Yesu laoq aeqdilmyel siqbaq aelbol'ae
15
"Ngael laoq aeqdilmyel siqbaq aelbol lil, ngaedae laoq til heeq e cholyaeq'ae. 2 Ngaeq hhae lye e aelsiq maeq siq e allaqhael laoq, yoqhhaeq lye noga hhei; aelsiq hael siq lael hael laoq, yoqhhaeq lye sholgaqlye noshoq biq, kaol allaq mael'ae aelsiq hhael bi siq lael. 3 Yaeqmeel noteel laoq ngaeq lye noteel'ae geegaeq gil biq e saeziq gae'lye shol vae. 4 Noteel laoq duqlye ngaeq e onglci'ae zhol maoqhhae, kaol ngael eiq duqlye noteel onglci'ae zhol lil. Allaq mael siqbaq aelbol mael'ae maq laq kaollaoq, aeqyoyoq laoq aelsiq maeq siq laelkiq'ae; noteel ngaeq e onglci'ae maeq zhol kaollaoq, noteel eiq xilnye ngeelvae. 5 Ngael laoq siqbaq aelbol lil, noteel laoq allaq'ae. Ngaeq e onglci'ae zhol hael laoq, ngael eiq yoqhhaeq e onglci'ae zhol lil, kaol yoqhhaeq haelnaeqmyel aelsiq siq du hhei; ngaeq ae'lye deelsae hhei kaollaoq, noteel qiqgiq maeq zongl ongl kaol'ae. 6 Cholyaeq ngaeq e onglci'ae maeq zhol kaollaoq, allaq mael nildu'ae beiq deelhhei kaol gee yil hhei laoqmyel hhae, kaol cholyaeqhael lye o hheikaol aeqzaeq mael'ae beiq pe hhei. 7 Noteel ngaeq e onglci'ae zhol kaollaoq, ngaeq e saeziq mael eiq noteel onglci'ae zadeel'ae; noteel aeqchee mulgoq, kaol geezaeq laol noteel'ae hhaeq'ae lye gee laeqngeel. 8 Xilnye laol, noteel aelsiq haelnaeqmyel siq du hhei, ngaedae laoq xilmael gae'lye rongqyaol za vae, noteel eiq ngaeq e laqcaq ngeelvae. 9 Aeqdae ngaeq'ae haelmillye gaeq laeq laol, ngael eiq noteel'ae haelmillye gaeq lil; noteel duqlye ngaeq e gaeq mael onglci'ae zhol maoqhhae. 10 Ngael ngaedae e minllinl mael zongl gaeyil, kaol duqlye yoqhhaeq e gaeq mael onglci'ae zhol laoqmyel, noteel ngaeq e minllinl mael zongl gaeyil kaollaoq, duqlye ngaeq e gaeq mael onglci'ae hhae zhol wae.11 "Ngaeq lye silqinq xihael noteel'ae geegaeq hhei biq mael laoq, ngaeq e hhaol mael noteel e neemae onglci'ae bi za, kaol noteel'ae hhaol mael bong'lye bi za maoqlye lil. 12 Noteel laoq ngael noteel'ae gaeq biq laoqmyel, qiqhhaeq qiqhhaeq'ae gaeq maoqhhae, xilmael laoq ngaeq e minllinl mael'ae. 13 Cholyaeq laoq yelchoq gae'lye sil hhei, cholyaeq e neegaeqgaeq mael laoq xilmael taq'ae hhael heeq myel maqza vae. 14 Noteel laoq ngael noteel'ae minllinl biq mael laoqmyel zongl yil kaollaoq, ngaeq e yelchoq ngeelvae. 15 Ngael laoq noteel'ae yaqhacheqzaq e cholyaeq lye maeq gul vae, yaqhacheqzaq e cholyaeq laoq hhaoqsongl haelzongl e silqinq mael maeq loq kaol'ae; ngael noteel'ae yelchoq lye gul wae, kaol ngael ngaedae tyuqvae lye gilzuqmyel haelgaeq hael laoq, gilzuqmyel noteel'ae geegaeq biq vae kaol'ae. 16 Noteel lye ngaeq yaol saelpodu hhei maeqngeel'ae, ngaeq lye noteel yaol saelpodu hhei lil, kaol noteel yaol moqheilheil du hheikaol aelsiq bi siq yil, kaol noteel e aelsiq mael haeqfu eiq bi zadeel maoq, xilnye laol, noteel ngaeq e cholmil maellye Aeqdae'ae aeqchee geezaeq biq kaol'eiq, yoqhhaeq noteel'ae biq laq'ae. 17 Ngael noteel'ae xilnye minllinl biq mael laoq, noteel yaol qiqhhaeq qiqhhaeq'ae bi gaeq maoqlye lil.
Cholyaeqhael Hhaoqsongl kaol laqcaqhael'ae neemasu biq hhae
18 Milcaeq taq e cholyaeqhael noteel'ae neemasu zaq laq kaollaoq, noteel laoq yoqhhaeteel noteel'ae neemasu zaq laefuq'ae lye, ngaeq'ae neemasu zaq wae lye loq maoqhhae. 19 Noteel laoq milcaeq taq ae'lye lael kaollaoq, milcaeq taq e cholyaeqhael laoq aeqyoteel laoqmyel cholyaeqhael'ae gaeq biq hhae; ngeelfeiq, noteel laoq milcaeq taq ae'lye lael maeqngeel'ae, kaol ngaeq lye noteel yaol milcaeq taq ae'lye saelpodu hhei lil, tyulkaol, milcaeq taq e cholyaeqhael laoq noteel'ae neemasu biq hhae. 20 Noteel laoq ngael noteel'ae gee gol biq e saeziq mael nyuqdeel maoqhhae: 'Yaqhacheqzaq e cholyaeq laoq Hhaoqsongl'ae maeq hhae heeq jyeqli'ae.' Yoqhhaeteel ngaeq'ae guaeq'ei diqqye laq kaollaoq, noteel vae eiq aeqdilmyel guaeq'ei hhae bi diqqye hhae; kaol yoqhhaeteel ngaeq e saeziq mael zongl gaeyil kaollaoq, noteel e saeziq mael eiq zongl gaeyil'ae. 21 Ngeelfeiq, yoqhhaeteel ngaeq e cholmil gae'lye, noteel'ae xilnye zongl laeq maoqlye hhae, yoqhhaeteel laoq ngaeq yaol moqheilheil duyi laq e tyutaeq'ae maeq loq biq kaol'ae. 22 Ngael yoqhhaeteel'ae qiqgiq maeq geemyeq lael gol biq kaollaoq, yoqhhaeteel laoq golsiq maqza'ae; ngeelfeiq, yaeqmeel yoqhhaeteel e golsiq mael maqza'ae lye maeq hhae gee vae. 23 Ngaeq'ae neemasu zaq e cholyaeq laoq, ngaedae vae eiq neemasu zaq ngeelvae. 24 Ngael yoqhhaeteel onglci'ae ochoq maeq zongl gol e silqinq mael maeq zongl gol kaollaoq, yoqhhaeteel laoq golsiq maqza vae; ngeelfeiq, yaeqmeel yoqhhaeteel ngael haelzonglhael mol aeqwae, kaol ngaedae kaol ngaeq'ae neemasu zaq gil laq hhae. 25 Xilmael laoq yoqhhaeteel e lilfaq taq'ae cu deelhhei mael peqlal hhae: 'Yoqhhaeteel ngaeq'ae qiqgiq'ae lye maqza myel neemasu zaq laq hhae.'
26 "Ngeelfeiq, ngael ngaedae tyuqvae lye noteel'ae Baelzongl e Qiqhhaeq yaol moqheilheil du hhei maoq, Baelzongl e xitaeq laoq, Aeqdae tyuqvae lye lael e zhen'liq e yohael ngeelvae, yoqhhaeq keellael fu laoq, ngaeq gae'lye zoqzenlkei laeq maoqlye hhae. 27 Kaol noteel eiq zoqzenlkei maoqhhae, noteel zhoqmyel fu ae'lye ngaeq nyegael qiqgael baelzhol kaol'ae."