Yesu lye cholyaeq siqqyel niq hhaeq yaol moqheilheil duyil
10
Aeqnaol, Hhaoqsongl cholyaeq siqqyel niq hhaeq yol moqheilheil du hhei, yoqhhaeteel yaol niq nulhhaeq niq nulhhaeq lye Yesu laefuqboq'ae moqheilheil du hhei, Yesu aeqyoyoq keelyil maoqlye milmae heeqmyelhael vae kaol pusiqhael vae bi yil gil hhae. 2 Yesu yoqhhaeteel'ae gee biq: "Heille hoq maoq e zaelsiq laoq naeq, ngeelfeiq, heille hoq e cholyaeq laoq maeq naeq'ae. Tyulkaol, noteel aeqhael e hhaoqsongl'ae aeqhael mulyaeq yaol moqheilheil du hheikaol yoqhhaeq e zaelsiq mael heille hoqyil lye geezaeq biq maoqhhae. 3 Noteel yil gil! Naelhaeq, ngael noteel yaol moqheilheil duyil mael laoq, aeqyol yolyaeqhael haeqheilhael onglci'ae lyeqdo hhei laoqmyel hhae. 4 Dyuqbaq palbye haeq heil, palbye haeq heil, paqno haeq heil, gaelmae ae'lye qiq hhaeq vae eiq saeziq maolgael myel haeq gee'naeqtyeq li.5 Aeqsul toq'ae do'li laol, laefuqmyel gee: 'Neesaelhhae mael xitoq'ae yo'li biq lye nyuqlil!' 6 Tyuqvae neesaelhhae e cholyaeq zhol kaollaoq, noteel e neesaelhhae mael yoqhhaeq'ae yo'li'ae; maeq zhol kaollaoq, noteel'ae polhoqlael. 7 Noteel xitoq'ae baelzhol maoqhhae, zaeq dol e laoq yoqhhaeteel heil laeq'ae. Aeqhael mulyaeq laoq hhaeqpyuq hhamul mael laoq hoq'ae. Xitoq ae'lye yultoq'ae haeq zhol du'li gil. 8 Milmae heeqmyel hae qiqgael'ae do'li fu, cholyaeq noteel'ae sheeqcaq laq kaollaoq, noteel'ae aeqchee baqda hhei laq laol aeqchee zaeq gil. 9 Kaol tyuqvae milmae heeqmyel e cholnaelhael yaol zonglmeeq biq maoqhhae, kaol yoqhhaeteel'ae geegaeq biq: 'Momil e Goqja noteel'ae niqlael vae.' 10 Milmae heeqmyel hae qiqgael'ae do'li fu, cholyaeq noteel'ae maeq sheeqcaq laeq laol, noteel gaiziq vae duyi kaol gee: 11 'Ngaeteel e aeqkeel mael'ae su da'lal e noteel e milmae heeqmyel e haeqlyel mael, ngaeteel laoq noteel e yiqsi ae'lye nuqhael gae maoq. Ngeelfeiq, noteel Momil e Goqja niqlael vae lye loq maoqhhae!' 12 Ngael noteel'ae geegaeq laeqngeel, tyu qiq nao, Soqdomaq e cholyaeqhael zityeq deelhhei mael, milmae heeqmyel tyulmael e cholyaeqhael taq'ae hhael yael'ae."
Yesu neemae maeq paellael nae e milmae heeqmyelhael'ae vuq biq
13 "Milmae nilmyel e Ge'laxunl o! Noq'ae zaihuol za vae! Boqsaildal o! Noq'ae zaihuol za vae! Ngael noteel tyuqvae shenqjiq zongl gol aeqwae. Shenqjiq xihael Tui'loq kaol Xidunl vae zongl kaollaoq, tyuqvae cholyaeqhael laoq haeqfu'ae'lye ziq e haeqpael pyeqcheeq da hheikaol haeqlyel mael vuqduq mael'ae beiqxeiq da hhei, milcaeq vae zhol gae deelhhei kaol neemae paellael vae. 14 Aeqgael shenqpanl fu, Tui'loq kaol Xidunl e cholyaeqhael zityeq deelhhei mael, noteel taq'ae hhael yael'ae! 15 Nol Jabaiqnongq o!
Nol laoq mqmae vae deiq da laq'ae lye kei laeq hhaemaeq?
Maeqngeel'ae! Nol laoq mil'oq'ae hha doyil ngeelvae!
16 Noteel e saeziq mael naelhaeq hael laoq, ngaeq e saeziq mael naelhaeq ngeelvae; noteel yaol maq mul nae hael laoq, ngaeq yaol maq mul nae ngeelvae; ngaeq'ae maq mul nae hael laoq, ngaeq yaol moqheilheil duyi e qiq hhaeq'ae maq mul nae ngeelvae."
Cholyaeq siqqyel niq hhaeq hoqlal
17 Cholyaeq siqqyel niq hhaeq zhee hhaol gae'lael aeqmyel hoqlal, kaol gee: "Hhaoqsongl o! Noq e cholmil gae'lye, niqhaeq eiq ngaeteel e saeziq mael naelhaeq vae." 18 Yesu gee: "Ngael Saqdanl mqmiqmiq laoqmyel mqmae taq ae'lye leeqgae yi mol aeqwae. 19 Ngael noteel'ae laqtaq biq hhei biq wae, noteel oqhol kaol xyeziq mael'ae nuq yil aeqmeel, diqrenq e onglzaeq mael tyel yinq ongl'ae. Aeqdilmyel noteel'ae zonglnael ongl e qiqgiq maq za vae. 20 Ngeelfeiq, niqhaeq noteel e saeziq mael naelhaeq gae'lye haeq hhaolzaeq gil, noteel e cholmil mael mqmae taq'ae cuda deelhhei gae'lye hhaol gil maoqhhae."
Yesu hhaol biq kaol mqmae Aeqdae'ae laqma deiqqei biq.
21 Tyuqfu qiqlaq'ae, Yesu laoq senllinq ganqdongl biq gae'lye hhaol biq, gee: "Mqmae Aeqdae o! Mqmae milcaeq e Hhaoqsongl, ngael noq'ae laqma deiqqei lil, noq lye silqinq xilmael suqhhaq zhee loq kaol geel e cholyaeq'ae zonglhhaq biq, ngeelfeiq, yaeqguq guqyaeq'ae qiqshil hhei biq. Mqmae Aeqdae o! Ngeel'ae, xilmael laoq noq e neezae'lael mael ngeelvae. 22 Ngaeq e aeqdae lye gilzuqmyel hael ngaeq'ae heilmoq hhei laeq; aeqdae maoqlaol, yaqyo aeqsul'ae lye qiq hhaeq eiq maeq loq'ae; yaqyo kaol yaqyo qiqshil goq e cholyaeqhael maoqlaol, aeqdae aeqsul'ae lye qiq hhaeq eiq maeq loq'ae." 23 Yesu zipol lael, kaol ochoq maeq bael gaeq myel ae'lye laqcaqhael'ae gee biq: "Noteel mol mael bael mol e cholyaeqhael laoq, yoqhhaeteel e ma'ne laoq geeqlongq meeq vae. 24 Ngael noteel'ae geegaeq laeqngeel, yilkaefu xianzhi kaol zongmaehael, noteel mol mael mol goq feiq, maeq hhae mol congl biq'ae; noteel gaeq mael gaeq goq feiq, maeq hhae gaeq congl biq'ae."
Meeq e Saqmaqlilyal cholyaeq e dullaelmyel guqjin
25 Lilfaq mael loq e laqkiq qiq hhaeq haoqtul lael, kaol Yesu'ae shilfu biq, gee: "Laoqsi, ngael haelmillye zongl kaol haeqfu eiq zadeel e aeqyil mael hhamul maeq?" 26 Yesu yoqhhaeq'ae gee biq: "Lilfaq taq'ae aeqchee lye cuda deelhhei hhaemaeq? Nol aeqchee mael'ae gee hhae lye loq lilmaeq?" 27 Yoqhhaeq geehoq biq: "Nol laoq neemae qiqsiqmyel, gilzuqmyel hael nyuq hael, hael geel hael kaol hal zoq e aqha maellye Hhaoqsongl'ae gaeq biq maoqhhae. Hhaoqsongl laoq noq e Momil ngeelvae, kaol dongqpyeq e cholyaeq'ae gaeq biq mael aeqyoq'ae gaeqzaeqhoq laoqmyel ngeel maoqhhae." 28 Yesu gee: "Nol geehoq mael hoq yae, nol xilnye zongl laol haeqfu eiq zadeel e aeqyil mael hhamul wae." 29 Xitaeq aeqyoq gee mael hoq'ae lye zonglfuzaeq maoqlyekaol Yesu'ae gee biq: "Aeqsul laoq ngaeq e dongqpyeq e cholyaeq maeq?" 30 Yesu geehoq biq: "Cholyaeq qiq hhaeq Ye'lulsa'lenq ae'lye Ye'lilge'ae gaeyil, lolbiq diqkoqzaeq e cholyaeq e aqlaq'ae leeqdo biq. Yoqhhaeteel lye aelhongq mael ee hei biq, kaol tyel sil maoqmyel tyel biq, yoqhhaeq yaol sil li maoqmyel tyuqvae beiqdeelsaeq biq, kaol deelsae hhei vae. 31 Tyuqfu qiqlaq'ae jilsi qiq hhaeq tyuqvae gaelmae ae'lye gaeyi, yoqhhaeq yaol mol hhei biq laol, baeqjyelboq ae'lye deelpol duyil. 32 Lilveil cholyaeq qiq hhaeq eiq tyuqvae keellael, yoqhhaeq yaol mol hhei biq laol, tyutaeq laoqmyel baeqjyelboq ae'lye deelpol duyil. 33 Ngeelfeiq, Saqmaqlilyal cholyaeq qiq hhaeq tyuqvae gaelmae ae'lye deel laeq, yoqhhaeq yaol mol hhei biq laol hhaoqsaeqsaeq li biq'ae. 34 Deel niqli kaol zhoqcae cil kaol zilbaeq mael yoqhhaeq e naelheiq mael'ae xyecheeq da hheikaol leeltyeq biq, kaol yoqhhaeq yaol aeqyoq e mao'lyu mael'ae sheeq da hhei biq, lyuqsel vae sheeqli kaol yoqhhaeq'ae zhaofu biq. 35 Aeqnaol qiq nao, Saqmaqlilyal cholyaeq xitaeq pulziq niq mal heildu hheikaol, lyuqsel vae fu'qyezaq e qiq hhaeq'ae heilmoq hhei biq, gee: 'Nol xitaeq'ae bael zhaofu laeq. Dyuqbaq maq mulloq mael laoq, ngael hoqlal fu heil laeq hhaeq.' 36 Nol nyuq fufu, xi suq nulhhaeq onglci'ae, aeqsul laoq lolbiq diqkoqzaeq e cholyaeq e aqlaq vae leeqdo e qiq hhaeq e dongqpyeq e cholyaeq maeq?" 37 Lilfaq mael loq e laqkiq gee: "Hhaoqsaeqsaeq biq e qiq hhaeq'ae." Yesu gee: "Nol eiq xilnye zongl yil maoqhhae."
Maqdal kaol Maqlilyal
38 Yoqhhaeteel gaelmae yol deel gil fu, Yesu pusiq qiqgael vae do'li. Maqdal lye gul biq e haeqmiyaeq qiq hhaeq yoqhhaeq'ae zhaofu biq. 39 Yoqhhaeq'ae dulmae qiq hhaeq zhol'ae, Maqlilyal lye gul biq hhae, Hhaoqsongl e aeqkeel dongqpyeq'ae zhol deelhhei, kaol yoqhhaeq gee e saeziq mael naelhaeq hhae. 40 Ngeelfeiq, Maqdal laoq fuqsil maoq e silqinq naeq biq kaol neemae hol tullaeq biq, deel niqli kaol gee: "Hhaoqsongl o! Ngaeq e dulmae ngael qiq hhaeq myel bi fuqsil laeq hhae, nol aeqcheekaol maeq fu do'li laq hhaemaeq? Yoqhhaeq yaol baelzongl yi lye gee biq!" 41 Hhaoqsongl geehoq biq: "Maqdal, Maqdal, nol haelnaeqmyel silqinq gae'lye maeq nyuq byel ongl myel nyuq hhae. 42 Ngeelfeiq, mulyo mael laoq qiq mal wae, Maqlilyal heilzaeq hhei mael laoq hhaelmeeq meeqli mael'ae, yoqhhaeq e tyuqvae lye maeq diqkoqzaeq yil ongl'ae."