Ael'yuq xeiq e dullaelmyel guqjin
13
Tyu qiq nao'ae, Yesu laoqhaol ae'lye duyi, kaol eeldeel deeljyel vae zholgae hhei. 2 Cholyaeq haelnaeqmyel yoqhhaeq e tyuqvae zhol'eeq deelhhei lael. Tyulkaol, yoqhhaeq hoq mael'ae da'li kaol zholgae hhei, cholyaeqhael laoq eeldeel deeljyel'ae haoqtul deelhhei hhae. 3 Yoqhhaeq dullaelmyel guqjin maellye cholyaeqhael'ae saeziq zhee gee gil biq, gee: "Ael'yuq xeiq e qiq hhaeq duyil kaol ael'yuq xeiq yil. 4 Yoqhhaeq xeiq fu, teel laoq aeqhael gaelmae gaeljyel'ae leeqgae deelhhei, kaol haeqzil beel laeq laol ael'yuq mael tuzaq byel vae. 5 Teel laoq haqlo taq'ae milcaeq maq zu myel vae leeqgae deelhhei, milcaeq maeq zu, kaol nae'naemyel dyeq du'lal vae, 6 Ngeelfeiq, aelcil maeq zhido yilkiq, kaol neelmae zhoq du'lal laol pe'nyuq kaol kuga vae. 7 Teel laoq aelgong gongbol dyeq myel milcaeq vae leeqgae deelhhei, kaol aelgong gongbol mael dyeq du'lal laol, zaelsiq aelyaeq mael naqvuq biq vae. 8 Teel laoq milmeeq vae leeqgae deelhhei, kaol zaelsiqsiq lael, aelcael qiq nul vae qiqhael (100) siq siq lael za, koqqyel siq siq lael eiq za, suqqyel siq siq lael eiq za hhae. 9 Naeqbol gaeq congl e cholyaeq laoq, naelhaeq maoqhhae!"Aeqcheekaol dullaelmyel guqjin maellye gee
10 Laqcaqhael deelniq laeq kaol Yesu'ae naelhaeq biq: "Cholyaeqhael'ae saeziq gee biq fu, aeqcheekaol dullaelmyel guqjin maellye gee gil biq lilmaeq?" 11 Yesu yoqhhaeteel'ae geehoq biq: "Mqmae Goqja e aolmiq mael noteel'ae maoqlaol, yoqhhaeteel'ae maeq bi loq yil. 12 Za hael'ae laoq, heil biq maoq siq, kaol yoqhhaeq'ae bi naeq du'lal; maqza hael'ae laoq, yoqhhaeq'ae halzahael dyel'eiq diqkoqzaeq biq maoq. 13 Ngael dullaelmyel guqjin maellye yoqhhaeteel'ae gee biq mael laoq,
yoqhhaeteel mol vae, ngeelfeiq, maeq fu'loq ongl biq'ae,
naeqbol maellye naelhaeq vae, ngeelfeiq, maeq gaeq congl biq'ae, loq eiq maeq loq biq'ae.
14-15 Yiqsailyal e peqlal maoqlye mael geedu e saeziq mael, yoqhhaeteel e aeqhhaol taq'ae peqlal vae, gee:
'Cholyaeq xihael e neemae mael mq yil biq hhae,
naeqbol deiqchiq hhei, ma'ne mi'qye hhei,
aeqgael ma'ne mol hhei, naeqbol gaeq hhei,
neemae mael loq li biq kaol polhoqlael laol,
ngael yoqhhaeteel'ae zonglmeeq biq maeqhe.'
Tyulkaol,
noteel hae'nae zael gaeq vae,
ngeelfeiq, maeq loq'ae,
hae'nae zael mol vae,
ngeelfeiq, maeq fu'loq ongl biq'ae.'
16 Ngeelfeiq, noteel laoq mol congl hhae, kaol noteel e ma'ne laoq geeqlongq meeq hhae; noteel laoq gaeq congl hhae, kaol noteel e naeqbol mael eiq geeqlongq meeq hhae. 17 Ngael aeqdilmyel noteel'ae geegaeq laeqngeel, haelnaeqmyel e xianzhi kaol gongyil e cholyaeq, noteel mol mael mol goq feiq, maeq hhae mol congl biq'ae; noteel gaeq mael gaeq goq feiq, maeq hhae gaeq congl biq'ae."
Ael'yuq xeiq e dullaelmyel guqjin mael aeqchee mael'ae gee hhae lye mael
18 "Tyulkaol, noteel ael'yuq xeiq e dullaelmyel guqjin xilmael naelhaeq maoqhhae. 19 Mqmae Goqja e saeziq mael gaeq hhei feiq maeq loq e cholyaeqhael laoq, Duqlaq e tyutaeq lael, kaol yoqhhaeq e neemae onglci'ae xeiq deelhhei mael diqkoqzaeq yil; xilmael laoq aeqhael gaelmae gaeljyel vae xeiq deelhhei hael'ae. 20 Haqlo taq'ae milcaeq maq zu myel vae leeqgae deelhhei mael laoq, cholyaeqhael Momil e saeziq gaeq hhei fu, nae'naemyel hhaol gae'lael aeqmyel naelhaeq dozaq hhei vae, 21 Ngeelfeiq, yoqhhaeq e onglci'ae aelcil maeq zhido yilkiq kaol haeldyulmyel maq dyeqdeel li'ae; Momil e saeziq gae'lye saeqlael puqlael kaol guaeq'ei diqqye biq laol, nae'naemyel Momil e saeziq mael beiqgae hhei kaol'ae. 22 Aelgong gongbol dyeq myel'ae leeqgae deelhhei mael laoq, cholyaeqhael Momil e saeziq mael gaeq hhei vae, ngeelfeiq, ssuqhaoq caqzaq mael'ae zoqgiq biq, kaol dyuqbaq lye cheeqmu gil yil biq gae'lye Momil e saeziq mael naqvuq biq vae, kaol zaelsiq maeq siq laelkiq'ae. 23 Milmeeq vae leeqgae deelhhei mael laoq, cholyaeqhael Momil e saeziq gaeq hheikaol siqcongl vae. Zaelsiqsiq lael, aelcael qiq nul vae qiqhael (100) siq siq lael za, koqqyel siq siq lael eiq za, suqqyel siq siq lael eiq za hhae."
Sulmhaeq e dullaelmyel guqjin
24 Yesu yoqhhaeteel'ae baeqjyelboq e dullaelmyel guqjin qiq mal geegaeq gil biq, gee: "Mqmae Goqja laoq cholyaeq lye meeq e ael'yuq mael haeldye vae xeiqdo hhei yil laoqmyel hhae, 25 Cholyaeqhael ssuqza fu, yoqhhaeq e diqrenq lael kaol sulmhaeq mael meqziq onglci'ae xeiqdo hhei, kaol deel vae. 26 Alchichi du'lal, aelnul du'lal fu, sulmhaeq mael eiq mol du'lal vae. 27 Aeqhael e hhaoqsongl e yaqhacheqzaq e cholyaeq yoqhhaeq'ae gee lael biq: 'Hhaoqsongl, noq lye meeq e ael'yuq mael haeldye vae xeiqdo hhei yil maeqngeel yil maeq? Haeqvae lye lael e sulmhaeq laeq?' 28 Hhaoqsongl geehoq biq: 'Xilmael laoq diqrenq zongl hhae.' Yaqhacheqzaq e cholyaeq yoqhhaeq'ae gee biq: 'Nol ngaeteel yaol sulmhaeq mael ee duyil lye nyuq lilmaeq?' 29 Hhaoqsongl gee: 'Maeq kei kael'ae, aeqgael sulmhaeq mael eedu fu, meqziq mael aelcil nae'naemyel eepudu hhei maeqhe. 30 Zaelsiq heille hhaeq fu keellye, xi niq sheel qiqgael bi heeqda lal. Zaelsiq heille fu, ngael heille e cholyaeqhael'ae, sulmhaeq mael laefuqmyel eedu hhei, kaol pe maoqlye kaltoq deelhhei, kaol meqziq mael ngaeq e zaelsiq baqdeelzaeq e laoqhaol vae baqle do'li lye gee biq maoq.'"
Oqpa oqne kaol paofenq e dullaelmyel guqjin
31 Yoqhhaeq dullaelmyel guqjin maellye yoqhhaeteel'ae yol gee biq: "Mqmae Goqja laoq oqpa oqne qiq ne laoqmyel hhae, cholyaeq lye heil yil kaol haeldye vae kae deelhhei yil. 32 Oqpa oqne mael baeqjyelboq e ael'yuqhael taq'ae hhael nil hhae, ngeelfeiq, aeqgael heeq lael fu, baeqjyelboq e oqbyehael taq'ae hhael heeq lael, kaol aelbol peqlal, kaol mqmae e haeqzilhael dyel'eiq yoqhhaeq e allaq taq'ae zongl lael."
33 Yoqhhaeq yoqhhaeteel'ae baeqjyelboq e dullaelmyel guqjin yol qiq mal gee gil biq: "Mqmae Goqja laoq paofenq laoqmyel hhae, cholhae aeqmae qiq hhaeq lye heil hheikaol meqziq e hhaeqxul san douq mael'ae heil keq hhei, gilzuqmyel zheeq lael fu keellye hhae."
Aeqcheekaol dullaelmyel guqjin maellye gee
34 Xihael laoq Yesu dullaelmyel guqjin maellye cholyaeqhael'ae gee biq e saeziq mael'ae, dullaelmyel guqjin maellye maeq gee fu laoq, yoqhhaeq yoqhhaeteel'ae qiqgiq maeq gee biq'ae. 35 Xilmael laoq xianzhi gee e saeziq mael peqlal maoqlye hhae, gee:
"Ngael myeqbongq gu'ngae hheikaol dullaelmyel guqjin gee maoq,
mqdongq milbeibei fu ae'lye zonglhhaq deelhhei e silqinq mael geedu hhei maoq."
Sulmhaeq e dullaelmyel guqjin mael aeqchee mael'ae gee hhae lye mael
36 Tyuqfu, Yesu cholyaeqhael zaellye deelsae hhei, kaol laoqhaol vae do'li. Yoqhhaeq e laqcaqhael deelniq laeq, gee: "Haeldye e sulmhaeq e dullaelmyel guqjin e yilsi mael ngaeteel'ae geegaeq hhei laeq." 37 Yoqhhaeq geehoq biq: "Meeq e ael'yuq xeiq e tyutaeq laoq Cholyaeq Yaqyo ngeelvae, 38 Haeldye laoq shilgail ngeelvae, meeq e ael'yuq laoq Mqmae Goqja e yaqyo ngeelvae, sulmhaeq laoq duqlaq e tyutaeq e yaqyo ngeelvae, 39 Sulmhaeq xeiq e diqrenq tyutaeq laoq niqhaeq haeqmae ngeelvae, zaelsiq heille fu laoq shilgail e aeqnaol naolli e qiq nao ngeelvae, heille hael laoq mqmae yosonglhael ngeelvae. 40 Sulmhaeq mael eedu hheikaol aeqzaeq doq maellye pe hhei laoqmyel, shilgail e aeqnaol naolli e qiq nao eiq xilnye ngeel maoqlye hhae. 41 Cholyaeq Yaqyo yoqhhaeq e mqmae yosongl yaol moqheilheil du hhei maoqlye hhae, kaol cholyaeq yaol golsiq bi zonglpizaeq e cholyaeqhael, kaol duqlaq myel zongl e cholyaeqhael yaol yoqhhaeq e goqja ae'lye zonglqyel du hhei maoqlye hhae, 42 Kaol aeqzaeq doq miqhulm hulmmae onglci'ae beiqdo biq, kaol tyuqvae nyul sil maoqmyel hhae nyul hhae. 43 Tyuqfu, gongyil e cholyaeqhael laoq yoqhhaeteel e aeqdae e goqja onglci'ae lye neelmae laoqmyel aeqcael cuq du hhei maoqlye hhae. Naeqbol gaeq congl e cholyaeq laoq, naelhaeq maoqhhae!"
Mqmae Goqja e dullaelmyel guqjin
44 "Mqmae Goqja laoq pyuqjyeqjyeq moqgoq mael milcaeq vae heilhhaq deelhhei laoqmyel hhae, cholyaeq lye mol hhei'laol, tyulmael heilhhaq hhei vae, zhee hhaol gae'lael aeqmyel halzahael ongqzaeq byel yil, kaol aeqhael xi qiq koq vulga hhei vae.
45 "Mqmae Goqja laoq senyil mulzaeq e cholyaeq meeq e zhenzhu mael saelpo laoqmyel hhae, 46 Kaol pyuqjyeqjyeq e zhenzhu qiq ne mol hhei biq laol, yoqhhaeq e halzahael ongqzaeq byel yil, kaol zhenzhu tyulmael vul hhei."
Hhaezongl jye e dullaelmyel guqjin
47 "Mqmae Goqja laoq hhaezongl mael eeldeel deelmae vae xeiqdo hhei laoqmyel hhae, kaol maeq qiqsheel e ngaeqdyel mael qiqgael ee'eeq hhei, 48 Hhaezongl mael bong lael laol, cholyaeqhael lye hhaezongl mael deeljyel'ae ee da hhei, kaol zholgae hhei, meeq hael laoq tongqtong mael'ae o do hhei, maeqmeeq hael laoq beiqgae hhei. 49 Shilgail e aeqnaol naolli eiq xilnye hhae: Mqmae yosonglhael duyi, kaol duqlaq e cholyaeqhael yaol gongyil e cholyaeqhael onglci ae'lye zonglqyel du hhei maoqlye hhae, 50 Kaol aeqzaeq doq miqhulm hulmmae onglci'ae beiq pe hhei, kaol tyuqvae nyul sil maoqmyel hhae nyul ngeelvae."
Yosheq kaol yogeil
51 Yesu gee: "Saeziq xihael noteel gilzuqmyel loq gil wae maeq?" Yoqhhaeteel yoqhhaeq'ae gee biq: "Loq wae." 52 Yoqhhaeq yoqhhaeteel'ae gee biq: "Momil e saeziq mael loq e laqkiqhael Mqmae Goqja e laqcaq geiq mael'ae xoqxiq mael laoq, cholyaeq qiq haoq toq e hhaoqsongl yoqhhaeq e moqgoq baqdeelzaeq e laoqhaol ae'lye, moqgoq yosheq kaol yogeil heildu hhei laoqmyel hhae."
Yesu e pusiq e cholyaeqhael yoqhhaeq'ae xinq biq
53 Yesu laoq dullaelmyel guqjin xihael gee byel hhei'laol, tyuqvae lye deelsae hhei vae, 54 Kaol aeqyoyoq e pusiq vae keellael, huiltangq vae cholyaeqhael'ae geemyeq gil biq, kaol yoqhhaeteel dyel'eiq gaqmaq zhee zuq li gil biq'ae, gee: "Cholyaeq xitaeq'ae geel mael kaol onglzaeq mael haeqvae lye lael biq hhaemaeq? 55 Xitaeq laoq aelbol laqkiq tyutaeq e yaqyo maeqngeel maeq? Yoqhhaeq e aeqmae'ae laoq Maqlilyal lye gul biq maeqngeel maeq? Yoqhhaeq e aeqnilhael laoq Yaqgel, Yoqsel, Ximenq, Yoqdal lye gul biq maeqngeel maeq? 56 Yoqhhaeq e dulmaehael gilzuqmyel aedeeteel saeqvae zhol maeqngeel maeq? Yoqhhaeq e xihael haeqvae lye hhae'lael biq hhaemaeq?" 57 Kaol yoqhhaeteel yoqhhaeq'ae xinq biq. Yesu yoqhhaeteel'ae gee biq: "Xianzhi vae laoq aeqyoq e pusiq cholyaeqhael kaol aeqyoq toq cholyaeqhael maeq zunjinl biq kaolmaoqlaol, haetaeq eiq yoqhhaeq'ae zunjinl biq'ae." 58 Yesu laoq yoqhhaeteel maeq xiangxinl gae'lye, tyuqvae shenqjiq haelnaeqmyel maeq zongl yo'ae.