Yesu laoq gaelmae'ae, zhen'liq'ae kaol aeqyil'ae
14
"Noteel neemae haeq nyuqsaeq gil, noteel Momil'ae xiangxinl, ngaeq vae eiq xiangxinl maoqhhae. 2 Ngaedae toq'ae zholhhael zhee za'ae; maqza kaollaoq, ngael haeqfu'ae'lye noteel'ae geegaeq biq vae, ngael li mael laoq, noteel'ae zholhhael paeqgaelsael meeq deelhhei yil maoqlye kaollil. 3 Ngael noteel'ae zholhhael paeqgaelsael meeqyil biq kaollaoq, noteel yaol ngaeq tyuqvae bi lael maoqlye sheeq hoqyi laeqngeel, tyulnye laol, ngael haeqvae zhol laol, noteel eiq haeqvae zhol. 4 Ngael yil maoqlye e milcaeq laoq noteel loq'ae, gaelmae tyu qiq keel noteel eiq loq'ae." 5 Domaq gee: "Hhaoqsongl o, ngaeteel laoq nol haeqvae yil maoqlye hhae lye maeq loq yae, haelmillyekaol gaelmae tyulmael loq laeq?" 6 Yesu yoqhhaeq'ae gee biq: "Ngael laoq gaelmae lil, zhen'liq lil, kaol aeqyil lil, ngaeq ae'lye maeqngeel kaollaoq, qiq hhaeq eiq Aeqdae tyuqvae maeq keelli ongl'ae. 7 Noteel ngaeq yaol loq kaollaoq, ngaeq e Aeqdae yaol eiq loq'ae; saeq ae'lye aeqnaol laoq, noteel yoqhhaeq yaol loq'ae, kaol yoqhhaeq yaol mol vae."8 Fei'lil yoqhhaeq'ae gee biq: "Hhaoqsongl o, Aeqdae yaol ngaeteel'ae bi fu laeq laol, ngaeteel laoq zhee hhaeq yaevae." 9 Yesu yoqhhaeq'ae gee biq: "Fei'lil, ngael noteel nyegael xuldyulmyel baelzhol fu, nol laoq ngaeq yaol maeq loq laeq wae siq maeq? Ngaeq yaol mol hhei e cholyaeq laoq Aeqdae yaol mol hhei ngeelvae, nol laoq haelmillyekaol 'Aeqdae yaol ngaeteel'ae bi fu laeq' lye gee lilmaeq? 10 Nol laoq ngael Aeqdae onglci'ae zhol, Aeqdae laoq ngaeq e onglci'ae zhol hhae lye maeq xiangxinl laeq hhaemaeq? Ngael noteel'ae gee biq e saeziq mael, ngael aeqyoyoq gae'lye gee maeqngeel yil, ngaeq e onglci'ae zhol e Aeqdae aeqyoyoq haelzongl maoqlye mael zongl hhae. 11 Noteel laoq ngael Aeqdae onglci'ae zhol, Aeqdae ngaeq e onglci'ae zhol hhae lye xiangxinl maoqhhae; xilnye maeqngeel kaol'eiq, ngael haelzongl gae'lye ngaeq'ae xiangxinl maoqhhae. 12 Ngael aeqdilmyel noteel'ae geegaeq laeqngeel, ngael haelzongl mael laoq, ngaeq'ae xiangxinl e cholyaeq eiq zongl maoqlye hhae, kaol xihael taq'ae hhael heeq myel zongl maoqlye hhae, ngael ngaeq e Aeqdae tyuqvae li maoqlye kaollil. 13 Noteel ngaeq e cholmil maellye aeqchee saelzaeq feiq, ngael noteel'ae hhaeq'ae lye gee laeqngeel, xilnye laol, Aeqdae Yaqyo gae'lye rongqyaol za vae. 14 Noteel ngaeq e cholmil maellye ngaeq'ae aeqchee geezaeq laeq kaol'eiq, ngael aeqdilmyel hhaeq'ae lye gee laeqngeel.
Yesu laqcaqhael'ae senllinq mael biq laqngeel lye gee gil biq
15 "Noteel ngaeq'ae gaeq laeq kaollaoq, ngaeq e minllinl mael zongl gaeyil'ae. 16 Ngael Aeqdae'ae geezaeq biq laol, yoqhhaeq laoq noteel'ae baeqjyelboq e Baelzongl e Qiqhhaeq biq hhei laq'ae, xilnye laol, yoqhhaeq noteel nyegael haeqfu keellye qiqgael baelzhol'ae. 17 Baelzongl e xitaeq laoq zhen'liq e yohael ngeelvae, milcaeq taq e cholyaeqhael yoqhhaeq yaol maeq mol congl biq, yoqhhaeq yaol maeq siqcongl biq, tyulkaol, yoqhhaeq'ae maq jyeqshel nae'ae. Ngeelfeiq, noteel laoq yoqhhaeq yaol loq'ae, yoqhhaeq laoq noteel nyegael qiqgael baelzhol'ae, kaol noteel onglci'ae zhol maoqlye kaol'ae. 18 Ngael noteel yaol maeq beiqdeelsaeq yil, kaol molchiq chiqyaeq maeq bi geiq yil, ngael noteel saeqvae hoq keellael maoqlye lil. 19 Haeldyul maeqngeel laol, milcaeq taq e cholyaeqhael ngaeq yaol maeq hhae mol wae, ngeelfeiq, noteel laoq ngaeq yaol hhae mol'ae, ngael laoq dyeqdeel lil, kaol noteel eiq dyeqdeel maoqlye kaol'ae. 20 Tyu qiq nao, noteel laoq ngael Aeqdae e onglci'ae zhol, noteel laoq ngaeq e onglci'ae zhol, ngael eiq noteel onglci'ae zhol hhae lye hhae loq'ae. 21 Ngaeq e minllinl mael naelhaeq do hheikaol zongl gaeyil e cholyaeq laoq, ngaeq'ae gaeq laeq e cholyaeq ngeelvae; ngaeq'ae gaeq laeq e cholyaeq laoq, ngaeq e Aeqdae yoqhhaeq'ae gaeq biq maoqlye hhae, ngael eiq yoqhhaeq'ae gaeq biq maoq, kaol ngaeq yaol yoqhhaeq'ae bi mol hhei maoq." 22 Yoqdal (Ja'lyul cholyaeq Yoqdal'ae gee maeqngeel'ae) Yesu'ae naelhaeq biq: "Hhaoqsongl o, nol aeqcheekaol noq yaol ngaeteel'ae bi mol laeq dyul maoqlaol, milcaeq taq e cholyaeqhael'ae laoq maeq bi mol lilmaeq?" 23 Yesu geehoq biq: "Aeqsul ngaeq'ae gaeq laeq laol, ngael gee e saeziq mael zongl gaeyil'ae, kaol ngaeq e Aeqdae eiq yoqhhaeq'ae gaeq biq'ae, kaol ngaeteel laoq yoqhhaeq e tyuqvae keelli maoqlye lil, kaol yoqhhaeq nyegael qiqgael baelzhol. 24 Ngaeq'ae maeq gaeq e cholyaeq laoq, ngael gee e saeziq mael maeq zongl gaeyil'ae. Noteel haelgaeq e saeziq mael ngaeq e saeziq maeqngeel'ae, ngaeq yaol moqheilheil duyi laq e Aeqdae e saeziq'ae.
25 Ngael noteel nyegael qiqgael baelzhol siq fu, noteel'ae silqinq xihael geedu biq wae. 26 Ngeelfeiq, Baelzongl e Qiqhhaeq laoq, Aeqdae lye ngaeq e cholmil gae'lye moqheilheil duyi e senllinq mael ngeelvae, yoqhhaeq gilzuqmyel noteel'ae geemyeq laeq maoqlye hhae, kaol noteel'ae ngaeq lye haelgee gol biq e saeziq mael, noteel'ae bi nyuq tullaeq laeq'ae. 27 Ngael noteel'ae neesaelhhae mael heildeelsaeq biq, ngael ngaeq e neesaelhhae mael noteel'ae biq biq; ngaeq lye noteel'ae biq biq mael laoq, milcaeq taq e cholyaeqhael biq laoqmyel maeqngeel'ae. Noteel e neemae mael haeq nyuqsaeq, gu eiq haq gu gil. 28 Noteel laoq ngael noteel'ae gee gol biq mael gaeq gol vae: 'Ngael yil hhei, ngeelfeiq, ngael noteel saeqvae hoqlal maoq siq.' Noteel ngaeq'ae gaeq laeq kaollaoq, hhaol maoqhhae, ngael Aeqdae tyuqvae yil, Aeqdae laoq ngaeq taq'ae hhael heeq kaol'ae. 29 Yaeqmeel laoq peqlal maoqlye e silqinq mael maq peqlal wae siq, ngeelfeiq, ngael noteel'ae geedu biq wae, xilnye laol, peqlal maoqlye e silqinq mael peqlal fu noteel hhae xiangxinl'ae. 30 Ngael noteel'ae haelnaeqmyel maeq geegaeq vae, milcaeq xilmael taq e cholyaeqhael'ae guanq e tyutaeq lael maoqlye kaol'ae; yoqhhaeq ngaeq e aeqhhaol taq'ae qiqgiq laqtaq maqza'ae. 31 Ngeelfeiq, xihael laoq milcaeq taq e cholyaeqhael'ae ngael laoq Aeqdae'ae gaeq biq'ae lye bi loq maoq, kaol Aeqdae ngaeq'ae haelmillye minllinl laeq laol, ngael laoq haelmillye zongl'ae lye bi loq maoq. Tullael, aedeeteel deel gil o!"