Yesu lye shiqtuq qyelniq hhaeq saelpodu hhae
10
Yesu lye laqcaq qyelniq hhaeq yaol gul laeq, kaol yoqhhaeteel'ae maeqshol e yohael lyeqdu ongl, kaol maeq qiqsheel e naelgol zonglmeeq ongl e laqtaq biq hhei biq. 2 Shiqtuq xi qyelniq hhaeq e cholmil mael sa'oqboqhael'ae: Laefuq qiq hhaeq laoq Biqdeq lye gul biq e Ximenq'ae, kaol yoqhhaeq e aeqnil Andeqlyel, Xibiqtail e yaqyo Yaqgel kaol Yaqgel e aeqnil Yoqhanl, 3 Kaol Fei'lil, Bado'loqmaiq, Domaq kaol shuil shezaeq e Maqtail, Yallelfei e yaqyo Yaqgel, kaol Daqtail, 4 Kaol jijinldangqa e Ximenq, kaol Yesu yaol yotyel maqdumyel ongqzaeq biq e Ja'lyul cholyaeq Yoqdal'ae.Yesu lye shiqtuq qyelniq hhaeq yaol moqheilheil du hhei
5 Yesu lye cholyaeq xi qyelniq hhaeq yaol moqheilheil duyil, kaol yoqhhaeteel'ae gee biq: "Baeqjyelboq minqcuq e cholyaeqhael e gaelmae mael noteel haeq deel gil; Saqmaqlilyal cholyaeq e milmae heeqmyel vae haq do'li; 6 Ngeelfeiq, Yiqsellyel toq e deelbu e aqciqhael e tyuqvae yil maoqhhae. 7 Yul'ae deel laol yul'ae gee gil biq, gee 'Mqmae e Goqja niqlael vae'. 8 Cholnael'ae zonglmeeq biq maoqhhae, kaol sil e cholyaeq yaol bi dyeqhoqlal, maqfeng naelgol nael biq e cholyaeq'ae bi meeqsholyil, kaol niqhaeq yaol lyeqdu hhei. Noteel'ae alngeiqmyel hhae'lael biq hhae, kaol ochoq'ae alngeiqmyel heil biq maoqhhae. 9 Haeqpi pollo onglci'ae pulziq, pulsheel kaol geeqsheel dyuqbaq haeq pi. 10 Gaelmae vae palbye haeq pi gil, onglci'ae dum do e aelhongq niq ko haeq heil, paqno haeq pyeq kaol zaeqngeeq haq baq, aeqhael mulyaeq zaeqzael hhamul mael laoq zae kaol'ae. 11 Noteel hae qiqgael e milmae heeqmyel vae, paelsilmyel hae qiqgael e pusiq vae do'li haoq, tyuqvae noteel'ae sheeqcaq nae e cholyaeq zhol maeqlye naelhaeq fufu maoqhhae, kaol tyutoq'ae deelsae maoq fu keellye tyuqvae zholgae hhei gil. 12 Yoqhhaetoq'ae do'li fu, tyutoq'ae meeqlaeqmaeq lye naelhaeq biq maoqhhae. 13 Tyutoq zae kaollaoq, noteel e neesaelhhae mael tyutoq'ae yo'li'ae; maeq zae kaollaoq, noteel e neesaelhhae mael noteel'ae yo hoqlael'ae. 14 Aeqsul noteel'ae maeq sheeqcaq laq, noteel e saeziq mael maeq naelhaeq e cholyaeq laoq, noteel tyutoq ae'lye, paelsilmyel tyuqvae milmae heeqmyel ae'lye deelsae fu, aeqkeel mael'ae su e haeqlyel mael nuqhael gae hhei. 15 Ngael noteel'ae aeqdilmyel geegaeq laeqngeel, shenqpanl e naohaeq fu, Soqdomaq kaol Eqmoqla milcaeq e cholyaeqhael zityeq deelhhei mael, tyuqvae milmae heeqmyel e cholyaeqhael taq'ae hhael yael'ae!"
Aeqgael hhae bi diqqye maoqlye mael
16 "Naelhaeq gil! Ngael noteel yaol moqheilheil du hhei mael laoq, aqciqhael haeqheilhael onglci'ae doyil laoqmyel hhae, tyulkaol, noteel geel mael oqhol laoqmyel ngeel maoqhhae, neemae meeq mael haoqhaoq laoqmyel ngeel maoqhhae. 17 Noteel cholyaeq tyuhael'ae fu'qyedeelzaeq hhei maoqhhae, yoqhhaeteel lye noteel yaol Yoqtail Yilhuil vae zhol e cholyaeq'ae eemoq li biq, kaol huiltangq vae lye noteel'ae alca maellye eiq diq maoqlye kaol'ae. 18 Noteel laoq ngaeq gae'lye hhael heeq e zhiqmoq, kaol zongmae e yiqsi'ae bi sheeqli maoqlye hhae, kaol noteel yoqhhaeteel'ae kaol baeqjyelboq minqcuq e cholyaeq'ae zoqzenl hhae kei biq wae. 19 Cholyaeq lye noteel yaol ee'li laeq fu, saeziq haelmillye gee, paelsilmyel aeqchee saeziq gee maoqlye haq zoqgiq. Tyuqfu, Momil noteel'ae gee maoq e saeziq mael biq laq'ae, 20 Noteel aeqyoyoq gee maeqngeel'ae, noteel e aeqdae e yohael mael noteel onglci'ae gee kaol'ae. 21 Algo aeqnil laoq algo aeqnil'ae neemae xyelpupu, kaol algo aeqnil yaol laqtaq za e cholyaeq lye bi zonglsil maoqlye hhae, aeqdae laoq yaeqguq'ae neemae xyelpupu, kaol yaeqguq yaol laqtaq za e cholyaeq lye bi zonglsil maoqlye hhae; yaeqguq aeqdae aeqmae nyegael zongltyeltoq dyul maeqcilmyel, aeqdae aeqmae yaol laqtaq za e cholyaeq lye bi zonglsil maoqlye hhae. 22 Noteel ngaeq e cholmil gae'lye cholyaeqhael lye neema hhae bi su zaq ngeelvae. Ngeelfeiq, aeqnaol naolli'ae zhee zityeq gaeyil ongl e cholyaeqhael laoq hha deqjiul ngeelvae. 23 Cholyaeq milmae heeqmyel e xi qiqgael'ae guaeq'ei diqqye laq laol, baeqjyelboq e milmae heeqmyel e qiqgael'ae kisae yil. Ngael aeqdilmyel noteel'ae geegaeq laeqngeel, noteel Yiqsellyel e milmae heeqmyelhael vae maeq deeldyu byel siq fu ae'lye, Cholyaeq Yaqyo laoq lael maoqlye wae. 24 "Laqcaq laoqsi'ae maeq jyeqli ongl'ae, yaqhacheqzaq e cholyaeq hhaoqsongl'ae maeq jyeqli ongl'ae. 25 Laqcaq'ae puqli biq mael laoqsi'ae laoqmyel qiqsheel, yaqhacheqzaq e cholyaeq'ae puqli biq mael hhaoqsongl'ae laoqmyel qiqsheel'ae, xilnye laol hhaeq vae. Cholyaeq laoq qiqhaoq qiqjyel e hhaoqsongl'ae 'Byeqxibuq'b lye vuq biq, yoqhhaetoq e cholyaeq'ae laoq nyeq'ei maeq gee kael vae."
Cholyaeq gu maoq mael laoq aeqsul vae maeq
26 "Tyulkaol, yoqhhaeteel'ae maq gu kael, zonglhhaq deelhhei e silqinq mael eiq bi molzaeq hhei ngeelvae, ochoq'ae maeq bi loq lye silqinq mael eiq bi loqzaeq hhei kaol'ae. 27 Ngael noteel'ae ochoq maeq bael gaeq myel vae lye geegaeq biq mael, noteel aeqsul eiq bael gaeq myel vae lye geedu hhei maoqlye hhae; noteel e naeqbol mael'ae haelgaeq hael, laoqhaol honglbyu ae'lye geegaeq duyil maoqlye hhae. 28 Cholyaeq e aeqhhaol xyeqsil ongl maoqlaol, cholyaeq e yohael mael maeq zonglmye ongl hael'ae, yoqhhaeteel'ae maq gu kael; daq'oqlaqmae vae lye aeqhhaol kaol yohael mael zonglmye ongl e tyutaeq'ae, noteel yoqhhaeq'ae gu maoqhhae. 29 Nulzael niq yaeq, geeqsheel dyuqbaq qiq mal ongq maeqngeel maeq? Noteel e aeqdae maeq hhaeq lil lye kaollaoq, milcaeq vae qiq yaeq eiq maeq leeqgae yi kiq'ae. 30 Noteel e qyelkeel mael eiq suqda gol wae. 31 Tyulkaol, maq gu gil kael, noteel laoq haelnaeqmyel e nulzaelhael taq'ae hhael pyuq wae siq!"
Cholyaeq e yiqsiboq'ae lye Jidu yaol loq lil lye gee maoqhhae
32 "Tyulkaol, aeqsul cholyaeqhael e yiqsiboq'ae lye ngaeq yaol loq lil lye gee laol, ngael eiq ngaeq e mqmae Aeqdae e yiqsiboq'ae lye yoqhhaeq yaol loq lil lye gee maoq; 33 Aeqsul cholyaeqhael e yiqsiboq'ae lye ngaeq yaol maeq loq yae lye gee laol, ngael eiq ngaeq e mqmae Aeqdae e yiqsiboq'ae lye yoqhhaeq yaol maeq loq yae lye gee maoq."
Laqcaq geiq e hhaeqpyuq
34 "Noteel laoq ngael lael mael laoq milcaeq vae hoqpinq mael heil laeq hhae lye kei gil laeq hhaemaeq, ngael lael mael laoq hoqpinq mael heil laeq maeqngeel yil, maejyel baq laq lil. 35 Ngael lael mael laoq,
'Cholyaeq aeqdae nyegael bi zonglgae maoqlye lil,
yaeqmiq aeqmae nyegael bi zonglgae maoqlye lil,
keeqmae ssuqmae nyegael bi zonglgae maoqlye lil.
36 Cholyaeq e diqrenq laoq,
aeqyoyoq toq e cholyaeqhael ngeelvae.'
37 Aeqdae aeqmae vae gaeq mael ngaeq'ae gaeq mael taq'ae jyeqli laol, ngaeq e laqcaq geiq e maeq zae'ae; yaeqmiq yaqyo vae gaeq mael ngaeq'ae gaeq mael taq'ae jyeqli laol, ngaeq e laqcaq geiq e maeq zae'ae. 38 Aeqyoyoq e shiqziljal mael maeq pi kaol ngaeq'ae maeq cho'lyeq kaollaoq, ngaeq e laqcaq geiq e maeq zae'ae. 39 Aeqyil hhamul hael laoq, aeqyil maqza ngeelvae; ngaeq gae'lye aeqyil maqza vae hael laoq, aeqyil hhamul maoqlye hhae."
Shangqcil laeqngeel lye mael
40 "Noteel'ae sheeqcaq laq hael laoq, ngaeq'ae sheeqcaq laq ngeelvae; ngaeq'ae sheeqcaq laq hael laoq, ngaeq yaol moqheilheil duyi laq e tyutaeq'ae sheeqcaq biq ngeelvae. 41 Xianzhi vae xianzhi'ae lye sheeqcaq biq hael laoq, xianzhi e shangqcil mael laoqmyel hha bal mul'ae; gongyil e cholyaeq vae gongyil e cholyaeq'ae lye sheeqcaq biq hael laoq, gongyil e cholyaeq e shangqcil mael laoqmyel hha bal mul'ae. 42 Ngael aeqdilmyel noteel'ae geegaeq laeqngeel, aeqsul laqcaq e cholmil gae'lye, xiteel onglci'ae ochoq lye maeq fu'qiq'ongl gil biq e qiq hhaeq'ae, eelqyeq qiq huqm baq hhei biq kaollaoq, yoqhhaeq laoq aeqdilmyel shangqcil mael hhamul'ae."