Yesu Bilshildal hobong vae cholnael zonglmeeq biq
5
Silqinq xilmael aeqnaol'ae, Yoqtail cholyaeq e zaeqnao qiq mal keellael vae, kaol Yesu Ye'lulsa'lenq'ae da'li. 2 Ye'lulsa'lenq vae Aqciq Oheiq'ae niqli myel'ae hobong qiq mal za'ae, Xiboqlaiq saeziq laoq Bilshildal lye gul hhae, hobong myeqzaeq vae zouqlangq ngaeq mael za'ae. 3 Tyuqvae cholnael leeq deel beq hhei'ae, mabyeq zoq, keeldil kaol ssuqhhal ae'lye maeq tullael kiq biq eiq zoq. a 5 Tyuqvae suqqyel heiq hoq nael biq e cholyaeq qiq hhaeq zhol'ae. 6 Yesu laoq yoqhhaeq ssuqza deelhhei mol hhei biq, kaol yoqhhaeq'ae nael biq e maolgael oqshevae lye loq vae, kaol yoqhhaeq'ae naelhaeq biq: "Nol bi meeqsholyil goq yae maeq?" 7 Cholnael tyutaeq geehoq biq: "Hhaoqsongl o, eelcuq dongni lael fu, qiq hhaeq eiq ngaeq yaol hobong vae maeq bael pyeqdo ga hhei laq'ae; ngael gaeyil maoq vae lye fu, haeqfu eiq ochoq lye laefuqmyel gaeyil hhei vae." 8 Yesu yoqhhaeq'ae gee biq: "Tullael, noq e zashe mael heil hheikaol deel o." 9 Tyutaeq qiqlaqmyel meeqsholyil biq vae, kaol zashe mael heil hhei'laol deel vae. Tyuqfu qiq nao laoq anxiqriq'ae. 10 Tyulkaol, Yoqtail cholyaeq laoq meeqsholyil biq e tyutaeq'ae gee biq: "Yaeqnao laoq anxiqriq'ae, lilfaq'ae lye gee'li'laol, nol zashe maeq hhae heil'ae." 11 Ngeelfeiq, yoqhhaeq yoqhhaeteel'ae geehoq biq: "Ngaeq yaol bi meeqsholyil laeq e tyutaeq ngaeq'ae 'noq e zashe mael heil hheikaol deel oq' lye gee laeq hhae." 12 Yoqhhaeteel yoqhhaeq'ae naelhaeq biq: "Noq'ae 'zashe mael heil hheikaol deel oq' lye gee laeq e qiq hhaeq aeqsul maeq?" 13 Tyuqvae cholyaeq zhee naeq kaol Yesu deelhhaq vae, tyulkaol, zonglmeeq biq e tyutaeq laoq yoqhhaeq aeqsul'ae lye maeq loq biq'ae. 14 Aeqnaol, Yesu sholhaol ae'lye tyutaeq yaol deelpuq hhei biq, kaol yoqhhaeq'ae gee biq: "Nol meeqsholyil aeqwae, golsiq haeq zonglpizaeq oq, aeqgael nyeq'ei maeq hhael meeq myel yo'lael laeqngeel." 15 Tyutaeq Yoqtail cholyaeq'ae yoqhhaeq yaol bi meeqsholyil e qiq hhaeq Yesu ngeelvae lye geegaeq yil biq'aee. 16 Tyuq ae'lye aeqnaol laoq, Yoqtail cholyaeq Yesu'ae guaeq'ei diqqye biq, yoqhhaeq duqlye anxiqriq'ae silqinq xilnye zongl kaol'ae. 17 Ngeelfeiq, Yesu yoqhhaeteel'ae gee biq: "Ngaedae mulhhael yaeqmeel keellye mul hhae, ngael eiq mul lil." 18 Tyulkaol, Yoqtail cholyaeq Yesu'ae nyeq'ei hhal xyeq goq biq, yoqhhaeq anxiqriq'ae maeq hhae zongl mael zongl dyul maeqcilmyel, aeqyoq Momil'ae Aeqdae lye gul biq'ae, aeqyoq kaol Momil qiqsheel lil lye keizaeq kaol'ae.Cholyaeq Yaqyo e laqtaq
19 Yesu yoqhhaeteel'ae yol gee biq: "Ngael aeqdilmyel noteel'ae geegaeq laeqngeel, Yaqyo laoq Aeqdae haelzongl mael mol hheikaol zongl maoqlaol, aeqyoyoq laoq qiqgiq maeq zongl ongl'ae; Aeqdae zongl e silqinq mael, Yaqyo eiq tyulnye zongl kaol'ae. 20 Aeqdae laoq Yaqyo'ae gaeq biq, kaol aeqyoq haelzonglhael gilzuqmyel yoqhhaeq'ae tyuqmyeq biq, yoqhhaeq'ae xihael taq'ae hhael heeq myel tyuqmyeq biq maoqlye wae siq, kaol noteel'ae gaqmaq bi zuq li. 21 Aeqdae haelmillye cholsil yaol bi dyeqhoqlal, kaol yoqhhaeteel'ae aeqyil haelmillye biq biq laol, Yaqyo eiq tyulnye aeqyil mael aeqsul'ae biq goq laol aeqsul'ae biq biq hhae. 22 Aeqdae cholyaeq'ae maeq shenqpanl'ae, ngeelfeiq, cholyaeq'ae shenqpanl e laqtaq mael gilzuqmyel Yaqyo'ae heil hhei biq mael laoq, 23 Haelzhol cholyaeqhael yaol Yaqyo'ae zunjinl biq mael Aeqdae'ae zunjinl biq laoqmyel bi ngeel maoqlye hhae. Yaqyo'ae maeq zunjinl hael laoq, yoqhhaeq yaol moqheilheil duyi e Aeqdae'ae maeq zunjinl biq ngeelvae. 24 Ngael aeqdilmyel noteel'ae geegaeq gil laeqngeel, ngaeq e saeziq mael naelhaeq, kaol ngaeq yaol moqheilheil duyi laq e tyutaeq'ae xiangxinl e cholyaeq laoq, haeqfu eiq zadeel e aeqyil mael hhamul'ae, kaol golsiq za'ae lye maeq hhae bi gee vae, kaol sil myel ae'lye duyi kaol aeqyil za myel'ae do'li wae. 25 Ngael aeqdilmyel noteel'ae geegaeq gil laeqngeel, naohaeq keellael goqbiq wae, yaeqmeel ngeelvae. Cholsil laoq Momil e Yaqyo e yotyel hhae gaeq, kaol haelgaeq e cholyaeq laoq dyeqhoqlal maoqlye hhae. 26 Aeqdae aeqyoyoq onglci'ae aeqyil za laoqmyel, Yaqyo onglci vae eiq aeqyil tyulnye bi za, 27 Kaol yoqhhaeq'ae shenqpanl e laqtaq eiq biq hhei biq'ae, yoqhhaeq laoq Cholyaeq Yaqyo kaol'ae. 28 Noteel silqinq xilmael gae'lye gaqmaq haq zuq gil, naohaeq keellael goqbiq wae, kaol tyuqfu fuq'ongl onglci'ae haelzholhael gilzuqmyel yoqhhaeq e yotyel mael gaeq hhei, 29 Kaol duyi maoqlye hhae; meeq e zongl hael laoq dyeqhoqlal kaol aeqyil za wae, duqlaq myel zongl hael laoq dyeqhoqlal kaol golsiq za'ae lye bi gee hhei wae.
Yesu'ae zoqzenl bael kei biq hael
30 "Ngael aeqyoyoq qiqgiq maeq zongl ongl yae, ngael haelmillye gaeq laol, haelmillye shenqpanl lil. Ngael aeqyoyoq e yilsi ae'lye zongl maeqngeel yil, ngaeq yaol moqheilheil duyi laq e qiq hhaeq e zhiqyil mael laoqmyel zongl lil, tyulkaol, ngaeq e shenqpanl mael laoq saeqsaeldye'lye hhae. 31 Ngael aeqyoyoq gae'lye zoqzenlkei kaollaoq, ngael zoqzenl mael laoq aeqdilmyel maeqngeel'ae. 32 Ngeelfeiq, ngaeq gae'lye zoqzenl bael kei laeq e baeqjyelboq e qiq hhaeq zhol'ae, ngael laoq yoqhhaeq ngaeq gae'lye zoqzenlkei mael laoq aeqdilmyel hhae lye loq lil. 33 Noteel cholyaeq yaol Yoqhanl tyuqvae moqheilheil du hhei gol'ae, kaol yoqhhaeq zhen'liq gae'lye zoqzenlkei gol'ae. 34 Ngael cholyaeq ae'lye lael e zoqzenl mael maq mul yil, ngeelfeiq, ngael xihael gee mael laoq, noteel yaol bi deqjiul maoqlye kaollil. 35 Yoqhanl laoq keeqdoq deelhhei e aeqdael doqhoq'ae, noteel qiqlaq maoq maeq hhae hhaol feiq yoqhhaeq e aeqcael onglci'ae zhol goq'ae. 36 Ngeelfeiq, ngaeq'ae Yoqhanl taq'ae hhael heeq myel zoqzenl za lil, Aeqdae lye ngaeq'ae ngael zonglbyel maoq e mulhhael mael biq hhei laq, mulhhael xilmael laoq ngael haelzongl maoqlye mael ngeelvae, kaol xihael lye ngaeq yaol laoq Aeqdae lye moqheilheil du hhei laq hhae lye zoqzenl du hhei vae. 37 Ngaeq yaol moqheilheil duyi laq e Aeqdae laoq ngaeq'ae bal zoqzenl laeq hhae. Noteel yoqhhaeq e yotyel mael qiqzael eiq maeq gaeq gol'ae; noteel yoqhhaeq e maduq mael qiqzael eiq maeq mol gol'ae; 38 Yoqhhaeq e saeziq mael noteel eiq neemae mael'ae maq odozaq hhei, noteel yoqhhaeq lye moqheilheil duyi e tyutaeq'ae maeq xiangxinl kaol'ae. 39 Noteel Momil e Suqhhaq mael yinqjiu, noteel laoq Momil e Suqhhaq onglci'ae haeqfu eiq zadeel e aeqyil mael za'ae lye kei biq kaol'ae; ngaeq'ae zoqzenl bael kei laeq mael laoq Momil e Suqhhaq taq'ae cu deelhhei hael ngeelvae. 40 Noteel ngaeq'ae saeqvae lael kaol aeqyil mul maoqlye maeq zongl nae. 41 "Ngael cholyaeq ae'lye lael e laqma deiqqei mael maq jyeqshel yil; 42 Ngeelfeiq, ngael noteel e neemae onglci'ae Momil e gaeq mael maqza'ae lye loq lil. 43 Ngael ngaedae cholmil maellye yi aeqlil, ngeelfeiq, noteel ngaeq'ae maeq sheeqcaq laq; ochoq aeqyoyoq e cholmil maellye yi kaollaoq, noteel daoldaolmyel yoqhhaeq'ae sheeqcaq biq'ae. 44 Noteel laoq qiqhhaeq qiqhhaeq'ae laqma deiqqei mael'ae hhaol biq, ngeelfeiq, Momil qiqhhaeq hhaeqli ae'lye lael e laqma deiqqei mael'ae maeq saelpo'ae, haelmillyekaol ngaeq'ae xiangxinl laeq? 45 Ngael Aeqdae yiqsi'ae lye noteel'ae konglgaol maoqlye hhae lye haeq kei gil, noteel'ae konglgaol e qiq hhaeq zhol'ae, xitaeq laoq, noteel chifu deelzaeq hhei e Moxi ngeelvae. 46 Noteel Moxi'ae xiangxinl kaollaoq, ngaeq vae eiq xiangxinl kiq'ae, yoqhhaeq e suqhhaq taq'ae ngaeq'ae gee e silqinq cu deelhhei kaol'ae. 47 Noteel yoqhhaeq lye hal cu hhei mael maeq xiangxinl kaollaoq, ngaeq e saeziq mael'ae haelmillyekaol xiangxinl laeq?"