Yesu lye ssuqhhal ae'lye maeq tullael kiq e cholyaeq yaol zonglmeeq biq
9
Yesu hoq mael'ae da'li, eeldeel deelmae vae he guq yil, kaol aeqyoyoq e milmae heeqmyel vae keellael. 2 Cholyaeq lye zashe maellye ssuqhhal ae'lye maeq tullael kiq e cholyaeq qiq hhaeq yaol, Yesu e yiqsi'ae baq laq biq. Yesu yoqhhaeteel e xinlxin mael mol hhei biq laol, ssuqhhal ae'lye maeq tullael kiq e cholyaeq'ae gee biq: "Yaeqguq, maq zoqgiq kael, noq e golsiq mael shelmianq aeqwae." 3 Tyuqfu, Momil e saeziq mael loq e laqkiq mee'nae nulhhaeq e neemae onglci'ae nyuq: "Cholyaeq xitaeq xyelduq e saeziq gee vae." 4 Yesu yoqhhaeteel e neemae mael'ae nyuq mael loq biq, kaol gee: "Noteel e neemae onglci'ae aeqcheekaol duqlaq myel nyuq gil lilmaeq? 5 Gee 'Noq e golsiq mael shelmianq wae', paelsilmyel gee 'Nol tullael kaol deel', hae qiq mal yael maeq? 6 Ngeelfeiq, Cholyaeq Yaqyo milcaeq vae golsiq shelmianq e laqtaq za'ae lye noteel'ae bi loq maoq." Kaol yoqhhaeq ssuqhhal ae'lye maeq tullael kiq e qiq hhaeq'ae gee biq: "Tullael! Noq e zashe mael baq hhei, kaol laoqhaol'ae hoqyil oq." 7 Tyutaeq tullael laol laoqhaol vae hoqyil vae. 8 Cholyaeqhael mol hhei biq laol zhee gu li gil biq'ae, kaol rongqyaol mael Momil'ae biq biq, Momil laoq xilnye e laqtaq mael cholyaeqhael'ae biq biq kaol'ae.Yesu lye Maqtail yaol saelpodu hhei
9 Yesu tyuqvae lye laefuqboq'ae deel du'li laol, Maqtail lye gul biq e cholyaeq qiq hhaeq, shuil shezaeq myel'ae zhol deelhhei mol hhei biq, kaol yoqhhaeq'ae gee biq: "Ngaeq'ae cho'lyeq lael!" Kaol yoqhhaeq tullael kaol Yesu'ae cho'lyeq li vae.
10 Yesu laoqhaol onglci'ae aelhoq zaeq fu, shuil shezaeq e cholyaeqhael, kaol golsiq za e cholyaeqhael Yesu kaol yoqhhaeq e laqcaqhael nyegael aelhoq qiqgael zaeq hhae. 11 Faqlilsail cholyaeqhael mol hhei biq laol, Yesu e laqcaqhael'ae gee biq: "Noteel e laoqsi aeqcheekaol shuil shezaeqhael kaol golsiq za hael nyegael aelhoq qiqgael zaeq hhaemaeq?" 12 Yesu gaeq hhei biq laol, gee: "Aeqhhaol zholsael e cholyaeq laoq cholnael zonglmeeq e cholyaeq maq mulyo'ae; ngeelfeiq, cholnael laoq mulyo'ae. 13 Momil e Suqhhaq taq'ae gee: 'Ngael hhaoqsaeqsaeq mael hhaol yae, zaelheel heel mael maeq hhaol yae.' Xi qiq doq e yilsi mael, noteel nyuq fufu yil gil. Ngael laoq gongyil e cholyaeq yaol gul'eeq yi maeqngeel yil, golsiq za e cholyaeq yaol gul'eeq yi aeqlil."
Maeq zaeq myel zhol mael'ae gee
14 Tyuqfu, Yoqhanl e laqcaqhael Yesu'ae mol lael, gee: "Ngaeteel kaol Faqlilsail cholyaeqhael duqlye maeq zaeq myel zhol lil, ngeelfeiq, noq e laqcaqhael laoq maeq zaeq myel maeq zhol'ae, xilnye zongl mael laoq aeqcheekaol maeq?" 15 Yesu yoqhhaeteel'ae gee biq: "Yaqyo alsheq kaol daeqxi qiqgael zhol fu, daeqxi haelmillyekaol nyuqsaeq laeq? Ngeelfeiq, naohaeq keellael laol, yaqyo alsheq yaol yoqhhaeteel zaellye sheeqsae yil, tyuqfu, yoqhhaeteel maeq zaeq myel zhol maoqhhae. 16 Eelcuq maellye ciq biq laol nil yilkiq e haeqpael yosheq qiq ziq mael, aelhongq yogeil mael'ae qiq hhaeq eiq maq guqda'ae; guqtul da hhei e maellye aelhongq tyulmael eezi kiq hhae, kaol gazi mael laefuq taq'ae hhael heeq kaol'ae. 17 Zilbaeq zilsheq mael saeqgeel palbye yogeil mael'ae qiq hhaeq eiq maq xyedo'ae, tyulnye zongl kaollaoq, saeqgeel palbye mael byuqbyeq hhei, kaol zilbaeq yul duyi, saeqgeel palbye mael eiq maq mullal vae. Zilbaeq zilsheq mael laoq saeqgeel palbye yosheq mael'ae xyedo maoqhhae, xilnye laol, niq mal myel haelmeeqlye zadeel wae."
Yesu lye yaeqmiyaeq kaol cholhae aeqmae yaol zonglmeeq biq
18 Yesu saeziq xihael gee fu, huiltangq'ae guanq e cholyaeq qiq hhaeq lael, kaol yoqhhaeq'ae vuqduqtongq gae hhei biq, gee: "Ngaeq e yaeqmiq yaeqmeel sil laeq vae, nol yoqhhaeq'ae aqlaq baqcheeq da hhei yil biq lye geezaeq lil, xilnye laol, yoqhhaeq dyeqhoqlal kiq'ae." 19 Yesu tullael laol yoqhhaeq nyegael bal yil vae; laqcaqhael eiq bal yil vae.
20 Tyuqfu, tyuqvae haeqmiyaeq qiq hhaeq zhol'ae. Yoqhhaeq'ae siqza biq mael maq qye'li kiq e naelgol nael biq mael qyelniq hoq zoq vae, yoqhhaeq Yesu e aeqnaolboq'ae keellael, kaol yoqhhaeq e aelhongq e aelbuq'aelqyel mael'ae so hhei biq; 21 Yoqhhaeq e neemae mael'ae xilnye nyuq kaol'ae: "Ngael yoqhhaeq e aelhongq mael'ae maoq maq so kaol'eiq, meeqsholyil wae." 22 Yesu zipol hoqlael laol, yoqhhaeq yaol mol hhei biq, gee: "Yaeqmiq, maq zoqgiq kael! Noq e xinlxin lye noq yaol jiul vae." Tyuq ae'lye aeqnaol, haeqmiyaeq tyutaeq meeqsholyil biq vae.
23 Yesu huiltangq'ae guanq e qiq hhaeq toq'ae keellael, qyebye laqkiq kaol oq'ol'oq myel nyul bonggaebyel e cholyaeq qiq miq mol hhei biq, 24 Kaol gee: "Duyil gil! Yaeqmiyaeq xitaeq sil e maeqngeel'ae, yuqxul hhae." Kaol yoqhhaeteel yoqhhaeq'ae eel gil biq. 25 Cholyaeqhael yaol lyeqdu hhei'laol, Yesu do'li, yaeqmiyaeq e aqlaq mael'ae cheel hhei biq laol, yaeqmiyaeq tullael vae. 26 Tyulkaol, peqlal e silqinq xilmael tyuqvae milcaeq vae haeqvae eiq gaeqbyel yil vae.
Yesu lye mabyeq niq nulhhaeq yaol zonglmeeq biq
27 Yesu tyuqvae lye laefuqboq'ae deel du'li fu, mabyeq niq nulhhaeq yoqhhaeq'ae cho'lyeq biq, gul gae'lael aeqmyel gee: "Dalweil e Yaqyo, ngaeteel'ae hhaoqsaeqsaeq laeq!" 28 Yesu laoqhaol vae do'li, mabyeqhael yoqhhaeq e yiqsi'ae keellael. Yesu gee: "Noteel ngael silqinq xilmael zonglkeel ongl'ae lye xiangxinl gil lilmaeq?" Yoqhhaeteel gee: "Hhaoqsongl o, ngaeteel xiangxinl lil." 29 Yesu yoqhhaeteel e ma'ne mael'ae so hhei biq, gee: "Noteel e xinlxin gae'lye noteel geezaeq laoqmyel bi peqlal laqngeel." 30 Kaol yoqhhaeteel e ma'ne mael pong'lael biq vae. Yesu aeqlyeq maeq lyeq myel yoqhhaeteel'ae gee biq: "Aeqyae'lye kei maoqhhae, ochoq'ae maeq bi loq hhaeq'ae." 31 Ngeelfeiq, yoqhhaeteel duyil laol, yoqhhaeq e cholmil mael tyuqvae milcaeq vae geegaeq du byel yil vae.
Yesu lye yaqba yaol zonglmeeq biq
32 Yoqhhaeteel duyil fu, cholyaeq lye niqhaeq guqzaeq li biq e yaqba qiq hhaeq yaol Yesu e yiqsi'ae sheeqlaeq biq. 33 Niqhaeq yaol lyeqdu biq laol, yaqba saeziq geedu hhei vae. Kaol cholyaeqhael gaqmaq zhee zuq li gil biq'ae, gee: "Yiqsellyel vae, xilnye silqinq qiqzael eiq maeq mol gol yil." 34 Ngeelfeiq, Faqlilsail cholyaeqhael gee: "Yoqhhaeq laoq niqhaeq zongmae'ae kaolzaeq kaol niqhaeq lyeqdu hhae."
Yesu e hhaoqsaeqsaeq mael
35 Yesu haeqvae lael'ee myel e maeq qiqsheel e milmae heeqmyel vae, kaol maeq qiqsheel e pusiq vae deeldyu byel vae, kaol yoqhhaeteel e huiltangq vae cholyaeqhael'ae geemyeq gil biq, kaol Mqmae Goqja e fuqyin mael geegaeq gil biq, kaol maeq qiqsheel e naelgol mael yol zonglmeeq gil biq. 36 Yoqhhaeq cholyaeq qiqmiq miqmae mol hhei biq laol, yoqhhaeteel'ae hhaoqsaeqsaeq biq; yoqhhaeteel'ae kunlnanq biq nyuqsaeq biq fu, baelzongl biq e cholyaeq qiq hhaeq eiq maeq zhol biq'ae, kaol aqciqhael'ae aqciq hoqzaq e cholyaeq maeq zhol laoqmyel kaol'ae. 37 Tyulkaol, yoqhhaeq laqcaqhael'ae gee biq: "Heille hoq maoq e zaelsiq laoq naeq, ngeelfeiq, aeqhael mulyaeq laoq maeq naeq'ae. 38 Tyulkaol, noteel zaelsiq e hhaoqsongl'ae aeqhael mulyaeq yaol moqheilheil du hhei, kaol yoqhhaeq e zaelsiq mael heille hoqyil lye geezaeq biq maoqhhae."