Yesu dyeqhoqlal vae
16
Anxiqriq e aeqnaol, Moqdalla e Maqlilyal, Yaqgel e aeqmae Maqlilyal kaol Saqloqmiq xianggao vul hheikaol, Yesu'ae xyecheeq yil biq maoqlye hhae. 2 Liqbailtian e mqshoq naqlye, neelmae zhoq du'lal fu, yoqhhaeteel fuq'ongl'ae keellael. 3 Qiqhhaeq qiqhhaeq'ae geegaeq gil: "Aeqsul aedeeteel'ae fuq'ongl oheiq e haqlo mael bi bael moqtael laeq?" 4 Yoqhhaeteel vuqduq baqtul hheikaol fu laol, haqlo mael leeqpong aeqvae lye mol hhei biq. Haqlo tyu qiq siq laoq zhee heeq hhae. 5 Yoqhhaeteel fuq'ongl'ae do'li, yaqyoyaeq qiq hhaeq poljye bachi'lye dum hhei myel, laqsseqboq'ae zhol deelhhei mol hhei biq, kaol gaqmaqzuq li gil biq'ae. 6 Yaqyoyaeq tyutaeq yoqhhaeteel'ae gee biq: "Maq gu gil kael! Noteel saelpo e shiqziljal mael'ae diqcheeq biq e Naqsa'lel cholyaeq Yesu laoq, saeqvae maeq zhol vae, dyeqhoqlal aeqwae! Fu! Saeqvae laoq yoqhhaeteel lye yoqhhaeq yaol baqduqm biq e milcaeq'ae. 7 Noteel yoqhhaeq e laqcaqhael kaol Biqdeq'ae geegaeq yil gil biq, Yesu noteel'ae laefuq geedu laq laoqmyel, noteel e laefuqmyel Ja'lillil vae keelli maoqlye hhae, kaol noteel tyuqvae lye yoqhhaeq yaol hhae mol'ae." 8 Yoqhhaeteel gaqmaqzuq gil biq kaol saeqzuqzuq gil biq'ae, fuq'ongl ae'lye zhoq duyi laol kisae hhei vae. Yoqhhaeteel gu gil biq, kaol cholyaeq'ae qiqgiq eiq maeq geedu gil biq'ae.Yesu Moqdalla e Maqlilyal'ae bi molli
9 Liqbailtian e mqshoq, Yesu dyeqhoqlal vae. Yoqhhaeq Moqdalla e Maqlilyal'ae laefuqmyel bi molli. Yilkaefu yoqhhaeq lye Maqlilyal e aeqhhaol ae'lye niqhaeq siq hhaeq lyeqdu yo hhae. 10 Yoqhhaeq laoq Yesu nyegael haeqfu eiq qiqgael baelzhol e cholyaeqhael'ae geegaeq gil biq, tyuqfu qiqlaq'ae yoqhhaeteel nyuqsaeq biq kaol nyul gil'ae. 11 Yoqhhaeteel Yesu dyeqhoqlal vae lye mael gaeq hhei biq, Maqlilyal eiq yoqhhaeq yaol mol vae, ngeelfeiq, yoqhhaeteel maeq xiangxinl gil biq'ae.
Yesu aeqyoyoq yaol laqcaq niq nulhhaeq'ae bi molli
12 Aeqnaol, laqcaqhael onglci e niq nulhhaeq pusiq vae yil gil, kaol gaelmae deel gil fu, Yesu laefuq laoqmyel maeq dul myel peqlal kaol yoqhhaeteel'ae bi molli. 13 Yoqhhaeteel baeqjyelboq e cholyaeqhael'ae geegaeq yil biq, ngeelfeiq, tyuteel eiq maeq xiangxinl gil biq'ae.
Yesu shiqtuq'ae fuqyin mael geegaeq yil lye moqheilheil gil biq
14 Aeqnaol, shiqtuq qyelqiq hhaeq aelhoq zaeq fu, Yesu yoqhhaeteel'ae bi molli, yoqhhaeteel yoqhhaeq dyeqhoqlal e aeqnaol yoqhhaeq yaol mol yo e cholyaeqhael'ae maeq xiangxinl biq'ae lye kaol, yoqhhaeteel maeq xiangxinl kaol neehaha'ae lye gaezaeq gil biq. 15 Yesu yoqhhaeteel'ae gee biq: "Noteel mqmae holhhaq'ae haeqvae eiq keelyil, kaol haelzhol cholyaeq'ae fuqyin geegaeq yil gil biq maoqhhae. 16 Xiangxinl kaol shelxiq e cholyaeqhael laoq hha deqjiul'ae; maeq xiangxinl e cholyaeqhael'ae laoq, golsiq za'ae lye hhae bi gee ngeelvae. 17 Xiangxinl e cholyaeqhael laoq shenqjiq zongl du hhei ongl'ae. Yoqhhaeteel ngaeq e cholmil maellye niqhaeq lyeqdu, kaol baeqjyelboq minqcuq e saeziqhael gee kiq'ae. 18 Yoqhhaeteel aqlaq maellye oqhol niq, naol sil laelkiq e aeqchee naeciq dol do hhei kaol'eiq maeq sil laelkiq, cholnael vae aqlaq maellye so hhei biq laol aeqdilmyel meeqsholyil kiq'ae."
Momil lye Yesu yaol mqmae taq'ae sheeq da'li vae
19 Hhaoqsongl Yesu laqcaqhael'ae saeziq gee byel biq laol, yoqhhaeq yaol mqmae taq'ae sheeq da'li biq vae, kaol Momil e laqsseqboq'ae zhol deelhhei. 20 Laqcaqhael duyil kaol haeqvae lael'ee myel milcaeq vae fuqyin geegaeq yil gil hhae. Hhaoqsongl yoqhhaeteel'ae baelzongl biq, kaol shenqjiq ae'lye yoqhhaeteel geegaeq e Momil e saeziq mael laoq hoq'ae lye zenlminq hhae.