Yesu lye qiqhael cholyaeq e zhiqmoq e yaqhacheqzaq e cholyaeq yaol zonglmeeq biq
7
Yesu cholyaeqhael'ae saeziq xihael geegaeq byel biq laol, Jabaiqnongq'ae do'li vae. 2 Qiqhael (100) cholyaeq e zhiqmoq e hhael fuyo e yaqhacheqzaq e cholyaeq sil li maoqmyel nael biq hhae. 3 Qiqhael (100) cholyaeq e zhiqmoq vae Yesu haelzongl e silqinqhael gaeq li biq, kaol Yoqtail cholyaeqhael e zhangqlaoq mee'nae hhaeq yaol gul laeq kaol Yesu tyuqvae moqheilheil du hhei, Yesu vae yoqhhaeq e yaqhacheqzaq e cholyaeq'ae bael zonglmeeq biq lye bi geezaeq yil. 4-5 Zhangqlaoqhael Yesu tyuqvae keelli laol, neemae qiqsiqmyel yoqhhaeq'ae geezaeq biq, gee: "Yoqhhaeq aedeeteel e minqcuq'ae zhee gaeq laeq'ae, yoqhhaeq aedeeteel'ae huiltangq eiq cu laq, tyulkaol, nol cholyaeq xitaeq'ae baelzongl biq e zae'ae." 6 Yesu yoqhhaeteel nyegael qiqgael bal yil vae. Yultoq'ae keelli maoq fu, qiqhael (100) cholyaeq e zhiqmoq lye yelchoq mee'nae hhaeq yaol bi duyi kaol bi gee yi: "Hhaoqsongl o! Maeq kei kael vae, noq yaol ngatoq'ae bi lael mael laoq ngael maeq zae yae. 7 Ngael eiq noq yaol mol yi e maeq zae yae; nol saeziq qiq doq gee laol, ngaeq e yaqhacheqzaq e cholyaeq laoq meeqsholyil wae. 8 Ngael laoq ochoq e laqtaq holhhaqboq'ae zhol lil, ngaeq e laqtaq holhhaqboq vae eiq dangbinkei e cholyaeq zhol lil. Ngael xitaeq'ae gee biq: 'Yil!' Yoqhhaeq yil vae. Ngael baeqjyelboq qiq hhaeq'ae gee biq: 'Lael!' Yoqhhaeq lael vae. Ngaeq e yaqhacheqzaq e cholyaeq'ae gee biq: 'Silqinq xilmael zongl yil!' Yoqhhaeq eiq zongl yil vae." 9 Yesu saeziq xihael gaeq hhei biq laol, gaqmaqzuq li biq'ae. Yoqhhaeq zipol hoqlael kaol yoqhhaeq'ae cho'lyeq e cholyaeqhael'ae gee biq: "Ngael noteel'ae geegaeq laeqngeel, xuldyulmyel xinlxin za e cholyaeq laoq, Yiqsellyel vae ngael qiqzael eiq maeq mol gol yil." 10 Aeqnaol, moqheilheil duyil e cholyaeqhael laoqhaol vae hoq keellael laol, yaqhacheqzaq e cholyaeq qiq hhaeq meeqhoqlael biq mol hhei biq.Yesu lye miqchiq e yaqyo yaol bi dyeqhoqlal
11 Aeqnaol haeldyul maeqngeel laol, Yesu Naqyin lye gul e milmae heeqmyel vae yil. Yoqhhaeq e laqcaqhael kaol haelnaeqmyel cholyaeq yoqhhaeq nyegael qiqgael yil vae. 12 Yesu milmae heeqmyel e oheiq'ae keelli maoq fu qiqlaq'ae, cholyaeq lye cholsil qiq hhaeq baq duyi'ae. Yoqhhaeq e aeqmae laoq miqchiq'ae, yaqyo xitaeq maoq maeq zhol biq'ae. Milmae heeqmyel e haelnaeqmyel cholyaeqhael miqchiq nyegael cholsil bal baqduqm yil biq hhae. 13 Hhaoqsongl miqchiq yaol mol hhei biq laol hhaoqsaeqsaeq li biq, yoqhhaeq'ae gee biq: "Haeq nyul oq!" 14 Tyulkaol, deel niqli kaol cholsil baq e aelbol mael'ae so hhei li, kaol baq gil hael haoqtul deelhhei. Yesu gee: "Yaqyoyaeq ngael noq'ae tullael lye moqheilheil lil!" 15 Sil e cholyaeq tyutaeq tullael, myeqbongq gu'ngae hheikaol saeziq gee tullaeq, kaol Yesu lye yaqyoyaeq xitaeq yaol yoqhhaeq e aeqmae vae sheeqmoq hoq hhei biq. 16 Haelzhol e cholyaeqhael zhee gu li gil biq'ae, rongqyaol mael Momil'ae biq biq, gee: "Xianzhi yoheeq aedeeteel onglci'ae du'lal vae!" Yol gee: "Momil aeqyoq e cholyaeqhael'ae fupol laeq vae!" 17 Tyulkaol, Yesu zongl e silqinq xilmael Yoqtail milcaeq kaol tyuqvae dongqpyeq dongqjyel e milcaeq vae gaeq keel byel yil vae.
Yoqhanl e laqcaqhael Yesu'ae naelhaeq li biq
18 Yoqhanl e laqcaqhael silqinq xihael gilzuqmyel Yoqhanl'ae geegaeq hoqli biq. Yoqhhaeq laqcaq niq nulhhaeq gul laeq. 19 Kaol yoqhhaeteel yaol Hhaoqsongl tyuqvae yil lye moqheilheil du hhei, gee: "Nol laoq aeqgael yi maoqlye e qiq hhaeq lilmaeq, paelsilmyel ngaeteel baeqjyelboq e cholyaeq yaol doq siq laeq?" 20 Cholyaeq niq nulhhaeq Yesu tyuqvae keellael, gee: "Shelxiqzongl e Yoqhanl ngaeteel yaol moqheilheil du hhei laq kaol noq'ae naelhaeq lael lye gee: 'Nol laoq aeqgael yi maoqlye e qiq hhaeq lilmaeq, paelsilmyel ngaeteel baeqjyelboq e cholyaeq yaol doq siq laeq?'" 21 Tyuqfu qiqlaq'ae, Yesu lye cholnaelhael, doqlal kiq e naelgol nael biq e cholyaeqhael, kaol maeqshol e yohael guqzaeq li biq e cholyaeqhael zonglmeeq byel biq. Yoqhhaeq mabyeqhael'ae hhaoqsaeqsaeq biq, kaol bi mol congl hoqlael vae. 22 Yesu yoqhhaeteel'ae geehoq biq: "Noteel hoqyil gil, kaol haelgaeq haelmol e silqinqhael Yoqhanl'ae geegaeq hoqli biq. Mabyeqhael mol congl lael vae, keeldilhael gaelmae deel yilkiq vae, maqfeng nael biq e cholyaeqhael meeqsholyil vae, naeqboqhael gaeq congl lael vae, cholsilhael dyeqhoqlal vae, saeqyaeqhael'ae fuqyin geegaeq biq vae. 23 Aeqsul ngaeq gae'lye xinlxin taq'ae maeq jye'leeq kaollaoq, geeqlongq meeq vae."
Yesu kaol shelxiqzongl e Yoqhanl
24 Yoqhanl lye moqheilheil du hhei e cholyaeqhael deelhoq vae, Yesu cholyaeqhael'ae Yoqhanl yaol geedu gil biq, gee: "Noteel byelcongq'ae aeqchee fu yil gil lilmaeq? Mol'ongq qiq bol zaeqxil lye bo ni fu yil gil lilmaeq? 25 Noteel duyil mael laoq, aeqdilmyel aeqchee fu yil gil maoqlye lilmaeq? Aelhongq yomeeq dum hhei e cholyaeq laeq? Aelhongq yomeeq dum hhei, dyuqbaq mul henq cholyaeq laoq, zongmae e laoqhaol vae zhol hhae. 26 Noteel duyil mael laoq, aeqdilmyel aeqchee fu yil gil maoqlye lilmaeq? Xianzhi laeq? Ngeel'ae, ngael noteel'ae geegaeq laeqngeel, yoqhhaeq xianzhihael taq'ae hhael heeq'ae! 27 Momil e Suqhhaq taq'ae cholyaeq xitaeq'ae cu deelhhei'ae:
'Naelhaeq gil, ngael ngaeq e mqmae yosongl yaol,
noq e laefuqmyel moqheilheil du hhei maoqlye lil.
Yoqhhaeq noq e gaelmae mael
laefuqmyel pasael deelhhei maoqlye hhae.'
28 Ngael noteel'ae geegaeq laeqngeel, haeqmiyaeq lye bo hhei e cholyaeqhael onglci'ae, Yoqhanl nyedullye yoheeq qiq hhaeq eiq maeq zhol'ae. Ngeelfeiq, Momil e Goqja vae hhaelnil nilli e qiq hhaeq laoq yoqhhaeq taq'ae hhael heeq'ae." 29 Gilzuqmyel cholyaeqhael kaol shuil shezaeq e cholyaeqhael eiq Yoqhanl lye shelxiq biq vae. Yoqhhaeteel Yesu gee e saeziq xihael gaeq hhei biq laol, Momil laoq gongyil'ae lye gee gil hhae. 30 Ngeelfeiq, Faqlilsail cholyaeqhael kaol lilfaq mael loq e laqkiqhael Yoqhanl lye maeq shelxiq gol biq'ae, tyulkaol, Momil yoqhhaeteel'ae meeq biq mael maq mul nae.
31 Yesu yol gee: "Ngael yaeqmeel dyeqdeel e cholyaeqhael yaol aeqchee mael nyedullye dul'ae lye gee laeq? Yoqhhaeteel haelmillye cholyaeq maeq? 32 Yoqhhaeteel laoq gaiziq vae zhol deelhhei e yaeqguq laoqmyel hhae, qiq miq laoq baeqjyelboq e qiq miq'ae gul biq, gee:
'Ngael noteel'ae tilliltoqloq bo gaeq gil biq,
noteel aeqcheekaol yinqjil maeq dil gil lilmaeq;
ngaeteel nyulkoqzheq fu,
noteel eiq maeq nyul.'
33 Shelxiqzongl e Yoqhanl lael fu, aelhoq maeq zaeq, zilbaeq maeq dol, tyulkaol, noteel gee: 'Yoqhhaeq'ae niqhaeq guqzaeq li biq hhae!' 34 Cholyaeq Yaqyo lael fu, zaeq eiq zaeq, dol eiq dol, ngeelfeiq, noteel gee: 'Nol fu, cholyaeq xitaeq zaeq dol mael hhaol biq dyul maeqcilmyel, shuil shezaeq e cholyaeqhael kaol golsiq za e cholyaeqhael nyegael yelchoq geiq hhae.' 35 Ngeelfeiq, Momil e geel mael aeqyoq e yaeqguqhael onglci'ae loqdaeqlye mol laelkiq vae."
Yesu lye golsiq za e haeqmiyaeq yaol shelmianq biq
36 Ximenq lye gul biq e Faqlilsail cholyaeq qiq hhaeq, Yesu'ae yoqhhaeq nyegael aelhoq bael zaeq lael lye gulzaeq biq, kaol yoqhhaeq Faqlilsail cholyaeq toq'ae aelhoq zaeq li vae. 37 Milmae heeqmyel tyuqvae, golsiq za e haeqmiyaeq qiq hhaeq zhol'ae. Yoqhhaeq laoq Yesu Faqlilsail cholyaeq toq'ae aelhoq zaeq hhae lye loq biq, kaol yil e pinqpin heil hhei, onglci'ae xianggao deeq hhae. 38 Yoqhhaeq Yesu e aeqnaolboq'ae haoqtul deelhhei, Yesu e aeqkeel mael'ae niqli aeqmyel nyul'ae. Yoqhhaeq e ma'eel mael Yesu e aeqkeel mael yuljyel byel vae, aeqnaol yoqhhaeq e qyelkeel maellye xyegee biq, myeqbongq maellye Yesu e aeqkeel mael'ae myeqchilnuq biq, kaol xianggao mael soda hhei biq. 39 Yoqhhaeq'ae aelhoq gulzaeq biq e Faqlilsail cholyaeq mol hhei biq laol, neemae mael'ae nyuq: "Xitaeq aeqdilmyel xianzhi kaollaoq, yoqhhaeq'ae so e xitaeq laoq haelmillye haeqmiyaeq'ae kaol aeqsul'ae lye loq'ae. Haeqmiyaeq xitaeq laoq golsiq za e cholyaeq'ae!"
40 Yesu yoqhhaeq'ae gee biq: "Ximenq, ngael noq'ae saeziq gee laeqngeel." Yoqhhaeq gee: "Laoqsi, nol gee." 41 Yesu gee: "Jyelzu pi e cholyaeq niq nulhhaeq yoqhhaeteel'ae dyuqbaq jilbiq e cholyaeq'ae dyuqbaq ca hhae. Qiq hhaeq laoq ngaeqhael (500) ca hhae, baeqjyelboq e qiq hhaeq laoq ngaeqqyel ca hhae. 42 Yoqhhaeteel qiq hhaeq eiq maeq heilduhoq ongl gil biq, kaol dyuqbaq jilbiq e cholyaeq yoqhhaeteel'ae dyuqbaq maeq saelzaeq hoq biq vae. Xilnye kaollaoq, yoqhhae niq nulhhaeq aeqsul yoqhhaeq'ae hhaelgaeq biq hhaemaeq?" 43 Ximenq geehoq biq: "Ngael nyuq laoq dyuqbaq hhal ca e qiq hhaeq'ae." Yesu yoqhhaeq'ae gee biq: "Nol gee mael hoq'ae." 44 Tyulkaol, Yesu haeqmiyaeq boq'ae zipol yi, kaol Ximenq'ae gee biq: "Nol haeqmiyaeq xitaeq haelzonglhael mol aeqwae maeq? Ngael notoq'ae do'lal fu, nol ngaeq'ae aeqkeel ciq e eelcuq maq baqmoq laeq'ae, ngeelfeiq, haeqmiyaeq xitaeq laoq ma'eel maellye ngaeq e aeqkeel mael zongljyel hhei, kaol yoqhhaeq e qyelkeel maellye xyegee laeq'ae. 45 Nol ngaeq'ae maduq mael'ae myeqchil maq nuq laq'ae, ngeelfeiq, haeqmiyaeq xitaeq do'lal aeqnaol laoq maqqyemyel ngaeq e aeqkeel mael'ae myeqchilnuq laq hhae. 46 Nol zhoqcae cil maellye ngaeq e vuqduq mael'ae maq soda laq'ae. Ngeelfeiq, haeqmiyaeq xitaeq laoq xianggao maellye ngaeq e aeqkeel mael'ae soda laq'ae. 47 Tyulkaol, ngael noq'ae geegaeq laeqngeel, yoqhhaeq e haeldyul dyulmae e golsiq mael shelmianq biq aeqwae, yoqhhaeq ngaeq'ae zhee gaeq laeq kaol'ae; shelmianq biq e golsiq mael aelheel oq hael laoq, yoqhhaeq e gaeq mael eiq aelheel wae." 48 Yesu haeqmiyaeq'ae gee biq: "Noq e golsiq mael shelmianq aeqwae." 49 Yoqhhaeq nyegael qiqgael baelzhol e cholyaeqhael hhaellaelmyel geegaeq gil: "Xitaeq aeqsul maeq, cholyaeq e golsiq mael dyel'eiq shelmianq ongl laoq?" 50 Yesu haeqmiyaeq'ae gee biq: "Noq e xinlxin lye noq yaol bi deqjiul vae. Nol neesaelhhae'lye hoqyil oq!"