Lasa'lul sil vae
11
Maqlilyal kaol aeqyoq e aelbae Maqdal e pusiq Boqdalniq vae, Lasa'lul lye gul biq e cholyaeq qiq hhaeq zhol'ae, yoqhhaeq'ae nael biq hhae. 2 Maqlilyal xitaeq laoq aeqnaol xianggao maellye Hhaoqsongl'ae soda hhei biq, kaol qyelkeel maellye Hhaoqsongl e aeqkeel mael xyegee biq e tyutaeq ngeelvae, nael biq e Lasa'lul laoq yoqhhaeq e aeqnil'ae. 3 Yoqhhae niq baeyaeq lye cholyaeq yaol Yesu tyuqvae bi yil, kaol gee: "Hhaoqsongl o, nol gaeq biq e tyutaeq nael biq hhae." 4 Yesu gaeq hhei biq laol, gee: "Naelgol xilmael maeq naelsil laelkiq'ae, Momil e rongqyaol gae'lye hhae, Momil e Yaqyo'ae xilmael ae'lye rongqyaol bi za maoqlye hhae." 5 Yesu laoq haeqfu eiq Maqdal'ae, yoqhhaeq e dulmae Maqlilyal kaol Lasa'lul'ae gaeq biq hhae. 6 Yoqhhaeq Lasa'lul nael biq'ae lye gaeq hhei biq feiq, yoqhhaeq zhol e tyuqvae niq nao zhol wae siq, 7 Aeqnaol Yesu laqcaqhael'ae gee biq: "Aedeeteel Yoqtail milcaeq vae zail yil gil maoq siq." 8 Laqcaqhael yoqhhaeq'ae gee biq: "Labiq, yaeqmeel qiqtongq Yoqtail cholyaeqhael haqlo maellye noq'ae beiq maoqlye zongl hhae, nol tyuqvae yil maoq siq maeq?" 9 Yesu gee: "Mqnao laoq shiq'el gol xiaoqshiq za maeqngeel maeq? Cholyaeq laoq mqnao vae deel laol, maeq jye'leeq laelkiq'ae, yoqhhaeq laoq milcaeq taq e aeqcael mael mol kaol'ae. 10 Cholyaeq mqkiq vae deel kaollaoq, jye'leeq laelkiq'ae, yoqhhaeq aeqcael maeq mol biq kaol'ae." 11 Yesu saeziq xihael gee byel hhei'laol, yoqhhaeteel'ae gee biq: "Aedeeteel e yelchoq Lasa'lul yuqxul vae, ngael yoqhhaeq yaol gulnyuq yil biq maoq." 12 Laqcaqhael gee: "Hhaoqsongl o, yoqhhaeq yuqxul vae kaollaoq, meeqhoqlael kiq'ae." 13 Yesu laoq Lasa'lul sil e mael'ae gee hhae, ngeelfeiq, laqcaqhael laoq aeqdilmyel yuqxul mael'ae gee hhae lye kei biq hhae. 14 Tyulkaol, Yesu maeq geehhaq myel yoqhhaeteel'ae geegaeq biq: "Lasa'lul sil vae. 15 Ngael tyuqvae maeq zhol gae'lye hhaol yae, xilmael laoq noteel gae'lye, kaol noteel'ae bi xiangxinl maoqlye kaollil. Yaeqmeel aedeeteel yoqhhaeq e tyuqvae yil gil o." 16 Haeqmoqa lye gul biq e Domaq, baeqjyelboq e laqcaqhael'ae gee biq: "Aedeeteel eiq yil kaol yoqhhaeq nyegael qiqgael bael sil yil gil o!"Yesu laoq dyeqhoqlal mael kaol aeqyil'ae
17 Yesu keellael vae, Lasa'lul yaol fuq'ongl vae yuq nao baqduqm wae lye loq biq. 18 Boqdalniq laoq Ye'lulsa'lenq vae niq hhae, san gong'liq laellye maoq maeq kaeq'ae. 19 Haelnaeqmyel e Yoqtail cholyaeqhael Maqdal kaol Maqlilyal e tyuqvae lael gil, Lasa'lul sil gae'lye yoqhhaeteel'ae haeq nyuqsaeq lye gee lael gil biq. 20 Maqdal Yesu lael vae lye gaeq hhei biq laol, yoqhhaeq'ae sheeqcaq yil biq, ngeelfeiq, Maqlilyal laoq laoqhaol vae zhol deelhhei wae siq. 21 Maqdal Yesu'ae gee biq: "Hhaoqsongl o, nol haeqfu'ae'lye saeqvae zhol kaollaoq, ngae'nil laoq maeq sil yilkiq wae! 22 Yaeqmeel keellye, ngael laoq nol Momil'ae aeqchee geezaeq biq feiq, Momil laoq aeqdilmyel noq'ae biq biq'ae lye loq lil." 23 Yesu yoqhhaeq'ae gee biq: "Noq e aeqnil dyeqhoqlal kiq'ae." 24 Maqdal gee: "Ngael laoq milcaeq holtaq e aeqnaol naolli qiq nao dyeqhoqlal fu, yoqhhaeq dyeqhoqlal'ae lye loq lil." 25 Yesu gee: "Ngael laoq dyeqhoqlal mael lil, kaol aeqyil lil, ngaeq'ae xiangxinl e cholyaeq laoq sil feiq dyeqdeel'ae. 26 Dyeqdeel e ngaeq'ae xiangxinl e haelzhol cholyaeqhael, qiqzael eiq maeq sil yilkiq'ae, nol saeziq xihael xiangxinl lilmaeq?" 27 Maqdal geehoq biq: "Hhaoqsongl o, ngael xiangxinl lil, ngael nol laoq Jidu'ae, Momil e Yaqyo'ae, kaol milcaeq taq'ae lael maoqlye e tyutaeq'ae lye xiangxinl lil."
Yesu lye Lasa'lul yaol bi dyeqhoqlal vae
28 Maqdal saeziq xihael gee hhei'laol, yoqhhaeq e dulmae Maqlilyal'ae gul hoqli biq, ochoq maeq bael gaeq myel vae lye gee: "Laoqsi lael vae, yoqhhaeq noq'ae gul hhae." 29 Maqlilyal zhoq gaeq hhei biq laol, nae'naemyel tullael, kaol Yesu tyuqvae keelyil. 30 Tyuqfu, Yesu laoq pusiq vae maq do'li wae siq, Maqdal yoqhhaeq'ae sheeqcaq biq e tyuqvae zhol wae siq. 31 Maqlilyal nyegael laoqhaol onglci'ae yoqhhaeq'ae haeq nyuqsaeq lye gee biq e Yoqtail cholyaeqhael, yoqhhaeq nae'naemyel tullael kaol duyil mol hhei biq, kaol yoqhhaeq'ae cho'lyeq yil, yoqhhaeq fuq'ongl tyuqvae nyul yil maoqlye hhae lye kei biq. 32 Maqlilyal Yesu tyuqvae keellael, yoqhhaeq yaol zhoq mol hhei biq laol, yoqhhaeq e aeqkeel dongqpyeq'ae vuqduqtongq gae hhei, gee: "Hhaoqsongl o, nol haeqfu'ae'lye saeqvae zhol kaollaoq, ngae'nil laoq maeq sil yilkiq wae!" 33 Yesu laoq yoqhhaeq kaol yoqhhaeq nyegael qiqgael bael lael e Yoqtail cholyaeqhael nyul mol hhei biq, kaol neemae maeq zholsael biq, kaol nyuqsaeq biq'ae, 34 Gee: "Noteel lye yoqhhaeq yaol haeqvae baqduqm deelhhei gil lilmaeq?" Yoqhhaeteel gee: "Hhaoqsongl o, fu lael." 35 Yesu nyul vae. 36 Tyulkaol, Yoqtail cholyaeqhael gee: "Nol fu, yoqhhaeq cholyaeq xitaeq'ae zhee gaeq biq hhae!" 37 Yoqhhaeteel onglci e qiq miq gee: "Yoqhhaeq lye mabyeq e ma'ne mael bi mol congl laelkiq, cholyaeq xitaeq yaol maeq bi sil myel maeq ongl maeq?"
38 Yesu e neemae mael yol teel eiq maeq zholsael biq, kaol fuq'ongl yiqsiboq'ae lael. Fuq'ongl tyulmael laoq gonglbyu qiq byu'ae, gonglbyu byuheiq vae laoq haqlo maellye moqchiq deelhhei hhae. 39 Yesu gee: "Haqlo xilmael moqtael hhei!" Sil e qiq hhaeq e aelbae Maqdal yoqhhaeq'ae gee biq: "Hhaoqsongl o, baqduqm mael yuq nao zoq wae, yoqhhaeq nul yil wae." 40 Yesu gee: "Ngael noq'ae 'nol xiangxinl kaollaoq, Momil e rongqyaol mael hhae mol'ae' lye gee gol laq maeqngeel maeq?" 41 Tyulkaol, yoqhhaeteel lye haqlo mael moqtael hhei vae. Yesu vuqduq baqtul hheikaol mqmae vae chifu, gee: "Aeqdae o, ngael noq'ae meeqyaevae lye gee lil, nol ngaeq e heeldoq mael naelhaeq laeq kaol'ae. 42 Ngael laoq nol duqlye ngaeq e heeldoq mael naelhaeq laeq'ae lye loq lil, ngeelfeiq, ngael saeziq xihael gee mael laoq, dongqpyeq'ae haoqtul deelhhei e cholyaeqhael gae'lye lil, ngaeq yaol laoq noq lye moqheilheil duyi laq hhae lye yoqhhaeteel'ae bi xiangxinl maoqlye kaollil." 43 Saeziq xihael gee byel hhei'laol, yotyel haeqheemyel gul: "Lasa'lul, duyi!" 44 Kaol sil e tyutaeq duyi vae, yoqhhaeq e aeqkeel aqlaq mael'ae paelpul leeltyeq deelhhei hhae, maduq mael'ae laoq haeqpael maellye leeltyeq deelhhei hhae. Yesu gee: "Yoqhhaeq yaol keelpyel biq, yoqhhaeq'ae bi deel!"
Yesu'ae xyeq maoqlye zongl gil
45 Maqlilyal e tyuqvae lael gil e haelnaeqmyel Yoqtail cholyaeqhael, Yesu haelzongl e silqinqhael mol hhei biq laol, yoqhhaeq'ae xiangxinl vae. 46 Ngeelfeiq, yoqhhaeteel onglci e qiq miq laoq Faqlilsail cholyaeqhael e tyuqvae yil, kaol Yesu haelzongl e silqinqhael yoqhhaeteel'ae geedu biq. 47 Tyulkaol, jilsizhangqhael kaol Faqlilsail cholyaeqhael gul'eeq deelhhei, kaol Yoqtail Yilhuil vae geedazaq gil'ae, gee: "Cholyaeq xitaeq shenqjiq zhee zongl du hhei, aedeeteel haelmillye zongl laeq? 48 Aedeeteel yoqhhaeq'ae xilnye bi zongl siq kaollaoq, haelzhol cholyaeq laoq yoqhhaeq'ae xiangxinl yil wae, kaol Loqmaq cholyaeq lael, kaol aedeeteel e milcaeq mael diqkoqzaeq hhei, kaol aedeeteel e minqcuq yaol zonglmye hhei." 49 Yoqhhaeteel onglci'ae Gaiyalfaq lye gul biq e qiq hhaeq zhol'ae, tyuqfu qiq hoq daljilsi geiq hhae, yoqhhaeq yoqhhaeteel'ae gee biq: "Noteel laoq qiqgiq maeq loq'ae, 50 Nyuq eiq maeq nyuq fufu gil, cholyaeq qiq hhaeq cholyaeqhael gae'lye sil, tyulnye laol, minqcuq qiq mal myel maeq myeyil kiq wae, kaol xilmael laoq noteel'ae meeqyo'lael'ae." 51 Yoqhhaeq saeziq xihael gee mael laoq, aeqyoyoq ae'lye lael maeqngeel'ae, yoqhhaeq tyuqfu qiq hoq daljilsi geiq hhae, tyulkaol, Yesu aeqgael Yoqtail minqcuq e cholyaeqhael e vuqtu mael bael sil maoqlye hhae lye geedu hhei; 52 Yoqtail minqcuq e cholyaeqhael gae'lye sil dyul maeqcilmyel, milcaeq holtaq'ae haeqvae lael'ee myel zhol deelyil e Momil e yaeqmiq yaqyohael, gul'eeq laeq kaol aeqhhaol qiq siq laoqmyel bi peqlal. 53 Tyu qiq nao ae'lye aeqnaol laoq, yoqhhaeteel Yesu yaol xyeq maoqlye geedazaq gil hhae.
54 Tyulkaol, Yesu laoq Yoqtail cholyaeqhael tyuqvae aeqsul eiq mol gae'lael aeqmyel vae maeq deel vae, kaol tyuqvae lye deelsae hhei vae, diqsheelleeldye dongqpyeq e milcaeq vae yil vae; Yiqfaqlianq lye gul e milmae heeqmyel vae keellael, kaol laqcaqhael nyegael tyuqvae zholgae hhei gil vae.
55 Yoqtail cholyaeqhael e Yuq'yeqjyeq keellael goqbiq vae, haelnaeqmyel cholyaeqhael zaeqnao laefuq'ae haeqvae lael'ee myel pusiq ae'lye Ye'lulsa'lenq vae da'li gil, kaol tyuqvae aeqyoyoq'ae zonglsholzaeq li gil maoqlye hhae. 56 Yoqhhaeteel haeqvae lael'ee myel Yesu'ae saelpo'ae, sholhaol vae haoqtul deelhhei fu, hhaellaelmyel geegaeq gil: "Noteel haelmillye nyuq gil lilmaeq? Yoqhhaeq zaeqnao maeq bael zaeq lael lye maeqhael ngeel?" 57 Jilsizhangqhael kaol Faqlilsail cholyaeqhael haeqfu'ae'lye minllinl gaeyi: Aeqsul laoq Yesu haeqvae zhol hhae lye loq kaollaoq, geedu lal maoqhhae, kaol yoqhhaeq yaol eetyeq biq maoq.