Cholyaeq qiq miq Yesu yaol xyeq maoqlye nyuq'ae
22
Paofenq Maqzoq Zaeqnao laoq Yuq'yeqjyeq'ae gee hhae, zaeqnao xilmael keellael goqbiq vae. 2 Jilsizhangqhael kaol Momil e saeziq mael loq e laqkiqhael Yesu yaol haelmillye hha xyeq congl maeq lye zongl gil hhae; yoqhhaeteel cholyaeqhael'ae gu biq hhae. 3 Tyuqfu, Saqdanl laoq Ja'lyul cholyaeq Yoqdal lye gul biq e qiq hhaeq e neemae'ae do'li aeqwae, Yoqdal xitaeq laoq shiqtuq qyelniq hhaeq onglci e qiq hhaeq'ae. 4 Yoqhhaeq jilsizhangqhael kaol sholhaol'ae fu'qyezaq e zhiqmoqhael zael'ae yil vae, kaol yoqhhaeteel nyegael Yesu yaol haelmillye yotyel maqdumyel ongqzaeq biq maoqlye geedazaq gil'ae. 5 Yoqhhaeteel zhee hhaol gil biq'ae, kaol Yoqdal'ae dyuqbaq heil laeqngeel lye gee biq. 6 Yoqhhaeq hhaeq'ae lye gee vae, kaol zhoqmyel haeqfu hhael zae'li kiq'ae maeq lye fu'ae, cholyaeqhael Yesu nyegael maeq baelzhol fu, Yesu yaol yoqhhaeteel'ae eemoq biq maoqlye zongl hhae.Yuq'yeqjyeq e aelhoq paeqgaelsael meeq deelhhei
7 Paofenq Maqzoq Zaeqnao keellael vae, xi qiq nao laoq cholyaeqhael aeqdilmyel Yuq'yeqjyeq e aeqyol yolyaeq xyeq maoqhhae. 8 Yesu lye Biqdeq kaol Yoqhanl yaol moqheilheil du hhei, gee: "Noteel laefuqmyel aedeeteel'ae Yuq'yeqjyeq mqkiq e aelhoq mael paeqgaelsael meeq deelhhei yil gil laeq, tyulnye laol, aedeeteel hhae zaeq aeqwae." 9 Yoqhhaeteel gee: "Nol ngaeteel yaol haeqvae paeqgaelsael meeq deelhhei yil lye nyuq lilmaeq?" 10 Yoqhhaeq gee: "Naelhaeq, noteel milmae heeqmyel vae do'li fu, cholyaeq qiq hhaeq eelcuq qiq buqyaeq baq hheikaol noteel yiqsiboq'ae deel laeq'ae, kaol noteel yoqhhaeq'ae cho'lyeq li gil, kaol yoqhhaeq do'li e toq'ae bael do'li gil. 11 Noteel tyutoq e hhaoqsongl'ae gee gil biq: 'Laoqsi noq'ae naelhaeq: ''Tangq'oxin mael haeqvae za hhaemaeq? Ngael kaol ngaeq e laqcaqhael tyuqvae Yuq'yeqjyeq e mqkiq e aelhoq zaeq maoq yae.'" 12 Yoqhhaeq noteel'ae haoqtaq'ae pasael deelhhei myel haeqheemyel qiq ssul tyuqmyeq laeq'ae, tyuqvae aeqchee mulyo e moqgoqhael eiq za vae, tyulkaol, noteel tyuqvae paeqgaelsael meeq deelhhei gil." 13 Yoqhhaeteel duyil vae. Yoqhhaeteel haelmol mael Yesu haelgee laoqmyel hhae, kaol yoqhhaeteel Yuq'yeqjyeq mqkiq e aelhoq mael paeqgaelsael meeq vae.
Aeqnaol naolli e mqkiq e aelhoq
14 Naohaeq keellael fu, Yesu kaol shiqtuqhael aelhoq qiqgael zaeq gil'ae. 15 Yesu yoqhhaeteel'ae gee biq: "Ngael laoq ngael hhae shelkuq e laefuq'ae, noteel nyegael Yuq'yeqjyeq mqkiq e aelhoq qiqgael zaeq maoqlye haeqfu'ae'lye xilnye nyuq laeq wae. 16 Ngael noteel'ae geegaeq laeqngeel, Momil milcaeq taq'ae zongmae geiq fu maoqlaol, ngael aeqdilmyel xilmael laoqmyel e mqkiq e aelhoq mael maeq zaeq vae." 17 Yesu beiziq mael heil pol hhei, Momil'ae meeqyaevae lye gee hhei'laol, gee: "Noteel beiziq mael baq hhei kaol byel dol gil. 18 Ngael noteel'ae geegaeq laeqngeel, yaeqnao ae'lye aeqnaol laoq, Momil e Goqja keellael fu maoqlaol, ngael aeqdilmyel siqbaq zilbaeq maeq dol vae." 19 Yesu aqba mael heilqei hhei, Momil'ae meeqyaevae lye gee hhei'laol, aqba mael heiqpa hheikaol laqcaqhael'ae heilmoq hhei biq, gee: "Xilmael laoq ngaeq e aeqhhaol'ae, noteel yaol bi deqjiul maoqlye gae'lye heelda hhei aeqlil; noteel xilnye zongl mael laoq, ngaeq yaol nyuqdeel maoqlye hhae." 20 Aelhoq zaeqdye aeqnaol, yoqhhaeq laefuq laoqmyel beiziq mael baqqei hheikaol, gee: "Beiziq xilmael onglci e siqbaq zilbaeq mael laoq, ngaeq e siq maellye zongltul hhei e geemeeq deelhhei yosheq'ae, siq xilmael noteel gae'lye yul duyi aeqlil.
21 Naelhaeq gil, ngaeq yaol yotyel maqdumyel ongqzaeq e qiq hhaeq laoq, ngaeq nyegael zaelzhee qiq zhee'ae zhol hhae. 22 Cholyaeq Yaqyo laoq laefuqmyel gee deelhhei laoqmyel hhae sil hhae, ngeelfeiq, Cholyaeq Yaqyo yaol yotyel maqdumyel ongqzaeq e tyutaeq laoq zaihuol za vae!" 23 Tyulkaol, laqcaqhael hhaellaelmyel yoqhhaeteel onglci'ae aeqsul silqinq xilmael zongl hhae maeqlye geegaeq gil'ae.
Laqcaqhael aeqsul hhael heeq lil lye geegae gil
24 Laqcaqhael hhaellaelmyel yoqhhaeteel onglci'ae aeqsul hhael heeq lil lye geegae tul gil laeq'ae. 25 Yesu yoqhhaeteel'ae gee biq: "Baeqjyelboq minqcuqhael'ae zongmae zhol'ae, kaol zongmae tyuhael yoqhhaeteel e hhaoqsongl geiq kaol guanqliq gil biq hhae, kaol laqtaq maellye yoqhhaeteel'ae guanqliq biq e zongmaehael'ae hhael meeq e yelchoq lye gul biq hhae. 26 Ngeelfeiq, noteel laoq xilnye haeq zongl gil: Noteel onglci'ae hhaelheeq heeqli e qiq hhaeq laoq, hhaelnil nilli e qiq hhaeq laoqmyel ngeel maoqhhae; yoheeqhael laoq, aeqdilmyel cholyaeqhael'ae fuqsil e qiq hhaeq laoqmyel zongl maoqhhae. 27 Aelhoq zaeq hael kaol zhaofu hael, haetaeq hhael heeq hhaemaeq? Aelhoq zaeq hael maeqngeel maeq? Ngeelfeiq, ngael noteel onglci'ae laoq cholyaeqhael'ae fuqsil e qiq hhaeq laoqmyel lil. 28 Ngaeq'ae shilfu laeq fu, haeqfu eiq ngaeq nyegael baelzhol hael laoq noteel ngeelvae. 29 Ngaeq e aeqdae lye zongmae geiq e laqtaq mael ngaeq'ae biq laq laoqmyel, ngael eiq noteel'ae laqtaq xilnye biq laqngeel. 30 Noteel'ae ngaeq e goqja vae ngaeq e baqwanq baqdeel hhei myel'ae bi zaeq dol laeqngeel; noteel aeqgael zongmae duqtyel mael'ae hhae zhol da'li, kaol Yiqsellyel e qyelniq zhipail'ae shenqpanl maoqlye hhae."
Biqdeq Hhaoqsongl yaol maeq loq yae lye suq pu gee maoqlye hhae
31 Yesu Ximenq Biqdeq'ae gee biq: "Ximenq, Ximenq, haelmeeqlye naelhaeq deelhhei! Saqdanl laoq noteel yaol meqziq ziqqyel laoqmyel ziqqyel e laqtaq mael Momil ae'lye saelzaeq yi aeqwae. 32 Ngeelfeiq, ngael noq e xinlxin mael haeq bi baelyil lye Momil'ae heeldoq bael gee biq aeqwae. Nol neemae paellael fu, nol laoq noq e aqsseq aeqnilhael'ae xinlxin hhael bi za lal maoqhhae." 33 Ngeelfeiq, Biqdeq Yesu'ae gee biq: "Hhaoqsongl o! Ngael noq nyegael qiqgael ee'longl li kaol hhaellaelmyel sil maoqlye nyuqmeeq wae!" 34 Yesu gee: "Biqdeq, ngael noq'ae geegaeq laeqngeel, yaeqnao haepyul maeq dyel e laefuq, nol ngaeq yaol maeq loq yae lye suq pu gee maoqlye hhae."
35 Yesu yoqhhaeteel'ae yol gee biq: "Yilkaefu ngael noteel'ae moqheilheil duyil fu, noteel dyuqbaq palbye maeq heil, palbye maeq heil, paqno maeq heil, noteel'ae aeqchee maq mulloq laeq maeq?" Yoqhhaeteel gee: "Mulloq'ae." 36 Yesu yoqhhaeteel'ae gee biq: "Ngeelfeiq, yaeqmeel laoq, dyuqbaq palbye heil hhei maoqhhae, moqgoq heil do palbye eiq heil hhei maoqhhae; maejyel maqza e cholyaeqhael laoq, aelhongq mael ongqzaeq hheikaol maejyel vul yil. 37 Ngael noteel'ae geegaeq laeqngeel, Momil e Suqhhaq taq'ae cu deelhhei, 'Yoqhhaeq yaol golsiq za e cholyaeqhael onglci'ae bael zongl do biq hhae.' Saeziq xihael aeqdilmyel ngaeq e aeqhhaol taq'ae peqlal ngeelvae, ngaeq gae'lye cu deelhhei e silqinq mael aeqdilmyel peqlal maoqlye hhae." 38 Yoqhhaeteel gee: "Hhaoqsongl o! Nol fu, saeqvae maejyel niq mal za'ae." Yesu yoqhhaeteel'ae gee biq: "Lo vae!"
Yesu Zhoqcae Geeqzhoq vae heeldoq gee
39 Yesu tyuqvae lye deelsae vae, haelzael'ae laoqmyel Zhoqcae Geeqzhoq vae da'li, laqcaqhael eiq yoqhhaeq'ae cho'lyeq deelhhei hhae. 40 Tyuqvae keellael laol, yoqhhaeq laqcaqhael'ae gee biq: "Noteel heeldoq gee maoqhhae, aeqgael cheeqmu myel vae leeqdo gil laqngeel." 41 Tyulkaol, Yesu yoqhhaeteel ae'lye deelsae hheikaol haqlo qiq siq beiq maol duyil ongl dyul kaeq myel vae vuqduqtongq gae hheikaol heeldoq gee'ae. 42 Gee: "Aeqdae o! Nol hhaeq lil lye kaollaoq, beiziq xilmael heilsae yil laeq! Ngeelfeiq, ngael nyuq laoqmyel haeq bi peqlal, noq e neemae mael haelmillye nyuqtongq deelhhei laol haelmillye bi peqlal." 43 Mqmae yosongl qiq hhaeq mqmae taq ae'lye mol du'lal, kaol yoqhhaeq'ae aqha biq hhei biq. 44 Yesu zhee nyuqsaeq biq, Momil'ae heeldoq nyeq'ei hhael gee tyeqli, yoqhhaeq e keeqpul mael siq laoqmyel milcaeq vae yul gaeyi. 45 Yesu heeldoq gee byel hhei'laol, tullael kaol laqcaqhael zael'ae keelli, yoqhhaeteel nyuqsaeq biq kaol yuqxul deelhhei mol hhei biq. 46 Kaol yoqhhaeteel'ae gee biq: "Noteel aeqcheekaol ssuqza gil lilmaeq? Tullael kaol heeldoq gee gil, aeqgael cheeqmu myel vae leeqdo gil laqngeel."
Yesu yaol eetyeq biq
47 Yesu saeziq gee siq fu, cholyaeq qiq miq lael vae! Shiqtuq qyelniq hhaeq onglci'ae, Yoqdal lye gul biq e qiq hhaeq yoqhhaeteel yaol sheeq hheikaol Yesu e yiqsiboq'ae keellael, kaol yoqhhaeq'ae myeqchilnuq biq. 48 Yesu yoqhhaeq'ae gee biq: "Yoqdal, nol laoq myeqchilnuq maellye, Cholyaeq Yaqyo yaol yotyel maqdumyel ongqzaeq lilmaeq?" 49 Yesu dongqpyeq e cholyaeqhael peqlal maoqlye e silqinq mael mol hhei biq, kaol gee: "Hhaoqsongl o! Ngaeteel maejyel maellye de hhei biq maeq?" 50 Yoqhhaeteel onglci e qiq hhaeq lye, daljilsi e yaqhacheqzaq e cholyaeq qiq hhaeq'ae maejyel maellye qiq pu she hhei biq, kaol laqsseqboq e naeqbol mael shega biq vae. 51 Yesu gee: "Xilnye haeq zongl!" Kaol yultaeq e naeqbol mael'ae so hhei biq, kaol yoqhhaeq yaol zonglmeeq biq vae. 52 Yesu yoqhhaeq'ae eetyeq biq e jilsizhangqhael, kaol sholhaol'ae fu'qyezaq e cholyaeqhael e zhiqmoqhael kaol zhangqlaoqhael'ae gee biq: "Noteel maejyel kaol haeqdul baq hheikaol duyi, noteel ngaeq'ae eetyeq laeq mael, lolbiq diqkoqzaeq e cholyaeq'ae eetyeq laoqmyel lilmaeq? 53 Ngael naochomyel noteel nyegael sholhaol vae zhol, noteel ngaeq'ae maeq eetyeq laeq'ae; ngeelfeiq, yaeqmeel laoq noteel e naohaeq wae, nahongq mael laqtaq za wae."
Biqdeq Hhaoqsongl yaol maeq loq yae lye suq pu gee
54 Yoqhhaeteel Yesu yaol eetyeq biq, kaol daljilsi toq'ae ee'li biq, Biqdeq gaelmaolsae'lye yoqhhaeteel'ae cho'lyeq deelhhei hhae. 55 Yoqhhaeteel dyekaeq'ae aeqzaeq bodoq hhei, kaol qiqgael zhol gil, Biqdeq eiq yoqhhaeteel onglci'ae baelzhol deelhhei hhae. 56 Yaqhacheqzaq e haeqmiyaeq qiq hhaeq Biqdeq e maduq mael aeqzaeq doq boq'ae polyil aeqmyel zhol deelhhei mol hhei biq, kaol yoqhhaeq'ae deelhae'lye chifu biq, gee: "Cholyaeq xitaeq laefuq Yesu nyegael qiqboq hhae!" 57 Biqdeq laoq maeqngeel yil lye gee'ae, gee: "Cholhae aeqmae, ngael yoqhhaeq yaol maeq loq yae!" 58 Qiqlaq lye laol, baeqjyelboq e qiq hhaeq yoqhhaeq yaol mol hhei biq, gee: "Nol eiq yoqhhaeteel onglci e qiq hhaeq'ae." Biqdeq gee: "Nol cholyaeq xitaeq o, ngael maeqngeel yil!" 59 Yiq gol xiaoqshiq laellye gol hhei'laol, yol qiq hhaeq aeqdilmyel ngeel'ae lye gee: Xitaeq eiq Ja'lillil cholyaeq'ae, tyulkaol, yoqhhaeq laoq aeqdilmyel Yesu nyegael qiqboq hhae. 60 Biqdeq gee: "Nol cholyaeq xitaeq o, ngael nol aeqchee gee lye maeq loq yae!" Yoqhhaeq saeziq gee siq fu, haepyul dyel tullaeq vae. 61 Hhaoqsongl zipol hoqlael kaol Biqdeq'ae chifu biq, Biqdeq laoq Hhaoqsongl yoqhhaeq'ae gee gol biq e saeziq mael nyuq tullaeq biq: "Yaeqnao haepyul maeq dyel lael laefuq'ae, nol ngaeq yaol maeq loq yae lye suq pu gee maoqlye hhae." 62 Tyulkaol, yoqhhaeq duyil kaol nyul tullaeq.
Yesu yaol zhiqmoqkae biq
63 Yesu'ae fu'qyezaq e cholyaeqhael yoqhhaeq'ae pasa biq, yoqhhaeq'ae tyel biq. 64 Yoqhhaeq e ma'ne mael hocongq biq kaol yoqhhaeq'ae naelhaeq biq, gee: "Peqlal maoqlye mael geedu hhei! Noq'ae tyel e qiq hhaeq aeqsul maeq?" 65 Yoqhhaeteel lye haelnaeqmyel saeziq lye Yesu'ae geekyuq biq wae siq.
66 Mqbae zhoq bae lael laol, cholyaeqhael e zhangqlaoqhael, jilsizhangqhael kaol Momil e saeziq mael loq e laqkiqhael qiqgael zhol'eeq deelhhei gil, Yesu yaol yoqhhaeteel e Yoqtail Yilhuil vae sheeqli biq, gee: 67 "Nol Jidu lil lye kaollaoq, ngaeteel'ae geedu laq!" Yesu yoqhhaeteel'ae gee biq: "Ngael noteel'ae geedu biq feiq noteel maeq xiangxinl'ae. 68 Ngael noteel'ae naelhaeq kaollaoq, noteel eiq aeqdilmyel maeq geehoq laeq'ae. 69 Ngeelfeiq, yaeqnao ae'lye laol, Cholyaeq Yaqyo laoq hhael'onglzaeq zaeqli Momil e laqsseqboq'ae zhol deelhhei maoqlye hhae." 70 Yoqhhaeteel gilzuqmyel gee: "Aelmaol, nol laoq Momil e Yaqyo lilmaeq?" Yesu gee: "Noteel gee mael hoq'ae, ngael ngeel lil." 71 Yoqhhaeteel gee: "Aedeeteel aeqchee zenljul mulyo siq maeq? Aedeeteel yoqhhaeq e myeqbongq ae'lye geedu hhei e saeziq mael gaeq vae."