Yesu dyeqhoqlal vae
28
Anxiqriq gol hhei'laol, siq nao e laefuq fuqli qiq nao, mqbaebae lael maoq fu, Moqdalla e Maqlilyal kaol baeqjyelboq e Maqlilyal lye gul biq e qiq hhaeq fuq'ongl'ae fu lael. 2 Qiqlaqmyel, milcaeq mael guaeq'ei ssu'ni tul beq laq; Hhaoqsongl e mqmae yosongl qiq hhaeq mqmae ae'lye gaeyi, kaol haqlo mael moqtael hhei, kaol holtaq vae zhol deelhhei kaol'ae. 3 Yoqhhaeq e maduq mael mqmiqmiq laoqmyel hhae, aelhongq mael laoq haeqnyel laoqmyel pul hhae. 4 Fu'qyezaq e cholyaeqhael gu biq kaol saeqzuqzuq gil biq'ae, kaol cholsil laoqmyel wae. 5 Mqmae yosongl cholhae aeqmae'ae gee biq: "Maq gu kael! Ngael noteel laoq shiqziljal mael'ae diqcheeq biq e Yesu yaol saelpo hhae lye loq lil. 6 Yoqhhaeq saeqvae maeq zhol'ae, yoqhhaeq gee gol laoqmyel, yoqhhaeq dyeqhoqlal wae. Noteel lael gil! Yoqhhaeq yaol baqdeel hhei myel vae fu lael gil. 7 Yoqhhaeq e laqcaqhael'ae wae geegaeq yil biq, yoqhhaeq cholsil onglci ae'lye dyeqhoqlal vae, kaol noteel e laefuqmyel Ja'lillil vae keelyil maoqlye hhae, kaol noteel yoqhhaeq yaol tyuqvae lye hhae mol'ae. Naelhaeq gil! Ngael noteel'ae geegaeq biq wae." 8 Kaol cholhae aeqmaehael fuq'ongl ae'lye nae'naemyel deelsae hhei vae, gu eiq gu biq, hhaol eiq zhee hhaol biq'ae, ki yil kaol yoqhhaeq e laqcaqhael'ae geegaeq yil biq. 9 Qiqlaqmyel, Yesu yoqhhaeteel boq'ae deel laeq, gee: "Neesaelhhae mael noteel'ae yo'li biq!" Kaol yoqhhaeteel deel niqli kaol yoqhhaeq e aeqkeel mael'ae baqtyeq deelhhei kaol yoqhhaeq'ae vuqduqtongq biq. 10 Yesu yoqhhaeteel'ae gee biq: "Maq gu gil kael! Noteel ngaeq e aqsseq aeqnilhael'ae Ja'lillil vae yil, tyuqvae lye noteel ngaeq yaol hhae mol'ae lye geegaeq yil gil biq."Jilsizhangqhael zaqgiqgiq
11 Yoqhhaeteel yil fu, fu'qyezaq e cholyaeq mee'nae hhaeq milmae heeqmyel vae do'li, kaol peqlal e silqinq mael gilzuqmyel jilsizhangqhael'ae geegaeq hhei biq. 12 Jilsizhangqhael kaol zhangqlaoqhael geedazaq gil, kaol dangbinkei hael'ae dyuqbaq haelnaeqmyel heilmoq hhei biq, 13 Gee: "Noteel xilnye gee maoqhhae: 'Mqkiq, ngaeteel yuqxul fu, yoqhhaeq e laqcaqhael lael kaol yoqhhaeq yaol haoqzaeq yil vae.' 14 Saeziq xilmael zongqdu'ae gaeq hhei biq kaollaoq, ngaeteel yoqhhaeq'ae haelmeeqlye gee biq hhaeq, kaol noteel'ae qiqgiq maeq zongl laelkiq'ae." 15 Dangbinkei hael dyuqbaq mael heilzaeq hhei vae, kaol yoqhhaeteel'ae moqheilheil gil biq laoqmyel zongl yil gil vae. Saeziq xilmael yaeqmeel keellye, Yoqtail cholyaeqhael onglci'ae gee bonggaebyel wae siq.
Yesu laqcaqhael'ae moqheilheil gil biq mael
16 Laqcaq qyelqiq hhaeq Ja'lillil vae yil, Yesu yoqhhaeteel'ae yil lye moqheilheil biq e geeqzhoq vae keellael. 17 Yoqhhaeteel Yesu yaol mol hhei biq laol, yoqhhaeq'ae vuqduqtongq biq, ngeelfeiq, huaiqyiq biq e cholyaeq zhol wae siq. 18 Yesu deelniq laeq, kaol yoqhhaeteel'ae gee biq: "Mqmae milcaeq e gilzuqmyel laqtaqhael ngaeq'ae biq hhei laq wae. 19 Tyulkaol, noteel yil maoqhhae, kaol milcaeq taq'ae haelzhol minqcuq yaol ngaeq e laqcaq bi geiq lal maoqhhae, kaol aeqdae, Yaqyo, kaol senllinq e cholmil maellye yoqhhaeteel'ae shelxiqzongl biq maoqhhae, 20 Ngael noteel'ae moqheil hael heil biq hael, yoqhhaeteel'ae gilzuqmyel zongl gaeyil lye geemyeq biq maoqhhae. Naelhaeq gil, shilgail e aeqnaol naolli e qiq nao keellye, ngael naochomyel noteel nyegael qiqgael baelzhol lil."