Ochoq'ae hhaoqsaeqsaeq gae'lye heil biq mael
6
"Noteel aeqyae'lye kei maoqhhae, cholyaeqhael'ae bi mol maoqlyekaol yoqhhaeteel e yiqsi'ae neemae qiqsiqmyel Momil'ae cho'lyeq lil lye baelyaelmyel haeq zongl, xilnye kaollaoq, noteel e mqmae Aeqdae lye shangqcil laeq mael maq hhamul wae.2 Tyulkaol, nol ochoq'ae hhaoqsaeqsaeq gae'lye heil biq fu, gee kaol zongl mael maeq qiqsheel e cholyaeqhael laoqmyel haeq ngeel, yoqhhaeteel huiltangq kaol gaiziq vae vuqkyul bo mael laoq, baelyaelmyel cholyaeq yaol yoqhhaeteel'ae laqma bi deiqqei maoqlye hhae. Ngael aeqdilmyel noteel'ae geegaeq laeqngeel, yoqhhaeteel laoq yoqhhaeteel e shangqcil mael hhamul hhei biq vae. 3 Nol ochoq'ae hhaoqsaeqsaeq gae'lye heil biq fu, laqsseq zongl mael laeqbael'ae haeq bi loq, 4 Xilnye laol, nol cholyaeq'ae hhaoqsaeqsaeq gae'lye heil biq mael cholyaeq maeq loq myel vae lye hhae zongl wae; noq e aeqdae cholyaeq maeq loq myel vae lye chifu hhei'laol, aeqdilmyel noq'ae shangqcil laeq'ae."
Heeldoq gee fu zongl maoq mael
5 "Noteel heeldoq gee fu, gee kaol zongl mael maeq qiqsheel e cholyaeqhael laoqmyel haeq zongl, yoqhhaeteel laoq baelyaelmyel cholyaeqhael'ae bi mol maoqlye, huiltangq kaol gallaq za e gaelmae vae heeldoq gee mael hhaol biq hhae. Ngael aeqdilmyel noteel'ae geegaeq laeqngeel, yoqhhaeteel laoq yoqhhaeteel e shangqcil mael hhamul hhei biq vae. 6 Nol heeldoq gee fu, nulyaeq'ae do'li, oheiq piqtyeq hhei, kaol cholyaeq maeq loq myel vae zhol e aeqdae'ae heeldoq gee biq. Noq e aeqdae cholyaeq maeq loq myel vae lye chifu hhei'laol, aeqdilmyel noq'ae shangqcil laeq'ae. 7 Noteel heeldoq gee fu, baeqjyelboq minqcuq e cholyaeq laoqmyel qiqgiq yilsi maqza e saeziq mael naqdye haq dye gil, yoqhhaeteel laoq saeziq naeq laol naelhaeq nae laeq'ae lye kei biq hhae. 8 Noteel yoqhhaeteel zongl laoqmyel haeq bael zongl, noteel geezaeq laefuq'ae, noteel e aeqdae laoq noteel mulyo mael haeqfu'ae'lye loq vae kaol'ae.
Hhaoqsongl geemyeq e heeldoq
9 "Tyulkaol, noteel heeldoq xilnye gee maoqhhae:
'Ngaeteel e mqmae vae zhol e aeqdae o:
Cholyaeqhael nol laoq senljyeq hhae lye gee lye nyuqlil.
10 Nol zongmae geiq yi lye nyuqlil,
noq e zhiqyil mael mqmae vae peqlal laoqmyel,
milcaeq taq vae eiq tyulnye peqlal biq lye nyuqlil.
11 Ngaeteel naochomyel mulyo e zaeqzael mael,
nol ngaeteel'ae naochomyel biq laq;
12 Ngaeteel ngaeteel'ae zonglzhil laeq e cholyaeq'ae yuanqliangl biq laoqmyel,
nol eiq ngaeteel lye noq'ae zonglzhil biq mael yuanqliangl laeq.
13 Ngaeteel'ae cheeqmu myel vae haeq bi leeqdo laq,
ngaeteel yaol duqlaq e tyutaeq zaellye jiul duyi laq.
Goqja, laqtaq kaol rongqyaol mael,
haeqfu keellye noq kaol'ae.
Amen!'
14 Noteel ochoq lye zonglzhil laeq mael yuanqliangl biq kaollaoq, noteel e mqmae Aeqdae eiq noteel'ae yuanqliangl laeq'ae. 15 Noteel ochoq'ae maeq yuanqliangl biq kaollaoq, noteel e aeqdae eiq noteel lye zonglzhil mael maeq yuanqliangl laeq'ae."
Maeq zaeq myel zhol
16 "Noteel maeq zaeq myel zhol fu, gee kaol zongl mael maeq qiqsheel e cholyaeq laoqmyel haeq ngeel, yoqhhaeteel maduq mael fusaeq lael aeqmyel zongl du hhei, aeqyoyoq'ae maq pashoqzaeq, kaol baelyaelmyel cholyaeqhael vae yoqhhaeteel laoq maeq zaeq myel zhol hhae lye bi fudu hhei maoqlye hhae. Ngael aeqdilmyel noteel'ae geegaeq laeqngeel, yoqhhaeteel laoq yoqhhaeteel e shangqcil mael hhamul hhei biq vae. 17 Nol maeq zaeq myel zhol fu, vuqduq ka maduq eiq ciq maoqhhae, 18 Kaol cholyaeq lye nol maeq zaeq myel zhol she lye haeq bi fuduzaq hhei, cholyaeq maeq loq myel vae zhol e aeqdae'ae bi mol laol hhaeq vae. Noq e aeqdae cholyaeq maeq loq myel vae lye chifu hhei'laol, aeqdilmyel noq'ae shangqcil laeq'ae."
Pyuqjyeqjyeq e moqgoq mael mqmae vae taeq deelhhei
19 "Aeqyoyoq gae'lye milcaeq taq'ae pyuqjyeqjyeq e moqgoq haeq taeqdeelzaeq, milcaeq taq'ae aeqbyuq zaeq li kiq, sulmkiq zaeq li kiq, kaol lolbiq gonglbyu duqbongq do'laq kaol haoqzaeq lael kiq'ae. 20 Pyuqjyeqjyeq e moqgoq mael mqmae taq'ae taeq deelhhei maoqhhae; mqmae vae aeqbyuq maeq zaeq li kiq, sulmkiq maeq zaeq li kiq, kaol lolbiq eiq gonglbyu maeq duqbongq do'laq kaol maeq haoqzaeq lael kiq'ae. 21 Noteel e pyuqjyeqjyeq e moqgoq mael haeqvae za laol, noteel e neemae mael eiq tyuqvae za kaol'ae."
Ma'ne laoq aeqhhaol e aeqdael doqhoq ngeelvae
22 "Ma'ne laoq aeqhhaol e aeqdael doqhoq'ae. Noq e ma'ne mael geelyiqlye kaollaoq, aeqhhaol qiqsiqmyel aeqcael cael sholmyel wae; 23 Noq e ma'ne mael maeqmeeq kaollaoq, aeqhhaol qiqsiqmyel nahongqlye wae. Noq e onglci e aeqcael mael nahongqlye peqyil hhei kaollaoq, nahongqlye tyulmael laoq haeqheemyel wae!"
Cholyaeq qiq hhaeq hhaoqsongl niq nulhhaeq'ae maeq hhae fuqshil'ae
24 "Cholyaeq qiq hhaeq hhaoqsongl niq nulhhaeq'ae maeq hhae fuqsil'ae; yoqhhaeq xitaeq'ae neemasu zaq biq, yultaeq'ae gaeq biq, xitaeq'ae neemae xyelpu maqpu biq, yultaeq'ae maeq fu'qiq'ongl biq myel zongl ngeelvae. Noteel Momil vae fuqsil, Maqmenqa mael'ae yol fuqsil myel maeq zongl hhaeq'ae."
Haq zoqgiq gil
25 "Tyulkaol, ngael noteel'ae geegaeq laeqngeel, aeqyil gae'lye aeqchee zaeq maoq, aeqchee dol maoqlye haq zoqgiq, aeqhhaol gae'lye aeqchee dum maoqlye eiq haq zoqgiq. Aeqyil laoq zaeqzael taq'ae hhal mulyo maeqngeel maeq? Aeqhhaol laoq aelhongq taq'ae hhal mulyo maeqngeel maeq? 26 Noteel mqmae e haeqzil mael'ae fu hhei gil, yoqhhaeteel ael'yuq maeq xeiq, maeq heille, kaol zaelsiq baqdeelzaeq e laoqhaol vae eiq zaelsiq maeq taeqdeelzaeq'ae, noteel e mqmae e aeqdae haeqzilhael'ae dyel'eiq cudyeq biq, noteel haeqzil taq'ae hhael pyuq maeqngeel maeq? 27 Noteel onglci'ae aeqsul zoqgiq ae'lye aeqyoyoq e aeqyil mael aelheel hhael bi maol laelkiq lilmaeq? 28 Aelhongq gae'lye zoqgiq kael maeq? Noteel byelcongq e eilya haelmillye heeqda lal hhaemaeq lye nyuq fufu: Eilya alyi mael aeqhael maq mul, haeqpael eiq maq hhaq. 29 Ngeelfeiq, ngael noteel'ae geegaeq laeqngeel, Soqloqmenq Zongmae zhee henqdada fu dum e poljye mael, alyi xihael onglci e qiq yi mael vae eiq maeq jyeqli ongl'ae. 30 Xinlxin aelheel maoq maqza e cholyaeqhael o! Byelcongq e haelsaeq, yaeqnao za siq, naeshoq laoq yuqduq'ae beiq pe biq, Momil haelsaeqhael'ae xilnye zonglzhi hhei biq, noteel'ae laoq nyeq'ei maeq gee kael wae. 31 Tyulkaol, haq zoqgiq gil, gee: 'Ngaeteel aeqchee zaeq laeq? Aeqchee dol laeq? Aeqchee dum laeq?' 32 Xihael laoq baeqjyelboq minqcuq e cholyaeqhael saelpo hhae. Noteel e mqmae Aeqdae laoq noteel mulyo e moqgoq xihael gilzuqmyel loq wae. 33 Noteel laefuqmyel Momil e Goqja, kaol yoqhhaeq e gongyil mael'ae geezaeq laol, xihael gilzuqmyel noteel'ae biq da hhei laq siq. 34 Tyulkaol, naeshoq gae'lye haq zoqgiq, naeshoq laoq naeshoq e zoqgiq e vuqtu mael za kaol'ae, qiq nao e saeq mael qiq nao pi laol hhaeq vae."