11
Yesu laoq laqcaq qyelniq hhaeq'ae moqheilheil byel biq laol, tyuqvae lye deelsae hhei, kaol maeq qiqsheel e milmae heeqmyel vae fuqyin geegaeq yil, kaol cholyaeqhael'ae geemyeq biq.Shelxiqzongl e Yoqhanl e laqcaqhael Yesu'ae mol lael
2 Yoqhanl laoqgaiqkei laoqhaol ae'lye Jidu haelzongl e silqinq mael gaeq hhei biq, kaol yoqhhaeq e laqcaq yaol moqheilheil du hhei, 3 Yesu'ae naelhaeq biq: "Aeqgael lael maoqlye e tyutaeq nol lilmaeq? Paelsilmyel ngaeteel baeqjyelboq e qiq hhaeq yaol doq siq laeq?" 4 Yesu yoqhhaeteel'ae geehoq biq: "Noteel yil, kaol haelmol hael, haelgaeq hael Yoqhanl'ae geedu hoqli biq: 5 Mabyeqhael mol congl lael vae, keeldilhael gaelmae deel yilkiq vae, maqfeng nael biq e cholyaeqhael meeqsholyil vae, naeqboqhael gaeq congl lael vae, cholsilhael dyeqhoqlal vae, saeqyaeqhael'ae fuqyin gaeq hhei biq vae. 6 Aeqsul ngaeq gae'lye maeq jye'leeq kaollaoq, geeqlongq meeq vae!" 7 Yoqhhaeteel zhoq deel hhei'laol, Yesu cholyaeqhael'ae Yoqhanl'ae gee keelli, gee: "Laefuq noteel diqsheelleeldye vae aeqchee fu yil gil lilmaeq? Mol'ongq mael zaeqxil lye bo ni mael fu yil gil lilmaeq? 8 Noteel duyil mael laoq, aeqdilmyel aeqchee fu yil gil maoqlye lilmaeq? Aelhongq yomeeq dum hhei e cholyaeq'ae fu laeq? Aelhongq yomeeq dum hhei e cholyaeq laoq, zongmae e laoqhaol vae zhol hhae. 9 Noteel duyil mael laoq, aeqdilmyel aeqchee fu yil gil maoqlye lilmaeq? Xianzhi laeq? Ngeel'ae, ngael noteel'ae geegaeq laeqngeel, yoqhhaeq xianzhi taq'ae haelnaeqmyel hhael heeq hhae. 10 Cholyaeq xitaeq laoq Momil e Suqhhaq taq'ae cuda deelhhei e:
''Naelhaeq gil, ngael ngaeq e mqmae yosongl yaol,
noq e laefuqmyel moqheilheil du hhei maoqlye lil,
yoqhhaeq noq e gaelmae mael,
laefuqmyel pasael deelhhei maoqlye hhae.'
11 Ngael aeqdilmyel noteel'ae geegaeq gil laeqngeel, haeqmiyaeq lye bo hhei e cholyaeqhael onglci'ae, shelxiqzongl e Yoqhanl nyedullye yoheeq qiq hhaeq eiq maeq zhol'ae; ngeelfeiq, Momil e Goqja vae hhaelnil nilli e qiq hhaeq laoq yoqhhaeq taq'ae hhael heeq'ae. 12 Shelxiqzongl e Yoqhanl e naohaeq ae'lye mael yaeqmeel keellye, Mqmae Goqja vae guaeq'ei diq gil biq hhae, zhee henq hael lye Mqmae Goqja mael diq yinqzaeq yil vae. 13 Yoqhanl e laefuq'ae xianzhihael, kaol lilfaq mael taq'ae cu deelhhei mael xihael gee gol vae. 14 Noteel naelhaeq nae kaollaoq, cholyaeq xitaeq laoq aeqgael lael maoqlye e Yiqlilyal ngeelvae. 15 Naeqbol gaeq congl e cholyaeq laoq, aeqdilmyel naelhaeq maoqhhae!
16 "Ngael yaeqmeel dyeqdeel e cholyaeqhael yaol aeqchee mael nyedullye dul'ae lye gee laeq? Yoqhhaeteel laoq gaiziq vae zhol deelhhei e yaeqguqhael baeqjyelboq e yaeqguqhael'ae gul biq laoqmyel hhae, gee:
17 'Ngael noteel'ae tilliltoqloq bo gaeq gil biq,
noteel yinqjil maeq dil gil;
ngaeteel nyulkoqzheq fu,
noteel neeto oheiq mael'ae maeq diq hoq.'
18 Yoqhanl lael fu, maeq zaeq, maeq dol, cholyaeqhael yoqhhaeq'ae niqhaeq guqzaeq li biq hhae lye gee'ae; 19 Cholyaeq Yaqyo lael fu, zaeq eiq zaeq, dol eiq dol, yoqhhaeteel laoq cholyaeq xitaeq zaeq mael'ae zhee hhaol biq, zilbaeq zhee dol goq biq, shuil shezaeq e cholyaeqhael kaol golsiq za e cholyaeqhael e yelchoq'ae lye gee hhae. Ngeelfeiq, geel mael laoq geel e aelsiq maellye zenlminq du hhei vae."
Neemae maeq paellael nae e milmae heeqmyelhael
20 Tyuqfu, Yesu qiqgael laelgael e milmae heeqmyel vae haelnaeqmyel e shenqjiq zongl du hhei. Milmae heeqmyel e cholyaeqhael neemae maeq paellael nae gae'lye, yoqhhaeq milmae heeqmyel e tyuhael'ae gaezaeq biq, gee: 21 "Ge'laxunl o! Noq'ae zaihuol za vae! Boqsaildal o! Noq'ae zaihuol za vae! Ngael noteel tyuqvae shenqjiq zongl gol aeqwae, shenqjiq xihael Tui'loq kaol Xidunl vae zongl kaollaoq, yoqhhaeteel laoq haeqfu'ae'lye ziq e haeqpael pyeqcheeq da hheikaol haeqlyel mael vuqduq mael'ae beiqxeiq da hhei, kaol neemae paellael vae. 22 Ngeelfeiq, ngael noteel'ae geegaeq laeqngeel, shenqpanl e naohaeq'ae, Tui'loq kaol Xidunl e cholyaeqhael zityeq deelhhei mael, noteel taq'ae hhael yael'ae! 23 Jabaiqnongq o!
Nol laoq mqmae vae deiq da laq hhae lye kei laeq hhaemaeq?
Maeqngeel'ae! Nol laoq mil'oq'ae hhae doyil hhae!
Noq e tyuqvae haelzongl e shenqjiq hael, Soqdomaq vae zongl kaollaoq, yoqhhaeq laoq yaeqnao keellye zadeel wae siq. 24 Ngeelfeiq, ngael noteel'ae geegaeq laeqngeel, shenqpanl e naohaeq'ae, Soqdomaq e cholyaeqhael zityeq deelhhei mael, noteel taq'ae hhael yael'ae!"
Ngaeq'ae saeqvae lael
25 Tyuqfu, Yesu gee: "Aeqdae o, mqmae milcaeq e Hhaoqsongl, ngael noq'ae meeqyaevae lye gee lil! Noq lye silqinq xihael geel kaol suqhhaq zhee loq e cholyaeq'ae zonglhhaq biq, ngeelfeiq, yaeqguq guqyaeq'ae qiqshil hhei biq kaol'ae. 26 Aeqdae o! Ngeel'ae, xilmael laoq noq e neezae'lael mael ngeelvae. 27 Halzahael gilzuqmyel ngaedae lye ngaeq'ae heilmoq hhei laeq hhae; aeqdae maoqlaol, Yaqyo aeqsul'ae lye qiq hhaeq eiq maeq loq'ae; Yaqyo kaol Yaqyo qiqshil nae e cholyaeqhael maoqlaol, aeqdae aeqsul'ae lye qiq hhaeq eiq maeq loq'ae." 28 Duqhee'lye aeq'yel chengdyeqlye pi hhei e cholyaeqhael gilzuqmyel ngaeq'ae saeqvae lael gil, ngael noteel'ae hhaeqnaeq bi naeq gil laeqngeel. 29 Ngaeq e neemae laoq naoqyae'lye hhae, maeq dilqeizaeq yil, kaol noteel ngaeq e nuqkeeq mael pi maoqhhae, kaol ngaeq'ae xoqxiq gil maoqhhae; xilnye laol, noteel e neemae mael paelsuqlye wae. 30 Ngaeq e nuqkeeq mael laoq yael hhae, kaol ngaeq e aeq'yel mael laoq paelsuqlye kaol'ae."