Yesu laefuq laoqmyel maeq dul myel peqlal
17
Koq nao gol hhei'laol, Yesu lye Biqdeq, Yaqgel kaol Yaqgel e aeqnil Yoqhanl yaol sheeq hheikaol, ochoq'ae maeq bi loq myel yoqhhaeteel yaol haeqgaomyel e geeqzhoq'ae sheeq da'li. 2 Yoqhhaeq yoqhhaeteel yiqsi ae'lye laefuq laoqmyel maeq dul myel peqlal, yoqhhaeq e maduq mael neelmae laoqmyel zheelniqlye hhae, aelhongq mael laoq aeqcael laoqmyel pul hhae. 3 Qiqlaqmyel, Moxi kaol Yiqlilyal yoqhhaeteel'ae bi molli, kaol Yesu nyegael saeziq geechoq'ae. 4 Biqdeq gee tullaeq, Yesu'ae gee biq: "Hhaoqsongl o, aedeeteel saeqvae zhol mael zhee meeq yae! Nol hhaeq lil lye kaollaoq, ngael saeqvae haeqpael haelcul suq ssul diqkaeq hhei hhaeq, qiq ssul laoq noq'ae, qiq ssul laoq Moxi'ae, qiq ssul laoq Yiqlilyal'ae." 5 Saeziq gee siq fu, qiqlaqmyel bachi'lye mqdul qiq congq lye yoqhhaeteel yaol congqvuq biq, mqdul onglci ae'lye yotyel yol gaeq duyi, gee: "Xitaeq laoq ngael gaeq e Yaqyo'ae, yoqhhaeq ngaeq'ae neezae zhee lael yae. Noteel yoqhhaeq e saeziq mael naelhaeq maoqhhae!" 6 Laqcaqhael gaeq hhei biq laol, maduq mael milcaeq'ae tongqmaoq yil aeqmyel zongl, zhee gu gil biq'ae. 7 Yesu deelniq laeq, yoqhhaeteel'ae pa hhei biq, gee: "Tullael, maq gu gil kael!" 8 Yoqhhaeteel vuqduq baqtul hhei'laol, Yesu qiq hhaeq yaol maoqlaol, qiq hhaeq yaol eiq maeq mol'ae.9 Geeqzhoq ae'lye gaeyil fu, Yesu yoqhhaeteel'ae moqheilheil biq: "Cholyaeq Yaqyo cholsil onglci ae'lye maq dyeqhoqlal laefuq'ae, noteel haelmol mael cholyaeq'ae haeq geegaeq yil biq." 10 Laqcaqhael Yesu'ae naelhaeq biq: "Aelmaol, Momil e saeziq mael loq e laqkiqhael aeqcheekaol Yiqlilyal laoq aeqdilmyel laefuqmyel lael hhae lye gee hhaemaeq?" 11 Yesu geehoq biq: "Yiqlilyal aeqdilmyel lael maoqlye hhae, kaol gilzuqmyel laefuq laoqmyel bi peqhoqlal maoqlye hhae; 12 Ngeelfeiq, ngael noteel'ae geegaeq laeqngeel, Yiqlilyal lael aeqwae, cholyaeqhael yoqhhaeq yaol maeq siqcongl'ae, kaol yoqhhaeq'ae haelmillye zongl goq laol haelmillye zongl biq wae siq. Cholyaeq Yaqyo eiq yoqhhaeteel lye xilnye hhae bi zonglkyuq hhae." 13 Laqcaqhael laoq Yesu gee mael shelxiqzongl e Yoqhanl vae gee hhae lye caiq loq li biq wae siq.
Yesu lye niqhaeq guqzaeq li biq e yaeqguq yaol zonglmeeq biq
14 Yesu kaol laqcaqhael cholyaeqhael e tyuqvae keellael, cholyaeq qiq hhaeq Yesu'ae mol lael, kaol vuqduqtongq gae hhei, 15 Gee: "Hhaoqsongl o, ngaeq e yaqyo'ae hhaoqsaeqsaeq biq. Yoqhhaeq'ae ciqpyepye biq hhae, kaol zhee kyuq biq hhae, aeqzaeq doq onglci'ae hae'nae pu jyedo aeqwae, eelcuq onglci vae eiq hae'nae pu jyedo aeqwae. 16 Ngael yoqhhaeq yaol noq e laqcaqhael tyuqvae sheeqli wae, ngeelfeiq, yoqhhaeteel yoqhhaeq'ae maeq zonglmeeq ongl biq'ae." 17 Yesu geehoq biq: "Ei! Yaeqmeel dyeqdeel e cholyaeqhael o, aeqcheekaol Momil'ae maeq xiangxinl kaol xinqlalmyel zongl gil lilmaeq? Ngael noteel'ae haeq fu keellye renqnail keel laeq? Yoqhhaeq yaol ngaeq e saeqvae sheeqlaeq!" 18 Yesu niqhaeq tyulmael'ae gaezaeq biq laol, niqhaeq yoqhhaeq ae'lye duyi hhei vae; tyuq ae'lye aeqnaol laoq, yaeqguq meeqsholyil biq vae. 19 Laqcaqhael deelniq laeq, kaol ochoq maeq bael gaeq myel Yesu'ae naelhaeq lael biq: "Ngaeteel aeqcheekaol niqhaeq tyulmael maeq lyeqdu ongl hhaemaeq?" 20 Yesu yoqhhaeteel'ae gee biq: "Noteel e xinlxin mael nil kaol'ae. Ngael aeqdilmyel noteel'ae geegaeq laeqngeel, Noteel e xinlxin mael oqpa oqne qiq ne hee zoq kaollaoq, geeqzhoq xilmael vae gee biq: 'Nol xiboq ae'lye yulboq'ae zideel yil', yoqhhaeq eiq zideel yil'ae, kaol noteel maeq zonglkeel ongl myel silqinq qiqgiq maqza vae."a
Yesu yoqhhaeq sil kaol dyeqhoqlal mael dil'el cil geedu
22 Yoqhhaeteel Ja'lillil vae zhol'eeq deelhhei gil fu, Yesu laqcaqhael'ae gee biq: "Cholyaeq Yaqyo yaol cholyaeq e aqlaq'ae bi eemoq maoqlye hhae. 23 Yoqhhaeteel yoqhhaeq yaol xyeq biq maoqlye hhae, dilsan tian yoqhhaeq dyeqhoqlal maoqlye hhae." Kaol laqcaqhael zhee nyuqsaeq gil biq'ae.
Sholhaol shuil
24 Yoqhhaeteel Jabaiqnongq vae keellael, sholhaol shuil mael shezaeq e cholyaeq Biqdeq vae mol lael, gee: "Noteel e laoqsi sholhaol shuil maeq heil du maeq?" 25 Biqdeq gee: "Heil'ae." Yoqhhaeq laoqhaol vae do'li, Yesu yoqhhaeq'ae saeziq laefuq gee'naeq biq, gee: "Ximenq, nol haelmillye nyuq lilmaeq? Milcaeq taq e zongmaehael aeqsul'ae guanshuil kaol cholyaeq shuil mael, aeqsul vae she hhaemaeq? Aeqyoyoq e yaqyohael vae maeq? Paelsilmyel, baeqjyelboq e cholyaeq vae maeq?" 26 Biqdeq gee: "Baeqjyelboq e cholyaeq vae." Yesu yoqhhaeq'ae gee biq: "Xilnye kaollaoq, yaqyo laoq maeq heildu kael vae. 27 Ngeelfeiq, aeqgael yoqhhaeteel'ae zonglzhil biq maeqhe, kaol nol eeldeel deelmae vae ngaeqdyel diaol yil, kaol laefuq diaol da hhei e ngaeqdyel mael heilqei hhei, kaol ngaeqdyel e myeqbongq mael heqngae hhei, nol laoq sitaqtelb qiq mal hhae mol'ae, kaol nol yoqhhaeteel'ae heilmoq yil biq, nol kaol ngaeq e shuilshangl maoq e dyuqbaq mael ngeelvae."