Hhaoqsongl geemyeq e heeldoq
11
Qiq nao laoq, Yesu milcaeq qiqgael vae heeldoq gee hhae. Heeldoq gee byel hhei'laol, laqcaq qiq hhaeq yoqhhaeq'ae gee biq: "Hhaoqsongl o! Yoqhanl aeqyoq e laqcaqhael'ae geemyeq biq laoqmyel, ngaeteel'ae heeldoq haelmillye gee lye geemyeq laeq." 2 Kaol Yesu yoqhhaeteel'ae gee biq: "Noteel heeldoq gee fu, xilnye gee maoqhhae:'Mqmae Aeqdae o!
Cholyaeqhael nol laoq senljyeq hhae lye gee lye nyuqlil;
nol zongmae geiq yi lye nyuqlil.
3 Ngaeteel naochomyel mulyo e zaeqzael mael,
nol ngaeteel'ae naochomyel biq laq;
4 Ngaeteel ngaeteel'ae zonglzhil laeq e cholyaeq'ae yuanqliangl biq laoqmyel,
nol eiq ngaeteel lye noq'ae zonglzhil biq mael yuanqliangl laeq.
Ngaeteel'ae cheeqmu myel vae haeq bi leeqdo laq.'"
Saelzaeq laol saelzaeq hhei ongl'ae
5-6 Yesu yoqhhaeteel'ae yol gee biq: "Noteel onglci'ae cholyaeq qiq hhaeq e yelchoq sul'ongl'ae yoqhhaeq tyuqvae lael, kaol yoqhhaeq'ae gee biq: 'Yelchoq o, ngaeq e yelchoq ngatoq'ae keellaeq vae, ngeelfeiq, ngael yoqhhaeq'ae qiqgiq baqda biq maqza laq'ae, kaol ngaeq'ae aqba suq mael jil hhei laeq.' 7 Yultaeq laoq laoqhaol onglci'ae lye geehoq biq: 'Ngaeq'ae haeq bi tullael laeq o, oheiq piqtyeq meeq aeqwae, yaeqguqhael eiq ngaeq nyegael ssuqhhal taq'ae baelzhol wae, ngael maeq hhae tullael kaol noq'ae maeq hhae heilmoq biq yaevae.' 8 Ngael noteel'ae geegaeq laeqngeel, yoqhhaeq laoq yoqhhaeteel yelchoq'ae lye kaol tullael kaol yoqhhaeq'ae heil biq maeqngeel kaol feiq, yoqhhaeq saqdol caeq maeq loq myel duqlye sael biq gae'lye, tullael kaol yoqhhaeq'ae mulyo biq mael heil biq'ae. 9 Ngael noteel'ae yol geegaeq laeqngeel, noteel geezaeq laol, noteel'ae heil laeq'ae; saelpo laol, saelpopuq hhei ongl'ae; oheiq mael'ae cheq laol, noteel'ae oheiq pong hhei laeq'ae. 10 Geezaeq e cholyaeq laoq hhamul'ae, saelpo e cholyaeq laoq saelpopuq hhei ongl'ae, oheiq mael'ae cheq e cholyaeq laoq, yoqhhaeq'ae oheiq pong biq kaol'ae. 11 Noteel onglci e aeqdaehael, noq e yaqyo ngaeqdyel saelzaeq fu, daoldaolmyel yoqhhaeq'ae oqhol niq biq laeq? 12 Paelsilmyel, havu saelzaeq fu, yoqhhaeq'ae xyeziq niqmoq biq laeq? 13 Noteel maeqmeeq feiq, meeq e moqgoq mael yaeqmiq yaqyo'ae heil biq maoqlye loq'ae, mqmae Aeqdae laoq nyeq'ei maeq gee kael vae. Yoqhhaeq laoq senllinq mael yoqhhaeq'ae geezaeq e cholyaeqhael'ae biq biq maeqngeel maeq?"
Faqlilsail cholyaeq Yesu'ae Byeqxibuq'ae lye gee biq
14 Yesu lye cholyaeq yaol yaqba bi ba yil kiq e niqhaeq yaol lyeqdu biq, niqhaeq duyi laol, yaqba saeziq gee kiq lael vae. Kaol cholyaeqhael gaqmaqzuq li gil biq'ae. 15 Ngeelfeiq, qiq miq laoq gee: "Yoqhhaeq laoq niqhaeq zongmae Byeqxibuq'ae kaolzaeq maeqngeel kaollaoq niqhaeq maeq lyeqdu ongl'ae." 16 Baeqjyelboq e cholyaeq qiq miq yoqhhaeq'ae shilfu biq, Yesu vae mqmae ae'lye lael e shenqjiq zonglfu hhei laeq lye geezaeq biq. 17 Yesu yoqhhaeteel nyuqtongq deelhhei mael loq biq, kaol yoqhhaeteel'ae gee biq: "Goqja qiqgael cholyaeqhael zonglgae kaollaoq, goqja xilmael laoq myeyil hhei ngeelvae; qiq haoq toq e cholyaeqhael zonglgae kaollaoq, xi toq laoq cholgulcillye peqyil hhei ngeelvae. 18 Saqdanl hhaellaelmyel zonglgae kaollaoq, yoqhhaeq e goqja mael haelmillye zhol gaeyil laeq? Ngael xilnye gee mael laoq, noteel ngael Byeqxibuq'ae kaolzaeq kaol niqhaeq lyeqdu hhae lye gee laeq kaol'ae. 19 Ngael Byeqxibuq'ae kaolzaeq kaol niqhaeq lyeqdu kaollaoq, noteel'ae cho'lyeq e cholyaeq xihael laoq aeqsul'ae kaolzaeq kaol niqhaeq lyeqdu hhaemaeq? Tyulkaol, yoqhhaeteel noteel e shenqpanl e zhiqmoq peqyil hhei ngeelvae. 20 Ngeelfeiq, ngael Momil e onglzaeq mael'ae kaolzaeq kaol niqhaeq lyeqdu kaollaoq, Momil e Goqja laoq noteel'ae yo'lael wae. 21 Aqha yobo qiq hhaeq tyelgae fu dum e aelhongq dum hhei, tyelgae moqgoq baq hheikaol yoqhhaeq e laoqhaol vae fu'qyezaq kaollaoq, yoqhhaeq e halzahael laoq maeq gabu yilkiq vae. 22 Ngeelfeiq, yoqhhaeq taq'ae hhael henq myel qiq hhaeq lael, kaol yoqhhaeq yaol tyel yinqzaeq biq laol, yoqhhaeq e tyelgae e moqgoqhael diqkoqzaeq yil biq, kaol diqkoq laeq mael byelzaeq vae. 23 Ngaeq nyegael qiqgael maeq haoqtul hael laoq, ngaeq'ae diqqye ngeelvae; ngaeq nyegael qiqgael maeq gul'eeq hael laoq, baelyaelmyel lyeqci ngeelvae.
Maeqshol e yohael deelsae hhei'laol yol hoqlal
24 "Maeqshol e yohael mael cholyaeq qiq hhaeq e aeqhhaol ae'lye deelsae hhei vae, geesa'lye milcaeq'ae deelpol duyil, haeqvae zholhhael za maeq lye saelpo, ngeelfeiq, maeq saelpopuq hhei ongl biq'ae, kaol gee: 'Ngael laefuq deelsae e laoqhaol vae hoqli maoq.' 25 Hoq keellael laol, onglci'ae sholgaqlye yashol deelhhei kaol zonglzhi deelhhei mol hhei biq. 26 Kaol yoqhhaeq taq'ae hhael duqlaq myel baeqjyelboq maeqshol e yohael siq hhaeq sheeqhoqlaeq, do'li kaol tyuqvae zholgae hhei; cholyaeq tyutaeq laefuq taq'ae hhael beeqzaeq vae."
Aeqdilmyel e geeqlongq
27 Yesu saeziq xihael gee siq fu, cholyaeqhael onglci'ae cholhae aeqmae qiq hhaeq yotyel haeqheemyel gul tullaeq, gee: "Noq yaol pi kaol noq'ae cu heeq biq e qiq hhaeq geeqlongq meeq shevae!" 28 Yesu gee: "Geeqlongq hhael meeq mael laoq, Momil e saeziq mael naelhaeq, kaol zongl gaeyil e cholyaeq'ae."
Yonaq e shenqjiq mael nyuq fufu
29 Cholyaeq nyeq'ei ta nyeq'ei hhael naeqlael fu, Yesu gee: "Yaeqmeel dyeqdeel e cholyaeqhael laoq, xinqlalmyel hhae. Yaeqmeel dyeqdeel e cholyaeqhael shenqjiq mael saelpo, ngeelfeiq, Yonaq e shenqjiq mael maoqlaol, yaeqmeel dyeqdeel e cholyaeqhael'ae shenqjiq maeq heil vae. 30 Yonaq haelmillye Niqniqvei cholyaeqhael e shenqjiq peqlal laol, Cholyaeq Yaqyo eiq yaeqmeel dyeqdeel e cholyaeqhael e shenqjiq peqlal maoqlye hhae. 31 Yilkaeaeqnao, Nanqfang e Haeqmiyaeq Zongmaea mildongq miljyel ae'lye Soqloqmenq e geel e saeziq mael naelhaeq lael vae. Tyulkaol, shenqpanl fu, yoqhhaeq laoq yaeqmeel dyeqdeel e cholyaeqhael nyegael qiqgael bael dyeqhoqlal maoqlye hhae, kaol yoqhhaeteel'ae golsiq za'ae lye zhiqmoqkae biq ngeelvae. Naelhaeq gil, Soqloqmenq taq'ae hhael heeq e qiq hhaeq saeqvae zhol hhae! 32 Niqniqvei e cholyaeqhael Yonaq e saeziq mael naelhaeq kaol neemae paellael vae. Shenqpanl fu, Niqniqvei cholyaeq laoq yaeqmeel dyeqdeel e cholyaeqhael nyegael qiqgael bal dyeqhoqlal ngeelvae, kaol yaeqmeel dyeqdeel e cholyaeqhael'ae golsiq za'ae lye zhiqmoqkae biq ngeelvae. Naelhaeq gil, Yonaq taq'ae hhael heeq e qiq hhaeq saeqvae zhol hhae!"
Ma'ne laoq aeqhhaol e aeqdael doqhoq'ae
33 "Aeqdael doqhoq keeqdoq hhei, kaol nulyaeq'ae baqculm deelhhei, paelsilmyel keelcuq e holhhaq vae baqdeel e cholyaeq qiq hhaeq eiq maeq zhol'ae. Yoqhhaeq aeqdael doqhoq baqda myel'ae baqdeel hhei maoqhhae, xilnye zongl laol, do'lal e cholyaeq'ae aeqcael bi mol congl maoqlye hhae. 34 Noq e ma'ne mael laoq noq e aeqhhaol e aeqdael doqhoq ngeelvae, noq e ma'ne haelmeeqlye kaollaoq, aeqhhaol qiqsiqmyel aeqcael cael sholmyel wae; maeqmeeq kaollaoq, aeqhhaol qiqsiqmyel nahongqlye wae. 35 Tyulkaol aeqyae'lye kei maoqhhae, noq e onglci e aeqcael mael nahongqlye haeq bi peqyil. 36 Tyulkaol, noq e aeqhhaol qiqsiqmyel aeqcael cael sholmyel, nahongqlye teel eiq maqza kaollaoq, nol laoq aeqdilmyel aeqcael cael sholmyel wae, zheelniqlye aeqdael doqhoq mael noq'ae keeqmol hhei laeq laoqmyel hhae."
Faqlilsail cholyaeq'ae kaol Momil e saeziq mael loq e laqkiq'ae gaezaeq biq
37 Yesu saeziq gee siq fu, Faqlilsail cholyaeq qiq hhaeq Yesu'ae yoqhhaeq nyegael aelhoq qiqgael bael zaeq lael lye gulzaeq biq, Yesu do'li kaol zaelzhee dongqpyeq'ae zholgae hhei vae. 38 Faqlilsail cholyaeq xitaeq Yesu aelhoq zaeq maoqlye laefuq'ae aqlaq maeq ciq mol hhei biq, kaol gaqmaqzuq li biq'ae. 39 Hhaoqsongl yoqhhaeq'ae gee biq: "Noteel Faqlilsail cholyaeqhael laoq, beiziq kaol panqpan e nilduboq'ae ciqshol hhei, ngeelfeiq, noteel onglci'ae laoq neemaecuqm mael kaol duqlaq mael bong'lye zoq hhae. 40 Qiqgiq maeq loq e cholyaeq o! Nildu mael zongldu e qiq hhaeq laoq onglci mael eiq zongldu maeqngeel maeq? 41 Noteel e beiziq kaol panqpan onglci'ae zoq hael saeqyaeqhael'ae hhaoqsaeqsaeq gae'lye heil biq kaollaoq, noteel'ae lye gee'li'laol gilzuqmyel shol lael wae. 42 Ngeelfeiq, noteel Faqlilsail cholyaeqhael laoq zaihuol za vae! Noteel onglzil, huiqxiang kaol halza e oqbye oqnyul mael, qyel mael onglci e qiq mal heelda hhei, ngeelfeiq, gongyil kaol Momil'ae gaeq biq e silqinq mael'ae laoq maeq nyuqtongq gil'ae. Xihael laoq noteel aeqdilmyel zongl maoqhhae, baeqjyelboqhael eiq baelzongl maoqhhae. 43 Noteel Faqlilsail cholyaeqhael laoq zaihuol za vae! Noteel laoq huiltangq e hhael meeq e zholhhael mael hhaol biq, kaol gaiziq ae'lye cholyaeqhael meeqlaeqmaeq lye naelhaeq biq mael hhaol biq kaol'ae. 44 Noteel zaihuol za vae! Noteel laoq fuq'ongl oheiq maqza e fuq'ongl laoqmyel hhae, tyuqvae holtaq ae'lye deel duyil e cholyaeqhael laoq fuq'ongl'ae lye maeq loq'ae."
45 Lilfaq mael loq e laqkiq qiq hhaeq, Yesu'ae geehoq biq: "Laoqsi, nol xilnye gee laol, ngaeteel yaol eiq geekyuq yaevae!" 46 Yesu gee: "Noteel lilfaq mael loq e laqkiqhael eiq zaihuol za vae! Noteel lye maeq pityeq ongl myel e chedyeqlye aeq'yel mael ochoq'ae bi pi, noteel laoq chengdyeqlye aeq'yel mael'ae laqnyul qiq nyul eiq maeq pa yil goq'ae. 47 Noteel zaihuol za vae, noteel lye xianzhihael'ae fuq'ongl cu biq, xianzhi tyuhael laoq noteel e aeqpyuq aeqdae lye xyeq biq hhae. 48 Noteel e aeqpyuq aeqdae lye xianzhihael yaol xyeq biq, kaol noteel yoqhhaeteel'ae fuq'ongl cu biq, kaol noteel laoq yoqhhaeteel haelzongl e silqinq mael hoq'ae lye bael gee e cholyaeqhael peqyil aeqwae. 49 Tyulkaol, Momil geel maellye gee: 'Ngael shiqtuq kaol xianzhihael yaol yoqhhaeteel tyuqvae moqheilheil du hhei maoq, qiq miq laoq yoqhhaeteel lye xyeq biq maoqlye hhae, qiq miq laoq yoqhhaeteel lye zonglkyuq biq maoqlye hhae. 50 Mqdongq milbeibei fu ae'lye mael yaeqmeel keellye, xianzhihael'ae xyeq biq e siq mael, yaeqmeel dyeqdeel e cholyaeqhael'ae saelhoq maoq. 51 Ngeel'ae, ngael noteel'ae geegaeq laeqngeel, Yalboq e siq ae'lye mael, jiltanq kaol sholhaol kaeqlaeq vae xyeq biq e Saqja'lilyal e siq keellye, xyeq biq e cholyaeqhael e siq mael gilzuqmyel yaeqmeel dyeqdeel e cholyaeqhael ae'lye saelhoq maoqlye lil.' 52 Noteel lilfaq mael loq e laqkiqhael zaihuol za vae! Noteel zhishiq e haedulm mael heilzaeq yil, aeqyoyoq maq do'li dyul maeqcil, do'li maoqlye cholyaeq vae eiq maeq bi do'li'ae." 53 Yesu tyuqvae lye duyi, Momil e saeziq mael loq e laqkiqhael kaol Faqlilsail cholyaeqhael, Yesu'ae hol sil maoqmyel hol biq, tyulkaol, yoqhhaeq'ae heqnaelhaeq biq'ae. 54 Yoqhhaeteel yoqhhaeq saeziq hae qiq doq geeba hhei maeq lye saelpo kaol zhiqmoqkae biq maoqlye zongl hhae.