Yesu lye mabyeq yaol zonglmeeq biq
9
Yesu gaelmae deel fu, bogae hhei fu ae'lye mabyeqbyeq e cholyaeq qiq hhaeq mol hhei biq. 2 Yoqhhaeq e laqcaqhael yoqhhaeq'ae naelhaeq biq: "Labiq, cholyaeq xitaeq bogae hhei fu ae'lye mabyeq'ae, aeqsul lye golsiq zonglpizaeq hheikaol maeq? Yoqhhaeq laeq, paelsilmyel yoqhhaeq e aeqdae aeqmae laeq?" 3 Yesu geehoq biq: "Yoqhhaeq golsiq zonglpizaeq hhei maeqngeel'ae, yoqhhaeq e aeqdae aeqmae lye golsiq zonglpizaeq hhei eiq maeqngeel'ae, Momil e mulhhael mael yoqhhaeq e aeqhhaol'ae mol du'lal maoqlye hhae. 4 Mqbaebae siq fu, aedeeteel ngaeq yaol moqheilheil duyi laq qiq hhaeq e mulhhael mael zongl maoqhhae; mqkiq keellael laol, qiq hhaeq eiq mulhhael maq hha mul wae. 5 Ngael milcaeq taq'ae zhol fu laoq, milcaeq taq e aeqcael lil." 6 Yesu saeziq xihael gee byel hhei'laol, eelcael mael milcaeq vae mye ga hhei, kaol eelcael maellye milpye teel nyel du hhei, kaol milpye mael mabyeq e ma'ne mael'ae soda hhei biq, 7 Kaol yoqhhaeq'ae gee biq: "Nol Xi'loqyal e hobong vae ciq yil." Xi'loqyal e yilsi laoq moqheil bi heil duyil mael'ae gee hhae. Tyulkaol, yoqhhaeq yil vae, ciq du hhei'laol, hoqlal fu mol congl lael biq vae. 8 Tyuqfu, yoqhhaetoq e dongqpyeq'ae zhol e cholyaeqhael, kaol yoqhhaeq aelhoq saelzaeq fu duqlye mol gol e cholyaeqhael gee: "Xitaeq laoq haeqfu eiq zhol deelhhei, kaol aelhoq saelzaeq e qiq hhaeq maeqngeel maeq?" 9 Qiq miq gee: "Yoqhhaeq'ae." Qiq miq gee: "Yoqhhaeq maeqngeel'ae, yoqhhaeq laoqmyel dul dyul wae." Aeqyoq gee: "Ngael ngeel lil." 10 Kaol yoqhhaeteel yoqhhaeq'ae naelhaeq biq: "Noq e ma'ne mael haelmillye mol congl lael laeq hhaemaeq?" 11 Yoqhhaeq geehoq biq: "Yesu lye gul biq e qiq hhaeq lye milpye teel nyel hhei, kaol ngaeq e ma'ne mael'ae soda hhei laq, kaol ngaeq'ae gee laeq: 'Nol Xi'loqyal e hobong vae ciq yil.' Kaol ngael cil yil laol mol lael laeq vae." 12 Yoqhhaeteel gee: "Tyutaeq haeqvae zhol hhaemaeq?" Yoqhhaeq gee: "Ngael maeq loq yae."Faqlilsail cholyaeqhael mabyeq'ae heqnaelhaeq biq
13 Yoqhhaeteel lye laefuq mabyeqbyeq biq e tyutaeq yaol, Faqlilsail cholyaeqhael tyuqvae sheeqli biq. 14 Yesu milpye nyeldu hheikaol, yoqhhaeq e ma'ne mael bi mol congl lael e tyu qiq nao laoq anxiqriq'ae. 15 Faqlilsail cholyaeqhael yoqhhaeq'ae haelmillye mol lael laeq hhaemaeq lye yol naelhaeq biq. Yoqhhaeq yoqhhaeteel'ae geedu biq: "Yesu lye milpye mael ngaeq e ma'ne mael'ae soda hhei laeq, kaol ngael ciq hhei'laol mol congl lael laeq vae." 16 Faqlilsail cholyaeq qiqniq hhaeq gee: "Cholyaeq tyutaeq laoq anxiqriq'ae maeq hhae zongl mael zongl vae, kaol yoqhhaeq laoq Momil ae'lye lael maeqngeel'ae." Baeqjyelboq e qiq miq gee: "Golsiq za e cholyaeq qiq hhaeq haelmillyekaol xilnye shenqjiq zongl kiq laeq?" Kaol yoqhhaeteel geegae tullaeq. 17 Yoqhhaeteel mabyeq'ae yol naelhaeq biq: "Yoqhhaeq lye noq e ma'ne mael bi mol congl vae, kaol nol gee yoqhhaeq laoq haelmillye cholyaeq maeq?" Yoqhhaeq gee: "Yoqhhaeq laoq xianzhi'ae."
18 Yoqtail cholyaeqhael laoq yoqhhaeq laefuq mabyeq'ae, kaol yaeqmeel mol laelkiq biq hhae lye maeq xiangxinl biq hhae, tyulkaol, yoqhhaeq e aeqdae aeqmae yaol gul laeq, 19 Kaol yoqhhaeteel'ae naelhaeq biq: "Xitaeq laoq noteel gee e bogae hhei fu ae'lye mabyeqbyeq e yaqyo maeq? Yaeqmeel yoqhhaeq haelmillyekaol mol congl hhaemaeq?" 20 Yoqhhaeq e aeqdae aeqmae geehoq biq: "Ngaeteel laoq yoqhhaeq ngaeteel e yaqyo'ae, bogae hhei fu ae'lye mabyeq'ae lye loq lil; 21 Yaeqmeel yoqhhaeq haelmillyekaol mol laelkiq'ae lye ngaeteel maeq loq yae; aeqsul lye yoqhhaeq e ma'ne mael bi mol congl hhae lye, ngaeteel eiq maeq loq yae. Noteel yoqhhaeq'ae naelhaeq biq, yoqhhaeq heeq lael aeqwae, kaol aeqyoyoq haelmillye hhae lye gee kiq vae." 22 Yoqhhaeq e aeqdae aeqmae xilnye gee mael laoq, Yoqtail cholyaeqhael'ae gu biq kaol'ae; Yoqtail cholyaeqhael laoq aeqsul Yesu laoq Jidu'ae lye gee laol, cholyaeq tyutaeq yaol huiltangq ae'lye lyeqdu maoqlye geemeeq deelhhei kaol'ae. 23 Tyulkaol, yoqhhaeq e aeqdae aeqmae gee: "Yoqhhaeq heeq lael aeqwae, kaol noteel yoqhhaeq'ae naelhaeq biq."
24 Tyulkaol, Faqlilsail cholyaeqhael lye laefuq mabyeqbyeq e cholyaeq yaol yol qiq pu gul laeq, kaol yoqhhaeq'ae gee biq: "Nol Momil'ae rongqyaol biq maoqhhae, ngaeteel cholyaeq xitaeq laoq golsiq za e cholyaeq'ae lye loq lil." 25 Tyutaeq geehoq biq: "Yoqhhaeq golsiq za e cholyaeq ngeel maeqngeel lye maeq loq yae, ngael loq e silqinq laoq qiq mal wae, ngael laefuq laoq mabyeq lil, yaeqmeel laoq mol laelkiq wae." 26 Kaol yoqhhaeteel yoqhhaeq'ae naelhaeq biq: "Yoqhhaeq lye noq'ae aeqchee zongl hhei laeq hhaemaeq? Yoqhhaeq noq e ma'ne mael haelmillye bi mol congl lael laeq hhaemaeq?" 27 Yoqhhaeq geehoq biq: "Ngael noteel'ae geedu biq wae, ngeelfeiq, noteel maeq naelhaeq nae, aeqcheekaol yaeqmeel laoq yol naelhaeq gil goq laq hhaemaeq? Noteel eiq yoqhhaeq e laqcaq geiq gil goq laq hhaemaeq?" 28 Kaol yoqhhaeteel yoqhhaeq'ae vuq biq, gee: "Nol yoqhhaeq e laqcaq'ae, ngaeteel laoq Moxi e laqcaq lil. 29 Ngaeteel laoq Momil laefuq Moxi'ae saeziq gee'naeq gol biq'ae lye loq lil; ngeelfeiq, cholyaeq xitaeq laoq, ngaeteel yoqhhaeq haeqvae lye lael hhae lye maeq loq yae." 30 Tyutaeq yoqhhaeteel'ae gee biq: "Xilnye kaollaoq qiqguail yaevae, yoqhhaeq lye ngaeq e ma'ne mael bi mol congl lael laeq vae, ngeelfeiq, noteel laoq yoqhhaeq haeqvae lye lael hhae lye maeq loq biq. 31 Aedeeteel loq'ae, Momil laoq golsiq za e cholyaeq geezaeq mael maeq naelhaeq'ae, ngeelfeiq, Momil'ae zun eiq zunjinl gu eiq gu, kaol yoqhhaeq e zhiqyil mael laoqmyel zongl yil hael'ae maoq maeq naelhaeq'ae. 32 Yilkaeaeqnao ae'lye mael yaeqmeel keellye, bogae hhei fu ae'lye mabyeqbyeq e cholyaeq yaol, cholyaeq lye yoqhhaeq e ma'ne mael bi mol congl lael kiq'ae lye qiq hhaeq eiq maeq gaeq gol'ae. 33 Cholyaeq xitaeq Momil ae'lye lael maeqngeel kaollaoq, yoqhhaeq laoq qiqgiq maeq zonglkeel ongl'ae." 34 Yoqhhaeteel geehoq biq: "Nol laoq bogae hhei fu ae'lye aeqdilmyel golsiq za hhae, ngaeteel'ae geemyeq laeq lil lye zongl oqyilsiq maeq?" Tyulkaol, yoqhhaeteel lye yoqhhaeq yaol lyeqdu biq vae.
35 Yesu laoq yoqhhaeteel lye yoqhhaeq yaol lyeqdu biq vae lye gaeq hhei biq, aeqnaol yoqhhaeq yaol deelpuq hhei biq fu, yoqhhaeq'ae gee biq: "Nol Cholyaeq Yaqyo'ae xiangxinl lilmaeq?" 36 Yoqhhaeq gee: "Hhaoqsongl o, aeqsul laoq Cholyaeq Yaqyo maeq, ngael yoqhhaeq'ae xiangxinl maoq yae." 37 Yesu gee: "Nol yoqhhaeq yaol mol vae, yaeqmeel noq nyegael saeziq gee'naeq e qiq hhaeq laoq yoqhhaeq ngeelvae." 38 Tyutaeq gee: "Hhaoqsongl o, ngael xiangxinl lil." Kaol yoqhhaeq Yesu'ae vuqduqtongq biq. 39 Yesu gee: "Ngael milcaeq taq'ae lael mael laoq, shenqpanl yi aeqlil, kaol maeq mol congl hael yaol bi mol congl lael, mol congl hael yaol laoq daoldaolmyel mabyeq bi peqyil maoqlye lil."
40 Yesu nyegael qiqgael baelzhol e Faqlilsail cholyaeq qiq miq saeziq xihael gaeq hhei biq laol, gee: "Ngaeteel eiq mabyeqbyeq yil hhaemaeq?" 41 Yesu yoqhhaeteel'ae gee biq: "Noteel laoq mabyeq kaollaoq, golsiq maqza vae; ngeelfeiq, yaeqmeel noteel gee 'Ngaeteel mol congl lil', tyulkaol, noteel laoq golsiq za wae siq."