Anxiqriq e Hhaoqsongl
12
Tyuqfu, Yesu anxiqriq'ae meqziq haeldye ae'lye deelpol duyil. Yoqhhaeq e laqcaqhael oqma myeq biq, kaol meqziq e aelcael mael che hheikaol zaeq gil'ae. 2 Faqlilsail cholyaeq mol hhei biq laol, Yesu'ae gee biq: "Fu hhei, noq e laqcaqhael anxiqriq'ae maeq hhae zongl e silqinq mael zongl vae." 3 Yesu yoqhhaeteel'ae gee biq: "Dalweil kaol yoqhhaeq'ae cho'lyeq e cholyaeqhael oqma myeq biq fu haelzongl e silqinq mael, noteel maeq duq gol yil maeq? 4 Yoqhhaeq haelmillyekaol Momil e laoqhaol vae do'li, kaol Momil'ae heel biq e aqba mael zaeq hhaemaeq? Aqba xilmael jilsi maoqlaol, yoqhhaeq kaol yoqhhaeq'ae cho'lyeq e cholyaeqhael maeq hhae zaeq'ae. 5 Zail laoq, lilfaq taq'ae cu deelhhei, anxiqriq fu, jilsi sholhaol vae lye anxiqriq'ae maeq hhae zongl mael zongl yo feiq, golsiq za'ae lye maeq suanl'ae, xilmael noteel maeq duq gol yil maeq? 6 Ngeelfeiq, ngael noteel'ae geegaeq laeqngeel, sholhaol taq'ae hhael heeq e qiq hhaeq saeqvae zhol hhae. 7 'Ngael hhaoqsaeqsaeq mael hhaol yae, zaelheel heel mael maeq hhaol yae.' Noteel saeziq xilmael e yilsi mael loq kaollaoq, golsiq maqza hael'ae golsiq za hhae lye maeq gee wae. 8 Cholyaeq Yaqyo laoq anxiqriq e Hhaoqsongl kaol'ae."Yesu lye aqlaq kuga e cholyaeq yaol zonglmeeq biq
9 Yesu tyuqvae milcaeq ae'lye deelsae hhei, kaol Yoqtail cholyaeq e huiltangq vae do'li; 10 Tyuqvae aqlaq qiqboq kuga e cholyaeq qiq hhaeq zhol'ae. Cholyaeq Yesu'ae konglgaol biq maoqlyekaol Yesu'ae naelhaeq biq: "Anxiqriq vae naelgol zonglmeeq hhaeq maeq maeq hhaeq maeq?" 11 Yesu yoqhhaeteel'ae gee biq: "Noteel onglci'ae aeqsul e aqciq qiq yaeq mael anxiqriq fu duqhongq vae leeqdo biq kaollaoq, aqciq mael maeq eetyeq biq, kaol maeq ee da hoq hhei biq yil maeq? 12 Cholyaeq aqciq taq'ae hhael pyuqjyeqjyeq'ae! Tyulkaol, anxiqriq vae meeq e silqinq zongl mael laoq hhaeq'ae." 13 Tyulkaol, cholyaeq tyutaeq'ae gee biq: "Aqlaq tyuqdu hhei!" Yoqhhaeq aqlaq zhoq tyuqdu hhei'laol, aqlaq mael laefuq laoqmyel peqhoqlal vae, yulboq laoqmyel wae. 14 Faqlilsail cholyaeqhael duyil, kaol Yesu yaol haelmillye zonglsil biq maoqlye geedazaq gil.
Momil lye saelpodu hhei e yaqhacheqzaq e cholyaeq
15 Yesu loq hhei biq laol, tyuqvae lye deelsae hhei vae, haelnaeqmyel cholyaeq qiq miq yoqhhaeq'ae cho'lyeq biq. Kaol yoqhhaeq lye gilzuqmyel cholnaelhael zonglmeeq byel biq vae, 16 Kaol yoqhhaeteel'ae yoqhhaeq yaol haeq geegaeq duyil lye aeqlyeq maeq lyeq myel gee biq'ae. 17 Xilmael laoq Yiqsailyal xianzhi gee e saeziq mael peqlal vae, gee:
18 "Naelhaeq gil, ngaeq lye saelpodu hhei e yaqhacheqzaq e cholyaeq xitaeq laoq,
ngael gaeq e, neemae onglci'ae zhee hhaol e qiq hhaeq'ae;
ngael ngaeq e yohael mael yoqhhaeq'ae biq hhei biq maoq,
yoqhhaeq saeqsaeldye mael baeqjyelboq minqcuq vae,
geegaeq hhei biq maoqlye hhae.
19 Yoqhhaeq maeq deiqgae,
yotyel ha'lye maeq gul,
gaiziq vae lye cholyaeq qiq hhaeq eiq yoqhhaeq e yotyel mael maeq gaeq'ae.
20 Ssekyuq biq e mol'ongq, yoqhhaeq maq heiqqye biq'ae,
myeyil goqbiq vae e aeqzaeq doq mael, yoqhhaeq maeq bo sil biq'ae,
yoqhhaeq lye saeqsaeldye mael bi yinqzaeq fu keellye xilnye hhae.
21 Baeqjyelboq minqcuq e cholyaeqhael,
yoqhhaeq e cholmil mael'ae chifu deelzaeq hhei maoqlye hhae."
Faqlilsail cholyaeq Yesu'ae Byeqxibuq'ae lye gee biq
22 Tyuqfu, cholyaeq lye niqhaeq guqzaeq li biq e cholyaeq qiq hhaeq yaol, Yesu e tyuqvae sheeqlaeq biq, cholyaeq xitaeq laoq mabyeqbyeq biq kaol yaqbaba biq hhae, Yesu yoqhhaeq'ae zonglmeeq biq, kaol yaqba saeziq gee kiq lael vae, kaol mol congl laelkiq vae. 23 Cholyaeqhael gaqmaqzuq li gil biq'ae, gee: "Xitaeq laoq Dalweil e Yaqyo maeqngeel maeq?" 24 Ngeelfeiq, Faqlilsail cholyaeqhael gaeq hhei biq laol, gee: "Cholyaeq xitaeq niqhaeq zongmae Byeqxibuq'ae kaolzaeq maeqngeel kaollaoq, niqhaeq maeq lyeqdu ongl'ae." 25 Yesu laoq yoqhhaeteel nyuq mael loq'ae, kaol yoqhhaeteel'ae gee biq: "Goqja qiqgael cholyaeqhael aeqyoteel aeqyoteel myel zonglgae kaollaoq, goqja xilmael laoq cholgulcillye peqyil hhei ngeelvae; milmae heeqmyel qiqgael e cholyaeqhael, paelsilmyel qiq haoq toq e cholyaeqhael aeqyoteel aeqyoteel myel zonglgae kaollaoq, maeq haoqtul deel ongl'ae. 26 Saqdanl laoq Saqdanl'ae lyeqdu kaollaoq, aeqyoteel aeqyoteel myel zonglgae ngeelvae, yoqhhaeq e goqja mael haelmillyekaol haoqtul deel ongl laeq? 27 Ngael Byeqxibuq'ae kaolzaeq kaol niqhaeq lyeqdu kaollaoq, noteel'ae cho'lyeq e cholyaeq xihael laoq aeqsul'ae kaolzaeq kaol niqhaeq lyeqdu hhaemaeq? Xilnye laol, yoqhhaeteel noteel e shenqpanl e zhiqmoq peqyil hhei ngeelvae. 28 Ngael Momil e yohael'ae kaolzaeq kaol niqhaeq lyeqdu kaollaoq, Momil e Goqja laoq noteel'ae yo'lael wae. 29 Cholyaeq haelmillye aqha yobo toq'ae do'li kaol yoqhhaeq e moqgoq mael diqkoqzaeq li laeq? Xilnye zongl maoqlye kaollaoq, aqha yobo tyutaeq yaol laefuqmyel kaltoq hhei kaolmaoqlaol, yoqhhaetoq'ae maeq diqkoqzaeq li ongl'ae. 30 Ngaeq nyegael qiqgael maeq haoqtul hael laoq, ngaeq'ae diqqye ngeelvae; ngaeq nyegael qiqgael maeq gul'eeq hael laoq, baelyaelmyel lyeqci ngeelvae. 31 Tyulkaol, ngael noteel'ae geegaeq laeqngeel, cholyaeqhael e gilzuqmyel golsiq mael kaol xyelduq e saeziq mael, ngael yoqhhaeteel'ae shelmianq biq maoq, ngeelfeiq, senllinq'ae xyelduq laol, qiqzael eiq maeq hhae shelmianq'ae. 32 Cholyaeq Yaqyo'ae saeziq maellye geekyuq kaollaoq, hhae bi shelmianq siq. Ngeelfeiq, senllinq'ae saeziq maellye geekyuq biq kaollaoq, xi qiqyil kaol aeqgael e shilgail'ae qiqzael eiq maeq hhae bi shelmianq'ae."
Aelbol kaol aelsiq
33 "Noteel laoq aelbol mael meeq laol, aelsiq mael eiq meeq'ae lye loq'ae; aelbol mael maeqmeeq laol, aelsiq mael eiq maeqmeeq'ae lye yol loq'ae; aelsiq mael'ae fu hhei'laol aelbol mael haelmillye hhae lye hhae loq kaol'ae. 34 Duq zoq e oqhol lye bo hhei hael o, noteel laoq duqlaq e cholyaeq'ae, haelmillyekaol meeq e saeziq geedu hhei kiq laeq? Neemae mael'ae bong'lye zoq hael, myeqbongq mael'ae geedu hhei kaol'ae. 35 Neemae meeq e cholyaeq laoq yoqhhaeq e taeq deelhhei e meeq maellye meeq e zongl du hhei; duqlaq e cholyaeq laoq yoqhhaeq e taeq deelhhei e duqlaq maellye duqlaq e zongl du hhei. 36 Ngael noteel'ae geegaeq laeqngeel, aeqsul doqcaqcaq laol, shenqpanl e naohaeq vae, hae qiq doq eiq bi geedu hhei maoqlye hhae; 37 Noq e saeziq maellye noq'ae gongyil e cholyaeq'ae lye gul biq maoqlye hhae, kaol noq e saeziq maellye eiq noq'ae golsiq za'ae lye gee maoqlye kaol'ae."
Yonaq e shenqjiq
38 Tyuqfu, Momil e saeziq mael loq e laqkiq kaol Faqlilsail cholyaeq mee'nae hhaeq Yesu'ae gee biq: "Laoqsi, ngaeteel'ae shenqjiq qiq mal zonglfu hhei laeq lye noq'ae geezaeq lil." 39 Yesu yoqhhaeteel'ae geehoq biq: "Duqlaq e xinqlalmyel e yaeqmeel dyeqdeel e cholyaeqhael shenqjiq fu maoqlye geezaeq gil, Yonaq xianzhi e shenqjiq mael maoqlaol, yoqhhaeteel'ae shenqjiq maeq bi fu vae. 40 Yonaq ngaeqdyel dyelmae oqma onglci'ae suq nao suq mil zhol, qiqsheel ngeelvae, Cholyaeq Yaqyo eiq milcaeq holhhaq'ae suq nao suq mil zhol maoqlye hhae. 41 Niqniqvei e cholyaeqhael Yonaq e saeziq mael naelhaeq kaol neemae paellael vae. Shenqpanl fu, Niqniqvei laoq yaeqmeel dyeqdeel e cholyaeqhael nyegael qiqgael bael dyeqhoqlal ngeelvae, kaol yaeqmeel dyeqdeel e cholyaeqhael'ae golsiq za'ae lye zhiqmoqkae biq ngeelvae. Naelhaeq gil, Yonaq taq'ae hhael heeq e qiq hhaeq saeqvae zhol hhae! 42 Yilkaeaeqnao, Nanqfang e Haeqmiyaeq Zongmaea mildongq miljyel ae'lye Soqloqmenq e geel e saeziq mael naelhaeq lael vae. Tyulkaol, shenqpanl fu, yoqhhaeq laoq yaeqmeel dyeqdeel e cholyaeqhael nyegael qiqgael bael dyeqhoqlal maoqlye hhae, kaol yoqhhaeteel'ae golsiq za'ae lye zhiqmoqkae biq ngeelvae. Naelhaeq gil, Soqloqmenq taq'ae hhael heeq e qiq hhaeq saeqvae zhol hhae!"
Maeqshol e yohael deelsae hhei'laol yol hoqlal
43 "Maeqshol e yohael mael cholyaeq e aeqhhaol ae'lye deelsae hhei vae, eelcuq maqza myel'ae deelpudeelda myel deel, kaol haeqvae zholhhael za maeq lye saelpo, ngeelfeiq, maeq saelpopuq hhei ongl biq'ae. 44 Tyulkaol, yoqhhaeq gee: 'Ngael laefuq deelsae e laoqhaol vae hoqli maoq.' Yoqhhaeq keellael laol, onglci'ae qiqgiq maqza, sholgaqlye yashol deelhhei, kaol haelmeeqlye zonglzhi deelhhei mol hhei biq, 45 Kaol yoqhhaeq taq'ae hhael duqlaq myel baeqjyelboq maeqshol e yohael siq hhaeq sheeqhoqlaeq, do'li kaol gilzuqmyel tyuqvae zholgae hhei. Aeqnaol cholyaeq tyutaeq laefuq taq'ae hhael beeqzaeq vae. Duqlaq e yaeqmeel dyeqdeel e cholyaeqhael eiq xilnye ngeel maoqlye hhae."
Yesu e aeqmae kaol aeqnilhael
46 Yesu cholyaeqhael'ae saeziq gee'naeq biq siq fu, yoqhhaeq e aeqmae kaol yoqhhaeq e aeqnilhael nilduboq'ae haoqtul deelhhei, kaol yoqhhaeq'ae saeziq gee'naeq goq biq hhae. 47 Cholyaeq Yesu'ae geegaeq lael biq: "Fu hhei! Noq e aeqmae kaol aeqnilhael nilduboq'ae haoqtul deelhhei hhae, noq nyegael saeziq gee'naeq goq biq hhae." 48 Ngeelfeiq, yoqhhaeq tyutaeq'ae geehoq biq, gee: "Aeqsul ngaeq e aeqmae maeq? Aeqsul ngaeq e aqsseq aeqnilhael maeq?" 49 Tyulkaol, yoqhhaeq laqcaqhael'ae nyultyuqtyuq deelhhei kaol gee: "Fu gil, ngaeq e aeqmae, ngaeq e aqsseq aeqnilhael! 50 Ngaeq e mqmae Aeqdae e zhiqyil laoqmyel zongl yil e cholyaeq laoq, ngaeq e aqsseq aeqnilhael, aelbae aeqnilhael, kaol aeqmae ngeelvae."