Yesu laoq sholhaol mael aeqgael cheqba hhei'ae lye gee
13
Yesu sholhaol onglci ae'lye duyi fu, laqcaq qiq hhaeq yoqhhaeq'ae gee biq: "Laoqsi, nol fu, haqlo xilmael maeqdaeqhhaeq'ae! Aqmail oq! Xuldyulmyel heeq xuldyulmyel zhi laoqhaol cu du hhei laoq!" 2 Yesu yoqhhaeq'ae gee biq: "Nol xuldyulmyel heeq xuldyulmyel zhi laoqhaol cu du hhei mael mol aeqwae maeq? Aeqgael saeqvae laoq aeqdilmyel haqlo qiq siq holtaq'ae qiq siq maqza deel wae, hae qiq siq eiq bi cheqga hhei ngeelvae."Milcaeq e aeqnaol naolli qiq nao laefuq'ae peqlal maoqlye mael
3 Yesu Zhoqcae Geeqzhoq vae zhol'ae, maduq mael sholhaol boq'ae polyil aeqmyel zhol deelhhei. Biqdeq, Yaqgel, Yoqhanl kaol Andeqlyel, baeqjyelboq e cholyaeq maeq bael zoq myel fu, Yesu'ae naelhaeq biq: 4 "Ngaeteel'ae geedu laq, silqinq xilmael haeqfu peqlal maoqlye hhaemaeq? Silqinq xilmael peqlal maoq fu, haelmillye laefuq mol lael hhaemaeq?" 5 Yesu yoqhhaeteel'ae gee biq: "Noteel aeqyae'lye kei maoqhhae, aeqgael cholyaeq noteel'ae zaqgiqgiq lal maeqhe. 6 Aeqgael haelnaeqmyel cholyaeq ngaeq e cholmil maellye lael lil lye zongl maoqlye hhae, gee 'Ngael laoq Jidu lil', tyulkaol, haelnaeqmyel cholyaeq yaol zaqgiq bi giq hhei ngeelvae. 7 Noteel daqzhangldiq kaol daqzhangldiq e yotyel gaeqlael fu, maq gu gil kael, silqinq xihael laoq aeqdilmyel peqlal maoqlye hhae, ngeelfeiq, milcaeq e aeqnaol naolli qiq nao maeq keellael siq. 8 Qiqzonglyaeq tullael kaol baeqjyelboq qiqzonglyaeq'ae diq yil, goqja qiq mal tullael kaol baeqjyelboq e goqja vae diq yil, haeqvae eiq milhoho tullaeq, hoqlaq maeqmeeq qiqgiq zaeq eiq maqza, xihael laoq zai'nanl yo'lael e zhoqmyel fu'ae. 9 Ngeelfeiq, noteel aeqyae'lye kei maoqhhae! Noteel yaol cholyaeqhael lye Yoqtail Yilhuil vae hhae bi ee'li, kaol noteel yaol huiltangq onglci'ae lye caxu maellye hhae bi zheq ngeelvae, kaol ngaeq gae'lye hhael heeq e zhiqmoq kaol zongmae yiqsiboq'ae haoqtul deelhhei, kaol yoqhhaeteel'ae fuqyin mael geegaeq gil biq. 10 Fuqyin xilmael, milcaeq taq'ae haelzhol cholyaeqhael'ae aeqdilmyel geegaeq biq maoqhhae. 11 Cholyaeq lye noteel yaol deiqtyeq laeq kaol zhiqmoqkae li laeq fu, noteel laefuqmyel aeqchee gee maoqlye maeq nyuq kael. Saeziq geedu mael laoq noteel maeqngeel'ae, senllinq geedu hhae, tyuqfu noteel'ae aeqchee saeziq biq hhei laeq laol aeqchee saeziq gee aeqmeel. 12 Algo aeqnil lye algo aeqnil yaol laqtaq za e cholyaeq lye bi zonglsil maoqlye hhae, aeqdae lye yaeqguq yaol eiq laqtaq za e cholyaeq lye bi zonglsil maoqlye hhae; yaeqguq aeqdae aeqmae nyegael zongltyeltoq dyul maeqcilmyel, aeqdae aeqmae yaol laqtaq za e cholyaeq lye bi zonglsil maoqlye hhae. 13 Noteel ngaeq e cholmil gae'lye cholyaeqhael lye neema hha bi su zaq ngeelvae. Ngeelfeiq, aeqnaol naolli'ae zhee zityeq gaeyil ongl e cholyaeqhael laoq hha deqjiul'ae.
Zai'nanl nanlmae yo'lael e naohaeq
14 "Noteel 'Hol lael aeqmyel zonglmye e qiqhhaeq' lye gul biq e tyutaeq laoq maeq hhae haoqtul e milcaeq vae haoqtul mol fu (Suqhhaq xilmael duq e cholyaeq aeqdilmyel loq maoqhhae), Yoqtail milcaeq vae zhol e cholyaeqhael laoq geeqzhoq vae ki da byel li maoqhhae. 15 Tongqgee'ae zhol hael haeq gaeyi, laoqhaol onglci'ae moqgoq heil li maoqlye haq do'li. 16 Haeldye'ae zhol hael eiq aelhongq haeq heil hoqli. 17 Tyuqfu naohaeq'ae, yaeqguqpi hhei hael kaol aeqchil bi dol hael zai'nanl za vae! 18-19 Tyuqfu naohaeq'ae peqlal maoqlye haelnaeqmyel zai'nanl mael laoq, Momil lye mqdongq milbeibei fu ae'lye mael yaeqmeel keellye maeq peqlal yo wae siq, aeqgael eiq aeqdilmyel maeq peqlal kiq'ae! Tyulkaol, noteel heeldoq gee biq maoqhhae, silqinq xihael aqga baehae'ae haeq bi peqlal lye Momil'ae geezaeq gil biq. 20 Momil lye tyuqfu naohaeq mael zonglnul kaolmaoqlaol, ruqtiq za e cholyaeqhael qiq hhaeq eiq maeq hhae dyeqdeel'ae. Ngeelfeiq, aeqyoq lye saelpodu hhei e cholyaeq gae'lye, yoqhhaeq lye tyuqfu naohaeq mael zonglnul hhae. 21 Tyuqfu, cholyaeq noteel'ae 'fu, Jidu saeqvae zhol hhae' lye gee laeq, paelsilmyel 'fu, tyuqvae zhol hhae' lye gee laeq kaollaoq, noteel haeq xiangxinl gil. 22 Jaq jiduhael kaol jaq xianzhihael deel mol du'laq, haelnaeqmyel shenqjiq kaol maeqdaeqhhaeq e silqinq zongl du hhei, giqhezaq ongl kaollaoq, Momil lye saelpodu hhei e cholyaeq yaol eiq giqhezaq yil maoqlye hhae. 23 Kaol noteel aeqyae'lye kei maoqhhae! Ngaeq lye noteel'ae aeqchee silqinq mael eiq laefuq myel geegaeq hhei biq aeqwae.
Cholyaeq Yaqyo mqdul nyegael qiqgael gaeyi maoqlye hhae
24 "Tyuqfu naohaeq, zai'nanl aeqnaol laoq,
neelmae mael naheiqlye peqyil maoqlye hhae,
baehae mael aeqcael maeq mol du'lal kiq vae,
25 Aeqgeelhael mqmae ae'lye leeqgae yi maoqlye hhae,
mqmae taq'ae gilzuqmyel ssu'ni beq lal maoqlye hhae.
26 Tyuqfu, yoqhhaeteel laoq onglzaeq mael kaol rongqyaol za e Cholyaeq Yaqyo laoq, mqdul nyegael qiqgael gaeyi mael hhae mol'ae. 27 Yoqhhaeq mqmae yosonglhael yaol moqheilheil du hhei maoqlye hhae, haeqvae lael'ee myel ae'lye kaol milcaeq e xiboq ae'lye mqmae e yulboq'ae keellye, yoqhhaeq lye saelpodu hhei e cholyaeqhael yaol qiqgael gul'eeq laeq maoqlye hhae.
28 Noteel laoq siqpyu'laq'oq e aelbol maellye yo'liq qiq mal xoqxiq hhei maoqhhae: Aelbol allaq mael naoqgaeqlye alpaqpaq du'lal fu, noteel yel'ongl baehae niqlael vae lye loq'ae. 29 Qiqsheel ngeelvae, noteel silqinq xihael peqlal mael mol fu, Cholyaeq Yaqyo aeqdilmyel keellael goqbiq vae lye loq maoqhhae. 30 Ngael aeqdilmyel noteel'ae geegaeq gil laeqngeel, yaeqmeel dyeqdeel e cholyaeqhael dyeqdeel siq fu, xihael aeqdilmyel gilzuqmyel peqlal maoqlye hhae. 31 Mqmae milcaeq mael maqza myel peqyil maoqlye hhae, ngeelfeiq, ngaeq e saeziq mael laoq maq gabu yilkiq'ae.
Yuqnyuqgeellye ngeel maoqhhae
32 "Tyuqfu naohaeq kaol shiqshen mael, cholyaeq qiq hhaeq eiq maeq loq'ae, mqmae taq e mqmae yosongl eiq maeq loq'ae, Cholyaeq Yaqyo eiq maeq loq'ae, aeqdae maoqlaol maeq loq'ae. 33 Noteel shiqshen tyulmael haeqfu keellael lye maeq loq'ae, tyulkaol, noteel aeqyae'lye kei maoqhhae, haeqfu eiq yuqnyuqgeellye ngeel maoqhhae. 34 Silqinq xilmael laoq cholyaeq qiq hhaeq laoqhaol ae'lye gaelmaolsae'lye hhae deelsae hhei laoqmyel hhae. Yoqhhaeq lye hhaeq'ongq ongqzaeq e cholyaeq'ae laoqhaol'ae za hael gilzuqmyel bi fu'qyezaq, aeqsul laoq aeqchee zongl maoqhhae lye mael gee deel byel saeq biq, kaol oheiq'ae fu'qyezaq e cholyaeq'ae yuqnyuqgeellye ngeel maoqhhae lye moqheilheil biq. 35 Tyulkaol, noteel yuqnyuqgeellye ngeel maoqhhae, noteel e hhaoqsongl haeqfu hoq keellael lye maeq loq'ae, kiqsulkiqxeiq fu maeqhe, sul'ongl fu maeqhe, haepyul dyel fu maeqhe, baezulbaegeq fu maeqhe. 36 Aeqgael yoqhhaeq qiqlaqmyel hoq keellael laol, noteel yuqxul mol hhei biq maeqhe. 37 Ngael noteel'ae haelgee biq e saeziq mael, noteel'ae oqlye gee maeqngeel yil, haelzhol cholyaeqhael'ae bael gee lil: 'Noteel yuqnyuqgeellye ngeel maoqhhae'."