Yesu laoq meeq e aqciq hoqzaq e cholyaeq'ae
10
"Ngael aeqdilmyel noteel'ae geegaeq laeqngeel, oheiq ae'lye aqciq ciqku vae maq do'li myel, baeqjyelboq ae'lye pa do'li e tyutaeq laoq lolbiq, kaol lolbiq diqkoqzaeq e cholyaeq ngeelvae; 2 Oheiq ae'lye do'li e cholyaeq laoq aqciq hoqzaq e cholyaeq ngeelvae. 3 Oheiq'ae fu'qyezaq e qiq hhaeq yoqhhaeq'ae oheiq pong hhei biq, aqciqhael eiq yoqhhaeq e yotyel mael naelhaeq'ae; yoqhhaeq laoq aqciqhael e cholmil maellye aeqyoyoq e aqciqhael'ae gul biq, kaol aqciqhael sheeq duyil biq. 4 Yoqhhaeq lye aeqyoyoq e aqciqhael gilzuqmyel sheeq duyil aeqnaol'ae, yoqhhaeq laefuqboq'ae deel, aqciqhael yoqhhaeq'ae cho'lyeq deelhhei, aqciqhael yoqhhaeq e yotyel mael loq kaol'ae. 5 Aqciqhael laoq maeq loq e cholyaeq'ae maeq cho'lyeq'ae, daoldaolmyel kisae hhei, aqciqhael laoq maeq siqcongl e cholyaeq e yotyel mael maeq loq biq kaol'ae." 6 Yesu yoqhhaeteel'ae dullaelmyel guqjin xilmael geedu gil biq, ngeelfeiq, yoqhhaeteel yoqhhaeq aeqchee mael'ae gee hhae lye maeq loq biq'ae.7 Tyulkaol, Yesu yol gee: "Ngael aeqdilmyel noteel'ae geegaeq laeqngeel, ngael laoq aqciqhael e oheiq lil. 8 Ngaeq e laefuq'ae lael hael laoq, gilzuqmyel lolbiq kaol lolbiq diqkoqzaeq e cholyaeq'ae, kaol aqciqhael yoqhhaeteel'ae maeq naelhaeq nae'ae. 9 Ngael laoq oheiq lil, cholyaeq ngaeq gae'lye do'lal kaollaoq, hha deqjiul'ae, tyulkaol, hha duyil, hha do'lal kaol haelsaeq eiq saelpozaeq hhei ongl'ae. 10 Lolbiq lael mael laoq, haoqzaeq lael, xyeq lal, zonglba lal maoqlye hhae, ngeelfeiq, ngael lael mael laoq, aqciqhael'ae aeqyil bi za maoqlye lil, kaol aeqyil onglci'ae maq lo myel qiqgiq maqza'ae.
11 Ngael laoq meeq e aqciq hoqzaq e cholyaeq lil, meeq e aqciq hoqzaq e cholyaeq laoq aqciqhael gae'lye sil kaol'eiq hhaeq'ae. 12 Dyuqbaq heil biq kaol aqciq bael fu'qye e cholyaeq laoq, aqciq hoqzaq e cholyaeq maeqngeel'ae, aqciq mael eiq yoqhhaeq e maeqngeel'ae, kaol yoqhhaeq haeqheil lael mol hhei biq laol, aqciqhael beiqdeelsaeq kaol kisae vae, kaol haeqheil lye aqciq mael baqzaq biq, kaol aqciqhael lyeqsae biq vae. 13 Yoqhhaeq laoq dyuqbaq heil biq kaol aqciq hoqzaq e cholyaeq'ae, kaol aqciqhael'ae qiqgiq maeq guanq biq kaol'ae. 14 Ngael laoq meeq e aqciq hoqzaq e cholyaeq lil, kaol ngael ngaeq e aqciqhael loq lil, ngaeq e aqciqhael eiq ngaeq yaol loq'ae, 15 Qiqsheel ngeelvae, Aeqdae ngaeq yaol loq, ngael eiq Aeqdae yaol loq; kaol ngael aqciqhael gae'lye sil kaol'eiq hhaeq lil. 16 Ngaeq'ae baeqjyelboq e aqciqhael laoq aqciq ciqku xilmael vae maeq zhol'ae; ngael aeqdilmyel yoqhhaeteel yaol sheeqlaeq maoq, yoqhhaeteel eiq ngaeq e yotyel mael naelhaeq maoqlye hhae, kaol hhaellaelmyel qiqgael bi zhol'eeq deelhhei, kaol aqciq hoqzaq e cholyaeq qiq hhaeq'ae bi guanq. 17 Tyulkaol, Aeqdae ngaeq'ae gaeq laeq, ngaeq lye ngaeq e aeqyil mael bi sil mael laoq, aeqyil mael zail qiq pu heilhoqlaeq maoqlye kaollil. 18 Ngaeq lye aeqyoyoq e aeqyil mael bi sil kaolmaoqlaol, ngaeq e aeqyil mael qiq hhaeq eiq maq xyeq ongl'ae. Ngael ngaeq e aeqyil mael bi sil e laqtaq za lil, kaol aeqyil mael heilhoqlaeq e laqtaq eiq za lil; xilmael laoq ngaeq e Aeqdae ngaeq'ae minllinl laeq mael'ae."
19 Yoqtail cholyaeqhael saeziq xihael gae'lye geegae tullaeq. 20 Yoqhhaeteel onglci e cholyaeq qiq miq gee: "Yoqhhaeq'ae laoq niqhaeq guqzaeq li biq hhae, yoqhhaeq muyil vae, aeqcheekaol yoqhhaeq e saeziq mael naelhaeq laeq?" 21 Baeqjyelboq e cholyaeq qiq miq gee: "Saeziq xihael laoq niqhaeq guqzaeq li biq e cholyaeq gee e saeziq maeqngeel'ae. Niqhaeq haelmillyekaol mabyeq e ma'ne mael bi mol laelkiq e laeq?"
Yoqtail cholyaeq laoq Yesu gee e saeziq mael maeq xiangxinl biq
22 Ye'lulsa'lenq vae, Sholhaol Heelda e Zaeqnao keellael vae, tyuqfu laoq aqga baehae'ae. 23 Yesu sholhaol e Soqloqmenq zouqlangq ae'lye deelpol duyil, 24 Yoqtail cholyaeqhael yoqhhaeq'ae ongtyeq deelhhei kaol yoqhhaeq'ae gee biq: "Nol ngaeteel'ae maeq nyuq byel ongl myel bi nyuq laeq mael haeqfu'ae keel maoqlye laeq? Nol Jidu kaollaoq, aeqsul eiq bael mol myel ae'lye ngaeteel'ae geedu laq." 25 Yesu yoqhhaeteel'ae gee biq: "Ngael noteel'ae geegaeq biq wae, ngeelfeiq, noteel laoq maeq xiangxinl'ae; ngael ngaeq e Aeqdae e cholmil maellye haelzongl e silqinq mael, ngaeq'ae bal zoqzenl laeq'ae. 26 Ngeelfeiq, noteel maeq xiangxinl'ae, noteel laoq ngaeq e aqciq maeqngeel kaol'ae. 27 Ngaeq e aqciqhael ngaeq e yotyel mael naelhaeq'ae, ngael eiq yoqhhaeteel yaol loq lil, yoqhhaeteel eiq ngaeq'ae cho'lyeq'ae. 28 Ngaeq lye yoqhhaeteel'ae haeqfu eiq zadeel e aeqyil mael biq hhei biq wae, kaol yoqhhaeteel qiqzael eiq maq myeyil kiq wae, kaol yoqhhaeteel yaol ngaeq e aqlaq ae'lye qiq hhaeq eiq maeq diqkoqzaeq yil ongl'ae. 29 Ngaeq'ae aqciqhael biq laq e Aeqdae tyutaeq laoq gilzuqmyel hael taq'ae hhael heeq'ae, yoqhhaeteel yaol ngaeq e Aeqdae aqlaq ae'lye qiq hhaeq eiq maeq diqkoqzaeq yil ongl'ae. 30 Ngael kaol Aeqdae laoq qiq hhaeq lil."
31 Kaol Yoqtail cholyaeqhael haqlo yol baqqei hheikaol, yoqhhaeq'ae beiq maoqlye zongl biq hhae. 32 Yesu yoqhhaeteel'ae gee biq: "Ngaeq lye aeqdae ae'lye lael e haelnaeqmyel meeq e silqinq mael noteel'ae zongl fu du hhei biq, noteel hae qiq mal gae'lye ngaeq'ae haqlo maellye beiq maoqlye zongl gil laeq lilmaeq?" 33 Yoqtail cholyaeqhael yoqhhaeq'ae gee biq: "Ngaeteel nol meeq e silqinq zongl mael gae'lye haqlo maellye beiq maoqlye zongl maeqngeel yil, nol xyelduq e saeziq gee mael gae'lye lil, nol laoq cholyaeq feiq Momil lil lye geiqzaq kaol'ae." 34 Yesu gee: "noteel e lilfaq taq'ae cu deelhhei 'ngael noteel laoq momilhael'ae lye gee' maeqngeel maeq? 35 Momil e Suqhhaq taq e saeziq mael laoq maeq paelyil kiq'ae, Momil e saeziq mael yo'li biq e cholyaeqhael'ae, Momil yoqhhaeteel'ae momilhael lye gul biq kaollaoq, 36 Aelmaol, mqmae Aeqdae lye zonglqyel du hheikaol senljyeq hhae lye bi geiq e qiq hhaeq yaol milcaeq taq'ae moqheilheil du hhei, yoqhhaeq aeqyoyoq laoq Momil e Yaqyo lil lye gee, kaol noteel laoq yoqhhaeq xyelduq e saeziq gee vae lye gee biq lilmaeq? 37 Ngael ngaedae e mulhhael mael maeq zongl kaollaoq, noteel ngaeq'ae maeq xiangxinl laeq kael'ae. 38 Ngael zongl vae kaollaoq, noteel ngaeq'ae maeq xiangxinl laeq feiq, haelzonglhael'ae xiangxinl maoqhhae, kaol noteel'ae ngaedae laoq ngaeq e onglci'ae zhol, ngael eiq aeqdae onglci'ae zhol hhae lye bi siqcongl bi loq maoq." 39 Kaol yoqhhaeteel Yesu yaol yol eetyeq maoqlye zongl, ngeelfeiq, yoqhhaeq yoqhhaeteel e aqlaq ae'lye kibeiq hhei vae.
40 Yesu Yoqdanl Lolbaeq e neeldu aelheiq boq'ae yol yil, Yoqhanl zhoqmyel cholyaeqhael'ae shelxiqzongl biq myel vae keellael, kaol tyuqvae zholgae hhei. 41 Haelnaeqmyel cholyaeqhael yoqhhaeq e tyuqvae keellael, gee: "Yoqhanl shenqjiq qiq mal eiq maeq zongl gol'ae, ngeelfeiq, Yoqhanl cholyaeq xitaeq'ae haelgee e saeziq mael laoq aeqdilmyel hhae." 42 Kaol haelnaeqmyel cholyaeq tyuqvae lye Yesu'ae xinlzaeq vae.