Yesu yaol Biqlado zael'ae ee'li biq
27
Mqshoq keellael laol, jilsizhangqhael kaol cholyaeqhael e zhangqlaoqhael Yesu yaol zonglsil biq maoqlye geedazaq gil hhae, 2 Kaol yoqhhaeq yaol kaltoq biq, ee yil kaol Biqlado zongqdu zael'ae eemoq yil biq.Yoqdal sil vae
3 Tyuqfu, Yesu yaol yotyel maqdumyel ongqzaeq biq e Yoqdal, Yesu yaol golsiq za'ae lye gee biq vae lye mol hhei biq laol, xilnye haeq zongl maoq ngeelzhol'ae yae lye nyuqhoq li biq, kaol pulziq tyu suqqyel mael jilsizhangqhael kaol zhangqlaoqhael'ae heilmoq hoq hhei lael biq, 4 Gee: "Ngaeq lye qiqgiq maeq zonglba yo e cholyaeq yaol yotyel maqdumyel ongqzaeq biq, kaol ngael golsiq za yaevae." aYoqhhaeteel gee: "Ngaeteel'ae aeqchee guanqyo laeq? Nol aeqyoyoq pi oq!" 5 Kaol Yoqdal pulziq tyulmael heelhaol vae beiqdeelsaeq, duyil kaol cheeqsil vae. 6 Jilsizhangqhael pulziq mael o da hoq hhei, gee: "Xilmael laoq siq e hhaeqpyuq'ae, sholhaol e dyuqbaq heil do myel vae maeq hhae heil do'li'ae." 7 Kaol yoqhhaeteel geedazaq gil, kaol dyuqbaq tyulmael lye, milcaeq maellye moqgoq pedu e cholyaeq ae'lye haeldye qiq koq vul hhei, kaol nilpu ae'lye lael e cholyaeqhael yaol baqduqm e aeqhael geiq hhae. 8 Tyulkaol, haeldye tyulmael yaeqmeel keellye "Siq e haeldye" lye gul hhae. 9-10 Xilmael laoq Ye'lilmiq xianzhi gee gol e saeziq mael peqlal hhae, gee: "Yoqhhaeteel pulziq tyu suqqyel maellye, milcaeq maellye moqgoq pedu e cholyaeq ae'lye haeldye qiq koq vul hhei, pulziq tyulmael laoq, Yiqsellyel cholyaeq lye yoqhhaeq'ae guqjil hhei biq e hhaeqpyuq mael ngeelvae; xilmael laoq Hhaoqsongl ngaeq'ae moqheilheil laeq laoqmyel hhae."
Yesu yaol Biqlado'ae eemoq li biq
11 Yesu zongqdu e yiqsi vae haoqtul deelhhei, zongqdu yoqhhaeq'ae naelhaeq biq: "Nol Yoqtail cholyaeq e zongmae lilmaeq?" Yesu gee: "Nol gee hhae." 12 Jilsizhangqhael kaol zhangqlaoqhael yoqhhaeq'ae konglgaol biq fu, yoqhhaeq qiqgiq eiq maeq geehoq'ae. 13 Biqlado yoqhhaeq'ae gee biq: "Yoqhhaeteel zoqzenlkei kaol noq'ae xuldyulmyel zhiqmoqkae e silqinq mael, nol maeq gaeq yil maeq?" 14 Yesu maeq gee'naeqhoq biq'ae, saeziq qiq doq eiq maeq gee'ae, tyulkaol, zongqdu gaqmaq zhee zuq li biq'ae.
Yesu yaol shiqziljal mael'ae diqcheeq biq maoqlye hhae
15 Haeqfu qiqzael zaeqnao xilmael keellael fu, zongqdu haelzael'ae laoqmyel zongl e qiq mal za'ae, cholyaeqhael'ae yoqhhaeteel bi pyeqduhoq hhei goq e koqlongl deelhhei e cholyaeq qiq hhaeq yaol, pyeqduhoq hhei biq maoqhhae. 16 Tyuqfu, aeqsul eiq loq e Ba'laba lye gul biq e koqlongl deelhhei e cholyaeq qiq hhaeq zhol'ae. 17 Cholyaeqhael zhol'eeq deelhhei fu, Biqlado yoqhhaeteel'ae gee biq: "Noteel laoq ngael noteel'ae haetaeq yaol bi pyeqduhoq hhei goq yae maeq? Ba'laba laeq? Jidu lye gul biq e Yesu laeq?" 18 Zongqdu laoq yoqhhaeteel lye yoqhhaeq yaol eemoq laeq mael laoq, heiqcilnael gil biq gae'lye hhae lye loq kaol'ae. 19 Yoqhhaeq shenqpanl e duqtyel mael'ae zhol deelhhei fu qiqlaq'ae, yoqhhaeq e haeqmiq cholyaeq yaol moqheilheil du hheikaol bi gee yi: "Ngael yaeqnao matu onglci'ae lye yoqhhaeq gae'lye zhollihhael maeqsael myel zongl laeq'ae, kaol gongyil e cholyaeq xitaeq'ae zongl gil biq e silqinq mael, nol teel eiq haeq bael guanq." 20 Jilsizhangqhael kaol zhangqlaoqhael cholyaeqhael'ae Ba'laba yaol pyeqduhoq hhei, Yesu yaol zonglsil hhei lye geezaeq gil lye tyuqcuq biq. 21 Zongqdu yoqhhaeteel'ae geehoq biq: "Cholyaeq xi niq nulhhaeq, noteel ngaeq yaol noteel'ae haetaeq yaol bi pyeqduhoq hhei goq yae maeq?" Yoqhhaeteel gee: "Ba'laba." 22 Biqlado gee: "Xilnye laol, Jidu lye gul biq e Yesu ngael yoqhhaeq'ae haelmillye zongl biq laeq?" Yoqhhaeteel gilzuqmyel gee: "Yoqhhaeq yaol shiqziljal mael'ae diqcheeq hhei!" 23 Zongqdu gee: "Aeqcheekaol laeq? Yoqhhaeq aeqchee duqlaq e silqinq zongl hhaemaeq?" Yoqhhaeteel nyeq'ei hhael gul tullaeq: "Yoqhhaeq yaol shiqziljal mael'ae diqcheeq hhei!" 24 Biqlado laoq gee kaol'eiq alngeiqmyel gee hhae, daoldaolmyel aeqvuqlaelvuqmyel zongl tul gil laeq goq biq'ae lye mol hhei biq, kaol eelcuq maellye cholyaeqhael e yiqsi ae'lye aqlaq ciq hhei, gee: "Cholyaeq xitaeq'ae siq bi yul e siq mael, golsiq mael ngaeq'ae maeq yo'lael, noteel aeqyoyoq pizaeq gil oq." 25 Cholyaeqhael gilzuqmyel geehoq biq: "Yoqhhaeq e siq mael ngaeteel kaol ngaeteel e yuqpaeq yuqnyul vae yo'lael biq aeqmeel!" 26 Tyulkaol, Biqlado lye Ba'laba yaol yoqhhaeteel'ae pyeqduhoq hhei biq, Yesu'ae caxu maellye zheq biq, kaol shiqziljal mael'ae diqcheeq yil lye cholyaeq'ae eemoq biq vae.
Dangbinkei hael Yesu'ae pasa biq
27 Zongqdu e dangbinkei cholyaeqhael lye Yesu yaol, zongqdu e laoqhaol vae sheeqli biq, kaol haelzhol e dangbinkei e cholyaeqhael yaol Yesu tyuqvae gul'eeq deelhhei. 28 Yoqhhaeteel lye yoqhhaeq e aelhongq mael heiga biq, kaol nyelna'na e poljye qiq ko dumda hhei biq, 29 Aelgong maellye zongmae vuqcongq zongldu hhei, kaol yoqhhaeq e vuqduq mael'ae congqda hhei biq, mol'ongq qiq kongq mael yoqhhaeq e laqsseq'ae baqmoq hhei biq, kaol yoqhhaeq e yiqsi vae vuqduqtongq gae hheikaol yoqhhaeq'ae pasa biq, gee: "Yoqtail cholyaeq e zongmae laoq maeq sil yilkiq'ae!" 30 Yoqhhaeq'ae eelcael mye biq, mol'ongq aelkongq maellye yoqhhaeq e vuqduq mael'ae diq biq. 31 Yoqhhaeteel pasa du hhei'laol, yoqhhaeq'ae poljye mael heiga biq, kaol aeqyoyoq e aelhongq mael dumda hoq hhei biq, yoqhhaeq yaol sheeq duyil kaol shiqziljal mael'ae diqcheeq yil biq maoqlye hhae.
Yesu yaol shiqziljal mael'ae diqcheeq biq
32 Yoqhhaeteel duyil fu, Ximenq lye gul biq e Guqlilnail cholyaeq qiq hhaeq deelpuq hhei biq, kaol Yesu e shiqziljal mael maeqnaelhaeq maeqzaeqmyel bi pi. 33 Yoqhhaeteel milcaeq qiqgael vae keellael, tyuqvae Gegeta lye gul hhae, Gegeta e yilsi laoq "Cholyaeq Vuqho Milcaeq" lye hhae. 34 Dangbinkei hael lye pyeqkeel mael zilbaeq mael'ae zongl keq hhei mael, Yesu'ae dol lye baqmoq hhei biq'ae. Yoqhhaeq dol fufu hhei'laol, maeq dol nae'ae. 35 Yoqhhaeteel lye yoqhhaeq yaol shiqziljal mael'ae diqcheeq biq laol, suqhhaq o maellye yoqhhaeq e aelhongq mael byelzaeq gil vae, 36 Kaol tyuqvae yol zhol deelhhei kaol yoqhhaeq yaol fu'qye deelhhei. 37 Yoqhhaeteel lye yoqhhaeq e vuqduq holtaqboq'ae, zonglba hhae lye mael tyelpyuq mael'ae cuda hheikaol diqcheeq da hhei, tyulmael taq'ae xilnye cu deelhhei: "Xitaeq laoq Yoqtail cholyaeq e zongmae Yesu'ae." 38 Tyuqfu, lolbiq diqkoqzaeq e cholyaeq niq nulhhaeq yoqhhaeq nyegael shiqziljal mael'ae bael diqcheeq deelhhei hhae, qiq hhaeq laoq laqsseqboq'ae, qiq hhaeq laoq laeqbaelboq'ae. 39 Tyuqvae lye deelpol duyil e cholyaeq yoqhhaeq'ae geefu biq, kaol vuqduq zheq'eel, 40 Gee: "Nol heelhaol mael cheqba hhei, kaol suq nao laol cutulhoq hhei ongl e qiq hhaeq, noq yaol jiulzaeqhoq hhei! Nol Momil e Yaqyo kaollaoq, shiqziljal taq ae'lye gaeyi!" 41 Jilsizhangqhael, Momil e saeziq mael loq e laqkiqhael, kaol zhangqlaoqhael eiq yoqhhaeq'ae tyulnye geefu biq, gee: 42 "Yoqhhaeq ochoq'ae jiul ongl, aeqyoyoq'ae laoq maeq jiul ongl'ae. Yoqhhaeq laoq Yiqsellyel cholyaeq e zongmae'ae, yaeqmeel shiqziljal taq ae'lye gaeyi laol, ngaeteel yoqhhaeq'ae xiangxinl hhaeq. 43 Yoqhhaeq Momil'ae xiangxinl'ae, Momil hhaeq lil lye kaollaoq, yaeqmeel ae'lye yoqhhaeq yaol jiul yi biq, yoqhhaeq laefuq 'Ngael laoq Momil e Yaqyo' lil lye gee gol kaol'ae." 44 Yoqhhaeq nyegael qiqgael bael diqcheeq deelhhei e lolbiq diqkoqzaeq e cholyaeq eiq yoqhhaeq'ae xilnye geefu biq hhae.
Yesu sil vae
45 Naoongl longlmae ae'lye mael xalvuq sandianq fu, milcaeq holtaq'ae haeqvae eiq nahongqlye hhae. 46 Xalvuq sandianq laellye fu, Yesu yotyel haeqheemyel gul'ae, gee: "Yiqlil! Yiqlil! Laqmaq sabageldalniq?" Xi qiq doq e yilsi laoq: "Ngaeq e Momil, ngaeq e Momil, aeqcheekaol ngaeq'ae deelsae laeq lilmaeq?" 47 Tyuqvae haoqtul deelhhei e cholyaeq, gaeq hhei biq hael gee: "Cholyaeq xitaeq Yiqlilyal'ae gul biq hhae!" 48 Cholyaeqhael onglci e qiq hhaeq ki'li kaol caeqmeel mael'ae zilqyel zongljyel hhei, kaol mol'ongq aelkongq mael'ae kaltoq da hheikaol yoqhhaeq'ae baq dol hhei biq. 49 Baeqjyelboq e cholyaeqhael gee: "Qiqlaq doq hhei siq, Yiqlilyal yoqhhaeq'ae jiul lael biq maeqlye fu maoq." 50 Yesu yotyel haeqheemyel qiq doq gul laol, saeq'ol qye'li vae. 51 Qiqlaqmyel, sholhaol vae eechiq e geqchiq haeqpael mael, holtaq ae'lye holhhaq keellye niq pa gapa hhei, milcaeq mael ssu'ni tullaeq, haqlo loongl mael dilbyeq hhei, 52 Kaol fuq'ongl eiq pong'lael vae, haelnaeqmyel yuqxul e senltuqhael e aeqhhaol mael eiq dyeqhoqlal vae. 53 Yesu dyeqhoqlal aeqnaol, yoqhhaeteel fuq'ongl ae'lye duyi, kaol senljyeq milmae heeqmyel vae do'li, kaol haelnaeqmyel cholyaeqhael'ae bi mol hhei vae. 54 Qiqhael (100) cholyaeq e zhiqmoq, kaol yoqhhaeq nyegael Yesu'ae qiqgael fu'qye e cholyaeqhael, milhoho kaol hael puqlael e silqinq mael mol hhei biq laol, zhee gu gil biq'ae, gee: "Yoqhhaeq aeqdilmyel Momil e Yaqyo she!" 55 Haelnaeqmyel cholhae aeqmaehael tyuqvae zhol'ae, gaelmaolsae'lye chifu gil, yoqhhaeteel laoq Ja'lillil ae'lye Yesu'ae cho'lyeq laeq, kaol yoqhhaeq'ae fuqsil lael biq hael'ae; 56 Tyuteel onglci'ae Moqdalla e Maqlilyal, Yaqgel kaol Yoqsel e aeqmae Maqlilyal, kaol Xibiqtail e yaqyo niq nulhhaeq e aeqmae bal zoq hhae.
Yesu yaol fuq'ongl vae baqduqm biq
57 Mqkiq keellael vae, cholmil mael Yoqsel lye gul biq e yoha hamae qiq hhaeq laoq, Yallilmaqtail ae'lye lael hhae, yoqhhaeq eiq Yesu e laqcaq'ae. 58 Cholyaeq xitaeq Biqlado yaol mol li, Yesu e aeqhhaol mael baq laq lye geezaeq biq, kaol Biqlado lye yoqhhaeq'ae baq hhei biq lye moqheilheil gil biq'ae. 59 Yoqsel aeqhhaol mael baq yi laol, sholgaqlye paelpul maellye leeltyeq hhei, 60 Aeqnaol yoqhhaeq yaol aeqyoyoq e fuq'ongl yosheq vae baqduqm deelli biq, fuq'ongl xilmael laoq, yoqhhaeq lye haqlo onglci'ae taqhongq do'li mael ngeelvae. Yoqhhaeq lye haqlo lomae mael fuq'ongl e oheiq vae moqchiq deelsaeq, kaol caiq deelsae hhei wae siq. 61 Moqdalla e Maqlilyal kaol baeqjyelboq e Maqlilyal tyuqvae zhol'ae, fuq'ongl boq'ae pol li myel vae zholgae deelhhei'ae.
Cholyaeqhael Yesu e fuq'ongl mael'ae fu'qye deelhhei gil
62 Aeqnaol qiq nao laoq, paeqgaelsael meeq e naohaeq e dil'el tian'ae, jilsizhangqhael kaol Faqlilsail cholyaeqhael zhol'eeq deelhhei, kaol Biqlado'ae mol lael, 63 Gee: "Yoheeq, ngaeteel laoq cholyaeq'ae cheeqmu e tyutaeq dyeqdeel siq fu gee gol mael nyuqdeel lil siq, gee: 'Suq nao laol, ngael dyeqhoqlal maoq.' 64 Tyulkaol, nol cholyaeqhael'ae dilsan tian keellye fuq'ongl mael haelmeeqlye fu'qye deelhhei lye moqheilheil biq, aeqgael yoqhhaeq e laqcaq lael kaol yoqhhaeq e aeqhhaol mael haoqzaeq yil maeqhe, kaol cholyaeqhael'ae geegaeq yil biq: 'Yoqhhaeq cholsil onglci ae'lye dyeqhoqlal vae.' Xilnye kaollaoq, aeqnaol'ae cheeqmu mael laefuq taq'ae hhael heeq wae." 65 Biqlado gee: "Noteel vae fu'qyezaq e cholyaeq zhol'ae, yil gil, noteel hael zonglkeel ongl maellye haelmeeqlye fu'qye deelhhei." 66 Kaol yoqhhaeteel fu'qyezaq e cholyaeqhael yaol sheeqyil, kaol haqlo mael fengtyeq hhei'laol fuq'ongl mael haelmeeqlye fu'qye deelhhei gil'ae.