Yesu Saqmaqlilyal e cholhae aeqmae'ae geemyeq biq e saeziq
4
Yesu laoq Faqlilsail cholyaeq yoqhhaeq laqcaq gul'eeq hhei mael kaol shelxiqzongl mael, Yoqhanl taq'ae hhael naeq'ae lye gaeq hhei gil biq vae lye loq'ae, 2 Qiqshiq laoq, Yesu aeqyoyoq shelxiqzongl gil biq maeqngeel'ae, yoqhhaeq e laqcaqhael yaol shelxiq bi zongl hhae. 3 Kaol Yoqtail vae lye deelsae hheikaol Ja'lillil'ae hoqyil vae. 4 Yoqhhaeq haelmillyekaol eiq Saqmaqlilyal ae'lye hhae deelpol duyil hhae. 5 Tyulkaol, Yesu Saqmaqlilyal e Xulja lye gul e milmae heeqmyel vae keellael vae; milmae heeqmyel e tyulmael laoq, Yaqgel lye yoqhhaeq e yaqyo Yoqsel'ae bi mul e aeqhael tyu qiq koq vae niqli aeqwae. 6 Yaqgel Eelduq mael tyuqvae za hhae. Yesu gaelmae deel kaol hhaeqdyuldyul biq, kaol eelduq dongqpyeq vae zholgae hhei; tyuqfu laoq naoongl laellye fu'ae.7 Saqmaqlilyal e cholhae aeqmae qiq hhaeq eelcuq baq yi. Yesu yoqhhaeq'ae gee biq: "Ngaeq'ae eelcuq bi dol laeq." 8 Tyuqfu, Yesu e laqcaqhael milmae heeqmyel'ae zaeqzael vul li vae. 9 Saqmaqlilyal e cholhae aeqmae Yesu'ae gee biq: "Nol laoq Yoqtail cholyaeq'ae, aeqcheekaol Saqmaqlilyal e cholhae aeqmae'ae eelcuq sael dol laeq lilmaeq?" Yoqtail cholyaeqhael kaol Saqmaqlilyal cholyaeqhael yilyil laellael maq mul kaol'ae. 10 Yesu yoqhhaeq'ae geehoq biq: "Nol Momil e encil mael kaol yaeqmeel noq'ae 'eelcuq bi dol laeq' lye gee e qiq hhaeq aeqsul'ae lye loq kaollaoq, nol haeqfu'ae'lye yoqhhaeq'ae geezaeq biq vae, kaol yoqhhaeq eiq haeqfu'ae'lye noq'ae aeqyil e eelcuq mael biq biq vae." 11 Cholhae aeqmae gee: "Algo o, noq'ae eelcuq kuqda e moqgoq maqza, eelduq mael eiq zhee naq hhae, nol haeqvae lye aeqyil e eelcuq baq laq laeq?" 12 Ngaeteel e aeqpyuq aeqdae Yaqgel lye eelduq xilmael ngaeteel'ae taeqdeelsaeq laeq hhae, aeqyoyoq, houldailhael kaol jyeqyaeqhael gilzuqmyel eelduq xilmael e eelcuq mael dol gil hhae, nol yoqhhaeq taq'ae hhael heeq oqyilsiq maeq?" 13 Yesu geehoq biq: "Aeqsul eelcuq xilmael dol hhei kaol'eiq suq hoqlal kiq siq; 14 Cholyaeqhael ngaeq lye biq biq e eelcuq mael dol kaollaoq, qiqzael eiq maq suq wae. Ngaeq lye biq biq e eelcuq mael, yoqhhaeq e onglci'ae eelbi e eelcuq peqlal, kaol yoqhhaeq'ae haeqfu eiq zadeel e aeqyil mael biq biq maoqlye hhae." 15 Cholhae aeqmae gee: "Algo o, eelcuq xilmael ngaeq'ae biq hhei laq, kaol ngael maq suq lalkiq wae, kaol saeqvae eelcuq maq baq yi kael wae."
16 Yesu gee biq: "Nol yil, kaol noq e haqyo yaol saeqvae gul laeq." 17 Cholhae aeqmae yoqhhaeq'ae gee biq: "Ngaeq'ae haqyo maeq zhol laeq'ae." Yesu gee biq: "Nol 'haqyo maeq zhol laeq'ae' lye gee mael laoq hoq'ae. 18 Noq'ae laefuq haqyo ngaeq hhaeq zhol'ae, yaeqmeel zhol e qiq hhaeq noq e haqyo maeqngeel'ae; nol gee e saeziq mael aeqdilmyel hhae." 19 Cholhae aeqmae gee: "Algo o, ngael nol laoq xianzhi she lye fudu hhei wae. 20 Ngaeteel e aeqpyuq aeqdae geeqzhoq xilmael vae Momil'ae heel biq, ngeelfeiq, noteel Ye'lulsa'lenq vae maoq Momil'ae maeq hhae heel biq'ae lye gee hhae." 21 Yesu gee: "Cholhae aeqmae, nol ngaeq'ae xiangxinl maoqhhae, naohaeq keellael goqbiq wae, tyuqfu noteel aeqdae'ae heel mael geeqzhoq xilmael vae maeqngeel'ae, Ye'lulsa'lenq vae eiq maeqngeel'ae. 22 Noteel heel e tyutaeq laoq noteel maeq loq'ae, ngeelfeiq, ngaeteel heel e tyutaeq laoq ngaeteel loq lil, jiul'en mael Yoqtail cholyaeq onglci ae'lye duyi kaol'ae. 23 Ngeelfeiq, naohaeq keellael goqbiq wae, yaeqmeel ngeelvae, kaol yohael kaol zhen'liq onglci'ae lye aeqdae'ae heel e cholyaeqhael laoq, aeqdilmyel aeqdae'ae heel e cholyaeq'ae; aeqdae xilnye cholyaeq yaol saelpo hheikaol yoqhhaeq'ae bi heel maoqlye kaol'ae. 24 Momil laoq yohael ngeelvae, kaol yohael kaol zhen'liq onglci'ae lye yoqhhaeq'ae heel biq maoqhhae." 25 Cholhae aeqmae gee: "Ngael laoq Jidu lye gul biq e Miqsailyal tyutaeq lael maoqlye hhae lye loq lil; yoqhhaeq lael laol, gilzuqmyel silqinq mael ngaeteel'ae geegaeq hhei laeq'ae." 26 Yesu gee: "Yaeqmeel noq nyegael saeziq gee'naeq e qiq hhaeq laoq tyutaeq ngeelvae." 27 Tyuqfu qiqlaq'ae, laqcaqhael hoqlal vae, kaol Yesu cholhae aeqmae qiq hhaeq nyegael saeziq gee'naeq mol hhei biq, kaol gaqmaqzuq gil biq'ae; ngeelfeiq, qiq hhaeq eiq "nol aeqchee mul maoq maeq" paelsilmyel "nol aeqcheekaol yoqhhaeq nyegael saeziq gee'naeq lilmaeq" lye maeq naelhaeq biq'ae. 28 Cholhae aeqmae tyutaeq buqyaeq mael beiqdeelsaeq kaol milmae heeqmyel'ae yil vae, kaol cholyaeqhael'ae gee biq, 29 Gee: "Noteel fu lael gil, cholyaeq qiq hhaeq ngael haelzongl gol e silqinq mael gilzuqmyel geedu hhei vae, xitaeq Jidu ngeel vae laoq?" 30 Kaol cholyaeqhael milmae heeqmyel ae'lye duyi, kaol Yesu tyuqvae yil.
Zaelsiq mao vae
31 Tyuqfu, laqcaqhael Yesu'ae geezaeq biq, gee: "Labiq, nol zaeq hhei." 32 Ngeelfeiq, Yesu yoqhhaeteel'ae gee biq: "Ngaeq'ae zaeq e zaeqzael za lil, noteel maeq loq'ae." 33 Kaol laqcaqhael hhaellaelmyel gee gil: "Ochoq lye yoqhhaeq'ae bi zaeq hhei maeqhael ngeel?" 34 Yesu gee: "Ngaeq e zaeqzael mael laoq, ngaeq yaol moqheilheil duyi laq e tyutaeq e zhiqyil mael laoqmyel zongl yil, kaol yoqhhaeq e mulhhael mael zonglbyel maoq mael ngeelvae. 35 Noteel 'baehae yuq siq kaol maoq zaelsiq heillezaq e naohaeq maeq keel siq' lye gee maeqngeel yil maeq? Ngael noteel'ae geegaeq laeqngeel, noteel vuqduq baqtul hheikaol haeldye'ae chifu gil, zaelsiq mao vae, heillezaq hhaq vae. 36 Zaelsiq heille e cholyaeq mulhhael hhaeqpyuq mul vae, kaol haeqfu eiq zadeel e aeqyil mael gae'lye zaelsiq heil'eeq deelhhei, kaol ael'yuq xeiq hael kaol zaelsiq heille hael hhaellaelmyel bi hhaol gil. 37 'Xitaeq ael'yuq xeiq, yultaeq zaelsiq heille.' Saeziq xilmael laoq aeqdilmyel hhae. 38 Ngael noteel'ae noteel lye duqhee'lye mul du hhei maeqngeel e zaelsiq mael, heille yil lye moqheilheil laeqngeel; ochoq laoq duqhee'lye mul, noteel laoq yoqhhaeteel lye duqhee'lye mul du hhei e zaelsiq mael saelza'lye heillezaq aeqmeel." 39 Cholhae aeqmae tyutaeq zoqzenlkei: "Yoqhhaeq ngael haelzongl gol e silqinq mael gilzuqmyel geedu hhei vae." Yoqhhaeq e saeziq gae'lye, tyuqvae milmae heeqmyel e haeldyul dyulmae Saqmaqlilyal cholyaeq Yesu'ae xinlzaeq vae. 40 Tyulkaol, Saqmaqlilyal cholyaeq tyuhael Yesu tyuqvae keellael, kaol yoqhhaeq'ae yoqhhaeteel nyegael baelzhol lye geezaeq biq, kaol Yesu tyuqvae niq nao baelzhol vae. 41 Yesu gee e saeziq gae'lye, yoqhhaeq'ae xiangxinl e cholyaeq hhael naeqlael vae. 42 Yoqhhaeteel cholhae aeqmae tyutaeq'ae gee biq: "Yaeqmeel ngaeteel xiangxinl mael laoq nol gee e saeziq gae'lye maeqngeel yil vae, ngaeteel yoqhhaeq gee mael gaeq wae, kaol xitaeq laoq aeqdilmyel milcaeq taq e cholyaeqhael'ae jiul yi e Hhaoqsongl'ae lye loq wae."
Yesu lye zhiqmoq e yaqyo yaol zonglmeeq biq
43 Niq nao gol hhei'laol, Yesu tyuqvae lye deelsae hheikaol Ja'lillil'ae yil vae. 44 Yesu aeqyoyoq gee gol: "Cholyaeqhael aeqyoteel pusiq e xianzhi'ae maeq zunjinl'ae." 45 Yesu Ja'lillil vae keelli fu, Ja'lillil cholyaeqhael yoqhhaeq'ae sheeqcaq biq'ae, yoqhhaeteel laefuq Ye'lulsa'lenq vae da'li kaol zaeqnao zaeq li fu, Yesu haelzongl e silqinqhael mol gol kaol'ae.
46 Yesu Ja'lillil milcaeq e Ja'naq vae keellael, laefuq yoqhhaeq eelcuq maellye zilbaeq bi peqlal e milcaeq vae ngeelvae. Zhiqmoq qiq hhaeq zhol'ae, yoqhhaeq e yaqyo Jabaiqnongq milcaeq vae nael biq hhae. 47 Yoqhhaeq laoq Yesu Yoqtail milcaeq ae'lye Ja'lillil'ae lael vae lye gaeq hhei biq, kaol Yesu'ae mol lael, kaol Yesu vae gaeyil kaol yoqhhaeq e yaqyo'ae bael zonglmeeq yil biq lye geezaeq biq, yoqhhaeq e yaqyo sil li goqbiq vae kaol'ae. 48 Yesu yoqhhaeq'ae gee biq: "Noteel laoq shenqjiq kaol maeqdaeqhhaeq e silqinq maeq mol hhei kaollaoq, haeqfu eiq maeq xiangxinl gil nae." 49 Zhiqmoq tyutaeq gee: "Hhaoqsongl o, ngaeq e yaqyo maeq sil laefuq ae'lye gaeyil lye noq'ae geezaeq lil!" 50 Yesu yoqhhaeq'ae gee biq: "Nol hoqyil o, noq e yaqyo meeq yilkiq'ae." Tyutaeq Yesu gee e saeziq mael xiangxinl kaol hoqyil vae. 51 Yoqhhaeq gaeyil fu, yoqhhaeq e yaqhacheqzaq e cholyaeqhael yoqhhaeq boq'ae deel laeq, kaol yoqhhaeq e yaeqguq meeqyil biq vae lye gee'ae. 52 Yoqhhaeq yaqhacheqzaq e cholyaeqhael'ae yaeqguq haeqfu meeqhoqlael biq hhaemaeq lye naelhaeq biq. Yoqhhaeteel yoqhhaeq'ae gee biq: "Milnao xalvuq yiqdianq'ae vuqduq maeq paeq biq vae." 53 Tyulkaol, aeqdae tyutaeq laoq loq vae, tyuqfu laoq Yesu yoqhhaeq'ae "noq e yaqyo meeq yilkiq'ae" lye gee biq fu ngeelvae, aeqyoyoq kaol yoqhhaetoq qiq haoq myel Yesu'ae xinlzaeq vae. 54 Xilmael laoq Yesu Yoqtail milcaeq ae'lye Ja'lillil vae hoqlal aeqnaol'ae, zongl e dil'el gol shenqjiq'ae.