Yesu laqcaqhael'ae heeldoq bael gee biq
17
Yesu saeziq xihael gee byel hhei'laol, vuqduq baqtul hheikaol mqmae'ae chifu, kaol gee: "Aeqdae o, naohaeq keellael vae, nol noq e Yaqyo'ae rongqyaol laeq, kaol Yaqyo eiq noq'ae bi rongqyaol lye nyuqlil, 2 Noq lye ruqtiq za e cholyaeqhael'ae guanqliq e laqtaq mael yoqhhaeq'ae biq hhei biq'ae, kaol yoqhhaeq lye haeqfu eiq zadeel e aeqyil mael, noq lye yoqhhaeq'ae hal biq hhei biq e cholyaeqhael'ae bi biq hhei. 3 Cholyaeq laoq nol aeqdilmyel Momil qiq hhaeq wae lye siqcongl'ae, kaol noq lye moqheilheil du hhei e Yesu Jidu yaol eiq siqcongl kaollaoq, yoqhhaeteel laoq haeqfu eiq zadeel e aeqyil mael za wae. 4 Ngael laoq milcaeq taq vae noq'ae rongqyaol biq wae, kaol noq lye ngaeq'ae mulhhael zongl yil lye gee laeq mael, ngael zonglbyel aeqwae. 5 Aeqdae o, yaeqmeel ngaeq yaol noq e yiqsi'ae rongqyaol bi za laq, rongqyael xilmael laoq, mqmae milcaeq zonglbeibei du hhei laefuq'ae, ngael noq nyegael hhaellaelmyel za e rongqyaol mael ngeelvae.6 "Noq lye ngaeq'ae biq hhei laq e milcaeq taq ae'lye saelpodu hhei e cholyaeqhael'ae, ngaeq lye noq e cholmil mael yoqhhaeteel'ae bi loq wae. Yoqhhaeteel laoq noq e ngeelvae, kaol noq lye yoqhhaeteel yaol ngaeq'ae biq hhei laq, kaol yoqhhaeteel eiq noq e saeziq mael zongl gaeyil vae. 7 Yaeqmeel yoqhhaeteel laoq noq lye ngaeq'ae hal biq hhei laq hael laoq, gilzuqmyel noq e tyuqvae lye lael hhae lye loq'ae; 8 Noq lye ngaeq'ae biq hhei laq e saeziq mael, ngaeq lye yoqhhaeteel'ae biq hhei biq wae, kaol yoqhhaeteel eiq odozaq hhei vae, kaol ngael laoq noq e tyuqvae lye lael hhae lye loq'ae, kaol noq lye ngaeq yaol moqheilheil du hhei hhae lye xiangxinl kaol'ae. 9 Ngael yoqhhaeteel gae'lye geezaeq lil; milcaeq taq e cholyaeqhael gae'lye geezaeq maeqngeel yil, ngeelfeiq, noq lye ngaeq'ae biq hhei laq e cholyaeqhael gae'lye geezaeq lil, yoqhhaeteel laoq noq e kaol'ae. 10 Ngaeq e halzahael laoq gilzuqmyel noq e ngeelvae, noq e halzahael eiq ngaeq e ngeelvae, kaol ngael yoqhhaeteel gae'lye rongqyaol za vae. 11 Ngael saeqvae milcaeq taq'ae maeq zhol vae, ngeelfeiq, yoqhhaeteel laoq milcaeq taq'ae zhol hhae, ngael noq e tyuqvae lael maoq. Senljyeq Aeqdae o, noq lye ngaeq'ae biq laq e cholmil gae'lye, yoqhhaeteel'ae fupol biq lye geezaeq lil, kaol yoqhhaeteel'ae aedeeteel laoqmyel qiqsheel e neemae bi za. 12 Ngael yoqhhaeteel nyegael qiqgael zhol fu, noq lye ngaeq'ae biq hhei laq e cholmil gae'lye, ngael yoqhhaeteel'ae fupol biq, kaol yoqhhaeteel'ae ocongq biq wae; yoqhhaeteel onglci'ae myeyil e cholyaeq tyuhael maoqlaol, qiq hhaeq eiq maq myeyil'ae, xilmael laoq Momil e Suqhhaq taq'ae gee e saeziq mael peqlal vae. 13 Yaeqmeel ngael noq e tyuqvae yil maoq, ngael milcaeq taq'ae saeziq xihael gee mael laoq, yoqhhaeteel e neemae onglci'ae ngaeq e hhaol mael bong'lye bi za maoqlye lil. 14 Ngaeq lye noq e saeziq mael yoqhhaeteel'ae biq biq wae; kaol cholyaeqhael yoqhhaeteel'ae neemasu zaq biq hhae, ngael milcaeq xilmael taq ae'lye lael maeqngeel laoqmyel, yoqhhaeteel eiq milcaeq xilmael taq ae'lye lael maeqngeel kaol'ae. 15 Ngael noq'ae yoqhhaeteel yaol milcaeq taq ae'lye bi deelsae hhei lye maeq geezaeq yil, nol yoqhhaeteel yaol duqlaq e tyutaeq'ae haeq bi niqli myel fupol biq lye geezaeq lil. 16 Ngael milcaeq xilmael taq ae'lye lael maeqngeel laoqmyel, yoqhhaeteel eiq milcaeq xilmael taq ae'lye lael maeqngeel'ae. 17 Nol zhen'liq maellye yoqhhaeteel'ae senljyeq wae lye bi peqlal lye geezaeq lil; noq e saeziq laoq zhen'liq'ae. 18 Nol ngaeq yaol milcaeq taq'ae haelmillye moqheilheil duyi laq laol, ngael eiq yoqhhaeteel yaol milcaeq taq'ae haelmillye moqheilheil duyil biq maoq. 19 Ngael yoqhhaeteel gae'lye aeqyoyoq yaol zonglqyel du hheikaol senljyeq wae lye geiq mael laoq, yoqhhaeteel yaol eiq zhen'liq gae'lye senljyeq wae lye bi peqlal maoqlye lil.
20 "Ngael yoqhhaeteel'ae heeldoq bael gee biq dyul maeqcil, yoqhhaeteel gee e saeziq ae'lye ngaeq'ae xiangxinl e cholyaeqhael vae eiq heeldoq bael gee biq lil, 21 Kaol yoqhhaeteel'ae qiqsheel e neemae bi za. Aeqdae nol ngaeq e onglci'ae zhol, ngael noq e onglci'ae zhol laoqmyel, yoqhhaeteel yaol eiq aedeeteel onglci'ae bi zhol, tyulnye laol, milcaeq taq e cholyaeqhael'ae noq lye ngaeq yaol moqheilheil duyi laq hhae lye bi xiangxinl. 22 Noq lye ngaeq'ae biq hhei laq e rongqyaol mael, ngaeq lye yoqhhaeteel'ae biq hhei biq wae, kaol aedeeteel qiqsheel e neemae za laoqmyel, yoqhhaeteel'ae qiqsheel e neemae bi za maoqhhae. 23 Ngael yoqhhaeteel onglci'ae zhol, nol ngaeq e onglci'ae zhol, kaol yoqhhaeteel yaol qiqgiq geehhael maqza myel qiqsheel e neemae bi za, kaol milcaeq taq e cholyaeqhael'ae noq lye ngaeq yaol moqheilheil duyi hhae lye bi loq, kaol yoqhhaeteel eiq nol yoqhhaeteel'ae gaeq biq mael ngaeq'ae gaeq laeq laoqmyel hhae lye bi loq. 24 Aeqdae o, ngael haeqvae zhol laol, noq lye ngaeq'ae biq hhei laq e cholyaeqhael eiq ngaeq nyegael tyuqvae qiqgael bi baelzhol laeq, kaol yoqhhaeteel'ae noq lye ngaeq'ae biq hhei laq e rongqyaol mael mol hhei biq lye nyuqlil, mqmae milcaeq zonglbeibei du hhei laefuq'ae, nol laoq ngaeq'ae gaeq laeq vae kaol'ae. 25 Gongyil e Aeqdae o, milcaeq taq e cholyaeqhael laoq noq yaol maeq siqcongl'ae, ngeelfeiq, ngael laoq noq yaol siqcongl lil, cholyaeq xihael eiq noq lye ngaeq yaol moqheilheil duyi hhae lye loq'ae. 26 Ngaeq lye noq e cholmil mael yoqhhaeteel'ae bi siqcongl wae, kaol zail bi siqcongl maoq siq, kaol nol ngaeq'ae gaeq laeq e gaeq mael yoqhhaeteel onglci'ae bi za, kaol ngael eiq yoqhhaeteel onglci'ae zhol."