9
Yesu yoqhhaeteel'ae yol gee biq: "Ngael aeqdilmyel noteel'ae geegaeq laeqngeel, saeqvae haoqtul deelhhei e cholyaeqhael, qiq miq laoq sil mael maeq yo'li biq fu ae'lye, Momil e Goqja mael laqtaq za aeqmyel lael e hhae mol'ae."Yesu laefuq laoqmyel maeq dul myel peqlal
2 Koq nao aeqnaol laoq, Yesu laoq Biqdeq, Yaqgel, Yoqhanl yaol sheeq hheikaol, ochoq'ae maeq bi loq myel yoqhhaeteel yaol haeqgaomyel e geeqzhoq vae sheeq da'li biq. Yesu yoqhhaeteel yiqsiboq ae'lye laefuq laoqmyel maeq dul myel peqlal. 3 Yoqhhaeq e aelhongq mael zheelniqlye hhae, kaol bachi'lye zhee bae'ae. Milcaeq taq e cholyaeqhael, xilnye bachi'lye haeqpael qiq hhaeq eiq maeq zongl du hhei ongl'ae. 4 Yiqlilyal kaol Moxi yoqhhaeteel'ae bi molli, kaol Yesu nyegael saeziq geechoq'ae. 5-6 Yoqhhaeteel gilzuqmyel zhee gu gil biq, tyulkaol, Biqdeq laoq aeqchee gee maoqlye maeq loq biq'ae. Tyulnye laol, Biqdeq Yesu'ae gee biq: "Labiqa, aedeeteel saeqvae zhol zhee meeq yae! Ngaeteel saeqvae haeqpael haelcul suq ssul diqkaeq hhei hhaeq, qiq ssul laoq noq'ae, qiq ssul laoq Moxi'ae, qiq ssul laoq Yiqlilyal'ae." 7 Mqdul qiq congq du'lal kaol yoqhhaeteel'ae congqvuq biq, mqdul onglci ae'lye yotyel gaeq duyi, gee: "Xitaeq laoq ngael gaeq e Yaqyo'ae, noteel yoqhhaeq e saeziq mael naelhaeq maoqhhae!" 8 Laqcaqhael nae'naemyel dongqpyeq'ae chifu gil, ngeelfeiq, baeqjyelboq e cholyaeq qiq hhaeq eiq maeq mol hhei biq'ae, yoqhhaeteel nyegael qiqgael baelzhol mael laoq Yesu qiq hhaeq wae.
9 Yoqhhaeteel geeqzhoq vae lye gaeyil fu, Yesu yoqhhaeteel'ae moqheilheil biq, gee: "Cholyaeq Yaqyo cholsil onglci ae'lye maq dyeqhoqlal laefuq'ae laoq, geiqsu'nu mol gil mael qiq hhaeq vae eiq haeq geedu yil." 10 Laqcaqhael saeziq xilmael neemae onglci'ae nyuqtongq deelhhei gil'ae, ngeelfeiq, cholsil onglci ae'lye dyeqhoqlal mael aeqchee yilsi oqlolyaeq lye qiqhhaeq qiqhhaeq'ae geezil geezae gil'ae. 11 Yoqhhaeteel Yesu'ae naelhaeq biq: "Aeqcheekaol Momil e saeziq mael loq e laqkiqhael Yiqlilyal laoq laefuqmyel lael hhae lye gee hhaemaeq?" 12 Yesu gee: "Yiqlilyal aeqdilmyel laefuqmyel lael kaol gilzuqmyel hael laefuq laoqmyel bi peqhoqlal maoqlye hhae. Ngeelfeiq, aeqcheekaol Momil e Suqhhaq taq'ae Cholyaeq Yaqyo laoq haeldyul dyulmae hhae bi zonglkyuq, kaol cholyaeq lye hhae bi fudyul hhae lye cu deelhhei hhaemaeq? 13 Ngeelfeiq, ngael noteel'ae geegaeq laeqngeel, Momil e Suqhhaq taq'ae cu deelhhei laoqmyel, Yiqlilyal keellael vae. Cholyaeq laoq yoqhhaeq'ae haelmillye zongl goq laol haelmillye zongl biq hhae."
Yesu lye maeqshol e yohael guqzaeq li biq e yaeqguq yaol zonglmeeq biq
14 Yoqhhaeteel laqcaqhael zael'ae hoq keellael, cholyaeq haelnaeqmyel yoqhhaeteel'ae ongtyeq deelhhei, kaol Momil e saeziq mael loq e laqkiqhael yoqhhaeteel nyegael geegae gil mol hhei biq'ae. 15 Cholyaeqhael Yesu yaol zhoq mol hhei biq laol, gilzuqmyel gaqmaqzuq li gil biq, ki da'li kaol yoqhhaeq'ae saeziq geechoq li biq. 16 Yesu yoqhhaeteel'ae naelhaeq biq: "Noteel yoqhhaeteel nyegael aeqchee geegae gil lilmaeq?" 17 Cholyaeqhael onglci'ae qiq hhaeq laoq yoqhhaeq'ae geehoq biq: "Laoqsi, ngaeq lye ngaeq e yaqyo yaol noq zael'ae sheeqlaeq wae, yoqhhaeq'ae saeziq maeq bi gee kiq e yohael guqzaeq li biq hhae. 18 Haeqvae zhol haoq, yohael tyulmael yoqhhaeq'ae eetyeq biq hhae, yoqhhaeq yaol beiqleeq biq laol, yoqhhaeq e myeqbongq mael bachi'lye haqmeq poqlye pyeqdu hhei, myeqsheq mael laoq sheqgiqgiq hhae, aeqhhaol qiqsiqmyel ongldye'lye peqyil biq'ae. Ngael noq e laqcaqhael vae yohael mael bael lyeqdu laeq lye geezaeq biq, ngeelfeiq, yoqhhaeteel maeq zonglkeel ongl biq'ae." 19 Yesu yoqhhaeteel'ae geehoq biq: "Ei! Yaeqmeel dyeqdeel e maeq xiangxinl e cholyaeqhael o! Ngael noteel nyegael haeqfu'ae baelzhol keel laeq? Ngael noteel'ae haeqfu keellye renqnail keel laeq? Yaeqguq yaol saeqvae sheeqlaeq." 20 Yoqhhaeteel yaeqguq yaol yoqhhaeq zael'ae sheeqli biq. Yohael tyulmael Yesu yaol mol hhei biq laol, yaeqguq qiq hhaeq yaol ssukiqssu'nyel myel bi ssu tullaeq, milcaeq vae jye'leeq deelhhei kaol pillilpu'lu myel pu'ae, myeqbongq mael'ae laoq bachi'lye haqmeq pyeqdu hhae. 21 Yesu yaeqguq e aeqdae'ae naelhaeq biq: "Yoqhhaeq'ae naelgol xilmael nael li biq mael haeldyul maolgael wae maeq?" Yoqhhaeq gee: "Meelhee'lye fu ae'lye xilnye hhae. 22 Yohael xilmael lye yoqhhaeq yaol aeqzaeq doq myel vae hae'nae pu beiqdo biq, eelcuq vae eiq beiqpuq biq, kaol yoqhhaeq yaol zonglsil maoqlye zongl hhae. Nol aeqchee eiq zongl kiq kaollaoq, ngaeteel'ae hhaoqsaeqsaeq laeq, ngaeteel'ae baelzongl laeq!" 23 Yesu yoqhhaeteel'ae gee biq: "Nol xiangxinl kaollaoq, xiangxinl e cholyaeq laoq aeqchee silqinq eiq zonglkeel ongl'ae!" 24 Yaeqguq e aeqdae nae'naemyel gul gae'lael aeqmyel, gee: "Ngael xiangxinl lil! Ngael maeq xiangxinl keel ongl myel'ae laoq, nol baelzongl laeq." 25 Yesu cholyaeqhael deel'eeq laeq mol hhei biq, kaol maeqshol e yohael mael'ae gaezaeq biq, gee: "Cholyaeq'ae naeqboq bi boq yil kaol yaqba bi peqyil e yohael, ngael noq'ae minllinl lil, yoqhhaeq e aeqhhaol ae'lye duyi, qiqzael eiq maq hha do'li vae!" 26 Yohael yulmael yotyel haeqheemyel gul tullaeq, kaol yaeqguq guqyaeq'ae ssukiqssu'nyel myel guaeq'ei bi ssu tullaeq laol duyi hhei vae. Yaeqguq guqyaeq qiq hhaeq sil e cholyaeq laoqmyel peqyil vae, tyulnye laol, cholyaeqhael gee bonggaebyel'ae: "Yoqhhaeq sil vae!" 27 Ngeelfeiq, Yesu yoqhhaeq e aqlaq mael'ae zoqtyeq deelhhei kaol sheeqtul hhei biq, kaol yoqhhaeq haoqtul lael vae. 28 Yesu laoqhaol vae do'li, laqcaqhael laoq ochoq maeq bael gaeq myel vae lye yoqhhaeq'ae naelhaeq biq: "Aeqcheekaol ngaeteel laoq maeqshol e yohael mael maeq lyeqdu ongl hhaemaeq?" 29 Yesu yoqhhaeteel'ae gee biq: "Xilnye yohael mael laoq heeldoq maq mul kaollaoq maeq lyeqdu ongl'ae."
Yesu yoqhhaeq sil kaol dyeqhoqlal mael dil'el cil geedu
30 Yoqhhaeteel tyuqvae lye duyil laol, Ja'lillil ae'lye deelpol duyil fu, Yesu cholyaeq'ae maeq bi loq lye nyuq'ae. 31 Yoqhhaeq tyuqfu laqcaqhael'ae geemyeq gil biq hhae, yoqhhaeteel'ae gee biq: "Cholyaeq Yaqyo yaol cholyaeqhael e aqlaq'ae eemoq biq, kaol yoqhhaeteel yoqhhaeq yaol xyeqsil biq maoqlye hhae. Xyeqsil biq aeqnaol'ae, suq nao laol yoqhhaeq dyeqhoqlal maoqlye hhae." 32 Ngeelfeiq, yoqhhaeteel saeziq xilmael maeq loq gil biq'ae, yoqhhaeq vae eiq maeq naelhaeq peq biq'ae.
Hhaelheeq heeqli e qiq hhaeq aeqsul'ae lye mael
33 Yoqhhaeteel Jabaiqnongq vae keellael. Yesu laoqhaol onglci'ae zhol fu yoqhhaeteel'ae naelhaeq biq: "Noteel gaelmae ae'lye aeqchee geezil geezae gil lilmaeq?" 34 Yoqhhaeteel yotyel qiq doq eiq maq du'ae, yoqhhaeteel gaelmae ae'lye aeqsul hhaelheeq heeqli e qiq hhaeq lil lye geegae gil kaol'ae. 35 Yesu zholgae hheikaol, shiqtuq qyelniq hhaeq yaol gul laeq, yoqhhaeteel'ae gee biq: "Aeqsul laefuq fuqli qiq hhaeq geiq goq kaollaoq, cholyaeqhael e aeqnaol naolli qiq hhaeq geiq, kaol cholyaeqhael e yaqhacheqzaq e cholyaeq geiq maoqhhae." 36 Tyuqfu qiqlaq'ae, Yesu lye yaeqguq guqyaeq qiq hhaeq cheelpol hhei, kaol yoqhhaeq yaol laqcaqhael onglci'ae bi haoqtul deelhhei, kaol yoqhhaeq yaol sheeqqei hheikaol yoqhhaeteel'ae gee biq: 37 "Aeqsul ngaeq e cholmil gae'lye yaeqguq xilnye qiq hhaeq vae sheeqcaq biq laol, ngaeq'ae sheeqcaq ngeelvae; aeqsul ngaeq'ae sheeqcaq laq laol, ngaeq'ae sheeqcaq maeqngeel'ae, ngaeq yaol moqheilheil duyi e qiq hhaeq'ae sheeqcaq biq hhae."
Noteel boq'ae haoqtul cholyaeq
Lul 9: 49-50
38 Yoqhanl Yesu'ae gee biq: "Laoqsi, ngaeteel cholyaeq qiq hhaeq mol aeqwae. Yoqhhaeq noq e cholmil maellye niqhaeq lyeqdu hhae. Yoqhhaeq ngaeteel'ae maeq bael cho'lyeq nae'ae, tyulkaol, yoqhhaeq'ae diqqye yo biq wae." 39-40 Yesu gee: "Aedeeteel'ae maeq hhaeq'ae lye maeq gee hael laoq, aedeeteel boq'ae haoqtul ngeelvae. Tyulkaol, cholyaeqhael ngaeq e cholmil maellye shenqjiq zongl du hhei aeqnaol'ae nae'naemyel ngaeq'ae geekyuq laeq, xilnye qiq hhaeq eiq maeq zongl'ae. Tyulkaol, yoqhhaeq'ae haeq diqqye biq. 41 Ngael aeqdilmyel noteel'ae geegaeq laeqngeel: Aeqsul lye noteel Jidu hhae lye kaol noteel'ae eelcuq qiq huqm baq hhei laq laol, yoqhhaeq laoq aeqdilmyel shangqcil mael hhamul'ae."
Cholyaeq'ae golsiq haeq bi zonglpizaeq
42 "Cholyaeq qiq hhaeq lye ngaeq'ae xiangxinl e yaeqguqhael onglci e qiq hhaeq yaol, golsiq bi zonglpizaeq kaollaoq, tyutaeq e kongqlongl mael'ae giho homae qiq siq kaltoq hheikaol, eeldeel deelmae vae bi beiqdo hhei mael hhael meeq'ae. 43 Noq e aqlaq qiqboq lye noq yaol golsiq bi zonglpizaeq kaollaoq dega hhei, nol aqlaq niqboq myel cuq ga'lal aeqmyel qiqzael eiq maq myeyil kiq e aeqzaeq doq e daq'oqlaqmae'ae doyil mael taq'ae laoq, aqlaq qiqboq maoq maq cuq myel haeqfu eiq zadeel e aeqyil za myel vae do'li mael hhael meeq'ae. b 45 Noq e aeqkeel qiqboq lye noq yaol golsiq bi zonglpizaeq kaollaoq dega hhei, nol aeqkeel niqboq myel cuq ga'lal aeqmyel daq'oqlaqmae'ae bi beiqdo hhei mael taq'ae laoq, keeldildil gae'lael aeqmyel haeqfu eiq zadeel e aeqyil za myel vae do'li mael hhael meeq'ae. c 47 Noq e ma'ne qiqboq lye noq yaol golsiq bi zonglpizaeq kaollaoq heqdu hhei, nol ma'ne niqboq myel cuq ga'lal aeqmyel daq'oqlaqmae'ae bi beiqdo mael taq'ae laoq, ma'ne qiqboq maoq maq cuq myel Momil e Goqja vae do'li mael hhael meeq'ae. 48 Daq'oqlaqmae e aeqzuq mael laoq maeq sil yilkiq'ae, aeqzaeq doq mael laoq maq myeyil kiq'ae. 49 Haetaeq yaol eiq caqdeq maellye vuq biq laoqmyel, aeqzaeq doq maellye bi vuq hhei ngeelvae. 50 Caqdeq laoq meeq hhae, ngeelfeiq, caqdeq mael maeq haeq myel peqyil hhei kaollaoq, nol aeqchee maellye caqdeq mael bi haeq hoqlael maoq maeq? Noteel onglci'ae caqdeq za maoqhhae, qiqhhaeq qiqhhaeq nyegael zilzheqlye zhol maoqhhae."