16
"Ngaeq lye noteel'ae silqinq xihael geegaeq hhei biq mael laoq, noteel yaol maeq bi jye'leeq lye lil. 2 Cholyaeqhael lye noteel yaol huiltangq vae lye lyeqdu maoqlye hhae; naohaeq keellael laol, noteel yaol xyeq maoqlye e cholyaeqhael laoq, xilnye zongl mael laoq Momil'ae heel lil lye kei biq hhae. 3 Yoqhhaeteel xihael zongl maoqlye mael laoq, Aeqdae'ae maeq siqcongl biq, ngaeq vae eiq maeq siqcongl biq kaol'ae. 4 Ngaeq lye noteel'ae silqinq xihael geegaeq gil biq mael laoq, yoqhhaeteel silqinq xihael zongl fu, ngael noteel'ae aeqchee geegaeq gol laq hhae lye mael bi nyuq tullaeq maoqlye lil."Senllinq e mulhhael
"Zhoqmyel fu, ngael noteel'ae silqinq xihael maeq geegaeq mael laoq, ngael noteel nyegael qiqgael baelzhol kaol'ae. 5 Ngael yaeqmeel laoq ngaeq yaol moqheilheil duyi laq e tyutaeq zael'ae li maoq, ngeelfeiq, noteel onglci'ae 'nol haeqvae li maoq maeq' lye qiq hhaeq eiq maeq naelhaeq laeq'ae. 6 Ngeelfeiq, ngaeq lye noteel'ae silqinq xihael geegaeq hhei biq gae'lye, noteel e neemae mael zhee nyuqsaeq biq hhae. 7 Ngeelfeiq, ngaeq lye aeqdilmyel e silqinq mael noteel'ae geegaeq hhei biq, ngael li mael laoq noteel'ae meeqyo'lael hhae. Ngael maeq li kaollaoq, Baelzongl e Qiqhhaeq noteel e saeqvae maeq lael kiq'ae; ngael li kaollaoq, yoqhhaeq yaol noteel saeqvae moqheilheil du hhei maoq. 8 Kaol yoqhhaeq lael laol, golsiq mael taq'ae haoq, gongyil mael taq'ae haoq kaol shenqpanl mael taq'ae haoq, milcaeq taq e cholyaeqhael gilzuqmyel ba hhae lye zenlminq du hhei maoqlye hhae. 9 Golsiq mael'ae gee'li'laol, yoqhhaeteel ngaeq'ae maeq xiangxinl laeq kaol'ae; 10 Gongyil mael'ae gee'li'laol, ngael Aeqdae tyuqvae li, kaol noteel ngaeq'ae qiqzael eiq maeq hhae mol vae kaol'ae; 11 Shenqpanl mael'ae gee'li'laol, milcaeq taq'ae guanq e tyutaeq'ae shenqpanl biq vae kaol'ae.
12 Ngael noteel'ae geegaeq maoq e silqinq zhee za wae siq, ngeelfeiq, yaeqmeel noteel maeq pityeq ongl vae; 13 Ngeelfeiq, zhen'liq e yohael lael fu, yoqhhaeq noteel yaol gilzuqmyel zhen'liq vae sheeqmyeq do laqngeel lye hhae. Yoqhhaeq laoq aeqyoyoq gae'lye saeziq gee maeqngeel'ae, yoqhhaeq gaeq gol e saeziq mael gilzuqmyel geedu hhei hhae, kaol aeqgael peqlal maoqlye e silqinq mael noteel'ae geegaeq laeqngeel lye hhae. 14 Yoqhhaeq ngaeq e saeqvae lye haelgaeq mael noteel'ae geegaeq maoqlye hhae, tyulkaol, yoqhhaeq ngaeq'ae rongqyaol maoqlye hhae. 15 Aeqdae'ae halzahael laoq gilzuqmyel ngaeq e ngeelvae, tyulkaol, ngael gee: "Yoqhhaeq ngaeq e saeqvae lye haelgaeq mael noteel'ae geegaeq maoqlye hhae."
Noteel e nyuqsaeq mael hhaol e peqlal
16 Haeldyul maeqngeel laol, noteel ngaeq yaol maeq hhae mol wae; ngeelfeiq, zail haeldyul maeqngeel laol, noteel ngaeq yaol mol maoqlye wae siq." 17 Tyulnye laol, yoqhhaeq e laqcaqhael onglci e qiqniq nulhhaeq hhaellaelmyel gee: "Yoqhhaeq ngaeteel'ae gee laeq: 'Haeldyul maeqngeel laol, noteel ngaeq yaol maeq hhae mol wae; ngeelfeiq, zail haeldyul maeqngeel laol, noteel ngaeq yaol mol maoqlye wae siq.' Yol gee: 'Ngael Aeqdae tyuqvae li maoqlye kaol'ae.' Xilmael laoq aeqchee yilsi maeq?" 18 Yoqhhaeteel yol gee: "Yoqhhaeq gee e 'Haeldyul maeqngeel laol' lye mael aeqchee yilsi maeq? Ngaeteel laoq yoqhhaeq aeqchee gee hhae lye maeq loq yae." 19 Yesu laoq yoqhhaeteel yoqhhaeq'ae naelhaeq goq biq hhae lye loq'ae, kaol gee: "Ngael gee e 'Haeldyul maeqngeel laol, noteel ngaeq yaol maeq hhae mol wae; zail haeldyul maeqngeel laol, noteel ngaeq yaol mol maoqlye wae siq', noteel laoq saeziq xihael gae'lye qiqhhaeq qiqhhaeq'ae naelhaeq gil lilmaeq? 20 Ngael laoq noteel'ae aeqdilmyel geegaeq laeqngeel, aeqgael noteel laoq nyul, kaol nyul sil maoqmyel nyul maoqlye hhae, ngeelfeiq, milcaeq taq e cholyaeqhael laoq hhaol gil maoqlye hhae; noteel laoq nyuqsaeq maoqlye hhae, ngeelfeiq, noteel e nyuqsaeq mael laoq hhaol mael peqlal maoqlye hhae. 21 Cholhae aeqmae yaeqguq bo fu zhee nael hhae, yoqhhaeq yaeqguq bo e naohaeq keellael vae kaol'ae; ngeelfeiq, yaeqguq bo hhei'laol, nael e tyulmael laoq yelbael hhei vae, yaeqguq qiq hhaeq milcaeq taq'ae dyeqlal vae lye hhaol kaol'ae. 22 Yaeqmeel noteel eiq nyuqsaeq hhae; ngeelfeiq, ngael noteel yaol mol maoq siq, kaol noteel e neemae mael hhaol hhae, noteel e hhaol mael laoq cholyaeq maeq diqkoqzaeq yil ongl'ae. 23 Tyu qiq nao, noteel laoq ngaeq'ae qiqgiq eiq maeq naelhaeq laeq wae. Ngael laoq aeqdilmyel noteel'ae geegaeq laeqngeel, noteel laoq ngaeq e cholmil maellye aeqdae'ae aeqchee geezaeq biq laol, yoqhhaeq laoq noteel'ae biq laq'ae. 24 Noteel ngaeq e cholmil maellye qiqzael eiq qiqgiq maeq geezaeq; yaeqmeel noteel geezaeq laol, hhae'lael wae, tyulnye laol, noteel e hhaol mael neemae onglci'ae bong'lye bi za.
Yesu laoq milcaeq taq hael'ae jyeqli wae
25 "Ngael laoq dullaelmyel guqjin maellye noteel'ae xihael gee biq, naohaeq keellael fu, ngael laoq dullaelmyel guqjin maellye noteel'ae maeq gee vae, ngeelfeiq, Aeqdae yaol noteel'ae maeq geehhaq myel geegaeq laeqngeel. 26 Tyu qiq nao, noteel ngaeq e cholmil maellye geezaeq; ngeelfeiq, ngael gee mael laoq, noteel gae'lye Aeqdae'ae bael naelhaeq biq maoqlye maeqngeel yil; 27 Aeqdae aeqyoyoq noteel'ae gaeq biq hhae, noteel ngaeq'ae gaeq laeq, kaol ngael Momil tyuqvae lye lael hhae lye xiangxinl kaol'ae. 28 Ngael Aeqdae tyuqvae lye lael, kaol milcaeq taq'ae keellael; ngael milcaeq taq ae'lye yol deelsae hhei, kaol Aeqdae tyuqvae li maoq." 29 Laqcaqhael gee: "Nol fu, yaeqmeel nol laoq maeq geehhaq myel gee, kaol dullaelmyel guqjin maellye maeq gee vae. 30 Yaeqmeel ngaeteel laoq nol aeqchee silqinq eiq loq'ae lye loq wae, kaol cholyaeq noq'ae maeq naelhaeq biq kael vae, tyulkaol, ngaeteel laoq nol Momil tyuqvae lye lael hhae lye xiangxinl lil." 31 Yesu yoqhhaeteel'ae gee biq: "Yaeqmeel noteel xiangxinl lilmaeq? 32 Naelhaeq gil, naohaeq keellael goqbiq vae, qiqshiq laoq keellael wae, noteel qiqgael'ae qiqmiq qiqmiq lye yil maoqhhae, kaol aeqyoyoq laoq aeqyoyoq e milcaeq vae hoqyil, kaol ngael qiq hhaeq maoq maeq zholdeelsaeq. Ngeelfeiq, ngael qiq hhaeq myel maeqngeel yil, Aeqdae ngaeq nyegael baelzhol kaol'ae. 33 Ngael noteel'ae silqinq xihael geegaeq mael laoq, noteel yaol ngaeq e onglci'ae neesael bi hhae maoqlye lil. Noteel milcaeq taq'ae zhol fu kuqnanl hhae pi hhae; ngeelfeiq, noteel maq zoqgiq kael, ngael milcaeq taq hael'ae jyeqli aeqwae."