Cholyaeqhael Yesu yaol xyeq maoqlye geedazaq gil'ae
14
1-2 Yuq'yeqjyeq kaol Paofenq Maqzoq Zaeqnao e laefuq niq nao'ae, jilsizhangqhael kaol Momil e saeziq mael loq e laqkiqhael gee: "Zaeqnao yo fu laoq Yesu'ae qiqgiq maeq zongl biq hhaeq'ae, aeqgael cholyaeqhael aeqvuqlaelvuqmyel zongl tul beq laq maeqhe." Tyulkaol, yoqhhaeteel Yesu yaol aeqyae'lye eetyeq kaol xyeq maoqlye nyuq gil hhae.Hhaoqsongl'ae xianggao xyecheeq hhei biq
3 Yesu Boqdalniq e maqfeng nael biq e cholyaeq Ximenq toq'ae aelhoq zaeq fu, haeqmiyaeq qiq hhaeq pyuqjyeqjyeq e naqdaq xianggao zoq e yil e pinqpin qiq mal heil hheikaol keellael'ae. Yoqhhaeq lye yil e pinqpin mael diqbyeq hhei, kaol naqdaq xianggao mael Yesu e vuqduq taq'ae xyecheeq hhei biq. 4 Cholyaeq mee'nae hhaeq laoq neema zhee su biq'ae, qiqhhaeq qiqhhaeq'ae geegaeq gil'ae, gee: "Aeqcheekaol xianggao mael xilnye vae mul hhei hhaemaeq? 5 Xianggao xilmael laoq pulziq suqhael (300) maeqcilmyel ongqdu ongl hhae, kaol saeqyaeq vae heilmoq hhei biq." Kaol yoqhhaeteel haeqmiyaeq tyutaeq'ae gaezaeq biq. 6 Ngeelfeiq, Yesu gee: "Yoqhhaeq aeqchee zongl zongl biq! Aeqcheekaol yoqhhaeq'ae bi mulsaeq laeq? Yoqhhaeq ngaeq e aeqhhaol'ae zongl mael laoq zhee meeq e silqinq'ae! 7 Noteel haeqfu eiq saeqyaeq nyegael qiqgael hhae zhol, noteel hhaeq lil lye kaollaoq, haeqfu qiqlaq eiq yoqhhaeteel'ae meeq biq kael, ngeelfeiq, noteel laoq haeqfu myel ngaeq nyegael qiqgael maeq hhae zhol'ae. 8 Haeqmiyaeq xitaeq laoq yoqhhaeq hael zonglkeel ongl hael zongl aeqwae. Yoqhhaeq lye laefuqmyel xianggao maellye ngaeq e aeqhhaol mael'ae soda laq mael laoq, baqduqm laefuq'ae paeqgaelsael meeq hhae. 9 Ngael aeqdilmyel noteel'ae geegaeq laeqngeel, mqmae holhhaq vae, fuqyin xilmael haeqvae milcaeq vae geegaeq duyil kaol'eiq, haeqmiyaeq xitaeq haelzongl mael geegaeq duyil maoqlye hhae, xilnye zongl mael laoq, yoqhhaeq yaol nyuqdeel biq maoqlye hhae."
Yoqdal Yesu yaol yotyel maqdumyel ongqzaeq biq maoqlye zongl hhae
10 Shiqtuq qyelniq hhaeq onglci e qiq hhaeq Ja'lyul cholyaeq Yoqdal, jilsizhangqhael'ae saelpo yil, kaol Yesu yaol yoqhhaeteel'ae eemoq hhei biq maoqlye zongl hhae. 11 Jilsizhangqhael gaeq hhei biq laol zhee hhaol gil biq'ae, tyulkaol, yoqhhaeq vae pulziq heil laeqngeel lye gee biq. Kaol Yoqdal laoq haeqfu shiqshen hhael zae'li kiq maeq lye fu deelzaeq hhei hhae, kaol yotyel maq du myel Yesu yaol yoqhhaeteel'ae ongq biq maoqlye hhae.
Aeqnaol naolli e mqkiq aelhoq
12 Paofenq Maqzoq Zaeqnao e laefuq fuqli qiq nao eiq, Yuq'yeqjyeq e aeqyol yolyaeq mael xyeq e tyu qiq nao ngeelvae. Laqcaqhael Yesu'ae naelhaeq biq: "Ngaeteel Yuq'yeqjyeq e baqwanq mael, haeqvae paeqgaelsael meeq deelhhei yil laeq?" 13 Yoqhhaeq laqcaq niq nulhhaeq yaol moqheilheil du hheikaol yoqhhaeteel'ae gee biq: "Noteel milmae heeqmyel vae li gil, cholyaeq qiq hhaeq eelcuq qiq buqyaeq baq hhei myel noteel'ae deelpuq lael'ae, kaol noteel yoqhhaeq'ae cho'lyeq li, 14 Yoqhhaeq aeqsul toq'ae do'li laol, noteel tyutoq e hhaoqsongl'ae gee biq: "Laoqsi noq'ae naelhaeq: 'Tangq'oxin mael haeqvae za hhaemaeq? Ngael kaol ngaeq e laqcaqhael tyuqvae Yuq'yeqjyeq e mqkiq e aelhoq zaeq maoq yae.'" 15 Yoqhhaeq noteel'ae haoqtaq vae dolza'lye paeqgaelsael meeq deelhhei e haeqheemyel qiq ssul tyuqmyeq hhei laeq'ae, kaol noteel tyuqvae aedeeteel'ae laefuqmyel paeqgaelsael meeq deelhhei yil gil laeq." 16 Kaol laqcaqhael duyil vae, milmae heeqmyel vae do'li, gilzuqmyel Yesu gee laoqmyel deelpuq hhei gil biq'ae, kaol yoqhhaeteel Yuq'yeqjyeq e baqwanq mael paeqgaelsael meeq deelhhei vae.
17 Kiqsulkiqxeiq fu, Yesu kaol shiqtuq qyelniq hhaeq lael vae. 18 Yoqhhaeteel zholgae hheikaol aelhoq zaeq gil fu, Yesu gee: "Ngael aeqdilmyel noteel'ae geegaeq laeqngeel, noteel onglci'ae ngaeq nyegael aelhoq qiqgael zaeq e cholyaeq qiq hhaeq, ngaeq yaol yotyel maqdumyel ongqzaeq maoqlye hhae." 19 Kaol yoqhhaeteel zhee nyuqsaeq gil biq'ae, qiqhhaeq qiqhhaeq lye yoqhhaeq'ae naelhaeq biq: "Ngael maeqhael ngeel?" 20 Yesu yoqhhaeteel'ae gee biq: "Yoqhhaeq shiqtuq qyelniq hhaeq onglci e qiq hhaeq'ae, ngaeq nyegael aqba mael panqpan mael'ae deiqsu e qiq hhaeq'ae. 21 Cholyaeq Yaqyo laoq Momil e Suqhhaq taq'ae cu deelhhei laoqmyel hhae sil hhae, ngeelfeiq, Cholyaeq Yaqyo yaol yotyel maqdumyel ongqzaeq biq e qiq hhaeq laoq zaihuol za vae! Tyutaeq yaol laoq maeq bo du hhei biq mael hhael shoq wae."
22 Yoqhhaeteel zaeq gil fu, Yesu aqba mael heilqei hheikaol Momil'ae meeqyaevae lye gee biq laol heiqpa hhei, laqcaqhael'ae heilmoq hhei biq, gee: "Xilmael laoq ngaeq e aeqhhaol mael'ae, noteel zaeq gil." 23 Yesu beiziq qiq mal yol heilqei hhei, kaol Momil'ae meeqyaevae lye gee laol, laqcaqhael'ae baqmoq hhei biq, kaol yoqhhaeteel dol vae. 24 Yesu yoqhhaeteel'ae gee biq: "Xilmael laoq ngael cholyaeqhael nyegael geemeeq deelhhei gae'lye yuldu hhei e siq ngeelvae, haelzhol cholyaeq gae'lye yuldu hhei aeqlil. 25 Ngael aeqdilmyel noteel'ae geegaeq laeqngeel, ngael Momil e Goqja vae noteel nyegael siqbaq zilbaeq zilsheq dol e naohaeq fu keellye, ngael siqbaq zilbaeq mael qiqzael eiq maeq dol vae."
26 Yoqhhaeteel shigo changl byel hhei'laol, duyi kaol Zhoqcae Geeqzhoq vae li gil vae.
Biqdeq aeqgael Hhaoqsongl yaol maeq loq yae lye gee maoqlye hhae
27 Yesu yoqhhaeteel'ae gee biq: "Noteel gilzuqmyel jye'leeq maoqlye hhae, Momil e Suqhhaq taq'ae xilnye cu deelhhei kaol'ae:
'Ngael aqciq hoqzaq e cholyaeq'ae diq biq laol,
aqciqhael kici byel maoqlye hhae.'
28 Ngeelfeiq, ngael dyeqhoqlal aeqnaol, ngael noteel laefuqmyel Ja'lillil vae keelli maoq." 29 Biqdeq yoqhhaeq'ae gee biq: "Cholyaeqhael gilzuqmyel jye'leeq feiq, ngael maeq jye'leeq yil." 30 Yesu yoqhhaeq'ae gee biq: "Ngael aeqdilmyel noq'ae geegaeq laeqngeel, yaeqnao mqkiq'ae haepyul niq pu dyel lael e laefuq'ae, nol ngaeq yaol maeq loq yae lye suq pu gee maoqlye hhae." 31 Biqdeq aeqdilmyel gee biq: "Ngael aeqdilmyel noq nyegael qiqgael hhae sil kaol'eiq, ngael aeqdilmyel noq yaol maeq loq yae lye maeq gee yil!" Baeqjyelboq e laqcaqhael eiq xilnye gee gil'ae.
Yesu Kelximaqniq vae heeldoq gee
32 Yoqhhaeteel Kelximaqniq lye gul e milcaeq vae keellael gil; Yesu laqcaqhael'ae gee biq: "Noteel saeqvae zhol gil, ngael heeldoq gee yil maoq yae." 33 Tyulkaol, yoqhhaeq lye Biqdeq, Yaqgel kaol Yoqhanl yaol bael sheeqyil vae. Yesu gu tulli biq kaol zhee nyuqsaeq biq hhae. 34 Kaol yoqhhaeteel'ae gee biq: "Ngaeq e neemae nyuqsaeq kaol sil lael maoqmyel oqyaevae; noteel saeqvae zholdeelsaeq, yuqnyuqgeel gil maoqhhae." 35 Yesu laefuqboq'ae teel deel du'li, milcaeq vae vuqduqtongq gae deelhhei kaol heeldoq gee: "Hhaeq lil lye kaollaoq, tyuqfu peqlal maoqlye mael ngaeq'ae haeq bi yo'lael." 36 Yesu yol gee: "Abala aeqdae o! Nol aeqchee silqinq eiq zonglkeel ongl, nol beiziq xilmael ngaeq saeqvae lye heilsae yil laeq lye geezaeq lil. Ngeelfeiq, ngael nyuq laoqmyel haeq bi ngeel, nol haelmillye nyuqtongq deelhhei laol haelmillye ngeel biq." 37 Yesu hoqlal laol, laqcaqhael yuqxul mol hhei biq, kaol Biqdeq'ae gee biq: "Ximenq nol yuqxul lilmaeq? Nol yuqnyuqgeellye qiqlaq eiq maeq zhol ongl laeq hhaemaeq? 38 Aeqdilmyel yuqnyuqgeel kaol heeldoq gee maoqhhae, aeqgael noteel cheeqmu myel vae leeqdo gil laqngeel. Noteel e neemae mael laoq hhaeq'ae, ngeelfeiq, ruqtiq laoq ruanqroq biq hhae." 39 Yesu deelsae hheikaol heeldoq yol gee yil, haelgee e saeziq mael laefuq gee laoqmyel hhae. 40 Yoqhhaeq yol hoqlal fu, laqcaqhael yuqxul mol hhei biq. Yoqhhaeteel hhaeqdyul zhee dyul biq, kaol Yesu'ae haelmillye geehoq biq maoqlye maeq loq biq'ae. 41 Yesu dilsan cil hoqlal fu, yoqhhaeteel'ae gee biq: "Noteel ssuqza kaol hhaeqnaeqnaeq gil oqyilsiq maeq? Hhaeq vae, naohaeq keel vae. Naelhaeq gil, Cholyaeq Yaqyo yaol golsiq za e cholyaeq e aqlaq'ae eemoq biq maoqlye wae. 42 Tullael, aedeeteel deel gil o! Ngaeq yaol yotyel maqdumyel ongqzaeq e cholyaeq keellael goqbiq vae."
Yesu yaol eetyeq biq
43 Yesu saeziq gee siq fu, shiqtuq qyelniq hhaeq onglci e Yoqdal, kaol maejyel kaol haeqdul baq hhei e cholyaeqhael keellael vae; cholyaeq xihael laoq jilsizhangqhael kaol Momil e saeziq mael loq e laqkiqhael, kaol zhangqlaoqhael lye moqheilheil du hheikaol lael hhae; 44 Yesu yaol yotyel maqdumyel ongqzaeq e cholyaeq yoqhhaeteel'ae laefuqmyel zonglmyeq biq, gee: "Ngael aeqsul'ae myeqchilnuq biq laol, aeqsul ngeelvae; yoqhhaeq yaol eetyeq biq kaol haeq bi kisae hhei." 45 Yoqdal keellael laol, nae'naemyel deel niqli kaol Yesu'ae gee biq: "Labiq!" Kaol yoqhhaeq Yesu'ae myeqchilnuq biq. 46 Yoqhhaeteel lye Yesu yaol eetyeq biq vae, kaol eesae yil maoqlye hhae. 47 Dongqpyeq'ae haoqtul deelhhei e cholyaeqhael onglci e qiq hhaeq maejyel eedu hhei, kaol daljilsi e hhaeq'ongq ongqzaeq e cholyaeq vae qiq pu she hhei biq, kaol yoqhhaeq e naeqbol mael qiqboq shega biq. 48 Yesu yoqhhaeteel'ae gee biq: "Noteel maejyel kaol haeqdul baq hhei myel ngaeq'ae eetyeq gil laeq mael, lolbiq diqkoqzaeq e cholyaeq'ae eetyeq laoqmyel zongl laeq lilmaeq? 49 Ngael naochomyel heelhaol vae cholyaeqhael'ae geemyeq gil biq, noteel nyegael qiqgael baelzhol, noteel ngaeq'ae maeq eetyeq laeq; ngeelfeiq, xilmael laoq Momil e Suqhhaq taq'ae gee e saeziq mael laoqmyel peqlal maoqlye kaol'ae." 50 Tyuqfu, laqcaqhael gilzuqmyel yoqhhaeq ae'lye deelsae hheikaol kisae byel vae.
51 Yaqyoyaeq qiq hhaeq, ziq e aelhongq maoqlaol maeq dum hhei aeqmyel Yesu'ae cho'lyeq. Cholyaeqhael yoqhhaeq'ae eetyeq biq maoqlye fu, 52 Yoqhhaeq ziq e aelhongq mael donghei hheikaol nyelguqlye kisae vae.
Yesu'ae zhiqmoqkae gil biq
53 Yoqhhaeteel lye Yesu yaol daljilsi zael vae ee deelli biq, gilzuqmyel jilsizhangqhael, zhangqlaoqhael kaol Momil e saeziq mael loq e laqkiqhael, gilzuqmyel qiqgael zhol'eeq deelhhei gil'ae. 54 Biqdeq gaelmaolsae'lye Yesu'ae cho'lyeq deelhhei, daljilsi toq e dyekaeq'ae keellye cho'lyeq keellaeq, songlqyezaq e cholyaeqhael nyegael, aeqzaeq doq myel e dongqpyeq'ae aeqzaeq qiqgael hulm hhae. 55 Jilsizhangqhael kaol gilzuqmyel Yoqtail Yilhuil vae zhol e cholyaeqhael, zenljul saelpo hheikaol Yesu'ae konglgaol biq, kaol yoqhhaeq yaol zonglsil biq maoqlye hhae, ngeelfeiq, zenljul maeq saelpodu hhei ongl biq'ae. 56 Haelnaeqmyel cholyaeq jaq e zoqzenl maellye yoqhhaeq'ae zhiqmoqkae biq, ngeelfeiq, yoqhhaeteel zoqzenlkei mael eiq maeq qiqsheel'ae. 57 Cholyaeq mee'nae hhaeq tullael, kaol jaq e zoqzenl maellye yoqhhaeq'ae zhiqmoqkae biq, gee: 58 "Ngaeteel yoqhhaeq gee mael gaeq yo aeqwae. Yoqhhaeq gee: 'Ngael cholyaeq e aqlaq maellye cutul hhei e heelhaol mael cheqga maoq, suq nao maeq bong myel cholyaeq e aqlaq maellye cu hhei maeqngeel e heelhaol qiq ssul cu du hhei maoq.'" 59 Xilnye kaol feiq, yoqhhaeteel e zoqzenl mael laoq maeq qiqsheel wae siq. 60 Daljilsi haoqtul lael, onglci'ae deel keellaeq, kaol Yesu'ae naelhaeq biq: "Cholyaeq xihael zoqzenlkei kaol noq'ae zhiqmoqkae mael laoq aeqcheekaol maeq? Nol qiqgiq eiq maeq gee'naeqhoq lye laeq?" 61 Yesu qiqgiq yotyel maq du'ae, qiqgiq eiq maeq gee'naeqhoq biq. Daljilsi yoqhhaeq'ae yol naelhaeq biq: "Nol laoq Maeqdaeqhhaeq Qiq hhaeq e Yaqyo Jidu lilmaeq?" 62 Yesu gee: "Ngael ngeel lil.
Noteel laoq Cholyaeq Yaqyo,
Hhael'onglzaeq zaeqli qiq hhaeq e laqsseqboq'ae zhol,
kaol mqmae e mqdul nyegael qiqgael lael e hhae mol'ae."
63 Kaol daljilsi yoqhhaeq e aelhongq mael eezi hhei, gee: "Aedeeteel zoqzenl e cholyaeq mulkael siq maeq? 64 Noteel yoqhhaeq gee e xyelduq e saeziq xihael gaeq vae! Noteel haelmillye nyuq gil yae maeq?" Cholyaeqhael gilzuqmyel yoqhhaeq'ae hhae sil e golsiq za'ae lye gee biq. 65 Tyulkaol, cholyaeq qiq miq laoq yoqhhaeq'ae nae'naemyel eelcael mye biq, yoqhhaeq e maduq mael'ae hocongq biq, kaol laqtu maellye yoqhhaeq'ae tyel biq, yoqhhaeq'ae gee biq: "Peqlal maoqlye mael geedu hhei!" Songlqyezaq e cholyaeq yoqhhaeq yaol eepol du'laq, kaol laqho maellye yoqhhaeq'ae tyel biq hhae.
Biqdeq Hhaoqsongl'ae maeq loq yae lye suq pu gee
66 Biqdeq aq'oqboq e dyekaeq'ae zhol fu, daljilsi e yaqhacheqzaq e haeqmiyaeq qiq hhaeq lael'ae. 67 Biqdeq aeqzaeq hulm mol hhei biq, kaol yoqhhaeq'ae chifu deelhhei kaol gee biq: "Nol eiq Naqsa'lel cholyaeq Yesu qiqboq hhae!" 68 Ngeelfeiq, Biqdeq maeqngeel yil lye gee biq: "Ngael maeq loq yae, nol aeqchee gee lye eiq maeq loq yae!" Kaol yoqhhaeq deel du hhei vae, laefuqboq e dyekaeq'ae keellael laol, haepyul dyel tullaeq vae. 69 Yaqhacheqzaq e haeqmiyaeq tyutaeq yoqhhaeq yaol mol hhei biq, kaol baeqjyelboq'ae haoqtul cholyaeq'ae yol gee biq: "Xitaeq laoq yoqhhaeteel e qiqboq hhae!" 70 Biqdeq maeqngeel yil lye yol qiq pu gee biq. Qiqlaqlye laol, baeqjyelboq'ae haoqtul e cholyaeq Biqdeq'ae yol gee biq: "Nol eiq Ja'lillil cholyaeq'ae, kaol nol aeqdilmyel yoqhhaeteel e qiqboq hhae." 71 Biqdeq laoq duqlaq e saeziq maellye faqsilkei: "Noteel gee e cholyaeq xitaeq ngael maeq loq yae!" 72 Tyuqfu qiqlaq'ae haepyul niq pu dyel tullaeq vae. Biqdeq Yesu yoqhhaeq'ae gee gol biq e saeziq mael nyuq tullaeq biq: "Haepyul niq pu dyel tullaeq e laefuq, nol ngaeq yaol maeq loq yae lye suq pu gee maoqlye hhae." Tyulkaol, yoqhhaeq qiqlaqmyel nyul tullaeq.