Anxiqriq e Hhaoqsongl
6
Qiqzael laoq, Yesu anxiqriq'ae meqziq haeldye ae'lye deelpol duyil, yoqhhaeq e laqcaqhael meqziq aelcael che hheikaol aqlaq maellye lyeq hheikaol zaeq gil'ae. 2 Faqlilsail cholyaeq mee'nae hhaeq gee: "Anxiqriq'ae maeq hhae zongl e silqinq mael noteel aeqcheekaol zongl gil lilmaeq?" 3 Yesu yoqhhaeteel'ae geehoq biq: "Dalweil kaol yoqhhaeq'ae cho'lyeq e cholyaeqhael oqma myeq biq fu zongl e silqinq mael, noteel maeq duq gol yil maeq? 4 Dalweil sholhaol'ae do'li, kaol Momil'ae heel biq e aqba mael zaeq vae, yoqhhaeq'ae cho'lyeq e cholyaeqhael vae eiq bi bael zaeq vae. Aqba xilmael jilsi maoqlaol qiq hhaeq eiq maeq hhae zaeq'ae." 5 Yesu yoqhhaeteel'ae yol gee biq: "Cholyaeq Yaqyo laoq anxiqriq e Hhaoqsongl'ae."Yesu lye aqlaq kuga e cholyaeq yaol zonglmeeq biq
6 Anxiqriq e yol qiqzael, Yesu huiltangq'ae do'li laol geemyeq gil biq. Tyuqvae laqsseq mael kuga biq e cholyaeq qiq hhaeq zhol'ae. 7 Momil e saeziq mael loq e laqkiqhael, kaol Faqlilsail cholyaeqhael Yesu anxiqriq'ae cholnael zonglmeeq maeqlye haoqchifu gil mael laoq, Yesu haeqvaehael'ae zonglba hhei maeq lye saelpodu hhei, kaol zhiqmoqkae biq maoqlye zongl hhae. 8 Yesu yoqhhaeteel e neemae onglci'ae nyuq mael loq biq, kaol aqlaq qiqboq kuga e cholyaeq'ae gee biq: "Tullael, cholyaeqhael e yiqsiboq'ae haoqtul deelhhei!" Tyutaeq tullael kaol tyuqvae haoqtul deelhhei vae. 9 Yesu yoqhhaeteel'ae gee biq: "Ngael noteel'ae naelhaeq gil laeqngeel, anxiqriq'ae meeq e zongl laeq, paelsilmyel maeqmeeq e zongl laeq? Aeqyil mael zongldyeqhoq biq laeq, paelsilmyel zonglsil biq laeq? Hae qiq mal hhae zongl hhaemaeq?" 10 Yoqhhaeq dongqpyeq'ae zhol e cholyaeqhael'ae chifu biq, kaol yultaeq'ae gee biq: "Noq e aqlaq mael tyuqdu hhei!" Yoqhhaeq aqlaq tyuqdu hhei'laol, aqlaq mael laefuq laoqmyel peqhoqlal biq vae. 11 Yoqhhaeteel neemae dilbyeq duyi maoqmyel hol biq'ae, Yesu'ae haelmillye zongl biq maoqlye hhaellaelmyel geedazaq gil'ae.
Yesu lye shiqtuq qyelniq hhaeq saelpodu hhei
12 Tyuqfu naohaeq'ae, qiq nao laoq Yesu geeqzhoq vae heeldoq gee li. Yoqhhaeq qiq mil myel Momil'ae heeldoq gee biq. 13 Mqbaebae lael laol, yoqhhaeq lye laqcaqhael yaol gul laeq, yoqhhaeteel onglci ae'lye qyelniq hhaeq saelpodu hhei, kaol yoqhhaeteel'ae shiqtuq lye gul biq hhae. 14 Qiq hhaeq e cholmil mael Ximenq lye gul biq hhae, aeqnaol Yesu yoqhhaeq'ae Biqdeq lye gul biq hhae. Baeqjyelboqhael laoq, Biqdeq e aeqnil Andeqlyel, kaol Yaqgel, Yoqhanl, Fei'lil, Bado'loqmaiq, 15 Maqtail, Domaq, Yallelfei e yaqyo Yaqgel, kaol jijinldangq e Ximenq, 16 Yaqgel e yaqyo Yoqdal, kaol aeqnaol yotyel maqdumyel Yesu yaol ongqzaeq biq e peqyil e Ja'lyul cholyaeq Yoqdal.
Yesu cholyaeqhael'ae geemyeq biq
17 Yesu yoqhhaeteel nyegael geeqzhoq ae'lye qiqgael gae hoqyi, saelza'lye milcaeq vae haoqtul deelhhei. Laqcaq qiq miq yoqhhaeq nyegael qiqgael baelzhol hhae, kaol haelnaeqmyel cholyaeq Yoqtail milcaeq, Ye'lulsa'lenq, Tui'loq kaol Xidunl e eeldeel deeljyel ae'lye lael. 18 Yoqhhaeteel yoqhhaeq geemyeq e saeziq mael naelhaeq lael gil, naelgol mael eiq bi bael zonglmeeq maoqlye xiwanglzaeq hhae. Yesu lye maeqshol e yohael guqzaeq li biq e cholyaeqhael gilzuqmyel zonglmeeq biq vae. 19 Yoqhhaeq e aeqhhaol ae'lye onglzaeq mael duyi, kaol cholyaeqhael e naelgol mael zonglmeeq biq vae. Tyulkaol, cholyaeqhael yoqhhaeq'ae haelmillye hha so yo congl maeq lye zongl gil'ae.
Geeqlongq kaol zaihuol
20 Yesu vuqduq baqtul hheikaol laqcaqhael'ae chifu deelhhei kaol gee:
"Saeqyaeqhael laoq geeqlongq meeq vae,
Momil e Goqja laoq noteel'ae biq biq kaol'ae.
21 Yaeqmeel oqma myeq e cholyaeqhael laoq geeqlongq meeq vae,
aeqgael noteel hhae zaeqdye maoqlye kaol'ae.
Yaeqmeel nyul hael geeqlongq meeq vae,
aeqgael noteel hha eel maoqlye kaol'ae.
22 Cholyaeq Yaqyo gae'lye, noteel'ae neemasu zaq laq, neemae onglci ae'lye noteel'ae deiqtael, noteel'ae gaezaeq, noteel e cholmil mael xinqlalmyel e moqgoq laoqmyel'ae lye kei laeq kaollaoq, noteel geeqlongq meeq wae. 23 Yoqhhaeteel e aeqpyuq aeqdae eiq xianzhihael'ae xilnye zongl gil biq hhae. Ngeelfeiq, noteel'ae mqmae taq e shangqcil mael haelnaeqmyel hhae. Tyulkaol, tyu qiq nao laoq, noteel dilqei dilqei myel hhaol gil aeqkaovae.
24 "Ngeelfeiq, noteel zacongl hael laoq zaihuol za vae,
noteel hael zholsael maoqmyel zholsael du'laq kaol'ae.
25 Noteel zaeqkyuq kyuqdeel e cholyaeqhael laoq zaihuol za vae,
noteel aeqgael laoq hha myeq kaol'ae.
Yaeqmeel eel e cholyaeqhael laoq zaihuol za vae,
noteel aeqgael laoq nyuqsaeq kaol hhae nyul kaol'ae.
26 Aeqsul eiq noteel'ae zhee meeq she lye gee laeq fu laoq, noteel zaihuol za wae. Yoqhhaeteel e aeqpyuq aeqdae eiq jaq xianzhihael'ae xilnye zongl gil biq kaol'ae."
Noq e chouqrenq'ae gaeq biq maoqhhae
27 "Ngeelfeiq, ngael noteel'ae ngaeq e saeziq mael naelhaeq deelhhei e cholyaeqhael'ae geegaeq laeqngeel: noteel chouqrenq'ae gaeq biq maoqhhae, noteel'ae neemasu zaq laq e cholyaeqhael'ae haelmeeqlye za biq maoqhhae. 28 Noteel'ae doqchiq gee laeq e cholyaeq'ae, geeqlongq meeq li biq lye gee biq maoqhhae; noteel'ae zonglkyuq laeq hael'ae heeldoq bael gee biq maoqhhae. 29 Ochoq noq e maduq qiqboq'ae tyel laeq laol, yulboq vae eiq bi tyel aeqkaovae; ochoq noq e nildu'ae dum e poljye mael, heilzaeq yil kaollaoq, onglci'ae dum do e poljye mael eiq bi heilzaeq yil aeqkaovae. 30 Aeqsul noq'ae aeqchee saelzaeq laeq laol, yoqhhaeq'ae heil hhei biq; ochoq noq e moqgoq mael heilzaeq yil laeq kaollaoq, haeq saelzaeq hoqlaeq. 31 Noteel ochoq noteel'ae haelmillye bi za goq laol, noteel eiq ochoq'ae tyulnye za biq maoqhhae. 32 Noteel'ae gaeq laeq e cholyaeqhael'ae oqlye gaeq biq kaollaoq, noteel'ae aeqchee meeqyo'lael kiq maeq? Golsiq za e cholyaeqhael eiq yoqhhaeteel'ae gaeq biq e cholyaeqhael'ae oq gaeq biq. 33 Noteel'ae haelmeeqlye meeq laeq e cholyaeqhael'ae, noteel eiq yoqhhaeteel'ae oqlye haelmeeqlye meeqhoq biq kaollaoq, meeqyaevae lye aeqchee gee biq kael maeq? Golsiq za e cholyaeqhael eiq xilnye zonglkeel ongl'ae. 34 Noteel ochoq'ae dyuqbaq jil biq, heilzaeq hoqlaeq maoqlye xiwanglzaeq kaollaoq, meeqyaevae lye aeqchee gee biq kael maeq? Golsiq za e cholyaeqhael eiq golsiq za e cholyaeqhael'ae oq jil biq, kaol haeldyul laol haeldyul saelzaeqhoq hhae. 35 Ngeelfeiq, noteel laoq noteel e chouqrenq'ae gaeq biq maoqhhae, yoqhhaeteel'ae haelmeeqlye meeq biq; jil duyil e dyuqbaq mael heilzaeq hoqlaeq maoqlye haeq chifuzaeq. Xilnye zongl laol, noteel e shangqcil mael zhee naeq hhae, hhaelgao gao'li Momil e yaqyo eiq hha geiq. Momil laoq meeq laeq yae lye maqza kiq e cholyaeqhael'ae kaol duqlaq e cholyaeqhael'ae haelmeeqlye meeq biq kaol'ae. 36 Noteel e mqmae Aeqdae cholyaeqhael'ae hhaoqsaeqsaeq kiq laoqmyel, noteel eiq ochoq'ae hhaoqsaeqsaeq biq maoqhhae.
Ochoq'ae maeq hhae panlduanl'ae
37 "Noteel ochoq'ae panlduanl laol, ochoq eiq noteel'ae panlduanl laelkiq'ae; ochoq'ae golsiq za'ae lye maeq gee laol, noteel'ae golsiq za'ae lye maeq gee lael kiq'ae; noteel ochoq'ae yuanqliangl biq laol, Momil noteel'ae yuanqliangl laeq'ae. 38 Noteel ochoq'ae heil biq kaollaoq, Momil eiq noteel'ae heil laeq'ae. Noteel ochoq'ae aeqchee coqloq maellye kuq biq laol, Momil eiq noteel'ae aeqchee coqloq maellye kuq hoq laeq'ae, kaol meeq e coqloq maellye deiqti hhei ssuti hhei, kaol bonghael duyi aeqmyel, noteel e yiqsiboq'ae daeq deelhhei e moqgoq mael'ae xyedo hhei laeq'ae."
39 Yesu dullaelmyel guqjin maellye yoqhhaeteel'ae yol gee biq: "Mabyeq haelmillyekaol mabyeq'ae gaelmae sheeqmyeq biq laeq? Niq nulhhaeq myel duqhongq'ae maeq leeqdo hhei maeq? 40 Laqcaq laoqsi'ae maeq jyeqli ongl'ae, ngeelfeiq, xoqxiq byel e qiq hhaeq laoq, laoqsi laoqmyel ngeelvae. 41 Nol aeqcheekaol noq e yelchoq e ma'ne onglci'ae zoq e gongqbeeq mael mol congl, noq e ma'ne onglci'ae aelbol duqmae zoq yae lye maeq nyuq lilmaeq? 42 Noq e ma'ne onglci'ae zoq e aelbol duqmae mael maeq mol congl laol, haelmillyekaol noq e yelchoq'ae gee biq: 'Yelchoq, ngael noq e ma'ne onglci'ae zoq e gongqbeeq mael bael heildu laqngeel.' Gee kaol zongl mael maeq qiqsheel e cholyaeq o! Noq e ma'ne onglci'ae aelbol duqmae mael heildu hhei'laol haelmeeqlye mol congl laelkiq wae, xilnye laol, noq e yelchoq e ma'ne onglci e gongqbeeq mael heildu biq kael wae.
Meeq e aelbol kaol maeqmeeq e aelbol
43 Meeq e aelbol laoq maeqmeeqmyel aelsiq maeq siq laelkiq'ae, maeqmeeq e aelbol eiq aelsiq yomeeq maeq siq laelkiq'ae. 44 Aelsiq mael'ae fu laol aelbol xi qiq bol laoq haelmillye she lye loq wae. Cholyaeq aelgong gongbol ae'lye siqpyu'laq'oq e aelsiq maq che hhei ongl'ae, pongqdeiq ae'lye eiq siqbaq maq che hhei ongl'ae. 45 Neemae meeq e cholyaeq laoq, meeq e zongldu beq hhei ngeelvae; neemae duqlaq e cholyaeq laoq, duqlaq myel zongldu beq hhei ngeelvae; neemae onglci'ae haelmillye nyuqtongq deelhhei laol, myeqbongq mael eiq haelmillye geedu hhei kaol'ae.
Maeq qiqsheel myel vae zongl deelhhei e congqciq paeqhhael
46 "Noteel aeqcheekaol myeqbongq mael laoq ngaeq'ae 'Hhaoqsongl o! Hhaoqsongl o' lye gul feiq, ngael moqheilheil mael laoq maeq naelhaeq gil lilmaeq? 47 Ngaeq saeqvae keellael e cholyaeqhael, aeqsul eiq ngaeq e saeziq mael naelhaeq dyul maeqcilmyel zongl yil kaollaoq, ngael noteel'ae yoqhhaeq haelmillye cholyaeq'ae lye geegaeq gil laeqngeel. 48 Yoqhhaeq laoq laoqhaol cuzaq e cholyaeq qiq hhaeq laoqmyel hhae. Yoqhhaeq milcaeq vae duqhongq hongqmae duq zu doyil, congqciq paeqhhael mael haqlo loongl taq'ae ciq da hhei. Laoqhaol cu meeq hhei vae, eellyeqlyeq gaeyi, eellyeq mael laoqhaol mael'ae tongq feiq, laoqhaol mael maeq tongq ni ongl'ae. 49 Ngeelfeiq, ngaeq e saeziq mael gaeq feiq maeq zongl yil e cholyaeq laoq, cholyaeq qiq hhaeq congqciq paeqhhael maqza myel milcaeq taq'ae laoqhaol cuzaq laoqmyel hhae. Eellyeq mael laoqhaol mael'ae tongq fu, laoqhaol mael nae'naemyel leeqba hhei vae, kaol ba'lye wae."