Maeqmeeqmyel zongl fu eetyeq biq e haeqmiyaeq
8
Yesu Zhoqcae Geeqzhoq'ae li vae. 2 Baezulbaegeq fu, Yesu sholhaol vae yol hoqli. Cholyaeqhael yoqhhaeq tyuqvae keelli gil, kaol yoqhhaeq zholgae hheikaol yoqhhaeteel'ae geemyeq gil biq. 3 Momil e saeziq mael loq e laqkiqhael kaol Faqlilsail cholyaeqhael lye, ochoq nyegael xinqlalmyel zongl fu eetyeq biq e cholhae aeqmae yaol sheeqlaeq, kaol yoqhhaeq yaol cholyaeqhael onglci'ae bi haoqtul deelhhei, 4 Kaol Yesu'ae gee biq: "Laoqsi, cholhae aeqmae xitaeq laoq ochoq nyegael xinqlalmyel zongl fu eetyeq biq hhae. 5 Moxi laoq lilfaq mael taq'ae, xilnye cholhae aeqmae yaol haqlo maellye beiqsil hhei lye minllinl gil laeq hhae, nol haelmillye nyuq lilmaeq?" 6 Yoqhhaeteel xilnye gee mael laoq, Yesu'ae shilfu maoqlye hhae, kaol yoqhhaeq geeba hhei maellye konglgaol biq maoqlye hhae. Ngeelfeiq, Yesu laoq dolmoqmoq gayil, kaol laqnyul maellye milcaeq vae zil cu hhae. 7 Yoqhhaeteel maqqyemyel Yesu'ae naelhaeq biq, kaol Yesu dolcheq deiqzhoq hhei, kaol gee: "Noteel onglci'ae aeqsul golsiq maqza e cholyaeq lil lye kaollaoq, tyutaeq laoq laefuqmyel haqlo heilqei hheikaol yoqhhaeq'ae beiq hhei biq." 8 Yoqhhaeq gee byel hhei'laol, dolmoq yol moq gayil kaol milcaeq vae zil cu. 9 Yoqhhaeteel saeziq xihael gaeq hhei biq laol, yaeqmoqhael laefuq deel hhei'laol, qiqhhaeq qiqhhaeq lye deelsae byel vae, Yesu kaol tyuqvae haoqtul deelhhei e cholhae aeqmae tyutaeq maoq maeq zholdeelsaeq'ae. 10 Yesu dolcheq deiqzhoq hheikaol, yoqhhaeq'ae naelhaeq biq: "Cholhae aeqmae, yoqhhaeteel haeqvae zhol hhaemaeq? Qiq hhaeq eiq noq'ae golsiq za'ae lye maeq gee laeq maeq?" 11 Yoqhhaeq gee: "Hhaoqsongl o! Maeq gee laeq'ae." Yesu gee: "Ngael eiq noq'ae golsiq za'ae lye maeq gee laeqngeel. Deel oq, saeq ae'lye aeqnaol laoq golsiq haeq zonglpizaeq oq."Yesu laoq haelzhol cholyaeq e aeqcael'ae
12 Yesu cholyaeqhael'ae yol gee biq: "Ngael laoq milcaeq taq e aeqcael lil, ngaeq'ae cho'lyeq e cholyaeqhael laoq nahongqlye vae maeq deel'ae, kaol aeqyil e aeqcael mael hhamul'ae." 13 Kaol Faqlilsail cholyaeq yoqhhaeq'ae gee biq: "Nol aeqyoyoq'ae zoqzenlkeizaeq hoq hhae, kaol noq e zoqzenl mael aeqdilmyel maeqngeel'ae." 14 Yesu geehoq biq: "Ngael ngaeq'ae zoqzenl keiqzaeq feiq, ngaeq e zoqzenl mael aeqdilmyel hhae, ngael laoq ngael haeqvae lye lael, kaol haeqvae yil maoqlye loq kaollil. Ngeelfeiq, noteel laoq ngael haeqvae lye lael, kaol haeqvae yil maoqlye hhae lye maeq loq'ae. 15 Noteel cholyaeq e nildu'ae fu hhei'laol cholyaeq'ae panlduanl hhae, ngeelfeiq, ngael laoq qiq hhaeq vae eiq maeq panlduanl yil. 16 Ngael cholyaeq'ae panlduanl kaol'eiq, ngael panlduanl mael laoq hoq hhae, ngael laoq ngael qiq hhaeq myel panlduanl maeqngeel yil, ngaeq yaol moqheilheil duyi laq e Aeqdae ngaeq nyegael qiqgael bael panlduanl kaol'ae. 17 Noteel e lilfaq taq'ae cu deelhhei: 'Niq nulhhaeq myel zoqzenl kaolmaoqlaol aeqdilmyel ngeel'ae lye maeq hhae gee'ae.' 18 Ngael ngaeq gae'lye zoqzenlkei, ngaeq yaol moqheilheil duyi laq e Aeqdae eiq ngaeq gae'lye zoqzenl bael kei laeq'ae." 19 Yoqhhaeteel yoqhhaeq'ae naelhaeq biq: "Noq e aeqdae haeqvae zhol hhaemaeq?" Yesu geehoq biq: "Noteel ngaeq yaol maeq loq, ngaedae yaol eiq maeq loq'ae; noteel ngaeq yaol loq kaollaoq, ngaedae yaol eiq loq vae." 20 Saeziq xihael laoq Yesu sholhaol e dyuqbaq heildeel e qiq ssul vae lye, cholyaeqhael'ae geemyeq biq fu gee e saeziq'ae. Tyuqfu, yoqhhaeq'ae qiq hhaeq eiq maeq eetyeq biq'ae siq, yoqhhaeq e naohaeq maeq keel siq kaol'ae.
Jidu'ae maeq xiangxinl hael laoq golsiq onglci'ae hhae sil ngeelvae
21 Yesu yoqhhaeteel'ae yol gee biq: "Ngael yil maoq vae, noteel ngaeq yaol saelpo maoqlye hhae, kaol aeqyoyoq e golsiq onglci'ae lye hhae sil ngeelvae. Ngael yil maoqlye e milcaeq vae noteel maeq keelyil ongl'ae." 22 Tyulkaol, Yoqtail cholyaeqhael gee: "Yoqhhaeq 'ngael yil maoqlye vae noteel maeq keelyil ongl'ae' lye gee, aeqyoq zonglsilzaeqhoq maoqlye hhaemaeq?" 23 Yesu yoqhhaeteel'ae gee biq: "Noteel laoq aq'oq ae'lye lael hhae, ngael laoq aqtaq ae'lye lael lil; noteel laoq milcaeq xilmael taq hhae lye hhae, ngeelfeiq, ngael laoq milcaeq xilmael taq hhae lye maeqngeel yil. 24 Tyulkaol, ngael noteel'ae gee biq, noteel laoq aeqyoyoq e golsiq onglci'ae hhae sil hhae; noteel 'ngael laoq tyutaeq'ae' lye maeq xiangxinl laeq kaollaoq, aeqyoyoq e golsiq onglci'ae hhae sil ngeelvae." 25 Yoqhhaeteel yoqhhaeq'ae naelhaeq biq: "Nol aeqsul lilmaeq?" Yesu gee: "Ngael zhoqmyel fu ae'lye noteel'ae geedu gol biq vae maeqngeel maeq? 26 Ngael noteel'ae gee maoq e saeziq, kaol noteel haelmillye hhae lye gee e saeziq zhee za siq; ngeelfeiq, ngaeq yaol moqheilheil duyi laq qiq hhaeq laoq aeqdilmyel hhae, ngael yoqhhaeq tyuqvae lye gaeq hhei hael, milcaeq taq e cholyaeqhael'ae geegaeq hhei biq wae." 27 Yoqhhaeteel laoq Yesu mqmae Aeqdae'ae gee hhae lye maeq loq biq'ae. 28 Tyulkaol, Yesu gee: "Noteel lye Cholyaeq Yaqyo yaol deiqqei hhei aeqnaol, 'ngael laoq tyutaeq'ae' lye hhae loq wae, kaol ngael laoq ngaeq gae'lye qiqgiq maeq zongl'ae lye hhae loq; ngael gee e saeziq xihael laoq ngaedae ngaeq'ae geemyeq laeq laoqmyel hhae. 29 Ngaeq yaol moqheilheil duyi laq e tyutaeq, ngaeq nyegael qiqgael baelzhol'ae, yoqhhaeq ngaeq'ae qiq hhaeq myel maeq bi zholdeelsaeq laeq'ae, ngael duqlye yoqhhaeq'ae bi hhaol e silqinq zongl kaol'ae." 30 Yesu saeziq xihael gee fu, haelnaeqmyel cholyaeq yoqhhaeq'ae xiangxinl vae.
Zhen'liq mael noteel'ae bi zilyoq laeq'ae
31 Yesu aeqyoq'ae xiangxinl e Yoqtail cholyaeqhael'ae gee biq: "Noteel ngaeq e saeziq mael zongl gaeyil kaollaoq, aeqdilmyel ngaeq e laqcaq ngeelvae. 32 Noteel laoq zhen'liq loq wae, zhen'liq noteel'ae bi zilyoq laeq wae." 33 Yoqhhaeteel gee: "Ngaeteel laoq Yalboqlahanl e houldail lil, qiqzael eiq ochoq e hhaeq'ongq ongqzaeq e cholyaeq maq geiq gol yil, nol haelmillyekaol 'noteel'ae bi zilyoq laeqngeel' lye gee lilmaeq?" 34 Yesu gee: "Ngael aeqdilmyel noteel'ae geegaeq gil laeqngeel, golsiq hael zonglpizaeq e cholyaeq laoq golsiq e hhaeq'ongq ongqzaeq e cholyaeq ngeelvae. 35 Hhaeq'ongq ongqzaeq e cholyaeq laoq laoqhaol vae haeqfu keellye maeq hhae zhol gaeyil'ae, ngeelfeiq, yaqyo laoq haeqfu keellye laoqhaol vae hhae zhol gaeyil'ae. 36 Tyulkaol, Momil e Yaqyo noteel'ae bi zilyoq laeq kaollaoq, noteel laoq aeqdilmyel hhae zilyoq wae. 37 Ngael laoq noteel Yalboqlahanl e houldail'ae lye loq lil, ngeelfeiq, noteel ngaeq yaol xyeq goq biq, noteel e neemae mael'ae ngael gee e saeziq mael maeq zoq dyel kaol'ae. 38 Ngael haelgee hael laoq, ngael Aeqdae tyuqvae lye mol aeqlil; ngeelfeiq, noteel haelzonglhael laoq, noteel e aeqdae tyuqvae lye gaeq hhei biq hhae."
Niqhaeq haeqmae e yaeqguqhael
39 Yoqhhaeteel Yesu'ae gee biq: "Ngaeteel e aeqpyuq aeqdae laoq Yalboqlahanl'ae." Yesu yoqhhaeteel'ae gee biq: "Noteel Yalboqlahanl e houldail kaollaoq, Yalboqlahanl haelzongl e silqinq mael zongl vae. 40 Yaeqmeel ngael laoq Momil tyuqvae lye gaeq hhei e zhen'liq mael noteel'ae geegaeq biq, ngeelfeiq, noteel laoq ngaeq yaol xyeq goq biq, Yalboqlahanl laoq xilnye silqinq maeq zongl gol'ae. 41 Noteel zongl mael laoq, noteel e aeqdaehael zongl maoqlye mael ngeelvae." Yoqhhaeteel gee: "Ngaeteel laoq xinqlalmyel zongl e haeqmiyaeq lye bo hhei maeqngeel'ae; ngaeteel'ae Aeqdae qiq hhaeq wae, yoqhhaeq laoq Momil ngeelvae." 42 Yesu yoqhhaeteel'ae gee biq: "Momil noteel e Aeqdae kaollaoq, noteel ngaeq'ae gaeq laeq vae, ngael laoq Momil tyuqvae lye lael kaollil; ngael saeqvae keellael wae. Ngael yi maoqlyekaol yi maeqngeel yil, Momil lye ngaeq yaol moqheilheil duyi laq hhae. 43 Noteel aeqcheekaol ngaeq e saeziq mael maeq loq gil laeq hhaemaeq? Ngaeq e saeziq mael noteel maeq naelhaeq do hhei kaol'ae. 44 Noteel laoq noteel e aeqdae niqhaeq haeqmae ae'lye lael hhae, kaol noteel e aeqdae haelmillye zongl goq laol noteel eiq bael zongl goq biq. Yoqhhaeq laoq zhoqmyel fu ae'lye cholyaeq xyeq hhae, zhen'liq boq'ae qiqzael eiq maeq haoqtul nae, yoqhhaeq e neemae onglci'ae zhen'liq maq zoq kaol'ae. Yoqhhaeq zaqgiqgiq mael laoq, aeqyoyoq ae'lye lael hhae, yoqhhaeq laoq aeqdilmyel zaqgiqgiq e qiq hhaeq'ae, kaol zaqgiqgiq e cholyaeq e aeqdae kaol'ae. 45 Ngael zhen'liq gee, ngeelfeiq, noteel xilmael gae'lye ngaeq'ae maeq xiangxinl laeq'ae. 46 Noteel onglci'ae ngael laoq golsiq za e cholyaeq'ae lye aeqsul geedu hhei ongl lilmaeq? Ngael gee mael laoq zhen'liq kaollaoq, noteel laoq aeqcheekaol ngaeq'ae maeq xiangxinl gil laeq lilmaeq? 47 Momil ae'lye lael hael laoq, Momil e saeziq mael naelhaeq'ae; noteel maeq naelhaeq mael laoq, noteel laoq Momil ae'lye lael maeqngeel kaol'ae."
Yalboqlahanl laefuq'ae Yesu laoq zhol wae
48 Yoqtail cholyaeqhael Yesu'ae gee biq: "Ngaeteel nol laoq Saqmaqlilyal cholyaeq'ae, kaol niqhaeq guqzaeq li biq hhae lye gee mael, hoq maeqngeel maeq?" 49 Yesu geehoq biq: "Ngaeq'ae niqhaeq maeq guqzaeq'ae. Ngael laoq ngaeq e Aeqdae'ae zunjinl biq lil, ngeelfeiq, noteel laoq ngaeq'ae maeq zunjinl laeq'ae. 50 Ngael ngaeq'ae rongqyaol bi za maoqlye maeq zongl yil, ngeelfeiq, ngaeq'ae rongqyaol bi za laq qiq hhaeq zhol'ae, yoqhhaeq cholyaeq'ae panlduanl hhae. 51 Ngael aeqdilmyel noteel'ae geegaeq gil laeqngeel, cholyaeq ngaeq e saeziq mael zongl gaeyil kaollaoq, sil mael qiqzael eiq maeq puqlael kiq'ae." 52 Yoqtail cholyaeq yoqhhaeq'ae gee biq: "Yaeqmeel ngaeteel laoq noq'ae niqhaeq guqzaeq li biq hhae lye aeqdilmyel loq wae. Yalboqlahanl sil vae, xianzhi eiq sil vae, nol laoq 'cholyaeq ngaeq e saeziq mael zongl gaeyil kaollaoq, sil mael qiqzael eiq maeq puqlael kiq'ae' lye gee, 53 Nol laoq ngaeteel e aeqpyuq aeqdae Yalboqlahanl taq'ae hhael heeq lil lye laeq? Yoqhhaeq sil vae, xianzhihael eiq sil vae; nol laoq aeqchee cholyaeq yae lye kei laeq hhaemaeq?" 54 Yesu geehoq biq: "Ngael ngaeq'ae rongqyaol za lil lye zongl kaollaoq, ngaeq e rongqyaol mael laoq qiqgiq yilsi maqza'ae, ngaeq'ae rongqyaol bi za laq e qiq hhaeq laoq ngaeq e Aeqdae'ae, noteel gee e noteel e Momil'ae lye gee e tyutaeq ngeelvae. 55 Ngeelfeiq, noteel yoqhhaeq'ae maeq loq'ae, ngael laoq loq lil. Ngael yoqhhaeq yaol maeq loq yae lye gee kaollaoq, ngael laoq noteel laoqmyel zaqgiqgiq e cholyaeq ngeelvae; ngeelfeiq, ngael laoq yoqhhaeq yaol loq lil, kaol yoqhhaeq e saeziq mael eiq zongl gaeyil lil. 56 Noteel e aeqpyuq aeqdae Yalboqlahanl, ngaeq yaol hhae mol biq naohaeq'ae zhee hhaol biq'ae, mol hhei biq laol, yoqhhaeq zhee hhaol biq'ae." 57 Yoqtail cholyaeqhael yoqhhaeq'ae gee biq: "Nol ngaeqqyel hoq dyel'eiq maq zoq siq, haelmillyekaol Yalboqlahanl yaol mol gol laeq?" 58 Yesu gee: "Ngael aeqdilmyel noteel'ae geegaeq gil laeqngeel, Yalboqlahanl dyeqlal laefuq'ae, ngael laoq zhol oqyil vae." 59 Tyulkaol, yoqhhaeteel haqlo baqqei hheikaol yoqhhaeq'ae beiq biq maoqlye zongl hhae. Ngeelfeiq, Yesu laoq hoqhhaq hhei, kaol sholhaol ae'lye duyil hhei vae.