Yesu laqcaqhael'ae aeqkeel ciq biq
13
Yuq'yeqjyeq laefuq'ae, Yesu laoq yoqhhaeq milcaeq vae lye deelsae hhei, kaol Aeqdae tyuqvae hoqli e naohaeq keellael wae lye loq'ae. Yoqhhaeq laoq milcaeq taq'ae yoqhhaeq e cholyaeqhael'ae gaeq biq, kaol yoqhhaeteel'ae aeqnaol naolli fu keellye gaeq biq hhae. 2 Mqkiq e aelhoq zaeq fu, niqhaeq haeqmae lye Yesu yaol yotyel maqdumyel onglzaeq biq maoqlye nyuq mael, Ximenq e yaqyo Ja'lyul cholyaeq Yoqdal e neemae mael'ae bi do'li wae, 3 Yesu laoq Aeqdae lye halzahael gilzuqmyel yoqhhaeq e aqlaq'ae heilmoq laeq vae lye loq'ae, kaol yoqhhaeq laoq Momil tyuqvae lye lael, kaol Momil tyuqvae hoqli maoqlye hhae lye loq'ae, 4 Kaol tullael kaol zaelzhee ae'lye deeltael hhei vae, nildu e aelhongq mael heiga hhei, kaol paelsheel mael haeqpipaqhhael vae kaltoq da hhei. 5 Aeqnaol, yoqhhaeq lye eelcuq mael ciqpenq mael'ae xyedo hhei, kaol laqcaqhael'ae aeqkeel ciq biq, kaol haeqpipaqhhael'ae paq hhei e paelsheel maellye xyegee biq. 6 Ximenq Biqdeq e yiqsi'ae keellael fu, Biqdeq gee: "Hhaoqsongl o, nol ngaeq e aeqkeel mael ciq maoqlye laeq?" 7 Yesu geehoq biq: "Ngael zongl mael laoq, nol yaeqmeel maeq loq'ae, aeqgael laoq loq wae." 8 Biqdeq gee: "Maeq hhaeq'ae, nol ngaeq e aeqkeel mael qiqzael eiq maeq ciq hhaeq'ae!" Yesu gee: "Ngael noq'ae maeq ciq kaollaoq, nol laoq ngaeq nyegael guanxil maqza wae." 9 Ximenq Biqdeq gee: "Hhaoqsongl o, tyulnye kaollaoq ngaeq e aeqkeel mael ciq dyul maeqcilmyel, ngaeq e aqlaq kaol vuqduq mael eiq bael ciq laeq!" 10 Yesu gee: "Aeqhhaol ciq gol e cholyaeq laoq, aeqhhaol qiqsiqmyel sholgaqlye wae, kaol aeqkeel ciq laol hhaeq vae. Noteel laoq sholgaqlye hhae, ngeelfeiq, aeqsul myel sholgaqlye maeqngeel'ae." 11 Yesu laoq aeqsul yoqhhaeq yaol yotyel maqdumyel ongqzaeq maoqlye hhae lye loq'ae, tyulkaol, yoqhhaeq "noteel aeqsul myel sholgaqlye maeqngeel'ae" lye gee hhae.12 Yesu laqcaqhael e aeqkeel mael ciq du hhei'laol, nildu e aelhongq mael dumda hoq hhei, kaol zholgae hhei, kaol yoqhhaeteel'ae gee biq: "Ngael noteel'ae zongl biq mael, noteel loq gil lilmaeq? 13 Noteel ngaeq'ae 'Laoqsi' kaol 'Hhaoqsongl' lye gul laeq, noteel gee mael hoq'ae, ngael laoq aeqdilmyel ngeel lil. 14 Ngael laoq noteel e Hhaoqsongl kaol laoqsi lil, ngeelfeiq, noteel e aeqkeel mael ciq biq, kaol noteel eiq qiqhhaeq qiqhhaeq'ae aeqkeel bael ciq maoqhhae. 15 Ngael noteel'ae zonglmyeq gil biq mael laoq, noteel ngael zongl laoqmyel zongl yil maoqhhae lye kaollil. 16 Ngael aeqdilmyel noteel'ae geegaeq laeqngeel, yaqhacheqzaq e cholyaeq laoq hhaoqsongl'ae maeq hhae heeq jyeqli'ae, moqheilheil duyil e cholyaeq eiq yoqhhaeq'ae moqheilheil biq e qiq hhaeq'ae maeq hhae heeq jyeqli'ae. 17 Noteel silqinq xihael loq vae, kaol zongl yil kaollaoq, geeqlongq meeq vae. 18 Ngael gee e saeziq xihael laoq noteel gilzuqmyel cholyaeqhael'ae gee maeqngeel yil, ngael ngaeq lye saelpodu hhei e cholyaeqhael yaol loq lil, ngeelfeiq, suqhhaq taq'ae gee: 'Ngaeq e aelhoq mael zaeq e cholyaeq, aeqkeel maellye ngaeq'ae pye laq', xilmael peqlal maoqlye hhae. 19 Yaeqmeel, silqinq xilmael maq peqlal wae siq, ngael noteel'ae geegaeq laeqngeel, kaol aeqgael silqinq mael peqlal fu, noteel'ae 'ngael laoq tyutaeq'ae' lye bi xiangxinl maoq. 20 Ngael aeqdilmyel noteel'ae geegaeq laeqngeel, ngaeq lye moqheilheil duyil e qiq hhaeq'ae sheeqcaq biq laol, ngaeq'ae sheeqcaq ngeelvae; ngaeq'ae sheeqcaq e qiq hhaeq laoq, ngaeq yaol moqheilheil duyi e qiq hhaeq'ae sheeqcaq biq ngeelvae."
Yesu laoq aeqyoq yaol ongqzaeq maoqlye e qiq hhaeq zhol'ae lye gee
21 Yesu saeziq xihael gee hhei'laol, neemae nyuqsaeq biq'ae, kaol maeq geehhaq myel gee: "Ngael aeqdilmyel noteel'ae geegaeq laeqngeel, noteel onglci'ae ngaeq yaol yotyel maqdumyel ongqzaeq maoqlye e qiq hhaeq zhol'ae." 22 Laqcaqhael qiqhhaeq qiqhhaeq'ae chifu gil, yoqhhaeq aeqsul'ae gee hhae lye maeq loq gil biq'ae. 23 Laqcaqhael onglci'ae Yesu gaeq biq e qiq hhaeq, bilxyeqmyel Yesu e neeto oheiq'ae leeqmaoq yil aeqmyel zhol hhae. 24 Ximenq Biqdeq yoqhhaeq'ae Yesu gee e qiq hhaeq aeqsul maeq lye, naelhaeq biq lye zongl fu biq. 25 Tyulkaol, laqcaq tyutaeq Yesu e neeto oheiq'ae tongqmaoq yil, kaol yoqhhaeq'ae naelhaeq biq: "Hhaoqsongl o, aeqsul maeq?" 26 Yesu geehoq biq: "Ngael aqba qiq keiq mael zanl hheikaol, aeqsul'ae heilmoq hhei biq laol, aeqsul ngeelvae." Tyulkaol, yoqhhaeq aqba qiq keiq mael zanl da hheikaol Ja'lyul cholyaeq Ximenq e yaqyo Yoqdal'ae heilmoq hhei biq. 27 Yoqdal aqba mael heil pol hhei'laol, Saqdanl yoqhhaeq e neemae mael'ae do'li vae. Kaol Yesu yoqhhaeq'ae gee biq: "Nol haelzongl maoqlye mael, wae zongl yil aeqkaovae." 28 Aelhoq qiqgael zaeq gil e cholyaeqhael laoq, qiq hhaeq eiq Yesu aeqcheekaol Yoqdal'ae xilnye gee biq hhae lye maeq loq'ae. 29 Yoqdal laoq dyuqbaq palbye mael guanq e qiq hhaeq'ae, tyulkaol, cholyaeqhael laoq Yesu yoqhhaeq'ae zaeqnao mulyo e moqgoq bi vul yil, paelsilmyel moqgoq teel heil hheikaol, saeqyaeqhael'ae heilmoq yil biq lye moqheilheil biq hhae lye kei gil biq hhae. 30 Yoqdal aqba zaeq hhei'laol, nae'naemyel duyil vae; tyuqfu laoq mqkiq wae.
Qiqhhaeq qiqhhaeq'ae gaeq maoqhhae
31 Yoqdal duyil hhei aeqnaol, Yesu gee: "Yaeqmeel Cholyaeq Yaqyo laoq rongqyaol za vae, Momil eiq Cholyaeq Yaqyo ae'lye rongqyaol za vae, 32 Momil Cholyaeq Yaqyo ae'lye rongqyaol za kaollaoq, aeqyoyoq eiq Cholyaeq Yaqyo'ae rongqyaol biq, kaol nae'naemyel yoqhhaeq'ae rongqyaol biq. 33 Yaeqguqhael o, ngael noteel nyegael qiqgael baelzhol e naohaeq haeldyul maqza vae. Noteel ngaeq'ae saelpo maoqlye hhae, ngeelfeiq, ngael Yoqtail cholyaeqhael'ae gee gol biq laoqmyel, yaeqmeel eiq noteel'ae gee laeqngeel: 'Ngael yil maoqlye e milcaeq laoq, noteel maq hha yil'ae.' 34 Ngael noteel'ae minllinl yosheq qiq doq gee gil laeqngeel. Noteel laoq qiqhhaeq qiqhhaeq'ae gaeq maoqhhae; ngael noteel'ae haelmillye gaeq biq laol, noteel eiq tyulnye qiqhhaeq qiqhhaeq'ae gaeq biq maoqhhae. 35 Noteel qiqhhaeq qiqhhaeq'ae gaeq kaollaoq, cholyaeqhael noteel laoq ngaeq e laqcaq'ae lye loq wae."
Biqdeq Yesu yaol maeq loq yae lye gee maoqlye hhae
36 Ximenq Biqdeq Yesu'ae gee biq: "Hhaoqsongl o, nol haeqvae yil maoqlye laeq?" Yesu geehoq biq: "Ngael yil maoqlye e milcaeq vae, yaeqmeel nol ngaeq nyegael maeq hhae bal yi'ae, ngeelfeiq, aeqgael laoq nol ngaeq nyegael bal yi maoqlye hhae." 37 Biqdeq gee: "Hhaoqsongl o, ngael aeqcheekaol yaeqmeel noq nyegael maeq hhae bal yil hhaemaeq? Ngael noq gae'lye sil kaol'eiq hhaeq lil!" 38 Yesu gee: "Nol ngaeq gae'lye sil hhaeq lilmaeq? Ngael aeqdilmyel noq'ae geegaeq laeqngeel, haepyul maeq dyel lael laefuq'ae, nol ngaeq yaol maeq loq yae lye suq pu gee maoqlye hhae."