Saeqyaeq miqchiq e fenglxianl mael
21
Yesu vuqduq baqtul hheikaol fu, yohahael siqbil dyuqbaq mael fenglxianl bongqke mael'ae heil do mol hhei biq. 2 Miqchiq qiq hhaeq lye dyuqbaq mildi'lye niq mal fenglxianl do hhei yol mol hhei biq. 3 Kaol gee: "Ngael aeqdilmyel noteel'ae geegaeq laeqngeel, saeqyaeq miqchiq xitaeq lye heil do hhei mael laoq, haelzhol cholyaeqhael lye heil do hhei mael taq'ae hhael naeq'ae. 4 Haelzhol cholyaeqhael laoq yoqhhaeteel e naeq du'lal hael onglci e teel heil do hhei, ngeelfeiq, saeqyaeq miqchiq xitaeq laoq aeqyoq maq mulloq feiq, ssuqhaoq caqzaq maoqlye halzahael gilzuqmyel heil do hhei vae."Yesu laoq sholhaol mael aeqgael cheqga hhei'ae lye gee
5 Laqcaq qiq miq sholhaol mael zhigaqlye haqlo kaol heelda hhei e liqvuq maellye haelmillye zonglzhi hhei hhae lye gee gil fu, Yesu yoqhhaeteel'ae gee biq: 6 "Noteel yaeqmeel mol e xihael, naohaeq keellael fu, aeqdilmyel haqlo qiq siq holtaq'ae qiq siq maqza deel wae, hae qiq siq eiq cheqga hhei ngeelvae."
Milcaeq e aeqnaol naolli qiq nao laefuq'ae peqlal maoqlye mael
7 Yoqhhaeteel Yesu'ae naelhaeq biq: "Laoqsi, aelmaol, silqinq xihael haeqfu keellael hhaemaeq? Silqinq xihael peqlal maoq fu laefuqmyel haelmillye mol lael hhaemaeq?" 8 Yesu gee: "Noteel aeqyae'lye kei maoqhhae, aeqdilmyel zaqgiq haeq bi giqzaq hhei. Haeldyul dyulmae cholyaeq ngaeq e cholmil maellye lael maoqlye hhae, kaol gee: 'Ngael laoq Jidu lil', yol gee: 'Naohaeq niqlael vae.' Noteel yoqhhaeteel'ae haeq cho'lyeq! 9 Noteel daqzhangldiq kaol aeqvuqlaelvuqmyel zongl tullaeq e silqinq gaeqlael fu, maq zoqgiq kael, silqinq xihael aeqdilmyel laefuqmyel peqlal maoqlye hhae, ngeelfeiq, jyeqjuq mael laoq qiqlaqmyel maeq keellael siq kaol'ae."
10 Yesu yoqhhaeteel'ae yol gee biq: "Qiqzonglyaeq tullael kaol baeqjyelboq qiqzonglyaeqhael'ae diq yil maoqlye hhae, goqja qiq mal tullael kaol baeqjyelboq e goqja vae diq yil maoqlye hhae. 11 Aeqgael laoq haeqheemyel milhoho lael'ae, haeqvae eiq hoqlaq maeqmeeq qiqgiq zaeq eiq maqza myel zongl tullaeq, doqlal kiq e naelgol eiq za, mqmae taq'ae gu lal aeqmyel yilxiangl kaol maeqdaeqhhaeq e shenqjiq mol du'lal. 12 Ngeelfeiq, silqinq xihael peqlal laefuq'ae, cholyaeqhael noteel'ae deiqtyeq laelkiq, noteel'ae zonglkyuq lael, noteel yaol huiltangq vae ee'li kaol laoqgaiqkei laoqhaol vae koqlongl li maoqlye hhae, kaol noteel yaol ngaeq e cholmil gae'lye zongmae kaol hhael heeq e zhiqmoq yiqsiboq'ae ee'li maoqlye hhae. 13 Tyulnye peqlal fu, noteel yoqhhaeteel'ae ngael haelmillye qiq hhaeq'ae lye hhae geedu biq wae. 14 Tyulkaol, noteel nyuqmeeq hhei gil, laefuqmyel aeqyoyoq gae'lye haelmillye gee'loqzaeqhoq maoqlye haeq nyuq gil. 15 Ngael noteel'ae myeqbongq zhee dyeq ga'lal aeqmyel kaol geel mael biq gil laqngeel, noteel e diqrenqhael noteel'ae maeq zonglleeq ongl kaol maeq gee yinqzaeq ongl'ae. 16 Noteel e aeqdae aeqmae, algo aeqnil, paeqyaeq, kaol yelchoq lye noteel yaol zhiqmoqhael'ae eemoq li biq maoqlye hhae, yoqhhaeteel lye noteel onglci e qiq miq yaol zonglsil maoqlye hhae. 17 Noteel ngaeq e cholmil gae'lye cholyaeqhael lye neema hhae bi su zaq ngeelvae. 18 Ngeelfeiq, noteel e qyelkeel qiq ke eiq maeq leeqdu yil kiq'ae. 19 Noteel zhee zityeq gaeyil ongl laol, aeqyil mael yinqzaeq hoq hhei ongl wae.
Yesu Ye'lulsa'lenq mael zonglmye maoqlye hhae lye geedu
20 Noteel Ye'lulsa'lenq mael dangbinkei e cholyaeqhael lye ongtyeq biq mol fu, cholgulcillye peqlal e naohaeq keellael vae lye loq maoqhhae. 21 Tyuqfu, Yoqtail milcaeq vae zhol hael geeqzhoq vae kihhaq li maoqhhae, milmae heeqmyel vae zhol hael kisae maoqhhae, pusiq vae zhol e cholyaeqhael laoq milmae heeqmyel vae haq do'li. 22 Xilmael laoq Momil Ye'lulsa'lenq e cholyaeqhael'ae chenqfaq biq e naohaeq'ae. Momil e Suqhhaq taq'ae cu deelhhei mael gilzuqmyel peqlal maoqlye hhae. 23 Tyuqfu naohaeq'ae, saeqvae milcaeq'ae zai'nanl nanlmae kaol Momil e faqhoqkei mael cholyaeq xihael'ae yo'lael maoqlye hhae, tyulkaol, yaeqguqpi hhei hael kaol aeqchil bi dol hael laoq zai'nanl za wae! 24 Yoqhhaeteel yaol maejyel maellye bi xyeq hhei, kaol baeqjyelboq e goqja'ae bi eezaeq yil. Aeqgael Ye'lulsa'lenq laoq baeqjyelboq minqcuq lye bi guanqliq e naohaeq bong lael fu keellye, baeqjyelboq minqcuq lye bi nuqhaeq maoqlye hhae.
Cholyaeq Yaqyo mqdul nyegael qiqgael gaeyi maoqlye hhae
25 "Neelmae, baehae kaol aeqgeel mael aeqgael laefuq laoqmyel maeq dul myel peqlal'ae. Milcaeq taq'ae halza e goqjahael e cholyaeqhael eiq eeldeel deelmae e eeldiq diqho gae'lye gu'ni'lye gu biq hhae. 26 Momil lye mqmae taq'ae halzahael zonglbeeq byel maoqlye hhae. Cholyaeqhael aeqgael milcaeq taq'ae keellael maoqlye e silqinq mael'ae nyuqkeel li biq laol, yohael haebael aeqmyel hagu kyuq biq. 27 Tyuqfu, yoqhhaeteel laoq onglzaeq kaol rongqyaol za e Cholyaeq Yaqyo laoq, mqdul nyegael qiqgael gaeyi mael hhae mol'ae 28 Silqinq xihael zhoq peqlal fu laoq, noteel laoq dolcheq deiqzhoq hheikaol vuqduq baqtul hhei, noteel hha deqjiul e naohaeq niqlael goqbiq vae."
29 Yesu yoqhhaeteel'ae dullaelmyel guqjin qiq mal yol geegaeq gil biq: "Noteel siqpyu'laq'oq e aelbol kaol baeqjyelboq e aelbolhael'ae fu gil. 30 Aelbolhael alpaqpaq du'lal fu, noteel mol hhei'laol yel'ongl baehae niqlael vae lye loq'ae. 31 Qiqsheel ngeelvae, noteel silqinq xihael peqlal mael mol fu laoq, Momil e Goqja niqlael vae lye loq maoqhhae. 32 Ngael aeqdilmyel noteel'ae geegaeq gil laeqngeel, yaeqmeel dyeqdeel e cholyaeqhael dyeqdeel siq fu, aeqdilmyel gilzuqmyel peqlal maoqlye hhae. 33 Mqmae milcaeq mael maqza myel peqyil maoqlye hhae, ngeelfeiq, ngaeq e saeziq mael laoq maq gabu yil kiq'ae.
Yuqnyuqgeellye heeldoq gee maoqhhae
34 "Noteel aeqyae'lye kei maoqhhae, aeqgael zaeq naeq, dolbu kaol ssuqhaoq caqzaq mael'ae zoqgiq gae'lye noteel e neemae mael kaltoq hhei, kaol tyuqfu qiq nao laoq hhaezongl laoqmyel qiqlaqmyel noteel'ae yo'lael maeqhe. 35 Naohaeq tyulmael milcaeq holtaq'ae zhol gil e cholyaeqhael'ae yo'lael maoqlye kaol'ae. 36 Tyulkaol, noteel haeqfu eiq yuqnyuqgeellye ngeel maoqhhae, kaol duqlye heeldoq gee maoqhhae, xilnye laol, noteel aeqgael lael maoqlye e silqinq xihael'ae kihhaq zaq ongl wae, kaol Cholyaeq Yaqyo e yiqsiboq'ae hhae haoqtul deel wae."