Geeqzhoq vae lye geemyeq e saeziqhael
5
Yesu cholyaeq xi qiq miq yaol mol hhei biq laol, geeqzhoq vae da'li vae, kaol zholgae hhei'laol, laqcaqhael yoqhhaeq e yiqsi'ae keellael, 2 Kaol yoqhhaeq myeqbongq gu'ngae hheikaol yoqhhaeteel'ae geemyeq gil biq, gee:Geeqlongq mael'ae gee
3 "Neemae saeq biq e cholyaeqhael laoq geeqlongq meeqa vae!
Mqmae Goqja mael yoqhhaeteel'ae biq biq kaol'ae.
4 Zhee nyuqsaeq hael laoq geeqlongq meeq vae!
Yoqhhaeteel'ae haeq nyuqsaeq lye hhae bi gee maoqlye kaol'ae.
5 Naoqyae'lye za kiq e cholyaeqhael laoq geeqlongq meeq vae!
Yoqhhaeteel aeqhael hhamul maoqlye kaol'ae.
6 Gongyil mael'ae zhee mulgoq e cholyaeqhael laoq,
geeqlongq meeq vae!
Yoqhhaeteel aeqdilmyel hhamul maoqlye kaol'ae.
7 Ochoq'ae hhaoqsaeqsaeq kiq e cholyaeqhael laoq,
geeqlongq meeq vae!
Yoqhhaeteel'ae hhaoqsaeq hhae bi saeq maoqlye kaol'ae.
8 Neemae sholgaqlye cholyaeqhael laoq geeqlongq meeq vae!
Yoqhhaeteel Momil yaol hhae mol maoqlye kaol'ae.
9 Cholyaeq yaol bi hoqpinq e cholyaeqhael laoq,
geeqlongq meeq vae!
Yoqhhaeteel'ae Momil e yaeqguq'ae lye hhae bi gul maoqlye kaol'ae.
10 Gongyil gae'lye guaeq'ei bi diqqye e cholyaeqhael laoq,
geeqlongq meeq vae!
Mqmae Goqja mael yoqhhaeteel kaol'ae.
11 "Cholyaeq ngaeq gae'lye noteel'ae gaezaeq laeq, guaeq'ei diqqye laq, kaol maeq qiqsheel e maeqmeeq e saeziq maellye noteel'ae geekyuq laeq kaollaoq, noteel geeqlongq meeq vae! 12 Kaol noteel zhee hhaol gil aeqmeel, noteel'ae mqmae vae shangqcil laeq maoqlye mael haelnaeqmyel kaol'ae. Noteel e laefuq'ae xianzhihael'ae, cholyaeqhael eiq yoqhhaeteel'ae xilnye guaeq'ei diqqye gil biq hhae."
Laqcaqhael laoq caqdeq kaol aeqcael geiq maoqhhae
13 "Noteel laoq milcaeq taq e caqdeq'ae. Caqdeq mael maeq haeq myel peqyil hhei kaollaoq, aeqchee maellye caqdeq mael bi haeq hoqlael laeq? Caqdeq mael qiqgiq maq mulyo vae, kaol nildu'ae beiq du hheikaol cholyaeq lye bi nuq hhei wae. 14 Noteel laoq milcaeq taq e aeqcael'ae. Geeqzhoq vae cu deelhhei e milmae heeqmyel mael laoq maeq zonglhhaq ongl'ae. 15 Cholyaeq aeqdael doqhoq keeqdoq hhei'laol, keelcuq e holhhaqboq'ae maq baq deel'ae, aeqdael doqhoq baqdeel myel vae baqdeel maoqhhae, kaol qiq haoq e cholyaeqhael'ae keeqmol hhei biq. 16 Kaol noteel e aeqcael mael eiq cholyaeqhael e yiqsi'ae xilnye keeqmol hhei biq maoqhhae, kaol yoqhhaeteel'ae noteel e meeq e xinqweiq mael bi mol hhei'laol, rongqyaol mael noteel e mqmae'ae zhol e aeqdae vae biq hhei biq."
Lilfaq mael'ae gee mael
17 "Noteel laoq ngael lael mael laoq, lilfaq kaol xianzhi e saeziq mael hega maoqlye hhae lye haeq kei gil. Ngael lael mael laoq hega maoqlye maeqngeel yil, bi peqlal maoqlye lil. 18 Ngael aeqdilmyel noteel'ae geegaeq laeqngeel, mqmae milcaeq mael maqza myel peqyil feiq, lilfaq mael qiqgael teel eiq maq hha hega hhei'ae, gilzuqmyel peqlal maoqlye hhae. 19 Tyulkaol, aeqsul lye gailminl onglci e maq hhal mulyo e qiq mal hega hhei, kaol cholyaeq'ae xilnye zongl lye geemyeq biq kaollaoq, yoqhhaeq'ae Mqmae Goqja vae hhaelnil nilli e qiq hhaeq lye hhae bi gul ngeelvae; ngeelfeiq, aeqsul gailminl xihael laoqmyel zongl yil, kaol cholyaeq'ae xilnye geemyeq biq kaollaoq, yoqhhaeq'ae Mqmae Goqja vae hhael heeq e qiq hhaeq lye hhae bi gul wae. 20 Ngael noteel'ae geegaeq laeqngeel, noteel e gongyil mael Momil e saeziq mael loq e laqkiq kaol Faqlilsail cholyaeqhael e gongyil mael'ae maeq jyeqli ongl kaollaoq, aeqdilmyel Mqmae Goqja vae maq hha do'li'ae.
Cholyaeq'ae faqhoq maeq kei biq hhaeq'ae
21 "Noteel laoq yilkaeaeqnao e cholyaeq'ae xilnye moqheilheil biq mael gaeq gol'ae: 'Cholyaeq maq hha xyeq'ae'; 'Cholyaeq xyeq hael laoq, aeqdilmyel hhae bi shenqpanl ngeelvae.' 22 Ngeelfeiq, ngael noteel'ae geegaeq laeqngeel: Aeqsul aqsseq aeqnil'ae faqhoqkei biq laol, aeqdilmyel hhae bi shenqpanl ngeelvae. Aeqsul aqsseq aeqnil'ae qiqgiq boq'ae maeq yo'ae lye vuq biq kaollaoq, aeqdilmyel Yoqtail Yilhuil vae lye hhae bi shenqpanl ngeelvae; aeqsul aqsseq aeqnil'ae yaeqzhoq'ae lye vuq biq kaollaoq, daq'oqlaqmae e aeqzaeq doq mael hhae shel ngeelvae. 23 Tyulkaol, nol jiltanq taq'ae zaelheel heel fu, aqsseq aeqnil noq'ae neemasu biq hhae lye nyuq tullaeq kaollaoq, 24 Zaelheel mael jiltanq yiqsi'ae heildeelsaeq, laefuqmyel yil kaol aqsseq aeqnil nyegael maoqhoqli, aeqnaol noq e zaelheel mael baqheel da hhei lal. 25 Nol kaol noq'ae zhiqmoqkae maoqlye e qiq hhaeq gaelmae vae deel siq fu, nae'naemyel yoqhhaeq nyegael maoqhoqli maoqhhae, aeqgael yoqhhaeq lye noq yaol faqguan zael'ae eemoq li, faqguan lye noq yaol cholyaeq ee'longl e cholyaeq'ae eemoq biq, kaol laoqgaiqkei laoqhaol vae ee'longl li laeqngeel. 26 Ngael aeqdilmyel noq'ae geegaeq laeqngeel, dyuqbaq qiq baq maeq heil lo hhei biq kaollaoq, nol aeqdilmyel tyuqvae lye maq duyi ongl'ae.
Ochoq nyegael neemaeba maoqlye maeq hhae nyuq'ae
27 "Noteel xilnye saeziq gaeq gol: 'Ochoq nyegael neemae maq hha ba'ae.' 28 Ngeelfeiq, ngael noteel'ae geegaeq laeqngeel, aeqsul cholhae aeqmae yaol mol hhei'laol, yoqhhaeq nyegael neemaeba goq yae lye nyuq laol, cholyaeq xitaeq laoq neemae onglci'ae lye yoqhhaeq nyegael neemaeba wae. 29 Noq e laqsseqboq e ma'ne lye noq'ae golsiq bi pi laeq kaollaoq, ma'ne mael heqdu hheikaol beiqgae hhei. Aeqhhaol qiqsiqmyel daq'oqlaqmae vae bi beiqdo hhei mael taq laoq, aeqhhaol taq'ae qiq mal baelyil hhei mael hhael meeq'ae. 30 Noq e laqsseq lye noq'ae golsiq bi pi laeq kaollaoq, aqlaq mael dega hheikaol beiqgae hhei. Aeqhhaol qiqsiqmyel daq'oqlaqmae vae bi beiqdo hhei mael taq laoq, aeqhhaol taq'ae qiq mal baelyil hhei mael hhael meeq'ae."
Haeqmiq'ae maq mul biq vae lye maeq hhae zongl'ae
31 "Saeziq yol gee: 'Aeqsul haeqmiq'ae maq mul biq vae lye kaollaoq, yoqhhaeq'ae maq mul biq vae lye cu hhei e suqhhaq heil biq maoqhhae.' 32 Ngeelfeiq, ngael noteel'ae geegaeq laeqngeel: Haeqmiq'ae maq mul biq vae hael laoq, yoqhhaeq ochoq nyegael meeqzaeq gae'lye maeqngeel kaollaoq, yoqhhaeq yaol ochoq nyegael neemaeba e cholyaeq zonglpeq biq vae; aeqsul haqyo lye maq mul biq e cholhae aeqmae yaol sheeqtoqzaeq kaollaoq, ochoq nyegael neemaeba e cholyaeq wae."
Faqsil maeq hhae kei'ae
33 "Noteel laoq yilkaeaeqnao e cholyaeq'ae gee biq e saeziq yol gaeq gol: 'Faqsilkei gol mael maeq zongl maeq hhaeq'ae, Hhaoqsongl'ae faqsilkei gol biq mael haelmillyekaol eiq haelmeeqlye zongl gaeyil maoqhhae.' 34 Ngeelfeiq, ngael noteel'ae geegaeq laeqngeel: Qiqgiq faqsil eiq maeq hhae kei'ae. Mqmae'ae tyuq deelhhei kaol faqsil maeq hhae kei'ae, mqmae laoq Momil e zongmae duqtyel kaol'ae. 35 Milcaeq'ae tyuq deelhhei kaol faqsil maeq hhae kei'ae, milcaeq laoq Momil aeqkeel baqda e toqmoq kaol'ae; Ye'lulsa'lenq'ae tyuq deelhhei kaol faqsil maeq hhae kei'ae, Ye'lulsa'lenq laoq zongmae maemae e milmae heeqmyel milcaeq kaol'ae; 36 Aeqyoyoq e vuqduq'ae tyuq deelhhei kaol faqsil maeq hhae kei'ae, nol qyelkeel qiq ke mael bi pul lael, paelsilmyel bi na yil maoqlye maeq ongl kaol'ae. 37 Noteel e saeziq mael, ngeel laol ngeel'ae lye gee, maeqngeel laol maeqngeel'ae lye gee. Zail gee siq kaollaoq, duqlaq e tyutaeq ae'lye lael wae."
Ochoq'ae maeq hhae zonglhoq biq'ae
38 "Noteel xilnye gee e saeziq gaeq gol: 'Ma'ne mael zonglbyeq laq laol, ma'ne mael zonglbyeq hoq biq, myeqsheq mael tyelcu laq laol, myeqsheq mael tyelcu hoq biq.' 39 Ngeelfeiq, ngael noteel'ae geegaeq laeqngeel: Duqlaq e cholyaeq nyegael haeq zongltyeltoq. Cholyaeq noq e laqsseqboq e maduq'ae tyel laeq laol, zipol lael kaol baeqjyelboq e qiqboq eiq yoqhhaeq'ae bi tyel aeqkaovae. 40 Cholyaeq noq'ae zhiqmoqkae maoqlye zongl, kaol noq e onglci'ae dum do e aelhongq mael heilzaeq maoqlye nyuq laol, nildu'ae dum e aelhongq mael eiq yoqhhaeq'ae bi heilzaeq yil aeqkaovae. 41 Cholyaeq noq'ae maeqnaelhaeq maeqzaeqmyel gaelmae qiq qye bael deel laeq lye zongl laeq laol, yoqhhaeq'ae niq qye bael deel biq. 42 Cholyaeq noq'ae saelzaeq laeq laol, yoqhhaeq'ae heil hhei biq; noq'ae jilzaeq laeq laol, maeq jil lye maeq hhae zongl biq'ae.
Noq e chouqrenq'ae gaeq biq maoqhhae
43 "Noteel xilnye gee e saeziq gaeq gol: 'Noq e dongqpyeq e cholyaeq'ae gaeq biq maoqhhae, noq e chouqrenq'ae neemasu zaq biq maoqhhae.' 44 Ngeelfeiq, ngael noteel'ae geegaeq laeqngeel: Noteel e chouqrenq'ae gaeq biq maoqhhae, noteel'ae guaeq'ei diqqye laq e cholyaeq'ae heeldoq bael gee biq maoqhhae. 45 Xilnye laol, noteel laoq noteel e mqmae Aeqdae e yaeqmiq yaqyo hha geiq wae. Yoqhhaeq laoq neelmae mael maeqmeeq e cholyaeq vae cuqmol biq, meeq e cholyaeq vae eiq cuqmol hhei biq; vuq'yel mael gongyil e cholyaeq'ae yelgae hhei biq, maeq gongyil e cholyaeq eiq yelgae hhei biq kaol'ae. 46 Noteel laoq noteel'ae gaeq laeq hael'ae oqlye gaeq biq kaollaoq, aeqchee shangqcil za kaol laeq? Shuil shezaeq hael eiq xilnye zongl maeqngeel maeq? 47 Noteel laoq noteel e aqsseq aeqnilhael'ae oqlye meeqlaeqmaeq lye naelhaeq biq kaollaoq, noteel ochoq taq'ae aeqchee hhael henq kaollaeq? Baeqjyelboq minqcuq e cholyaeq eiq xilnye zongl maeqngeel maeq? 48 Tyulkaol, noteel laoq noteel e mqmae Aeqdae qiqgiq geehhael maqza laoqmyel, noteel eiq qiqgiq geehhael maqza myel ngeel maoqhhae."