Yesu'ae cho'lyeq e cholhae aeqmaehael
8
Haeldyul maeqngeel laol, Yesu milmae heeqmyel vae kaol pusiq vae qiqgael qiqgael lye deeldyu byel vae, Momil e Goqja e fuqyin mael geegaeq kaol geemyeq gil biq'ae. Shiqtuq qyelniq hhaeq eiq yoqhhaeq nyegael qiqgael bal yil'ae. 2-3 Duqlaq e yohael guqzaeq li biq kaol naelgol mael zonglmeeq biq e cholhae aeqmae mee'nae hhaeq eiq Yesu nyegael qiqgael baelzhol'ae. Yoqhhaeteel onglci'ae, yilkaefu aeqhhaol ae'lye niqhaeq siq hhaeq lyeqdu yo biq e Moqdalla pusiq e Maqlilyal, Xi'lyul toq'ae fu'qyezaq e Kuqsaq e haeqmiq Yoqyalnaq, kaol Susannaq, kaol baeqjyelboq cholhae aeqmaehael laoq, aeqyoyoq'ae halza maellye Yesu kaol laqcaqhael'ae mulyo biq mael heil biq hhae.Ael'yuq xeiq e dullaelmyel guqjin
4 Haeqvae lael'ee myel milmae heeqmyel ae'lye lael e cholyaeqhael Yesu tyuqvae lael gil'ae. Cholyaeqhael hhaellaelmyel zhol'eeq deelhhei fu, Yesu dullaelmyel guqjin maellye gee: 5 "Ael'yuq xeiq e qiq hhaeq ael'yuq xeiq yil. Yoqhhaeq ael'yuq xeiq fu, teel laoq aeqhael gaelmae gaeljyel'ae leeqgae deelhhei, cholyaeq lye nuq biq, kaol mqmae vae beel e haeqzilhael lye tuzaq byel vae. 6 Teel laoq haqlo taq'ae milcaeq maq zu myel vae leeqgae deelhhei, zhoq dyeq du'lal laol, yojyel maeq jyel biq kaol kuga hhei. 7 Teel laoq aelgong gongbol dyeq myel milcaeq vae leeqgae deelhhei, kaol aelgong gongbol nyegael qiqgael dyeq du'lal, kaol naqvuq biq vae. 8 Teel laoq milmeeq vae leeqgae deelhhei, kaol dyeq du'lal, aelcael qiq nul vae zaelsiq qiqhael (100) siq siq lael'ae." Yoqhhaeq saeziq xihael gee byel hhei'laol, yotyel haeqheemyel gee: "Naeqbol gaeq congl e cholyaeq laoq, naelhaeq maoqhhae."
Aeqcheekaol dullaelmyel guqjin maellye gee
Tail 13:10-17; Keq 4: 10-12
9 Laqcaqhael Yesu'ae dullaelmyel guqjin xilmael aeqchee mael'ae gee hhaemaeq lye naelhaeq biq. 10 Yesu gee: "Momil e Goqja laoq aeqchee mael'ae gee hhae lye mael noteel'ae bi loq laeqngeel; ngeelfeiq, baeqjyelboq e cholyaeqhael'ae dullaelmyel guqjin maellye gee biq lil. Tyulkaol, 'Yoqhhaeteel mol laoq mol vae, ngeelfeiq, qiqgiq eiq maeq fudozaq ongl biq'ae; gaeq laoq gaeq vae, ngeelfeiq, qiqgiq maeq siqcongl biq'ae.'"
Ael'yuq xeiq e dullaelmyel guqjin mael aeqchee mael'ae gee hhae lye mael
11 "Dullaelmyel guqjin xilmael laoq xilnye hhae, ael'yuq laoq Momil e saeziq'ae. 12 Aeqhael gaelmae gaeljyel'ae leeqgae deelhhei mael laoq, cholyaeqhael Momil e saeziq gaeq hhei fu, Saqdanl nae'naemyel lael, kaol yoqhhaeteel e neemae'ae xeiq deelhhei e Momil e saeziq mael diqkoqzaeq yil, aeqgael yoqhhaeteel xiangxinl kaol hha deqjiul maeqhe. 13 Haqlo taq'ae milcaeq maq zu myel vae leeqgae deelhhei mael laoq, cholyaeqhael Momil e saeziq gaeq hhei fu, hhaol gae'lael aeqmyel naelhaeq dozaq hhei vae. Ngeelfeiq, yoqhhaeteel onglci'ae aelcil maq zhido yilkiq'ae, kaol qiqlaq xiangxinl dyul wae. Yoqhhaeteel'ae cheeqmu bi fu, yoqhhaeteel maeq xiangxinl vae. 14 Aelgong gongbeeq vae leeqgae deelhhei mael laoq, cholyaeqhael Momil e saeziq gaeq hhei fu, yoqhhaeteel ssuqhaoq caqzaq fu, ssuqhaoq caqzaq mael'ae zoqgiq gil biq, kaol dyuqbaq kaol nyelhhae maellye yoqhhaeteel yaol zongltyeq biq vae, tyulkaol, zaelsiq maeq mao laelkiq'ae. 15 Milmeeq vae leeqgae deelhhei mael laoq, cholyaeqhael zaqgiq maqgiq e meeq e neemae maellye naelhaeq, Momil e saeziq mael haelmeeqlye nyuqtongq deelzaeq hhei, neemaegil lye zaelsiqsiq lael mael doq deelhhei.
Zonglhhaq deelhhei mael laoq bi loqzaeq hhei ngeelvae
16 "Aeqdael doqhoq keeqdoq hhei'laol moqgoq maellye qiq hhaeq eiq maeq congqkaeq'ae, ssuqhhal holhhaq vae eiq maeq baq deel'ae. Aeqdael doqhoq baqdeel myel'ae baqdeel hhei'laol, do'lal e cholyaeq'ae ma'ne bi mol congl. 17 Zonglhhaq deelhhei e silqinq mael eiq bi molzaeq hhei ngeelvae, ochoq'ae maeq bi loq lye silqinq mael eiq mol du'lal, kaol cholyaeq lye bi loqzaeq hhei kaol'ae. 18 Tyulkaol, noteel haelmeeqlye nyuqtongq deelhhei aeqmyel naelhaeq maoqhhae, za hael'ae laoq, heil biq maoq siq; maqza hael'ae laoq, yoqhhaeq'ae halzahael dyel'eiq diqkoqzaeq biq maoq."
Yesu e aeqmae kaol aeqnilhael
19 Yesu e aeqmae kaol aeqnilhael yoqhhaeq'ae tyuqvae keellael, ngeelfeiq, cholyaeq naeq kaol yoqhhaeq e yiqsiboq'ae maeq keelli ongl biq'ae. 20 Cholyaeq Yesu'ae geegaeq lael biq: "Noq e aeqmae kaol aeqnilhael nilduboq'ae zhol hhae, noq yaol mol goq biq hhae." 21 Yesu yoqhhaeteel'ae geehoq biq: "Momil e saeziq mael naelhaeq do hheikaol tyulnye laoqmyel zongl yil e cholyaeq laoq, ngaeq e aeqmae, ngaeq e aqsseq aeqnilhael ngeelvae."
Zaeqxil kaol eeldiqdiq mael Yesu e saeziq mael naelhaeq
22 Tyuqfu naohaeq e qiq nao, Yesu laqcaqhael nyegael hoq mael'ae da'li vae, kaol yoqhhaeteel'ae gee biq: "Aedeeteel eeldeel deelmae yulboq'ae he guq gil yil maoq." Kaol yoqhhaeteel hoq he duyil vae. 23 Hoq ki fu Yesu yuqxul hhae. Eeldeel deelmae taq'ae qiqlaqmyel zaeqxil xilmae bo tullaeq. Hoq mael'ae eelcuq bong lael goqbiq, kaol neqyil goqbiq vae. 24 Yoqhhaeteel Yesu'ae gulnyuq lael biq, gee: "Laoqsi! Laoqsi! Aedeeteel hhae sil goqbiq vae!" Yoqhhaeq nyuq lael laol zaeqxil xilmae mael'ae gaezaeq biq, zaeqxil xilmae mael maeq bo vae, eelcuq mael eiq maeq dongni vae. 25 Yesu yoqhhaeteel'ae gee biq: "Noteel e xinlxin mael haeqvae za hhaemaeq?" Yoqhhaeteel zhee gu li gil biq, kaol gaqmaqzuq li gil biq'ae, hhaellaelmyel geegaeq gil'ae: "Xitaeq aeqdilmyel aeqsul oqlolyaeq? Yoqhhaeq zaeqxil xilmae mael'ae moqheilheil biq laol, zaeqxil xilmae dyel'eiq yoqhhaeq e saeziq mael naelhaeq'ae."
Niqhaeq guqzaeq li biq e Geqlasen milcaeq cholyaeq yaol zonglmeeq biq
26 Hoq mael Ja'lillil yulboq e Geqlasen cholyaeq e milcaeq'ae keellael vae. 27 Yesu loljyel vae zhoq gaeyi laol, milmae heeqmyel vae niqhaeq guqzaeq li biq e cholyaeq qiq hhaeq yoqhhaeq e yiqsiboq'ae ki'laq. Cholyaeq xitaeq haeqfu'ae'lye aelhongq maeq dum wae, laoqhaol vae maeq zhol'ae, fuq'ongl ongldye vae zhol hhae. 28 Yoqhhaeq Yesu yaol zhoq mol hhei biq laol gul tullaeq, Yesu e yiqsiboq'ae vuqduqtongq gae deelhhei lael, yotyel haeqheemyel gee: "Hhaelgao gao'li Momil e Yaqyo Yesu o, nol ngaeteel zongl mael aeqchee bael heiq laeq hhaemaeq? Ngaeq'ae haeq zonglkyuq laeq lye noq'ae geezaeq lil!" 29 Xilnye gee mael laoq, Yesu lye maeqshol e yohael mael yoqhhaeq e aeqhhaol ae'lye duyil lye moqheilheil biq kaol'ae. Maeqshol e yohael mael yultaeq'ae hae'nae pu eetyeq biq wae; yoqhhaeq'ae sulmca kaol aeqkeel mael kaltoq e sulmca maellye kaltoqtyeq biq, cholyaeq eiq fu'qyezaq, ngeelfeiq, yoqhhaeq lye sulmca mael dong'qyezaq hhei, niqhaeq lye byelcongq vae lyeq deelli biq. 30 Yesu yoqhhaeq'ae naelhaeq biq: "Noq'ae aeqchee lye gul laeq hhaemaeq?" Yoqhhaeq gee: "Ngaeteel haelnaeqmyel lil, tyulkaol, cholmil mael Naeq lye hhae." 31 Niqhaeq xihael Yesu'ae yoqhhaeteel yaol dongqto maqza e duqhongq vae doyil lye haeq minllinl laeq lye geezaeq biq.
32 Tyuqfu geeqzhoq geeqxil vae aqhhaq yilchangq changqmae gazaq hhae. Yoqhhaeteel Yesu'ae aqhhaq yuhael onglci'ae bi doyil laq lye geezaeq biq, tyulkaol, Yesu yoqhhaeteel'ae hhaeq'ae lye gee biq. 33 Niqhaeq tyuhael cholyaeq xitaeq aeqhhaol ae'lye duyi vae, kaol aqhhaq yuhael'ae do'li vae, tyulkaol, aqhhaq yuhael tongqtyuq'ae ki gayil, kaol hhaqbyeq ae'lye eeldeel deelmae vae jyedo hheikaol neqsil byel vae. 34 Aqhhaq hoqzaq e cholyaeq silqinq xihael mol hhei biq laol kisae vae, milmae heeqmyel vae kaol pusiq e cholyaeqhael'ae geegaeq hoqli biq. 35 Cholyaeqhael duyi kaol aeqchee silqinq peqlal hhae maeqlye fu lael gil'ae. Yoqhhaeteel Yesu tyuqvae keellael laol, niqhaeq maeq guqzaeq biq vae e cholyaeq tyutaeq, aelhongq dumda hhei, neemae eiq nyuqgeel hoqlael vae, kaol Yesu e aeqkeel dongqpyeq'ae zhol deelhhei mol hhei biq, kaol zhee gu gil biq'ae. 36 Silqinq xihael bael mol e cholyaeqhael, niqhaeq guqzaeq li biq e cholyaeq yaol haelmillye zonglmeeq biq hhae lye silqinq mael yoqhhaeteel'ae geedu hhei biq'ae. 37 Geqlasen kaol dongqpyeq dongqjyel milcaeq ae'lye lael e cholyaeqhael gusil maoqmyel gu gil biq, kaol Yesu yaol yoqhhaeteel zaellye deelsae hhei lye geezaeq biq. Kaol Yesu hoq mael'ae da hoqli vae. 38 Niqhaeq maeq guqzaeq biq vae e cholyaeq tyutaeq Yesu'ae yoqhhaeq nyegael qiqgael baelzhol maoqlye geezaeq biq; ngeelfeiq, Yesu yoqhhaeq'ae hoqli lye moqheilheil biq, gee: 39 "Nol laoqhaol vae hoqli, Momil lye noq'ae haelmillye zonglmeeq laeq hhae lye mael geegaeq hoqyil gil biq." Kaol yoqhhaeq deelsae hhei vae, milmae heeqmyel vae deeldyu byel hhei, kaol Yesu lye yoqhhaeq'ae haelmillye zonglmeeq laeq hhae lye mael geegaeq gil biq hhae.
Yesu lye yaeqmiyaeq kaol cholhae aeqmae yaol zonglmeeq biq
40 Gilzuqmyel cholyaeq Yesu'ae doq deelhhei'ae, tyulkaol, yoqhhaeq hoqlal fu, cholyaeqhael zhee hhaol gil biq'ae. 41-42 Tyuqfu, huiltangq'ae guanq e cholyaeq keellael vae. Yoqhhaeq e cholmil mael Yelluq lye gul biq hhae. Yoqhhaeq'ae yaeqmiq qiq hhaeq maoq maeq zhol'ae, qyelniq hoq zoqlal maoqmyel wae, ngeelfeiq, yaeqmeel sil li goqbiq vae. Tyulkaol, yoqhhaeq Yesu e aeqkeel dongqpyeq'ae vuqduqtongq gae deelhhei, Yesu'ae yoqhhaetoq'ae bael lael laeq lye geezaeq biq.
Yesu lye cholhae aeqmae qiq hhaeq yaol zonglmeeq biq
Yesu tyuqvae bal yil fu, cholyaeqhael yoqhhaeq'ae byuqkiqbyuqnyel myel byuq biq. 43 Tyuqfu, tyuqvae haeqmiyaeq qiq hhaeq zhol'ae. Yoqhhaeq'ae siqza biq mael maq qye'li kiq e naelgol nael biq mael qyelniq hoq zoq vae, halza e dyuqbaq mael cholnael zonglmeeq e cholyaeqhael e aqlaq'ae mul do byel aeqwae, ngeelfeiq, qiq hhaeq eiq yoqhhaeq'ae maeq zonglmeeq ongl biq'ae. 44 Yoqhhaeq Yesu e aeqnaolboq'ae deel keellaeq, yoqhhaeq e aelhongq e aelbuq'aelqyel mael'ae so hhei'laol siq zhoqmyel qye'li biq vae. 45 Yesu gee: "Aeqsul ngaeq'ae so lal hhaemaeq?" Cholyaeqhael maq so yil lye gee gil'ae. Biqdeq gee: "Laoqsi, cholyaeqhael noq'ae ongtyeq deelhhei kaol byuq bongbyel hhae." 46 Ngeelfeiq, Yesu gee: "Cholyaeq aeqdilmyel ngaeq'ae so yo vae, ngael ngaeq e onglzaeq mael aeqhhaol ae'lye duyil yae lye loq lael laeq kaol'ae." 47 Haeqmiyaeq xitaeq maq hoqhhaq ongl yae lye loq biq, gu biq kaol zuqni'lye deel du'laq, Yesu e yiqsiboq'ae vuqduqtongq gae deelhhei lael, aeqcheekaol yoqhhaeq'ae so aeqlil lye mael, kaol haelmillye qiqlaqmyel meeqyil laeq hhae lye e silqinq mael, haelzhol cholyaeq yiqsiboq'ae geedu hhei vae. 48 Yesu yoqhhaeq'ae gee biq: "Yaeqmiq o! Noq e xinlxin lye noq yaol bi meeqsholyil vae, neesaelhhae'lye hoqyil oq!"
Yesu lye yaeqmiyaeq yaol bi dyeqhoqlal
49 Yesu saeziq gee siq fu, huiltangq'ae guanq e cholyaeq toq ae'lye cholyaeq qiq hhaeq keellael, gee: "Noq e yaeqmiq sil vae, laoqsi yaol haeq bi fu yil o." 50 Yesu gaeq hhei biq kaol yoqhhaeq'ae gee biq: "Maq gu kael, xinlxin za laol! Yoqhhaeq meeqshol hoqlael kiq'ae." 51 Tyu toq vae keellael laol, Biqdeq, Yoqhanl, Yaqgel kaol yaeqmiq e aeqdae aeqmae maoqlaol, baeqjyelboq e cholyaeq laoq qiq hhaeq eiq laoqhaol vae maeq bi bal do'lal. 52 Tyuqfu cholyaeqhael yaeqmiyaeq gae'lye nyul sil maoqmyel nyul bonggaebyel'ae. Yesu gee: "Haeq nyul gil! Yoqhhaeq maeq sil'ae, yuqxul hhae." 53 Yoqhhaeteel yaeqmiyaeq sil aeqwae lye loq biq, kaol yoqhhaeq'ae eel gil biq. 54 Yoqhhaeq yaeqmiyaeq e aqlaq mael'ae cheel hhei, kaol yoqhhaeq'ae gul biq, gee: "Yaeqguq, tullael!" 55 Yoqhhaeq e yohael hoqlal vae, kaol nae'naemyel tullael vae. Yesu yaeqmiyaeq'ae zaeq e teel heilmoq hhei biq lye moqheilheil gil biq'ae. 56 Yoqhhaeq e aeqdae aeqmae gaqmaqzuq li biq'ae. Yesu yoqhhaeteel'ae silqinq xilmael qiq hhaeq vae eiq haeq geegaeq yil lye moqheilheil gil biq.