Siqbaq aeqhael mulpazaq e cholyaeqhael e dullaelmyel guqjin
Tail 21: 33-46; Lul 20:9-19
12
Yesu dullaelmyel guqjin maellye yoqhhaeteel'ae gee biq: "Cholyaeq qiq hhaeq siqbaq qiq koq kae deelhhei'ae, dongqpyeq dongqjyel'ae kilkul diqlongl byel hhei, zilbaeq deiqduzaq e eelzhol qiq mal duq du hhei, aeqhael fu'qye e haelcul qiq ssul cu hhei'laol, aeqhael mulpazaq e cholyaeqhael vae bi mulpazaq, tyulnye laol, gaelmaolsae'lye vae yil vae. 2 Naohaeq keellael fu, aeqhael e hhaoqsongl lye hhaeq'ongq ongqzaeq e cholyaeq yaol, aeqhael mulpazaq e cholyaeq zael vae bi yil, kaol heilhoqlaeq maoq e siqbaq aelsiqhael heilhoq yil lye moqheilheil du hhei. 3 Aeqhael mulpazaq e cholyaeqhael lye yoqhhaeq yaol eetyeq biq, yoqhhaeq'ae diq biq, kaol aqlaq alngeiqmyel bi hoqli vae. 4 Aeqhael e hhaoqsongl baeqjyelboq e hhaeq'ongq ongqzaeq e cholyaeq yaol, yoqhhaeteel zael vae moqheil yol heil du hhei, yoqhhaeteel lye xitaeq'ae vuqduq mael diqnael biq dyul maeqcilmyel, yoqhhaeq vae yol geekyuq biq. 5 Aeqhael e hhaoqsongl baeqjyelboq yaqhacheqzaq e cholyaeq yaol moqheil yol heil du hhei, ngeelfeiq, yoqhhaeteel lye xitaeq yaol xyeqsil biq. Aeqnaol cholyaeq haelnaeqmyel moqheil yol heil du hhei, ngeelfeiq, yoqhhaeteel lye diqnael biq eiq zoq, xyeq biq eiq zoq'ae. 6 Aeqhael e hhaoqsongl vae hhaelgaeq e yaqyo qiq hhaeq maoqlaol, moqheil hhae heil duyil e cholyaeq maeq zhol vae, aeqnaol naolli laoq, aeqhael e hhaoqsongl lye yoqhhaeq yaol moqheilheil du hhei, gee: 'Yoqhhaeteel ngaeq e yaqyo'ae zunjinl biq vae laoq.' 7 Aeqhael mulpazaq e cholyaeq tyuhael laoq qiqhhaeq qiqhhaeq'ae geegaeq gil: 'Xitaeq laoq aeqgael zaeqdye halngeiq e hhaoqsongl geiq maoqlye hhae; lael gil, aedeeteel yoqhhaeq yaol xyeq hhei kaollaoq, zaeqdye halngeiqhael laoq aedeeteel wae.' 8 Tyulkaol, yoqhhaeteel lye yoqhhaeq yaol eetyeq biq kaol xyeq biq vae, siqbaq aelbol kae deelhhei e aeqhael nilduboq'ae beiq du deelyil biq. 9 Tyulnye laol, aeqhael e hhaoqsongl laoq haelmillye zongl laeq? Yoqhhaeq aeqhael mulpazaq e cholyaeqhael yaol zonglsil hhei, kaol siqbaq kae deelhhei e aeqhael mael ochoq'ae bi mulpazaq hoq. 10-11 Noteel Momil e Suqhhaq taq'ae saeziq xihael maeq duq gol yil maeq?Laoqhaol cuzaq e cholyaeq lye beiqgae e haqloa mael laoq,
congqciq paeqhhael e hhal mulyo e haqlo peqlal vae;
xilmael laoq Hhaoqsongl haelzonglhael'ae,
aedeeteel e ma'ne maellye fu kaollaoq maeqdaeqhhaeq'ae."
12 Yoqhhaeteel dullaelmyel guqjin xilmael laoq yoqhhaeteel'ae gee hhae lye loq biq, kaol Yesu yaol deiqtyeq maoqlye nyuq gil'ae, ngeelfeiq, cholyaeqhael'ae gu gil biq, kaol Yesu zaellye deelsae hhei vae.
Kaiqsa vae shuilshangl biq
13 Aeqnaol laoq, yoqhhaeteel lye Faqlilsail cholyaeq mee'nae hhaeq kaol Xi'lyul dangq e cholyaeq mee'nae hhaeq yaol, Yesu zael'ae li lye moqheilheil du hhei, kaol yoqhhaeq e saeziq maellye yoqhhaeq'ae hail biq maoqlye hhae. 14 Yoqhhaeteel keellael vae, kaol yoqhhaeq'ae gee biq: "Laoqsi, nol cholyaeq'ae zaqgiq maqgiq'ae lye ngaeteel loq lil, aeqsul vae eiq qiqsheel meeq biq, qiq hhaeq e maduq gae'lye eiq maeq fu, kaol zhen'liq maellye Momil e gaelmaeb mael cholyaeq'ae geemyeq gil biq. Kaiqsa vae shuilshangl biq e hhaeq maeq maeq hhaeq maeq? Ngaeteel heil biq laeq, haeq heil biq laeq?" 15 Yesu lye yoqhhaeteel gee kaol nyuq mael maeq qiqsheel'ae lye fuduzaq biq, kaol yoqhhaeteel'ae gee biq: "Noteel aeqcheekaol ngaeq'ae shilfu gil laeq lilmaeq? Siqbil dyuqbaq qiq mal heil laeq kaol ngaeq'ae bi fu laeq." 16 Kaol yoqhhaeteel heil laeq vae. Yesu yoqhhaeteel'ae naelhaeq biq: "Xilmael'ae zonglda deelhhei mael aeqsul e vuqduq kaol aeqsul e cholmil maeq?" Yoqhhaeteel yoqhhaeq'ae geehoq biq: "Kaiqsa hhae." 17 Yesu gee: "Kaiqsa mael laoq Kaiqsa'ae heilmoq hhei biq, Momil mael laoq Momil'ae heilmoq hhei biq." Yoqhhaeteel Yesu'ae gaqmaqzuq li gil biq'ae.
Cholyaeq dyeqhoqlal aeqnaol laoq haeqmiq maeq sheeq maeq mulzaeq
18 Saqdugai cholyaeq laoq cholyaeq dyeqhoqlal kiq e silqinq maqza'ae lye kei gil biq'ae, yoqhhaeteel Yesu zael vae keellael laol yoqhhaeq'ae naelhaeq biq: 19 "Laoqsi, Moxi lye aedeeteel'ae xilnye saeziq cu deelhhei laeq: 'Cholyaeq qiq hhaeq e algo sil hhei'laol, yaeqguq lye eiq maeq zhol myel, haeqmiq qiq hhaeq myel zholdeelsaeq kaollaoq, yoqhhaeq e aeqnil laoq algo e haeqmiq yaol sheeqzaeq maoqhhae, kaol sil e algo vae houldail bi zhol gaeyil. 20 Yilkaefu, algo aeqnil siq hhaeq zhol'ae, hhael heeq e qiq hhaeq haeqmiq sheeq hhei vae, ngeelfeiq, yaeqguq lye eiq maeq zhol myel sil vae; 21 Dil'el gol aeqcu yaol sheeqzaeq hhei, ngeelfeiq, yaeqguq lye eiq maeq zhol myel sil vae; dilsan gol eiq xilnye hhae. 22 Cholyaeq tyu siq hhaeq'ae aeqyoteel hhae lye yaeqguq qiq hhaeq eiq maeq zholdeelsaeq'ae, aeqnaol cholhae aeqmae tyutaeq eiq sil vae. 23 Dyeqhoqlal e naohaeq keellael fu, yoqhhaeteel gilzuqmyel dyeqhoqlal maoqlye hhae, siq hhaeq myel yoqhhaeq yaol sheeq yo vae, tyulnye kaollaoq, aeqgael yoqhhaeq aeqsul e haeqmiq maeq?" 24 Yesu yoqhhaeteel'ae gee biq: "Noteel ba vae, noteel laoq Momil e Suqhhaq mael maeq loq, kaol Momil e onglzaeq mael eiq maeq loq laeq hhaemaeq? 25 Cholyaeq cholsil onglci ae'lye dyeqhoqlal aeqnaol laoq, sheeq eiq maeq sheeq, mul eiq maeq mulzaeq'ae, mqmae taq e mqmae yosongl laoqmyel hhae. 26 Cholsil dyeqhoqlal e silqinq mael'ae gee keelli laol, noteel Moxi e suqhhaq taq'ae, aelgong aelbol aeqzaeq doq e guqjin mael maeq duq gol yil maeq? Momil Moxi'ae xilnye gee gol biq, gee: 'Ngael laoq Yalboqlahanl e Momil lil, Yiqsaq e Momil lil, Yaqgel e Momil lil.' 27 Momil laoq cholsil e Momil maeqngeel'ae, choldyeq e Momil'ae. Noteel ba taq'ae hhal ba shevae!"
Gailminl onglci'ae hhal mulyo mael
28 Momil e saeziq mael loq e laqkiq qiq hhaeq lael, yoqhhaeteel geegae gil mael gaeq hhei biq, Yesu geehoq biq mael meeq'ae lye kei li biq, kaol yoqhhaeq'ae naelhaeq biq: "Gailminl e onglci'ae, hae qiq doq hhal mulyo hhaemaeq?" 29 Yesu geehoq biq: "Hhal mulyo mael laoq: 'Yiqsellyel e cholyaeqhael o, naelhaeq gil! Hhaoqsongl laoq aedeeteel e Momil'ae, aedeeteel'ae Hhaoqsongl qiq hhaeq wae. 30 Nol laoq neemae qiqsiqmyel, kaol gilzuqmyel hael nyuq hael, kaol gilzuqmyel hael geel hael, kaol haelzoq e aqha maellye Hhaoqsongl'ae gaeq biq maoqhhae. Hhaoqsongl laoq noq e Momil ngeelvae.' 31 Aeqnaol qiq mal laoq: 'Ochoq'ae gaeq biq mael aeqyoq'ae gaeqzaeqhoq laoqmyel ngeel maoqhhae.' Gailminl xi niq mal taq'ae hhal mulyo laoq maqza vae." 32 Momil e saeziq mael loq e laqkiq qiq hhaeq Yesu'ae gee biq: "Gee mael hoq yae, laoqsi, nol gee mael zhee hoq yae, Momil qiq hhaeq wae, yoqhhaeq maoqlaol baeqjyelboq e Momil maeq zhol'ae. 33 Aedeeteel laoq neemae qiqsiqmyel, kaol gilzuqmyel hael geel hael, kaol haelzoq e aqha maellye yoqhhaeq'ae gaeq biq maoqhhae, tyuldyul maeqcilmyel, ochoq'ae gaeq biq mael aeqyoyoq'ae gaeqzaeqhoq laoqmyel ngeel maoqhhae, xihael laoq Pebyel Zaelheel kaol baeqjyelboq e maeq qiqsheel e zaelheel mael taq'ae hhael meeq'ae." 34 Yesu laoq tyutaeq zhee geel gae'lael aeqmyel geehoq hhae lye mol hhei biq, kaol yoqhhaeq'ae gee biq: "Nol Momil e Goqja'ae maeq maol vae." Tyuq ae'lye aeqnaol laoq cholyaeqhael qiq hhaeq eiq yoqhhaeq'ae maeq naelhaeq peq biq vae.
Jidu kaol Dalweil e guanxil
35 Yesu sholhaol vae lye cholyaeqhael'ae geemyeq gil biq, gee: "Momil e saeziq mael loq e laqkiq aeqcheekaol Jidu laoq Dalweil e Yaqyo'ae lye gee hhaemaeq?" 36 Dalweil'ae senllinq ganqdongl biq, gee:
'Yeheqhuaq ngaeq e Hhaoqsongl'ae gee biq:
Ngaeq lye noq e diqrenq yaol,
noq e aeqkeel baqda e toqmoq bi geiq fu keellye,
nol ngaeq e laqsseqboq'ae zhol deelhhei.'
37 Dalweil laoq yoqhhaeq'ae Hhaoqsongl lye gul biq'ae, yoqhhaeq haelmillyekaol aeqyoq e yuqpaeq ngeel kiq laeq?" Cholyaeqhael yoqhhaeq gee mael zhee naelhaeq gil goq biq'ae.
Momil e saeziq mael loq e laqkiqhael'ae gaezaeq biq
38 Yesu cholyaeqhael'ae Momil e saeziq geegaeq gil biq fu, gee: "Noteel Momil e saeziq mael loq e laqkiqhael vae fu'qyedeelzaeq hhei maoqhhae, yoqhhaeteel poljye dum hheikaol deelpudeelda myel deel mael hhaol biq hhae, gaiziq ae'lye cholyaeqhael yoqhhaeteel'ae meeqlaeqmaeq lye naelhaeq biq mael hhaol biq hhae. 39 Huiltangq onglci'ae hhael meeq e zholhhael mael, kaol baqwanq zaeq myel'ae hhael meeq e zholhhael mael'ae hhaol biq hhae. 40 Yoqhhaeteel lye miqchiq e halzahael zaeqneq biq dyul maeqcilmyel, baelyaelmyel heeldoq zhee qiqlaq gee tyeqli lil lye zongl hhae. Xilnye cholyaeq laoq hhael naeq myel e chenqfaq hhae shel hhae."
Saeqyaeq miqchiq e fenglxianl mael
41 Yesu fenglxianl bongqke yiqsiboq'ae zhol deelhhei, cholyaeqhael dyuqbaq mael fenglxianl bongqke mael'ae, haelmillye heil do gil hhaemaeq lye chifu hhae. Dyuqbaq zhee za e cholyaeqhael laoq haelnaeqmyel heil do hhei'ae. 42 Saeqyaeq miqchiq qiq hhaeq lael'ae, meelhee'lye dyuqbaq niq mal heil do hhei, ngeelfeiq, geeqsheel dyuqbaq qiq mal dyul maoq maeq pyuq'ae. 43 Yesu lye laqcaqhael yaol gul laeq, kaol yoqhhaeteel'ae gee biq: "Ngael aeqdilmyel noteel'ae geegaeq gil laeqngeel, saeqyaeq miqchiq xitaeq lye fenglxianl bongqke mael'ae heil do hhei mael laoq, cholyaeqhael lye heil do hhei mael taq'ae hhael naeq'ae. 44 Haelzhol e cholyaeq laoq yoqhhaeteel'ae naeq du'lal mael heil do hhae, saeqyaeq miqchiq xitaeq laoq yoqhhaeq maq mulloq feiq, ssuqhaoq caqzaq maoqlye hael gilzuqmyel heil do hhei hhae."