Yesu yaol Biqlado'ae eemoq li biq
23
Tyulkaol, Cholyaeqhael gilzuqmyel tullael, kaol Yesu yaol Biqlado yiqsi'ae eemoq li biq. 2 Yoqhhaeq'ae konglgaol gil biq, gee: "Ngaeteel laoq cholyaeq xitaeq ngaeteel e minqcuq e cholyaeqhael'ae Loqmaq zenlfuq boq'ae haeq pol lye cheeqmu biq mael, Kaiqsa'ae shuil haeq shangl biq lye diqqye mael, yoqhhaeq laoq Jidu kaol zongmae lil lye geezaeq mael saelpodu hhei aeqwae." 3 Biqlado Yesu'ae naelhaeq biq: "Nol laoq Yoqtail cholyaeq e zongmae lilmaeq?" Yesu geehoq biq: "Nol gee hhae." 4 Biqlado jilsizhangqhael kaol cholyaeqhael'ae gee biq: "Ngael cholyaeq xitaeq'ae aeqchee golsiq za'ae lye qiqgiq eiq maeq saelpodu hhei yil." 5 Ngeelfeiq, yoqhhaeteel nyeq'ei hhael gee tullaeq, gee: "Yoqhhaeq Yoqtail halza milcaeq vae cholyaeqhael'ae geemyeq kaol cheeqmu gil biq, laefuq laoq Ja'lillil vae zongl hhae, yaeqmeel laoq saeqvae keellael aeqwae."Xi'lyul e yiqsiboq ae'lye Yesu'ae zhiqmoqkae biq
6 Biqlado gaeq hhei biq laol, cholyaeqhael'ae naelhaeq biq: "Xitaeq laoq Ja'lillil cholyaeq maeq?" 7 Biqlado Yesu laoq Xi'lyul Antiqpal hhae guanq hhae lye loq hhei biq laol, yoqhhaeq yaol Xi'lyul tyuqvae bi sheeqyil vae; tyuqfu Xi'lyul laoq Ye'lulsa'lenq'ae zhol hhae. 8 Xi'lyul Yesu yaol mol hhei biq laol zhee hhaol biq'ae. Yoqhhaeq Yesu haelzongl e silqinqhael gaeq gol biq, haeqfu'ae'lye yoqhhaeq yaol mol goq biq, kaol yoqhhaeq shenqjiq zongl mael'ae fu maoqlye chifuzaeq kaol'ae. 9 Tyulkaol, yoqhhaeq Yesu'ae yulnye xilnye lye zhee naelhaeq biq'ae, ngeelfeiq, Yesu qiq doq eiq maeq geehoq biq'ae. 10 Jilsizhangqhael kaol Momil e saeziq mael loq e laqkiqhael haoqtul deelhhei, kaol Yesu'ae maqqyemyel konglgaol gil biq'ae. 11 Xi'lyul kaol yoqhhaeq e dangbinkei e cholyaeqhael Yesu'ae fudyul biq'ae, yoqhhaeq'ae pasa biq, yoqhhaeq'ae aelhongq zhigaqlye dumda hhei biq, kaol yoqhhaeq yaol Biqlado tyuqvae sheeq hoqli biq vae. 12 Xi'lyul kaol Biqlado laefuq laoq chouqrenq'ae, tyuqfu qiq nao laoq yelchoq peqlal vae.
Cholyaeqhael Yesu yaol shiqziljal mael'ae diqcheeq biq lye gul gil'ae
13 Biqlado lye jilsizhangqhael, zhiqmoq yoheeqhael kaol cholyaeqhael gul'eeq laeq. 14 Yoqhhaeteel'ae gee biq: "Noteel cholyaeq xitaeq yaol ngaeq saeqvae ee'laeq, yoqhhaeq cholyaeqhael'ae Loqmaq zenlfuq boq'ae haeq pol lye cheeqmu biq'ae lye gee gil. Yaeqmeel, ngael noteel e yiqsiboq ae'lye naelhaeq yo wae. Noteel cholyaeq xitaeq aeqchee aeqchee golsiq za'ae lye konglgaol gil biq mael, ngael yoqhhaeq'ae qiqgiq golsiq za'ae lye maeq saelpodu hhei yil. 15 Xi'lyul eiq yoqhhaeq'ae golsiq za'ae lye maeq saelpodu hhei ongl biq'ae, kaol ngaeq saeqvae bi sheeq hoqlaeq vae, xilnye fu hhei'laol yoqhhaeq hhae sil e silqinq qiqgiq maeq zongl gol'ae. 16 Tyulkaol, ngael yoqhhaeq'ae diq biq, kaol yoqhhaeq yaol pyeqduhoq hhei biq maoq."a 18 Ngeelfeiq, cholyaeqhael yotyel haeqheemyel hhaellaelmyel gul: "Cholyaeq xitaeq yaol xyeqsil hhei, ngaeteel'ae Ba'laba yaol pyeqduhoq hhei laq!" 19 Ba'laba xitaeq laoq, milmae heeqmyel vae aeqvuqlaelvuqmyel zongl gil fu cholyaeq xyeq yo hhae, kaol laoqgaiqkei laoqhaol vae ee'longl biq hhae. 20 Biqlado laoq Yesu yaol pyeqduhoq hhei goq biq, kaol yoqhhaeteel'ae saeziq yol gee biq hhae. 21 Ngeelfeiq, yoqhhaeteel maqqyemyel gul gil: "Yoqhhaeq yaol shiqziljal mael'ae diqcheeq biq! Yoqhhaeq yaol shiqziljal mael'ae diqcheeq biq!" 22 Biqlado yoqhhaeteel'ae dilsan cil gee biq: "Xitaeq aeqchee duqlaq e silqinq zongl hhaemaeq? Ngael yoqhhaeq hhae sil e golsiq za'ae lye maeq saelpodu hhei ongl yae. Tyulkaol, ngael yoqhhaeq'ae diq biq kaol pyeqduhoq biq maoq." 23 Ngeelfeiq, yoqhhaeteel yotyel haeqheemyel gul gil'ae, Biqlado'ae Yesu yaol shiqziljal mael'ae diqcheeq biq lye maqqyemyel geezaeq biq, kaol yoqhhaeteel e yotyel maellye yinqzaeq vae. 24 Tyulkaol, Biqlado laoq yoqhhaeteel hael geezaeq laoqmyel zongl vae. 25 Yoqhhaeq lye yoqhhaeteel hael geezaeq laoqmyel aeqvuqlaelvuqmyel zongl gil fu, cholyaeq xyeqsil aeqkaol laoqgaiqkei laoqhaol vae koqlongl li biq e cholyaeq tyutaeq yaol pyeqduhoq hhei biq vae, ngeelfeiq, Yesu yaol laoq yoqhhaeteel'ae eemoq biq, kaol yoqhhaeteel e yilsi mael laoqmyel bi zongl vae.
Yesu yaol shiqziljal mael'ae diqcheeq biq
26 Yoqhhaeteel lye Yesu yaol sheeqsae yil fu, pusiq ae'lye lael e Guqlilnail cholyaeq Ximenq yaol eetyeq biq, kaol shiqziljal mael yoqhhaeq e dolcheq mael'ae baqcheeq da hheikaol yoqhhaeq'ae bi pi'ae, kaol yoqhhaeq yaol Yesu e aeqnaolboq'ae bi cho'lyeq hhae. 27 Cholyaeq haelnaeqmyel Yesu'ae cho'lyeq deelhhei, cholhae aeqmaehael Yesu gae'lye nyul sil maoqmyel nyul gil'ae. 28 Yesu zipol hoqlael kaol yoqhhaeteel'ae gee biq: "Ye'lulsa'lenq e yaeqmiqhael o! Ngaeq gae'lye haeq nyul gil, noteel kaol noteel e yaeqmiq yaqyohael gae'lye nyul maoqhhae. 29 Aeqgael tyuqfu naohaeq keellael laol, cholyaeqhael gee: 'Yaeqguq maeq bo kiq hael, yaeqguq maeq pi gol hael, albye'ae aeqchil maeq bi dol gol hael geeqlongq meeq vae!'
30 Tyuqfu cholyaeq laoq geeqzhoq zhoqmae mael'ae gee biq:
'Ngaeteel e aeqhhaol taq'ae leeqcheeq dayi!'
Geeqzhoq zhoqyaeq mael'ae gee biq:
'Ngaeteel yaol yaq vuq laq!'
31 Yoqhhaeteel aelbol nyuljyeqlye fu ae'lye xilnye zongl'ae; kuga fu laoq haelmillye zongl laeq?"
32 Yoqhhaeteel lye baeqjyelboq e ee'longl biq e cholyaeq niq nulhhaeq yaol eiq sheeqlaeq kaol Yesu nyegael qiqgael zonglsil yil maoqlye hhae. 33 "Cholyaeq Vuqho" lye gul e milcaeq vae keellael laol, Yesu yaol shiqziljal taq'ae diqcheeq biq, baeqjyelboq e koqlongl li biq e cholyaeq niq nulhhaeq yaol eiq diqcheeq biq, qiq hhaeq laoq laqsseqboq'ae, qiq hhaeq laoq laeqbaelboq'ae. 34 Yesu gee: "Aeqdae o, yoqhhaeteel'ae shelmianq biq! Yoqhhaeteel aeqyoyoq aeqchee zongl lye maeq loq'ae." Dangbinkei e cholyaeqhael suqhhaq o fufu gil'ae, kaol yoqhhaeq e aelhongq mael byelzaeq gil vae. 35 Cholyaeqhael haoqtul deelhhei kaol fu gil'ae, yoheeqhael yoqhhaeq'ae eel gil biq, gee: "Yoqhhaeq ochoq yaol jiul vae, yoqhhaeq laoq Momil lye saelpodu hhei e Jidu kaollaoq, aeqyoq yaol eiq jiulzaeqhoq hhei ongl'ae!" 36 Dangbinkei e cholyaeqhael da'li kaol yoqhhaeq'ae pasa biq, zilqyel mael baq hheikaol yoqhhaeq'ae bi dol hhae. 37 Gee: "Nol Yoqtail cholyaeq e zongmae kaollaoq, noq'ae jiulzaeqhoq hhei!" 38 Yesu e vuqduq holtaqboq e tyelpyuq mael'ae cu deelhhei: "Xitaeq laoq Yoqtail cholyaeq e zongmae'ae."
39 Bael diqcheeq biq e ee'longl biq e cholyaeqhael onglci e qiq hhaeq yoqhhaeq'ae geekyuq biq, gee: "Nol Jidu maeqngeel yil maeq? Noq yaol kaol ngaeteel yaol jiul hhei laeq!" 40 Baeqjyelboq e qiq hhaeq tyutaeq'ae gaezaeq biq: "Noq yaol eiq qiqgael bi diqcheeq hhae, Momil'ae maq gu laq wae siq maeq? 41 Aedeeteel'ae xilnye bi zongl mael laoq hoq hhae, aedeeteel laoq aeqdilmyel zonglba kaol hhae bi chenqfaq hhae, ngeelfeiq, cholyaeq xitaeq laoq qiqgiq maeq zonglba yo'ae." 42 Yoqhhaeq Yesu'ae yol gee: "Yesu o! Nol noq e goqja nyegael qiqgael yi fu, nol ngaeq'ae nyuqdeel laeq." 43 Yesu yoqhhaeq'ae gee biq: "Ngael aeqdilmyel noq'ae geegaeq laeqngeel, yaeqnao nol laoq ngaeq nyegael zhee hhaol gae'lael aeqmyel Mqmae Zongqdei vae qiqgael hhae zhol wae."
Yesu sil fu haelmillye peqlal
44-45 Naoongl longlmae ae'lye mael xalvuq sandianq fu keellye, neelmae mael aeqcael maeq mol laelkiq vae, tyulkaol, milcaeq holtaq'ae haeqvae eiq nahongqlye hhae. Sholhaol e geqchiq haeqpael mael, niq pa gapa hhei. 46 Yesu yotyel haeqheemyel gul'ae: "Aeqdae o! Ngael ngaeq e yohael mael noq e aqlaq mael'ae heilmoq aeqwae." Saeziq xilmael gee byel hhei'laol saeq'ol qye'li vae. 47 Qiqhael (100) cholyaeq e zhiqmoq peqlal e silqinq mael mol hhei biq laol, rongqyaol mael Momil'ae biq biq, gee: "Xitaeq laoq aeqdilmyel gongyil e cholyaeq she!" 48 Silqinq xilmael'ae fu gil maoqlye zhol'eeq deelhhei e cholyaeqhael, hael peqlal e silqinq mael mol hhei biq laol, gilzuqmyel neeto oheiq'ae diq diq myel hoqyil gil vae. 49 Yesu'ae loq e cholyaeqhael kaol Ja'lillil ae'lye Yesu'ae duqlye cho'lyeq deelhhei e cholhae aeqmaehael, gilzuqmyel gaelmaolsae'lye haoqtul deelhhei kaol silqinq xihael fu gil hhae.
Yesu yaol fuq'ongl'ae baqduqm biq
50 Cholmil mael Yoqsel lye gul biq e cholyaeq qiq hhaeq zhol'ae, yoqhhaeq laoq Yoqtail Yilhuil onglci e qiq hhaeq'ae, cholyaeq zhee mul kiq, neemae zhee meeq, zaqgiq maqgiq'ae. 51 Kaol Yoqtail milcaeq e Yallilmaqtail milmae heeqmyel e cholyaeq'ae, kaol haeqfu eiq Momil e Goqja mael'ae panlwangl deelzaeq hhei hhae. Yoqhhaeq tyuqvae milcaeq e zhiqmoqkae myel vae zhol e baeqjyelboq e cholyaeqhael haelzongl laoqmyel maeq bael zongl'ae. 52 Xitaeq Biqlado'ae saelpo yil, Yesu e aeqhhaol mael baq laq lye geezaeq biq. 53 Yoqhhaeq lye aeqhhaol mael pyeqgae hhei'laol, paelpul maellye leeltyeq biq, haqlo loongl e geeqzhoq vae diqkeiq du hhei e fuq'ongl'ae baqdeel hhei, fuq'ongl tyulmael laoq cholyaeq maq baqduqm gol wae siq. 54 Tyuqfu qiq nao laoq paeqgaelsael meeq deel e qiq nao'ae, qiqlaq lye laol anxiqriq keellael goqbiq vae. 55 Yesu nyegael Ja'lillil ae'lye qiqgael lael e cholhae aeqmaehael aeqnaolboq'ae cho'lyeq deelhhei hhae. Yoqhhaeteel fuq'ongl kaol yoqhhaeq e aeqhhaol mael haelmillye baqduqm hhae lye mol vae. 56 Kaol hoqli laol xiang'liaol kaol xianggao mael paeqgaelsael meeq deelhhei yil, yoqhhaeteel anxiqriq'ae gailminl taq'ae gee laoqmyel hhaeqnaeqnaeq gil vae.