhae, kaol yoqhhaeteel'ae golsiq za'ae lye bi gee mael laoq xihael gae'lye hhae. 20 Duqlaq myel zongl e cholyaeqhael laoq aeqcael mael'ae neemasu biq, kaol aeqcael mael'ae maeq niqlael, aeqgael yoqhhaeq e xinqweiq mael mol du'lal maeqhe lye kaol'ae. 21 Ngeelfeiq, zhen'liq zongl e cholyaeqhael laoq aeqcael mael'ae niqlael'ae, kaol yoqhhaeq e xinqweiq mael laoq Momil e saeziq maellye zongl hhae lye bi mol du'lal maoqlye hhae."
Yesu kaol shelxiqzongl e Yoqhanl
22 Silqinq xilmael aeqnaol, Yesu kaol laqcaqhael Yoqtail milcaeq vae keelyil vae. Yesu yoqhhaeteel nyegael tyuqvae zholgae hhei, kaol shelxiqzongl gil biq hhae. 23 Yoqhanl eiq Sa'lenq milcaeq vae niqli e Ai'nenl vae shelxiqzongl hhae, kaol haelnaeqmyel cholyaeqhael tyuqvae shelxiq yil gil hhae, tyuqvae laoq eelcuq naeq kaol'ae. 24 Tyuqfu, Yoqhanl yaol laoqgaiqkei laoqhaol vae maeq koqlongl biq wae siq.
25 Yoqhanl e laqcaqhael kaol Yoqtail cholyaeq qiq hhaeq, zonglshol e gui'liq gae'lye geegae tullaeq. 26 Yoqhhaeteel Yoqhanl tyuqvae lael, kaol yoqhhaeq'ae gee biq: "Labiq, naelhaeq, yilkaefu noq nyegael Yoqdanl Lolbaeq e neeldu aelheiq vae, nol yoqhhaeq'ae zoqzenl bael kei biq e tyutaeq, yoqhhaeq eiq shelxiqzongl hhae, kaol haelnaeqmyel cholyaeqhael yoqhhaeq e tyuqvae yil byel vae." 27 Yoqhanl geehoq biq: "Mqmae ae'lye yoqhhaeq'ae biqga hhei biq maeqngeel kaollaoq, cholyaeqhael qiqgiq eiq maq hhamul'ae. 28 Noteel aeqyoyoq ngaeq'ae zoqzenl bael kei laeq: Ngael Jidu maeqngeel yil lye gee gol wae, ngael laoq ngaeq'ae moqheilheil laeq kaol yoqhhaeq laefuq'ae lael dyul oqyil. 29 Yaeqmiq alsheq yaol sheeqzaeq e cholyaeq laoq yaqyo alsheq'ae. Yaqyo alsheq e yelchoq laoq haoqtul deelhhei, kaol yaqyo alsheq e yotyel gaeq hhei'laol zhee hhaol wae. Tyulkaol, ngaeq e neemae onglci'ae hhaol mael bong'lye oqyaevae! 30 Yoqhhaeq laoq nyeq'ei ta nyeq'ei hhal mulyo myel peqlal, ngael laoq nyeq'ei ta nyeq'ei maq hhal mulyo myel peqyil hhei."
Mqmae ae'lye lael e tyutaeq
31 "Holtaq ae'lye lael e tyutaeq laoq halza haelzholhael holtaq'ae zhol hhae; milcaeq ae'lye lael hael laoq milcaeq hhae lye hhae; yoqhhaeteel haelgee mael eiq milcaeq hhae lye hhae. Mqmae ae'lye lael e tyutaeq laoq halza haelzholhael holtaq'ae zhol hhae. 32 Yoqhhaeq haelgaeq haelmol mael zoqzenl du hhei vae, ngeelfeiq, yoqhhaeq e zoqzenl mael qiq hhaeq eiq maeq naelhaeq nae'ae. 33 Yoqhhaeq e zoqzenl mael'ae naelhaeq nae e tyutaeq laoq, Momil aeqdilmyel ngeel hhae lye zoqzenl du hhei vae. 34 Momil lye moqheilheil duyi e tyutaeq laoq Momil e saeziq gee hhae, Momil yoqhhaeq'ae senllinq mael haeldyul lye maqza myel biq biq kaol'ae. 35 Aeqdae Yaqyo'ae gaeq biq'ae, kaol halza haelzholhael gilzuqmyel yoqhhaeq e aqlaq'ae heilmoq biq vae. 36 Yaqyo'ae xiangxinl e cholyaeq laoq haeqfu eiq zadeel e aeqyil mael hhamul'ae; Yaqyo'ae maeq xiangxinl e cholyaeq laoq, haeqfu eiq zadeel e aeqyil mael maq hhamul dyul maeqcilmyel, Momil e faqhoqkei mael yoqhhaeq hhae pi hhae."